Síguenos en
gl_ES
Tempo Malpica de Bergantiños
Martes 19°
11°
Mércores 17°
14°
Xoves 17°
13°
tiempo.com   +info
  1.  
  2. ACTUALIDADE

ACTUALIDADE

17Mai 2022

Malpica inaugura a sala expositiva “Non canto por cantar” cunha mostra da tradición inmaterial da terra

Ao comezo do acto o alcalde lembrou a figura do primeiro rexedor do Concello, Luis Cancela Vecino

O alcalde de Malpica, Eduardo Parga, inaugurou hoxe o novo espazo expositivo “Non canto por cantar” no Centro de Artesanía e Tradición (antigo Centro Comarcal de Bergantiños).

Pola mañá abriu as portas cunha intervención do rexedor que lembrou a importancia de ter presente a historia, ao tempo que transmitiu o seu pesar polo falecemento do primeiro alcalde, en democracia, de Malpica, Luis Cancela Vecino “un home que fixo moito polo Concello, aínda lembro que foi o responsable de instalar o primeiro alumeado público de Malpica”.

No acto tamén interveu a concelleira de Educación, Cultura, Patrimonio e Deportes, Noelia Freijeiro, cuxo departamento é responsable da organización da mostra. Unha exposición que reúne imaxes gráficas e documentación que percorren a historia da música e baile tradicional de Galicia e que aínda se mantén vivo a través das actuacións dos mozos e mozas. Asemade fixo entrega dun agasallo a Mar de Bouzas en recoñecemento ao seu compromiso e traballo para a realización da mostra. Na súa intervención a concelleira destacou que: “Para rematar quero dar as grazas a todos/as os/as colaboradores que me axudaron a facer realidade  este proxecto, aos que aportaron documentación ( Rosario das Marías, Xosé Manuel Varela, Elena Verdes,  Fransy González, Xabier Díaz, Luis Prego, Beatriz Busto, AC O Fiadeiro, Asoc de Coros e Danzas EIDOS, Chisco Feijoo e Quique Peón), ás asociación locais por participar na grabación, a Marco e a Mara por aportarnos a visión máis pura de todo esto, a Sandra e  Guille de “Monnom” por conseguir plasmar ao detalle o que había na miña cabeza, a Selina Otero, polas suas verbas e , sobre todo, ás familias das persoas ás que hoxe homenaxeamos. Deixei para o final á persoa que me acompañou dende que isto eran só ideas na miña mente, Mar Suarez ou máis coñecida como Mar da Bouzas, grazas por adicarlle tanto tempo, por axudarme a darlle forma ao que hoxe presentamos, non hai maneira de agradecer o teu traballo. Por favor, acompáñame un pouco máis, que teño algo para ti”.

O acto contou coa participación e actuacións das asociacións locais Raigañas, Malante e Carcaxía que interpretaron pezas do Concello de Malpica.

“Non canto por cantar” é a primeira exposición de cancións e bailes típicos do concello malpicán. Cunha exhaustiva compilación de cancións e bailes recollidos aquí, esta mostra quere describir o xeito de bailar propio desta zona, con ritmos e pasos únicos na tradición galega. A pandeireta era o instrumento por excelencia. Había tamén gaiteiros que formaban parte das murgas ou charangas que tocaban nas festas. E regueifeiros. No pasado facíanse foliadas nos sobrados, fiadas, ruadas, bailes nas tabernas… Cada semana xuntábanse mozos e mozas do lugar para tocar, bailar e cantar. Era a forma de divertirse nos tempos de antes.

Os e as protagonistas desta exposición son os informantes, os maiores, dos que herdamos as pezas que hoxe tocan e bailan os mozos e mozas non só do concello senón de toda Galicia. Persoas que cederon a súa sabedoría en recollidas e foron fonte de información para asociacións folclóricas de distintos puntos da xeografía. Xente de Mens, Barizo, Santiso, Vigo dos Toxos, Beo, Seaia, Cerqueda, Cambre e Leiloio, principalmente, que nos deixan o seu legado. En “Non canto por cantar” poderán ver fotos de moitos deles e delas, dos que queda documentación gráfica, co seu nome, alcume, a casa á que pertencían e o lugar de onde son. Para esta exposición contamos con 44 pero segundo aseguran as fontes orais puido haber máis de 200 en todo o concello.

Dende maneos, muiñeira, punteada, ‘jotas’, agharrados, muiñeira corrida, valses ata a Ribeirana, un baile típico desta zona. Un baile moi especial que se bailaba nas foliadas, fiadas e tamén cando se facía o percorrido dos ‘Madamitos e Ghuardineros’ de Cerqueda no Entroido. Máis que un baile parece unha danza, difire de calquera outro baile solto da zona (punteadas, jotas e maneos). No vídeo desta exposición, que se proxecta na sala audiovisual contigua, obsérvanse estes bailes, intepretados por bailadores de antes (a primeira recollida foi no ano 1971 en Mens) e da actualidade, a través das tres asociacións de música e baile tradicional do concello malpicán: Asociación Cultural Raigañas de Cerqueda, Asociación Cultural Malante de Malpica e Asociación Cultural e Deportiva Carcaxía de Seaia. Ademais de bailes e cancións, as palabras dos mestres/as, músicos/as e bailadores/as malpicáns que manteñen viva a nosa cultura axudan a interpretar en “Non canto por cantar” a historia e o significado da música tradicional do Concello de Malpica.

13Mai 2022

Malpica aproba o orzamento centrado nas necesidades sociais e na mellora das infraestruturas do municipio

Os orzamentos crecen no seu conxunto un 9,02% con respecto aos de 2020,
cun aumento de 436.604 euros ata alcanzar os 5.277.221 euros

A Corporación aprobou hoxe, cos votos do grupo de goberno, o Orzamento Xeral de 2022 e o cadro de persoal. Un orzamento que crece no seu conxunto un 9,02% con respecto ao do ano 2020, cun aumento de 436.604 euros ata alcanzar os 5.277.221 euros.

O alcalde, Eduardo Parga, destacou os investimentos previstos para este ano que ascenden a 468.652, e que serán incrementados xa que o Concello está á espera de coñecer a concesión de axudas dos plans adicionais da Deputación Provincial e outras aportacións que poidan chegar da Xunta.

O alcalde asegurou durante a sesión que este orzamento axústase á realidade do concello e están centrados en cubrir as necesidades de primeiro orde dos veciños e veciñas de Malpica, de xeito especial, nos servizos sociais, debido ás consecuencias económicas e sociais da pandemia da Covid-19, pero tamén canto ao mantemento, conservación e construción de novas infraestruturas.

As contas, dixo, tamén apostan pola potenciación das actividades culturais, o e o turismo. “Nun momento como o que atravesamos, cunha forte demanda nos servizos sociais e de atención as necesidades das persoas máis vulnerables centramos os nosos esforzos en aumentar estas partidas. Do mesmo, xeito co fin de reactivar a economía e de mellorar os servizos, os orzamentos contemplan diversas actuacións de mellora e de construción de
novas infraestruturas”, apuntou Parga.

En canto o cadro de persoal o Concello está inmerso nun proceso de consolidación de postos de traballo e o alcalde anunciou que se fará pública a oferta de emprego público o vindeiro 1 de xuño. Precisamente, no capítulo de persoal o orzamento sofre un aumento do 2,39%.

Tamén destaca o aumento dun 19,62% no capítulo de gasto en bens correntes e servizos, ata chegar aos 2.852.376 euros. Destaca, neste punto, a dotación para a prestación do Servizo de Axuda no Fogar derivado do aumento de horas concedidas pola Xunta de Galicia para a dependencia. Tamén incrementase a dotación para o subministro enerxía eléctrica derivada do aumento de prezos en todo o Estado.

En canto a tranferencias correntes, o goberno local incrementará as axudas a entidades culturais tamén poñerá ao día o gasto con asocxiacións deportivas. O alcalde destacou o papel que xogan estos colectivos na dinamización cultural e deportiva do concello e, polo tanto, “dende á administración temos que facer os esforzos necesarios para que se sigan
mantendo as actividades e apoiar cos recursos que poidamos a estes colectivos”. Tamén se incluén neste capítulo as achegas para convenios con outros concellos para reforzar os servizos de Policía Local.

13Mai 2022

Doce patinadoras de Malpica competirán mañá na I fase de niveis 1-3 Coruña Norte

O encontro deportivo organizado polo Club Patín Velúa será en As Pontes

O Concello de Malpica estará representado na competición da I fase de niveis 1- 3 Coruña Norte que se disputará mañá no pavillón do CEIP A Magdalena, en As Pontes.

Unha actividade deportiva organizada polo Club Patín Velúa que levará polo Nivel 1 ás pantinadoras malpicáns Candela Chouciño, Xiana García, Dania Blanco, Paula Agrelo, Martina Chouciño, Antía Castro, Clara Villaverde, Valentina Súarez.

E no nivel 2 Pau Casal, Paula Vidal, Ana Pérez, Antía Pérez serán as representantes do Concello de Malpica.

12Mai 2022

O Concello de Malpica acolle a teatralización da vida de Rosalía de Castro

A obra “Rosalía” chega o 17 de maio ao Ecomuseo Forno do Forte, en Buño

O Concello de Malpica traerá, o vindeiro 17 de maio, a vida de Rosalía de Castro a través dunha obra de teatro homónima, representada pola compañía Culturactiva Producións. Será, ás 17.00 horas, no Ecomuseo Forno do Forte, en Buño.

Unha oferta familiar, con entrada de balde, que recreará a vida da escritora achegando a Rosalía nena que cantaba, bailaba, lía e comía chocolate. A que vive no lugar onde medran as poetas entre a rebeldía, as lecturas, a curiosidade, o xogo e as canción con rimas e sen autor. Toda unha recreación cos valores sociais en escena dirixida por Fina Calleja e representada por Rocío González e Cristina Collazo.

Esta obra xa leva mais de 70 funcións realizadas desde a súa estrea ata ser un título imprescindible do teatro familiar galego.

Con esta programación o Concello continúa coa programación de “Malpica nun mar de letras” co que celebra o Día das Letras Galegas ao longo do mes de maio.  A programación do día 17 complétase coa inauguración da sala Non canto por cantar, ás 12.00 horas, no Centro de Artesanía e Tradición (antigo Centro Comarcal de Bergantiños) unha homenaxe ao canto e baile tradicional e o patrimonio inmaterial da terra.

Ás 18.30 está previsto o concerto de música infantil: Charo Pita co espectáculo A familia Papaventos, na praza Anselmo Villar Amigo.

11Mai 2022

As letras de Florencio Delgado Gurriarán chegan ás bibliotecas de Malpica

Os centros educativos e a municipal reciben exemplares dedicados ao escritor homenaxeado no Día das Letras Galegas 2022

Os centros educativos e a Biblioteca Municipal de Malpica recibiron na xornada de hoxe novos libros relativos ao escritor homenaxeado no Día das Letras Galegas 2022: Florencio Delgado Gurriarán.

A concelleira de Educación, Cultura, Patrimonio e Deportes, Noelia Freijeiro, foi a encargada de facer a entrega de novos títulos para a lectura e o préstamo nos colexios do Concello.

Así, os estantes dos centros teñen, dende hoxe, exemplares de “Os Bolechas. As miñas primeiras Letras” e “Florencio Delgado Gurriarán. Polos vieiros da saudade”, asinado por Héctor Cajaraville.

Esta entrega de libros está incluída dentro da programación do Concello de Malpica para celebrar o Día das Letras Galegas, que continuará ao longo de todo o mes de maio. As publicacións entregadas na Biblioteca Municipal compartirán estes días, ata o 31 de maio, espazo coa exposición en torno á obra do poeta nacido na aldea Córgomo, no concello ourensán de Vilamartín de Valdeorras. O autor destacou como poeta, pero tamén exerceu de articulista, crítico literario, coordinador editorial, lexicógrafo, tradutor, corrector…, que, tras o golpe de estado de 1936, exiliouse a México.

Ademais este venres, 13 de maio, presentarase a obra gañadora do XVI Certame de Poesía Erótica “Illas Sisargas”: Edénicas de Andrea Fernández. Será ás 19.00 horas, na Casa do Pescador, nun acto organizado pola A.C. Caldeirón.

E o sábado está programado un evento lúdico coa representación de Muiñada, a cargo da compañía Galeatro. Ao remate os asistentes terán a posibilidade de realizar unha visita guiada pola contorna da Área Recreativa de Río de Vaa. Para os interesados a entrada será de balde, sendo unicamente preciso inscribirse antes do comezo da actividade, ás 17.30 horas.

11Mai 2022

O Ecomuseo Forno do Forte acollerá un Laboratorio Artístico do que sairá unha nova peza representativa da Costa da Morte

As persoas interesadas en participar xa poden inscribirse nesta actividade impulsada pola asociación Costa da Morte- Terra Atlántica que se desenvolverá o 5 de xuño

O Ecomuseo Forno do Forte, en Buño, acollerá en xuño unha iniciativa do Laboratorio Artístico para a creación dunha nova peza representativa dos valores da Costa da Morte. O día 5, ás 12.00 horas, dará comezo a proposta da Terra Atlántica que fundaméntase en conseguir crear unha obra que represente a Costa da Morte dende unha perspectiva artística.

Os interesados teñen de prazo para inscribirse ata ás 23.59 horas do 22 de maio a través da ligazón: LABORATORIO ARTÍSTICO.

Poderán participar todas aquelas persoas e colectivos artísticos ou artesáns maiores de idade. A participación no laboratorio farase por orde de inscrición e tendo en conta os criterios de selección. O número de participantes está limitado a 15 intervencións.

As persoas participantes farán unha intervención, en directo, da obra creada ou comisariada para este proxecto, tendo cabida propostas de artesanía e distintas disciplinas artísticas (encaixe, olería, pintura, escultura, etc). As/os artistas deberán crear a obra durante o tempo estipulado do Laboratorio formando parte dun evento da Marca, co estilo, técnica e dimensións de libre elección.

Desde o Concello de Malpica apoiase esta iniciativa que ten como obxectivo apoiar a cultura e a artesanía da nosa terra a través da creatividade e innovación artística.

10Mai 2022

A agrupación de voluntarios de Protección Civil de Malpica recibiu hoxe nove Condecoracións na cerimonia da Academia Galega de Seguridade Pública

Foron recoñecidos coa medallas de Mérito e Recoñecemento á Antigüidade e a Constancia nas categorías de Bronce, Prata e Ouro

A agrupación de voluntarios de Protección Civil de Malpica recibiu hoxe nove Condecoracións na cerimonia da Academia Galega de Seguridade Pública. Foron recoñecidos coa medallas de Mérito e Recoñecemento á Antigüidade e a Constancia nas categorías de Bronce, Prata e Ouro.O acto, que se cebebrou na Estrada, tamén asistiu o alcalde de Malpica, Eduardo Parga, e o concelleiro de obras, Miguel Ángel Fernández.

Foron recoñecidos coa medallas de Mérito e Recoñecemento á Antigüidade e a Constancia nas categorías de Bronce, Prata e Ouro. Na categoría de Bronce con distintivo branco foi recoñecido David Varela Abelenda; e con distintivo laranxa Carlos Antonio Formoso Canto e Marco Antonio Ures García.

Na categoría de Prata con distintivo vermello a medalla foi entregada a Eduardo Rubén Díaz García e Iván Lema Botana.Na categoría de Ouro recibiron medallas distintivas Emilio Sayans Bonachera, Daniel Vázquez Añón, José Antonio Alfeirán Regueira e Adrián Verdes Suárez.

Moitos parabéns e grazas polo voso traballo, esforzo e compromiso a prol da seguridade e a asistencia en urxencias na nosa vila.

10Mai 2022

A obra gañadora do XVI Certame de Poesía Erótica “Illas Sisargas” será presentada este venres en Malpica

O acto, englobado no programa de “Malpica nun mar de letras” estará protagonizado pola autora da obra premiada “Edénica”, Andrea Fernández

Este venres Andrea Fernández, autora da obra “Edénicas” gañadora do XVI Certame de Poesía Erótica “Illas Sisargas” estará na Casa do Pescador, presentando o seu libro.

Esta acción cultural, englobada na programación de “Malpica nun mar de letras” está organizada pola A. C. Caldeirón e se desenvolverá ás 19.00 horas.

Fernández acadou o recoñecemento na 16 edición deste premio literario convocado pola asociación Caldeirón e o Concello de Malpica. Recibiu o premio nun acto celebrado o pasado mes de novembro, no que o xurado escolleuna por unanimidade “polo seu sutil erotismo e pola súa luz poética” entre outros.

9Mai 2022

O Concello celebra as Letras galegas con actividades de “Malpica nun mar de letras 2022”

Ao longo do mes de maio os espazos públicos acolleran actividades literarias, exposicións, concertos e espectáculos

O Concello de Malpica celebrará o Día das Letras Galegas 2022 cunha serie de actividades que se desenvolverán en diferentes espazos baixo o lema “Malpica nun mar de letras 2022”. Nesta edición a figura homenaxeada é o autor en lingua galega Florencio Delgado Gurriarán (1903-1987).

Desde o 2 ao 31 de maio a Biblioteca Municipal acollerá a exposición en torno á obra do poeta nacido na aldea Córgomo, no concello ourensán de Vilamartín de Valdeorras. O autor destacou como poeta, pero tamén exerceu de articulista, crítico literario, coordinador editorial, lexicógrafo, tradutor, corrector… Tras o golpe de estado de 1936 exiliouse a México.

Concerto didáctico

Este mércores Lidia Botana chegará co espectáculo De aquí para alá, que se representará no Auditorio do Centro Cívico. Un concerto didáctico que escoitan desde as 10.30 horas o alumnado do CEIP Joaquín Rodríguez Otero e das escolas unitarias de Mens e Barizo, do CRA A Nosa Señora do Faro. Posteriormente, ás 12.15, as nenas e os nenos do CEIP Milladoiro pasaran a gozar desta representación.

O autor na biblioteca

O vindeiro mércores as bibliotecas, tanto a Municipal de Malpica como as dos centros de ensino do Concello, recibirán exemplares de Os Bolechas. As miñas primeiras Letras e Florencio Delgado Gurriarán. Polos vieiros da saudade, asinado por Héctor Cajaraville.

O venres, 13 de maio, presentarase a obra gañadora do XVI Certame de Poesía Erótica “Illas Sisargas”: Edénicas de Andrea Fernández. Será ás 19.00 horas, na Casa do Pescador, nun acto organizado pola A.C. Caldeirón.

As actividades de “Malpica nun mar de letras 2022” inclúen eventos lúdicos no espazo natural do río Vaa. Así o sábado, 14 de maio, a compañía Galeatro representará Muiñada e ao remate os asistentes terán a posibilidade de realizar unha visita guiada pola contorna da Área Recreativa de Río de Vaa. Para os interesados a entrada será de balde, sendo unicamente preciso inscribirse antes do comezo da actividades, ás 17.30 horas.

17 de maio

O día das Letras Galegas as celebracións comezarán ás 12.00 horas no Centro de Artesanía e Tradición (antigo Centro Comarcal de Bergantiños) onde se inaugurará a sala Non canto por cantar.

Posteriormente, ás 17.00 horas o Ecomuseo acollerá a representación de Rosalía, de Culturactiva.

Ás 18.30 está previsto o concerto de música infantil: Charo Pita co espectáculo A familia Papaventos, na praza Anselmo Villar Amigo.

As actividades da tarde están destinadas a un público familiar, terán a entrada de balde e o único requisito de formalizar a inscrición ao comezo.

Pintura e poesía

Desde o 20 de maio ao 30 de xuño o Espazo Expositivo do Centro Cívico de Malpica acolle a mostra de pintura Carrexadoras, asinada por Viki Rivadulla. A exposición poderá ser visitada de luns a venres de 8.30 horas a 15.00 horas e de 16.00 a 22.00 horas. Os sábados as portas estarán abertas de 10.00 a 14.00 horas e de 16.00 a 18.00 horas.

As actividades rematarán o 27 de maio coa presentación das bases e da convocatoria do XVII Certame de Poesía Erótica “Illas Sisargas”. Un acto organizado pola A.C. Caldeirón, que se desenvolverá ás 12.00 h. no Salón de plenos da Casa do Concello.

Un mes cheo de actividades organizadas desde a Concellería de Educación, Cultura, Patrimonio e Deporte, coa colaboración da Deputación a Través da Rede Cultural 2022 e coa participación do Ecomuseo do Forno do Forte; o Centro Artesanía e Tradición (CAT); a AC Caldeirón; a Confraría de Pescadores e o Fogar dos Pensionistas San Adrián do Mar.

.

9Mai 2022

O Concello colabora no V Campionato de pesca submarina zona norte 2022 celebrada en Malpica

O peixe recollido ao longo da xornada foi doado a Cáritas Interparroquial de Bergatiños

O Concello colaborou a xornada do V Campionato clasificatoria Zona Norte de Pesca Submarina celebrado este domingo en Malpica. Unha actividade que tamén contou coa colaboración da Confraría de Pescadores, Protección Civil e Buceo Malpica.

Toda a pesca recollida ao longo da xornada foi doada para Cáritas Interparroquial de Bergantiños.

Nesta xornada participaron deportista federados de todos os clubs pertencentes á zona que abarca desde Fisterra ata Ribadeo, que se clasificaron os 14 participantes que mellor puntuación obtiveron. O porto base foi o de Malpica, desde onde saíron todas as embarcacións cos respectivos pescadores e lancheros. A xornada tivo lugar entre punta Muxeiros, en Malpica, ata punta de Chan de Razo, en Razo.

Os tres primeiros clasificados foron: Adrián del Río García, do Club de Remo San Felipe; Antonio Ramón Lata Lafuente, do Club do Mar Ferrol, e en terceiro lugar Luis Miguel Pan Tajes, do Club del Mar de San Amaro.

Página 3 de 12912345...102030...Última »