gl_ES
Tempo Malpica de Bergantiños
Martes 13°
Mércores 13°
Xoves 13°
tiempo.com   +info
  1.  
  2. ACTUALIDADE

ACTUALIDADE

6Xuñ 2019

Case 200 persoas participaron no Ecomuseo do Forno do Forte nas actividades da campaña “Hola cerámica”

hola ceramica 2

Un total de 194 persoas participaron a fin de semana pasada nas actividades incluídas na campaña ¡Hola cerámica!, unha iniciativa que se desenvolveu nos concellos adheridos á Asociación Española de Cidades da Cerámica (AECC) coa finalidade achegar a cerámica a un público cada vez máis amplo.

Visitas guiadas, demostracións do oleiro no torno e obradoiros infantís centraron a atención do público que se achegou ata o Ecomuseo do Forno do Forte, e que realizou unha valoración moi positiva da experiencia.

31Mai 2019

Malpica será unha das sedes da Campaña de Vela da Deputación da Coruña

campaña_vela_2019

Un total de 240 nenas e nenos da provincia da Coruña participarán este verán na Campaña de Vela da Deputación. Malpica será unha das sedes. O curso que se levará a cabo no noso concello celebrarase entre o 22 e o 26 de xullo. O prazo de inscrición estará aberto a partir do luns 3 de xuño.

A Campaña de Vela vai dirixida a nenos e nenas de 9 a 18 anos da comarca de Bergantiños. Poden formalizar a inscrición no seu concello, entregando a ficha de inscrición que pode descargarse da páxina web da Deputación da Coruña (www.dacoruna.gal/deportes), debidamente cumprimentada e asinada polos pais ou titores dos solicitantes. A cota de inscrición será de 25 euros e é obrigatorio saber nadar.

Máis información: campaña_vela

31Mai 2019

O Certame de Poesía Erótica Illas Sisargas cumpre 14 anos como único do seu xénero en España

IMG_0044

Eduardo Parga e Paco de Tano presentaron o certame

O Certame de Poesía Erótica Illas Sisargas é único e quere seguir séndoo. “Hai moitos concellos e entidades que convocan certames de poesía, pero o noso é único en España”, apuntou o presidente da Asociación Cultural Caldeirón, Francisco Quiroga “Paco de Tano”, na presentación da 14ª edición. No acto estivo acompañado polo alcalde, Eduardo Parga, ao que agradeceu o apoio do Concello de Malpica ano tras ano e a implicación persoal do alcalde.

Caldeirón volve a contar unha vez máis coa colaboración do Concello de Malpica na organización do certame, que nas últimas edicións xa se move arredor das 20 obras a concurso. O prazo para participar nesta edición xa está aberto. Os/as autores/as interesados/as poden enviar os seus orixinais ata o 30 de setembro, este ano coa novidade de que deberán facelo en formato pdf e vía correo electrónico, ao enderezo premio@caldeiron.org.

O Concello de Malpica financia a edición da obra gañadora e o premio, dotado con 1.000 euros.

Relación de gañadores das edicións anteriores:

  1. “Arredor do teu corpo”, Antonio García Teijeiro
  2. “Baile Átha Cliath”, Alberte Momán
  3. “Xoguetes póstumos”, Enma Pedreira
  4. “Rúa da cancela”, Eli Ríos e Eduardo Estévez
  5. “Amantes”, María Lado
  6. “Carnia Haikai”, Elvira Riveiro
  7. “Chamádeme Eva”, Mercedes Leobalde
  8. “Dominio público”, Ramón Neto
  9. “O episodio”, Verónica Martínez Delgado e Alberte Momán
  10. “A razón do perverso”, Mário J. Herrero Valeiro
  11. “O home invisíbel”, Xabier Queipo
  12. “Diáspora de amor balea”, Andrea Nunes Brións e María Rosendo
  13. “Marco Livornio”, Mario Regueira

Descarga as bases aquí bases premio illas sisargas 2019 (2 pax)

29Mai 2019

O Ecomuseo Forno do Forte participa esta fin de semana nunha campaña de promoción da olería de ámbito internacional

hola ceramica

O Ecomuseo Forno do Forte participa na campaña ¡Hola cerámica!, unha iniciativa que se desenvolve nos concellos adheridos á Asociación Española de Cidades da Cerámica (AECC) e que ten como finalidade achegar a cerámica a un público cada vez máis amplo. A iniciativa, de ámbito internacional, naceu en Italia no ano 2015, e dende entón vai a máis en cada edición.

Rutas, xornadas de portas abertas, talleres, demostracións no torno, exposicións, xogos tradicionais, charlas, masterclasses e visitas guiadas son algunhas das actividades que se desenvolverán os días 31 de maio e 1 e 2 de xuño nas dez localidades de toda España, na súa maior parte de Cataluña e a zona de Levante, que participan na experiencia. Buño será a única representante galega.

A proposta do Ecomuseo Forno do Forte inclúe tres actividades:

  • Vive a olería. Visitas guiadas ao Ecomuseo Forno do Forte, onde o público pode ver a tecnoloxía e o modo de vida tradicional dos oleiros. O conxunto etnográfico está formado polas antigas casas-talleres, forno, cabanote e cabazo, e ademais amosa unha ampla colección de pezas históricas e tradicionais, xunto co traballo dun oleiro en vivo.
  • Olería en vivo. Demostracións do oleiro no torno.
  • Elabora a túa cunca. Os visitantes maiores de 12 anos poderán sentar ao torno e aprender a elaborar unha peza sinxela coa axuda do oleiro do ecomuseo.

As tres actividades son gratuítas e desenvolveranse o venres e o sábado de 11.00 a 14.00 e de 16.00 a 19.00 horas, e o domingo, de 10.00 a 14.00 horas.

27Abr 2019

Leilía, De Vacas, Xosé Lois Romero & Aliboria e Os do fondo da barra serán os pratos fortes da XII Festa Galega de Malpica

Este verán a música galega volverá a inundar as rúas de Malpica con motivo da celebración da XII Festa Galega, que terá lugar os días 16 e 17 de agosto. E este ano volveremos a ter cartel de luxo, xa que nos acompañarán Leilía, De Vacas, Xosé Lois Romero & Aliboria ou Os do fondo da barra. Pero, a maiores destas primeiras confirmacións, a Concellería de Cultura, que dirixe Noelia Freijeiro, segue a traballar para converter a Malpica no epicentro da música folk durante toda unha fin de semana.

leilia

Leilía

Leilía nace no ano 1989 cando seis mulleres se xuntan para recuperaren do esquecemento a tradición oral galega. Ao son de pandeiretas e voces, pronto van agromando os froitos. A mediados dos 90 chega o louvado Leilía, composto exclusivamente por pezas tradicionais. O seguinte reto foi achegar a música do pasado ao presente, por medio da incorporación de instrumentos e polifonías non tradicionais, e así o fixeron nos seus seguintes traballos, dos que nos ofrecerán unha escolma o venres 16 de agosto.
O sábado 17 celebraranse os outros tres concertos, nos que reuniremos estilos moi diferentes da música galega de hoxe e de sempre. Dende Os do fondo da barra, o grupo de pandereteiros de Xacarandaina, ata Xosé Lois Romero & Aliboria ou De Vacas.

Premios La Opinion

Aliboria

Aliboria é un colectivo de novos músicos galegos, dirixidos por Xosé Lois Romero, que reinventan os cantos e os ritmos enxebres de Galicia conxuntando as potentes voces das súas cantantes cuns novos arranxos para percusión tradicional cheos de forza, raza e terra. Bombos, pandeiros, pandeiras, tixolas, tarrañolas, cunchas, pandeiretas, latas, tambores, sachos, perfectamente conxunguidos cos cantos, os aturuxos, os bailes e a diversión.

DE VACAS

De Vacas

De Vacas é un cuarteto composto por tres voces, as de Inés Salvado, Faia Díaz e Paula Romero, sempre acompañadas pola guitarra de Guillerme Fernández, que fai versións de temas de masas de todas as épocas, dende as Spice Girls ata o Gagnam Style. Algunhas, coma “Amodiño” ou o recentísimo “El anillo pa cuando”, arrasan.

24Abr 2019

Hostalaría local e Concello impulsan a Ruta de Tapas Malpica Sabe a Mar con dúas edicións en maio e setembro

A Ruta de Tapas Malpica Sabe a Mar cumpre catro anos e, por iniciativa do sector hostaleiro, neste 2019 vanse celebrar dúas edicións nos meses de maio e setembro. Unha vez máis, a Concellería de Promoción Económica e a hostalaría malpicá unen esforzos para desenvolver unha iniciativa conxunta que enlaza tres sectores fundamentais da economía local: o turismo, a pesca e a olería.

Malpica Sabe a Mar pretende diferenciarse doutras iniciativas semellantes incluíndo os produtos pesqueiros como ingrediente de todas as tapas, o que permite, por unha banda, poñer en valor o produto local e o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que incluiría a ruta sería a olería, xa que para a ocasión elaboraranse no Ecomuseo do Forno do Forte pratos artesanais que se repartirán entre os oito establecementos participantes: Taberna do Lesto, Restaurante O Burato, Café Bar Ybarra, Café Bar JB, Restaurante San Francisco, Larada Bar, Bar O Pescador e Bar Santiago Apóstol.

A primeira Ruta de Tapas Malpica Sabe a Mar deste ano arrincará o venres 3 de maio coa animación musical do grupo local Os Arjalleiros, que percorrerán os oito locais. As tapas serviranse nesa primeira xornada de 20.00 a 23.00 horas; o sábado, de 12.00 a 14.00 e de 20.00 a 23.00, e o domingo, de 12.00 a 14.00 horas. O prezo non varía con respecto ao ano pasado, de xeito de cada tapa custará 1,5 euros, e con cada unha entregaráselle ao cliente un boleto que lle permitirá obter premios directos. Nesta ocasión teremos mochilas isotérmicas, gorras e moitas sorpresas!

CARTEL

23Abr 2019

O fútbol base volveu a conquistar Xaviña no I Memorial Ramón Calvete Gómez

EF Luis Calvo Sanz Campión Benxamín

O V Torneo de Fútbol Base Concello de Malpica – I Memorial Ramón Calvete Gómez converteu nunha festa do fútbol e da deportividade o campo municipal de Xaviña (Buño), no que se deron cita case 500 nenos e nenas.

O xoves foi o día de benxamíns e infantís, con 16 equipos en total. As Escolas de Fútbol Luis Calvo Sanz alzáronse co campionato na categoría benxamín, despois de superar á SD Sofán por 6-2. O Imperátor OAR da Coruña foi terceiro e o Galicia Gaiteira, cuarto. Nos trofeos individuais, Lucas Suárez, das EF Luis Calvo Sanz, recibiu o Trofeo Ramón Calvete Gómez ao mellor xogador, mentres que o gardameta da SD Sofán A, Ismael Cancela, foi elixido como mellor porteiro do torneo.

Na categoría infantil o título foi para o Corme, que se impuxo ao Cabana na final. O Bergantiños foi terceiro e o Concello de Zas, cuarto. O Trofeo Ramón Calvete Gómez ao mellor xogador foi para Borja Torrado, do Corme CF, mentres que o mellor porteiro do torneo foi Yago Pazos, da Cabana SD.

O venres foi a quenda de prebenxamíns e o alevíns.

Na categoría prebenxamín, as Escolas de Fútbol Luis Calvo Sanz mostráronse intratables de principio a fin e gañaron o torneo. Tordoia foi segundo; Cee, terceiro, e Camariñas, cuarto. No que respecta aos premios individuais, o Trofeo Ramón Calvete Gómez ao mellor xogador foi para Iker López, da SD Tordoia, e o de mellor porteiro foi para Iago Marcote, do UC Cee.

Por último, na categoría alevín tamén se impuxeron as EF Luis Calvo Sanz, tras vencer na final ao Cerqueda. O terceiro posto foi para o Sofán, que gañou ao Cabana na quenda de penaltis. O Trofeo Ramón Calvete Gómez ao mellor xogador foi para Manu Abelenda, das EF Luis Calvo Sanz, e o de mellor porteiro, para Kelyan Faria, do Cabana SD.

23Abr 2019

O Día do Ritmo ofrecerá este venres en Malpica un espectáculo de baile moderno e ximnasia rítmica

cartelDR(1)

O venres 26 celébrase o Día do Ritmo, que cumpre 14 anos consolidado como unha cita de éxito, tanto polo espectáculo que ofrece como pola elevada participación de deportistas e de público. O pavillón municipal de Malpica será escenario dun espectáculo de deporte e música aberto a todos os públicos, que comezará cunha exhibición de ximnasia rítmica a cargo das escolas municipais de Cabana e Malpica e rematará cunha demostración do alumnado da escola municipal de baile moderno do Concello de Malpica.

O espectáculo comezará ás 18.00 horas, e a entrada é libre.

Nos últimos años, desde a área de Deportes do Concello de Malpica vense realizando un importante esforzo na promoción das modalidades deportivas de baile moderno e ximnasia rítmica. Con esa intención, á marxe de difundir a súa práctica involucrando a diferentes entidades, incluso de fóra do municipio, estableceuse a organización dun evento co obxecto de dar unha maior difusión a ditas actividades e poder ofrecer tamén un espazo específico para realizar demostracións do aprendido durante o curso.

17Abr 2019

Medio millar de nenos renderanlle homenaxe a Ramón Calvete en Xaviña

Cartel V Torneo de Fútbol Base Concello de Malpica

O Campo Municipal de Xaviña xa conta as horas para acoller a quinta edición do Torneo de Fútbol Base Concello de Malpica, que se celebrará o xoves 18 e o venres 19 de abril no municipal oleiro para render homenaxe a un dos seus grandes impulsores como foi o gran Ramón Calvete Gómez.

O Concello de Malpica e a Asociación Deportiva Vidú xa están ultimando os detalles do V Torneo de Fútbol Base Concello de Malpica – I Memorial Ramón Calvete Gómez, que unha Semana Santa máis será unha gran festa do fútbol base e a cal, a partires desta edición, terá unha toque sentimental, xa que dende a organización decidiron renderlle homenaxe a un home de fútbol, unha persoa que o deu todo pola súa paixón e polo seu Buño como foi ex presidente branquiazul Ramón Calvete Gómez.

Nada máis e nada menos que cerca de medio millar de nenos e nenas que compoñen os 29 equipos participantes serán os que encherán dun gran ambiente de fútbol e de convivencia deportiva o Campo Municipal de Xaviña.

Neste evento, que xa está consolidado na axenda deportiva de cada Semana Santa, estarán representados os seguintes 16 clubs: Corme CF, Buño SCD, EF Luis Calvo Sanz, Cabana SD, CF Dumbría, Galicia Gaiteira, UD Cerqueda, SD Tordoia, SD Sofán, Camariñas FC, UC Cee, Bergantiños FC, Victoria CF, Imperátor OAR, Concello de Zas e Muxía CF.

Na xornada do xoves, os benxamíns e os infantís serán os encargados de facer gozar aos afeccionados que se acheguen ata Xaviña dende as 10 da mañá ata as 8 da tarde, mentres que o venres será a quenda dos prebenxamíns e dos alevíns nunha xornada que comezará ás 10.30 da mañá e rematará ás 8.20 da tarde.

Como adoita ser habitual nos eventos nos que está metida a Asociación Deportiva Vidú, haberá representación feminina xa que é unha das premisas da entidade cormelana, e neste V Torneo de Fútbol Base Concello de Malpica – I Memorial Ramón Calvete Gómez haberá dous equipos formados totalmente por nenas como son as promesas das EF Luis Calvo Sanz que competirán na categoría benxamín e as infantís do Victoria CF da Coruña.

Dende a organización convidan a todos aqueles que sexan afeccionados ao fútbol que se acheguen ao Campo Municipal de Xaviña (Buño) para gozar dun evento que sempre é unha gran xornada de convivencia futbolística para todos os participantes e tamén para os espectadores.

13Abr 2019

O Ecomuseo do Forno do Forte de Buño ampliará o seu horario de apertura e a súa oferta de actividades durante a Semana Santa

O Ecomuseo do Forno do Forte de Buño ampliará o seu horario de apertura durante a Semana Santa coa finalidade de converterse nun recurso de referencia para as persoas que visiten a nosa comarca durante eses días. Deste xeito, dende o luns 15 ata o sábado 20 o ecomuseo estará aberto de 10 a 14 e de 16 a 20 horas, e o domingo 21 poderá visitarse de 10 a 14 horas.

forno_do_forte

Paralelamente, ao longo da semana levaranse a cabo varias actividades. De martes a venres, de 11.30 a 13.30 e de 16.30 a 18.30, haberá obradoiros de barro para nenos e nenas, cun máximo de 25 participantes por quenda. Pero á parte de que os pequenos teñan o seu primeiro contacto co barro no cabanote do Forno do Forte, os maiores poderán probar a sentarse no torno.

Así mesmo, o venres e o sábado realizaranse rutas guiadas polo Buño oleiro. O ecomuseo será o punto de partida ás 12.00 horas e tamén o de chegada ás 14.00 horas. Ao longo da Ruta Oleira visitaranse os fornos da Costa e Os Mouróns, así coma o centro da vila, onde os visitantes non só terán a oportunidade de ver e saber máis sobre as tendas, os alfares ou a tradición oleira, senón tamén sobre a igrexa, o cruceiro e outros elementos patrimoniais de relevancia. Nos fornos restaurados faranse paradas específicas para explicar as súas características e o proceso de cocción.

Página 5 de 98« Primera...34567...102030...Última »