O Concello de Malpica de Bergantiños, en colaboración coa Deputación da Coruña, organiza este verán obradoiros gratuítos de barro dirixidos a nenos e nenas de entre 3 e 12 anos no Ecomuseo Forno do Forte. As actividades desenvolveranse durante os meses de xullo e agosto, de martes a venres, en horario de 16.30 a 18.30 horas. Non é precisa inscrición previa, pero os menores deberán acudir acompañados dun adulto. A iniciativa, que se enmarca no programa “Malpica Verán 2025”, pretende achegar aos máis novos á tradición oleira, promovendo o coñecemento e a creatividade a través do barro.
O Centro de Artesanía e Tradición de Buño acollerá o vindeiro venres 20 de xuño ás 20:00 h a presentación da obra La ruta de Eulogio, un traballo de investigación asinado por Sandra Aldao Pereira, profesora de ESO e filóloga, que impartiu docencia en Buño entre os anos 1992 e 1995.
A actividade será aberta ao público ata completar aforo.
Esta obra marca o debut como autora de Sandra Aldao Pereira, natural de Carballo, quen presenta unha investigación ensaística arredor dun crime real acontecido hai 110 anos no Concello da Laracha, coas peculiaridades dun único testemuña: un cruceiro. O traballo recupera este feito histórico a través de novas achegas documentais e reflexivas.
Sobre a autora:
Diplomada en Maxisterio pola Universidade da Coruña.
Licenciada en Filoloxía Hispánica pola Universidade de Santiago de Compostela.
Diplomada en Teoloxía para Segrares pola Universidade Pontificia de Comillas.
Diplomada en Ciencias Relixiosas pola Universidade de Salamanca.
Profesora de ESO en Coristanco desde 1998, con experiencia en centros de Buño, Razo, Carballo, Cabana e A Laracha.
No ano 1993 publicou a tradución ao galego da obra O segredo na muller, coa que concorreu ao Premio Ramón Cabanillas.
Participou como poñente no Simposio Internacional de Linguas e Culturas coa intervención Explotación didáctica dunha escena de teatro.
A praia de Area Maior de Malpica acollerá este verán actividades de surf organizadas polo Concello de Malpica de Bergantiños. A iniciativa ofrece catro quendas ao longo dos meses de xuño, xullo e agosto, cun total de 21 prazas dispoñibles en cada unha delas. A actividade está dirixida tanto a nenos e nenas de 7 a 16 anos como a persoas adultas a partir dos 16 anos, con horarios e tarifas diferenciadas.
Na primeira quenda, que se desenvolverá do 30 de xuño ao 4 de xullo, as sesións para a mocidade terán lugar os luns, mércores e venres de 12:00 a 14:00, cun custo de 60 euros. As clases para adultos celebraranse os martes e xoves de 18:00 a 20:00, cun prezo de 40 euros. A data límite de inscrición para esta quenda é o martes 24 de xuño.
A segunda quenda terá lugar do 7 ao 11 de xullo, mantendo os mesmos horarios e tarifas: de luns a venres para a rapazada e os martes e xoves para adultos. O prazo de inscrición estará aberto ata o martes 1 de xullo.
Xa en agosto, a terceira quenda desenvolverase do 4 ao 8. As clases para participantes de 7 a 16 anos realizaranse os luns, mércores e venres de 12:00 a 14:00, e para adultos, os martes e xoves de 18:00 a 20:00. O último día para inscribirse será o martes 29 de xullo.
A cuarta e última quenda está programada do 11 ao 15 de agosto, mantendo as mesmas condicións de horarios e prezos. Neste caso, a data límite de inscrición será o martes 5 de agosto.
Estas sesións de surf representan unha oportunidade única para iniciarse ou mellorar nesta disciplina deportiva nun entorno privilexiado como é a praia de Area Maior, nun programa estruturado e guiado por profesionais.
O permiso para realizar fogueiras durante o San Xoán poderá solicitarse ata o 19 de xuño
NORMAS REALIZACIÓN CACHARELA “ SAN XOAN” :
Na zona urbana, o volume de combustible do lume no sobre pasará os 3 mts de perímetros nin o metro ( 1 metro) de altura. No rural non poderá exceder os 6 metros de perímetro nin os 3 metros de altura.
A separación entre as cacharelas e os edificios, árbores, vehículos e mobiliario urbán serán como mínimo 12 metros, agás no casco urbano.
Porase especial coidado de non situalas baixo tendidos eléctricos ou telefónicos, así como que nos arredores non exista ningún local no que se almacén de produtos inflamables
Queda prohibida a queima de rodas, plásticos, escumas de poliuretano, aceites e, de xeito xeral, calquera substancia que ao arder desprenda fume tóxico.
O material de combustión serán : leña, polas, toro de árbores e madeiras vellas etc.
En ningún caso se botarán ao lume recipientes que conteñan líquidos inflamables ou gases a presión ( areosois) aínda que estean baleiros.
As persoas interesadas na celebración da cacharela de San Xoán, deberán presentar a correspondente comunicación no Concello por rexistro de entrada ou Sede Electrónica comunicando a celebración da mesma e lugar. Debendo en todo momento vixiar o lume ata que estea totalmente apagado. Para asegurarse de que quede totalmente apagado deberán empapar a cinza con auga.
As persoas interesadas en montar unha cacharela deberán coidar os arredores e coñecer o número de Emerxencias (112) e o de incendios (085). Ademais terán preto do lume unha mangueira ou auga suficiente en recipientes para apagar o mesmo en caso de que se extenda co fin de evitar un incendio ou a súa propagación .-
A presentación da solicitude de comunicación de celebración da caharela non exime das responsabilidade por danos ou perdas que procedan no caso de incendio cando concorra neglixencia, imprudencia ou incumprimentos das normas ditadas.-
As Torres de Mens, en Malpica de Bergantiños, convertéronse este 17 de maio no epicentro da celebración do Día das Letras Galegas 2025. Este emblemático enclave acolleu o acto institucional organizado pola Xunta de Galicia, que deu inicio a unha xornada cargada de simbolismo, emoción e compromiso coa lingua e a cultura galegas.A cerimonia estivo conducida por Icía Varela, que guiou o acto con sensibilidade e solvencia. A apertura correu a cargo da Asociación Cultural Raigañas de Cerqueda e a Asociación Cultural Malante que foron as e os encargados de amenizar musicalmente o evento. Entre os asistentes estiveron o presidente da Xunta, Alfonso Rueda; o presidente da Real Academia Galega (RAG), Henrique Monteagudo; o alcalde de Malpica, Eduardo Parga e a concelleira de Cultura, Noelia Freijeiro; ademais de numerosos representantes municipais da comarca e outras autoridades.
O rexedor malpicán, Eduardo Parga, destacou a honra que supuña para el e para o municipio acoller unha celebración tan significativa, e subliñou o valor que a lingua galega ten como elemento de identidade compartida.Parga referiuse tamén ás homenaxeadas deste ano, as Pandeireteiras de Mens, ás que definiu como “memoria viva” da fala e da música tradicionais.
Apuntou que lograron converter a pandeireta e a copla nunha verdadeira forma de estar no mundo. Aproveitou tamén para agradecer á Real Academia Galega a escolla de Malpica como sede dos actos centrais, así como aos veciños, polo seu apoio constante a este tipo de celebracións.O presidente da Xunta, Alfonso Rueda, quixo poñer en valor a beleza natural do lugar escollido e celebrou e agradeceu ás propietarias das Torres de Mens a súa colaboración para poder levar a cabo o evento.Rueda lembrou a importancia do legado das pandereteiras de Malpica, das que dixo que representan o talento presente en cada recuncho do país. E apelou a un pacto pola lingua baseado no consenso e no reforzo positivo, asegurando que o futuro do galego pasa por fuxir de imposicións e apostar polo acordo.Os actos continuaron no Centro Cívico de Malpica, onde a Real Academia Galega celebrou unha homenaxe ás cantareiras, símbolo da tradición oral que mantén viva a lingua.
Alí, á entrada, a música foi a cargo da Asociación Cultural e deportiva Carcaxía. As protagonistas do acto foron as Pandeireteiras de Mens, Rosa e Adolfina Casás Rama (de Cerceda) e Eva Castiñeira (de Muxía).A RAG puxo o foco no papel das mulleres na transmisión da poesía oral popular, ás que definiu como exemplo de forza, saber e identidade colectiva. A académica Ana Boullón, promotora da edición deste ano, resumiu o espírito da xornada asegurando que se trataba de celebrar o pasado cunha mirada posta no futuro. No seu primeiro discurso como presidente da RAG, Henrique Monteagudo pediu unha reformulación profunda da política lingüística, que sitúe a infancia e a mocidade no centro das accións.
Apostou por un discurso entusiasta e de compromiso real coa lingua, afastado de polémicas estériles, e centrado na normalización efectiva do galego.As Tanxugueiras foron as encargadas de abrir o acto cunha actuación na que agradeceron o legado das mulleres que lles transmitiron a lingua e a música. Reivindicaron a importancia de seguir defendendo o galego como lingua propia.No pleno académico interviñeron tamén Antón Santamarina e Xesús Alonso Montero. Ambos puxeron en valor a riqueza do cancioneiro popular e a súa pegada en figuras senlleiras como Rosalía de Castro. Santamarina evocou os seus anos de infancia na Fonsagrada, onde aprendeu cantares tradicionais que logo contribuiría a recoller e estudar da man da etnomusicóloga Dorothé Schubarth.A RAG personalizou a homenaxe en sete mulleres sen títulos nin formación académica, pero cun profundo coñecemento transmitido de xeración en xeración. Mulleres do rural, que malia ter vivido á marxe das normas sociais ou verse obrigadas a emigrar, conservaron vivo o fío da tradición.Monteagudo pechou a intervención apelando ao espírito de Castelao e de Rosalía, e afirmou que o exemplo das cantareiras segue vivo nas novas xeracións. Para o presidente da RAG, representan unha enerxía colectiva que nunca desaparece.Para pechar o acto, a voz de Icía Varela cantando o himno galego e o alcalde de Malpica, Eduardo Parga, e a concelleira Noelia Freijeiro obsequiaron aos presidentes da RAG e a Xunta con unhas pezas de barro de Buño.
O Concello de Malpica presenta, xunto coas asociacións, unha nova edición de “Nun Mar de Letras”, un programa cultural que encherá o municipio de actividades arredor da lingua, a literatura, a música e a tradición galega. Durante máis dun mes, desenvolveranse exposicións, espectáculos, presentacións de libros, obradoiros, encontros institucionais e actos festivos dirixidos a públicos de todas as idades.
Este ano será máis especial ca nunca: catro das homenaxeadas pertencen ao noso concello, e Malpica terá a honra de acoller os actos oficiais do Día das Letras Galegas. Un recoñecemento histórico que converte ao noso municipio no corazón da celebración da cultura galega.
Consulta aquí a programación detallada por datas:
Do luns 5 de maio ao domingo 15 de xuño
Exposición Canta que cadramos ben. Cantareiras: Poesía popular oral, dos Equipos de Dinamización da Lingua Galega da Dirección Xeral de Política Lingüística da Xunta de Galicia, na Biblioteca Municipal Eduardo Blanco Amor
Mércores 7 de maio
Dotación da biblioteca municipal, as bibliotecas dos centros de ensino e as asociacións de canto e danza tradicional do concello de Malpica de publicacións de cantareiras
Luns 12 de maio
Ás 10.00 e ás 12.00: Coa pandeireta na man de María Faltri, no auditorio do Centro Cívico. Representación escolar para o alumnado de infantil e primaria do CEIP Milladoiro, CEIP JRO e CRA A Nosa Señora do Faro (escola de Mens)
Xoves 15 de maio
A partir das 11.00: Festival das Letras Galegas no auditorio do Centro Cívico. Organiza: CEIP Milladoiro
Sábado 17 de maio
A partir das 11.00: Acto Institucional do Día das Letras Galegas da Xunta de Galicia nas Torres de Mens
A partir das 12.30: Pleno extraordinario da Real Academia Galega no auditorio do Centro Cívico de Malpica
A partir das 14.00:
III Gran Xantar de Mens
Polbo e churrasco a fartar
Sesión vermú con dúo
A partir das 18.00: Tardeo
As entradas pódense mercar antes do 12 de maio nos teléfonos 628 206 620 (Yaissa) e 626 355 917 (Álex). Organiza: Comisión de festas de Mens
Ás 21.00: III RUADA NUN MAR DE LETRAS no campo da festa de Mens coas actuacións de:
A.C.D. Carcaxía
A.C. Malante
Do Rivés
Caamaño&Ameixeiras
Domingo 18 de maio
Das 17.00 ás 18.30: Obradoiro de regueifa impartido por Lupe Blanco, no campo da festa de Mens. A partir de 10 anos. 30 prazas que se adxudicarán por orde de chegada
Luns 19 de maio
A partir das 10.00: Ao son das nosas pandeireteiras. Vai por elas, no campo da festa de Mens. Organiza: CRA A Nosa Señora do Faro
Martes 20 de maio
A partir das 12.00: Homenaxe das novas xeracións malpicás ás Pandeireteiras de Mens, actuacións musicais, lecturas de coplas e ofrenda floral, na igrexa de Santiago de Mens. Organiza: IES Urbano Lugrís
Sábado 24 de maio
Das 16.00 ás 21.00: O chintófano de Dorothé de Sonsoles Penadique e contacontos de María da Pontragha, no Ecomuseo do Forno do Forte. Organiza: AVSC O Quinteiro de Buño
Ás 17.30: Presentación do libroAs vellas de Mensde José Manuel Fernández Pensado, na igrexa de Santiago de Mens
Ás 19.00: Gala de fin de curso da A.C. Malante, no auditorio do Centro Cívico de Malpica. Organiza: A. C. Malante
Martes 27 de maio
Ás 12.00: Axúdame a cantar, con Felisa e Montse, no auditorio do Centro Cívico. Representación escolar para o alumnado do IES Urbano Lugrís, 5º e 6º de primaria do CEIP Milladoiro e do CEIP JRO. As/Os participantes recibirán como agasallo a publicación Agora que vén a noite de Marcos Calveiro
Venres 30 de maio
Presentación das bases e convocatoria do XX Certame de Poesía Erótica “Illas Sisargas”. Ás 12.00, no salón de plenos da casa do concello. Organiza A.C. Caldeirón
Sábado 31 de maio
Ás 19.30: Gala de fin de curso da A.C. Raigañas, no auditorio do Centro Cívico de Malpica. Organiza: A. C. Raigañas
Domingo 1 de xuño
Escora Danza
Ás 10.30: Obradoiro de Amparo Martínez, no Fogar do Pensionista da Casa do Pescador
Ás 11.30: Obradoiro de Fran Sieira, no Centro Sociocultural das Pozacas
Ás 13:30: OUSAR de Amparo Martínez, no paseo da Praia
Ás 19:00, no porto de Malpica, espectáculos:
“77.000”, do Colectivo DeXeito
“Lea”, de Adro de Baio, dirixido por Fran Sieira
(As actividades de exterior, no caso de mal tempo, trasladaranse ao auditorio do Centro Cívico)
Organiza: Escora Danza. Deputación Provincial da Coruña
Venres 6 de xuño
Ás 16.00 Maratón teatral do Obradoiro de Animación Teatral do Concello de Malpica, no auditorio do Centro Cívico. Representacións:
“Ñac-Ñac”, do grupo I do Obradoiro de Animación Teatral
“De-Función”, do grupo II do Obradoiro de Animación Teatral
“Mafia”, da Escola de Teatro ANPA As Mariñas
Sábado 7 de xuño
Ás 12.00: Presentación do libroCancioneiro Galego Serodio 1989 – 2012de Xabier Díaz, coa actuación das Cantareiras da A.C. Raigañas, no Centro Artesanía e Tradición (CAT) de Buño
Do sábado 7 ao domingo 15 de xuño
Ás 19.00: Inauguración da exposición70º aniversario da Agrupación Folklórica Aturuxo. Homenaxe ás Pandeireteiras de Mens, no espazo expositivo do Centro Cívico de Malpica
Domingo 8 de xuño
Ás 12.00 Gala de fin de curso da A.C.D. Carcaxía, no auditorio do Centro Cívico de Malpica. Organiza: A.C.D. Carcaxía
Sábado 14 de xuño
Ás 12.00: Presentación do libroSomos pandeireteirasde Mercedes Peón, Ana Romaní, Selina Otero, Andrea Nunes, María Reimóndez, Susana Sanches Arins e Natalia Balseiro, no Centro Artesanía e Tradición (CAT) de Buño
Domingo 15 de xuño
Ás 19.00: Festival 70º aniversario da Agrupación Folklórica Aturuxo. Homenaxe ás Pandeireteiras de Mens, no auditorio do Centro Cívico
O Concello de Malpica conta xa con dúas novas maquinarias ao servizo da veciñanza: un camión, adquirido por 70.785 euros, e un tractor, cun investimento de 148.588 euros. Estes vehículos están destinados a mellorar os labores de mantemento e limpeza no municipio.
A compra foi posible grazas ao convenio asinado coa Deputación da Coruña o pasado 3 de maio de 2024, a través do cal o ente provincial concedeu unha subvención nominativa de 171.659,49 euros. Esta axuda foi complementada cunha achega municipal de 45.714,05 euros, co obxectivo de completar o financiamento necesario para a adquisición dos dous vehículos.
Desde o Concello destacan que esta actuación forma parte da estratexia de renovación e mellora dos medios materiais destinados aos servizos públicos, co fin de ofrecer unha atención máis eficiente á cidadanía.
O Concello de Malpica pon en marcha unha nova campaña de concienciación cidadá sobre o correcto uso do servizo de recollida de residuos voluminosos e do Punto Limpo, co obxectivo de manter as rúas limpas e mellorar a xestión dos residuos.
Na actualidade, está a producirse unha situación insostible na que moitos cidadáns depositan mobles e outros obxectos voluminosos en calquera día da semana, dificultando a xestión municipal dos residuos. Debido a esta problemática, o Concello lembra que non é posible dispoñer de persoal exclusivamente para vixiar estas accións, polo que se fai imprescindible cumprir coas normas establecidas.
Días habilitados para a recollida de voluminosos:
Primeiro martes de cada mes
Terceiro luns de cada mes
Procedemento para a recollida: Os veciños que necesiten desfacerse de mobles ou outros obxectos voluminosos deberán solicitar cita previa nas oficinas do Concello e indicar a cantidade de residuos que van depositar. Só así se poderá garantir unha recollida eficiente e organizada.
Alternativa: Punto Limpo de Ponteceso Se algún cidadán precisa desfacerse destes residuos fóra das datas establecidas, poderá acudir ao Punto Limpo de Ponteceso, onde o servizo é totalmente gratuíto.
Desde o Concello de Malpica pedimos a colaboración de todos os veciños para evitar situacións que prexudiquen a imaxe e a limpeza do municipio. Manter Malpica limpa é responsabilidade de todos.
Este sitio utiliza cookies para mellorar a experiencia do usuario - Ocultar detalles
• Social media Facebook, Twitter e outras Redes Sociais precisan utilizar cookies para recoñecerte.
• Analytics Os datos recollidos polas cookies de Google Analytics son anónimos e só se usan para valorar a experiencia do usuario no nosa web.
• Anuncios Este sitio pode albergar publicidade propia, de afiliados, ou de redes publicitarias.
• Cookies propias Este sitio utiliza cookies propias para facilitar o acceso e mellorar a navegación e experiencia ao usuario Aviso Legal ACEPTOLeer más
Galego
Castellano
