As nenas e nenos de entre 3 e 12 anos terán a oportunidade de achegarse a o mundo do modelado do barro no Ecomuseo Forno da Forte
O Concello de Malpica presenta unha nova oferta lúdica para a Semana Santa 2022 a través dun Obradoiro de barro, que se desenvolverá o 14 e o 16 de abril no Ecomuseo Forno do Forte.
Os interesados nesta actividade gratuíta, poderán gozar e coñecer os segredos do moldeado con barro o xoves 14 e o sábado 16 de abril de 16.30 horas a 18.30 horas.
O Concello anima a todos a aproveitar a oportunidade de coñecer de cerca o barro e os seus usos.
A representación, que busca visibilizar o traballo artístico das compañías gallegas, acollerá no paseo marítimo “Miña Xoia” de Clara Ferrao e “Alleo” de Colectivo Glovo
O Concello de Malpica acollerá o vindeiro domingo, 24 de abril, a estrea do proxecto de danza contemporánea “Escora”, será no paseo da Praia ás 18.30 horas. Un encontro único onde se interpretarán Miña Xoia por parte da compañía de Clara Ferrao, e de Alleo de Colectivo Glovo. A representación estará guiada por Marcia Vázquez, coa que unha vez rematada a intervención haberá un encontro para que participen público e artistas.
En caso de choiva o espectáculo será no Centro Cívico de Malpica. Esta convocatoria está englobada dentro do Proxecto Escora e realizase uns días antes da celebración do Día Internacional da Danza, o 29 de abril.
Proxecto Escora Escora preséntase como punto de encontro para as artes escénicas, a danza, a paisaxe, o patrimonio, a lingua e a comunidade. Esta iniciativa tamén se levará a cabo en Fisterra, Muxía, Camariñas, Laxe e Caión.
Os espazos saen dos escenarios convencionais, dando a oportunidade de achegar a otros espazos e aproximando a danza aos máis diversos públicos. O proxecto da Deputación busca visibilizar o traballo artístico das compañías galegas, con accións de proximidade que presentan unha oportunidade de achegar a danza a espazos pouco habituais para esta disciplina artística.
Estes aparellos están no pavillón municipal e os campos de fútbol de Pedra Queimada, Xaviña, e desde o venres no da Feira Nova
O Concello de Malpica, a través do departamento de Deportes, realizou cursos de formación en primeiros auxilios para os traballadores do pavillón municipal e das instalacións municipais.
Así, os asistentes ás instrucións desenvolvidas recibiron os coñecementos para enfrontarse a situación de emerxencia nas que, ademáis, é preciso facer uso dos aparellos desfibriladores que teñen a súa disposición.
Actualmente os centros deportivos de Malpica que contan con estes aparellos son o pavillón Municipal, e os campos de fútbol de Pedra Queimada, e de Xaviña. E, desde venres tamén no da Feira Nova.
É preciso lembrar que aínda que o uso dos desfibriladores é sinxelo, é importante ter os coñecementos para que os resultados sexan óptimos. Estes dispositivos subministran descargas ao corazón a través da parede torácica, e os sensores que conten analizan o ritmo cardíaco que indican cando é preciso proceder á descarga e o nivel de intensidade.
Coa instalación dos aparatos, así como as formacións que o Concello facilita, os traballadores poderán afrontar mellor posibles situacións de emerxencia sanitaria cun resultado satisfactorio.
O Concello de Malpica, colabora na presentación de “As árvores do incesto”, o libro de poesía asinado por Paco Souto.
O acto literario, organizado pola AC Caldeirón será esta tarde ás 20.30 horas no Cornecho de Tano (rúa Eduardo Pondal, 1).
Paco Souto, poeta, dinamizador cultural, exedil, perdeu a vida mentres traballaba como percebeiro, no 2017. Souto desenvolveu un intenso labor cultural e social. Foi coeditor de Edicións do Dragón e da colección Letras de Cal. Presidente da asociación de mariscadores e da asociación Caldeirón, desde a que promoveu o Premio de Poesía Erótica Illas Sisargas. Tamén, foi o principal responsable da Editorial Caldeirón que publicaba as obras gañadoras no certame.
A actividade será reprogramada para cando as condicións meteorolóxicas o permitan
O Concello de Malpica comunica que a representación prevista para mañá, 9 de abril de “Muiñada”, no río de Vaa, queda adiada por mor das condicións climatolóxicas.
A obra representada pola compañía Galeatro será reprogramada para vindeiras datas, cando o tempo o permita. Trátase dunha recreación destinada a todos os públicos na que o xogo, lendas, tradición e música son o fío condutor para mostrar as raíces.
A actividade organizada polo departamento de Educación, Cultura, Patrimonio e Deportes achega esta arte escénica a toda a poboación
O Concello de Malpica, a través da organización do departamento de Educación, Cultura, Patrimonio e Deportes, recibirá o vindeiro 22 de abril o “Autobús do teatro”.
O público poderá asistir á representación da obra “Ás oito da tarde, cando morren as nais”, baseada no texto de AveLina Pérez, baixo a dirección e dramaturxia de Marta Pazos.
Esta iniciativa, de achegar a arte escénica a toda Galicia, é froito do programa de mobilidade do Centro Dramático Galego, que xa visitou Malpica recentemente coa representación da obra de Albert Camus “A peste”.
As entradas
En total saíran á venda 50 entradas, por 6 euros cada unha. Os interesados en asistir deberán enviar un mail ao enderezo auditoriodemalpica@gmail.com.
O percorrido do Autobús do Teatro será de 18.00 horas a 21.45 horas e terá a saída xunto o Ybarra e na recta do Empalme, en Leiloio.
A obra
Os interesados asistirán a representación dun canto coral sustentado no absoluto baleiro, explotando as posibilidades do xogo escénico desde unha concepción aberta do espazo e cunha ollada irónica sobre a relación entre o teatro e a súa recepción. Aquí, a procura da identidade individual amparada na masa, superficial e ignorante, que presume de coñecementos inútiles, amósase indecente.
Fantástico labor o que levaron a cabo onte, sábado, 2 de abril, numerosos voluntarios no porto de Malpica. Realizaron unha limpeza mariña que tivo como resultado unha gran cantidade de lixo sacada do mar, o que contribúe a reducir a contaminación. Organizaron a Asociación Chelonia e Coca-Cola, e colaboraron Buceo Malpica, Concello de Malpica e a Confraría de Pescadores de Malpica. Esta actividade estivo integrada dentro do proxecto Mares Circulares, que busca contribuír á redución de impactos dos millóns de toneladas de residuos que cada ano chegan ás contornas acuáticas.
Durante a mañá, varios buzos somerxéronse na auga para ir na procura dos refugallos contaminantes. Contaban co apoio en terra doutro gran número de persoas e, entre todos, lograron extraer todo tipo de restos non desexados: redes, pneumáticos e mesmo pilas. Calquera deles danan a vida da flora e da fauna e, como consecuencia, das augas e produtos que o propio humano usa ou consume. As súas consecuencias poden ser terribles para moitas especies, colaborando na súa extinción.
Dende o consistorio agradecemos á organización desta actividade medioambiental pensar na nosa vila para levala a cabo, e mesmo sentir lle trasladamos a todas as persoas que investiron unha parte do seu tempo en colaborar na que é unha iniciativa solidaria para o ben de todos. A Concellaría de Medio Ambiente está comprometida con este tipo de actuacións para lograr un ecosistema máis sostible e pide a toda a poboación que cesen as malas prácticas neste sentido. Anima á veciñanza a reciclar, como fixeron os voluntarios logo de recoller a varredura. Moitos deses materiais, como sucede coas redes, poden ter unha segunda vida se se dá o paso de depositalas no colector que lles corresponde. O concelleiro Miguel Fernández participou na limpeza.
Durante abril, maio e xuño as persoas interesadas recibirán clases de formación os luns e mércores
O Concello de Malpica informa que desde este luns, 4 de abril, xa se están a impartir os cursos de formación de inglés para as persoas que traballan en hostalaría.
Unha nova aposta pola formación xestionada a través da Concellería de Educación, Cultura, Patrimonio e Deportes co que se responde a unha solicitude da Asociación de Hostaleiros de Malpica de Bergantiños.
Os cursos
Os luns e mércores, de 8.30 horas a 20.00 horas, as persoas interesadas reciben as clases de inglés co obxectivo de mellorar as competencias nesta lingua e ao mesmo tempo dotar de máis recursos e calidade os servizos. A formación é tanto para persoas traballadoras como propietarias de establecementos de hostalaría.
O Concello continúa a traballar en iniciativas a través das que dar unha mellor resposta a veciñanza e visitantes, como aqueles que pasan por Malpica con motivo da Ruta dos Faros, entre outras actividades e atraccións da zona.
Será o xoves, 7 de abril, no Centro Cívico do Concello
O Departamento de Deportes do Concello organiza unha charla informativa para que os maiores realicen a actividade física axeitada e necesaria.
O vindeiro xoves, 7 de abril as 10.30 horas, no Centro Cívico de Malpica realizárase esta actividade a cargo de María Varela Bardanca. A profesional, licenciada en Ciencias da Actividade Física e o Deporte, será a encargada de impartir un Obradoiro práctico de actividade física adaptada.
Ao longo do encontro falarase das:
– Enfermidades ou patoloxías comúns na xente adulta e como afectan a súa calidade de vida.
– Como podemos estar activos a pesar das nosas limitacións.
– Que tipo de actividades son as máis axeitadas en función da idade.
Unha nova aposta do Concello de Malpica pola saúde e o coidado da poboación.
O Concello continúa coas accións en favor da promoción da tradición de Buño
O Concello de Malpica continua promovendo a tradición de Buño a través dunha peza artística única. A gañadora do segundo sorteo lanzado a través do seu perfil de Facebook foi para Patricia Pose Rodríguez.
A peza artesal, trátase dun polbiño asinado no taller de Cerámica Creare Lidia Trigo, unha das artistas representantes das novas xeracións da olería de Buño.
A Concellería de Olaría de Malpica impulsa a iniciativa “Goza da arte de Buño, participa e que a sorte te acompañe” para dar maior visibilidade a esta arte propia da terra.
Este sitio utiliza cookies para mellorar a experiencia do usuario - Ocultar detalles
• Social media Facebook, Twitter e outras Redes Sociais precisan utilizar cookies para recoñecerte.
• Analytics Os datos recollidos polas cookies de Google Analytics son anónimos e só se usan para valorar a experiencia do usuario no nosa web.
• Anuncios Este sitio pode albergar publicidade propia, de afiliados, ou de redes publicitarias.
• Cookies propias Este sitio utiliza cookies propias para facilitar o acceso e mellorar a navegación e experiencia ao usuario Aviso Legal ACEPTOLeer más
Galego
Castellano
