Novas – Páxina 66 – Concello de Malpica de Bergantiños

25Mai 2018

ACTUALIDADE,Cultura,Novas

O Concello de Malpica conmemorará o 70º aniversario das dúas visitas ornitolóxicas de Francisco Bernis ás illas Sisargas

Nos meses de febreiro e xuño de 1948, o doutor en Zooloxía e fundador da Sociedade Española de Ornitoloxía SEO/BirdLife Francisco Bernis Madrazo realizou sendas visitas ornitolóxicas ao arquipélago das Sisargas. Tras ese traballo de campo, publicou dous artigos no Boletín de la Real Sociedad Español de Historia Natural que son considerados estudos ornitolóxicos pioneiros sobre estas illas. Agora, dentro da colección Costa da Morte de Edicións Embora, o divulgador ambiental Antonio Sandoval e o divulgador cultural Xosé Manuel Varela rescatan nun libro pensado para público xeral ambos textos acompañados dun manuscrito coas notas de campo nas Sisargas do propio Francisco Bernis.

Pero a reedición do libro non será a única actividade de homenaxe nesta data cando xusto se cumpren xusto 70 anos desas dúas visitas de Bernis ás Sisargas. Así, o Concello de Malpica de Bergantiños organizou para o domingo 3 de xuño uns actos conmemorativos para un persoeiro que colocou nun lugar importante a Malpica de Bergantiños dentro do mapa da ornitoloxía española.

A xornada abrirase de mañá cun percorrido turístico na que participarán as dúas fillas de Francisco Bernis, Carmen e Cristina Bernis Carro, acompañadas de Eduardo Parga, Antonio Sandoval e Xosé Manuel Varela. Nel visitarán a vila oleira de Buño, a contorna do faro Nariga e rematarán na cabo Santo Hadrián para contemplar de primeira man as Sisargas como espazo de traballo de seu pai.

Ás cinco da tarde, no salón de actos da Casa do Pescador desenvolverase o principal acto institucional de conmemoración deste «70 aniversario de Francisco Bernis nas Sisargas». Iniciarase coa presentación do libro «Francisco Bernis, Las islas Sisargas en 1948. Dos visitas ornitológicas». Na mesa de presentación, presidida polo alcalde de Malpica de Bergantiños, Eduardo Parga Veiga, participarán os editores do libro, Xosé Manuel Varela Varela e Antonio Sandoval Rey; Ramón Martí Montes, director de desarrollo institucional da Sociedad Española de Ornitología SEO/BirdLife; Álvaro Barros López, vogal da Sociedade Galega de Ornitoloxía; e Carmen e Cristina Bernis Carro.

Os actos pecharanse coa entrega de agasallos institucionais conmemorativos deste aniversario á familia de Bernis de man do máximo mandatario malpicán, Eduardo Parga Veiga.

Ler máis

24Mai 2018

ACTUALIDADE,Novas

O Concello de Malpica participa na campaña “Quere o teu mercado” co sorteo dun lote de pezas de Olería de Buño

O de Malpica é un dos numerosos mercados galegos que participan na campaña internacional “Quere o teu mercado”, coa que se pretende apoiar, promocionar e visibilizar o papel dos mercados nas vilas, fomentando así a compra do produto local e a profesionalidade dos praceiros e praceiras. En Galicia a campaña está promovida pola Dirección Xeral de Comercio e Consumo da Xunta, e desenvólvese arredor do 27 de maio, Día do Mercado.

O Concello de Malpica e as praceiras e praceiros súmanse á iniciativa cunha campaña que se levará a cabo dende ata o 26 de maio, e que rematará co sorteo de cinco pezas tradicionais da nosa Olería de Buño. Con cada compra, os clientes dos postos do mercado recibirán un boleto, que deberán cubrir cos seus datos persoais e depositar nunha urna situada na entrada do edificio. O sorteo celebrarase o día 26, ás 12 horas, no propio mercado.

O Concello de Malpica anima aos veciños e veciñas a facer as súas compras no mercado municipal, onde atoparán produtos frescos, de calidade e da nosa contorna, favorecendo así a produción de proximidade e a economía local. E ademais, ata o 26 de maio, a túa compra pode ter premio. Participa e sorte!

Ler máis

16Mai 2018

ACTUALIDADE,Novas

O programa de envellecemento activo do Concello de Malpica aposta este ano polas actividades ao aire libre

Inauguración en Malpica

Xa está en marcha un novo programa de envellecemento activo promovido pola Concellería de Servizos Sociais e impartido pola empresa Máis Porvir. Un total de 50 persoas, repartidas entre Malpica e Buño, participan nunha iniciativa que goza de gran aceptación e que, a medida que van desenvolvéndose edicións, vai incorporando novas propostas a petición dos/as participantes. Este ano, de feito, amplíase a oferta de actividades ao aire libre, incluíndo, por exemplo, xogos populares ou unha ruta de sendeirismo ata a ermida do Santo Hadrián.

Os detalles do programa que se desenvolverá durante máis dun mes déronos a coñecer a concelleira de Servizos Sociais, Marisol Blanco Gorín, e a xerente de Máis Porvir, Sandra Caamaño. Tamén asistiron aos actos de apertura o concelleiro Miguel Fernández e o alcalde, Eduardo Parga, que convidou aos participantes a desfrutar das actividades programadas e aproveitar para aprender cousas novas, xa que tamén están previstos talleres como o de decoración de vidro.

A Concellería de Servizos Sociais de Malpica aposta un ano máis por una actividade que potencia a autonomía persoal das persoas maiores, favorece a súa socialización e fomenta a súa participación social.

Asisitentes ao acto de apertura en Buño

As actividades desenvolveranse ata o 21 de xuño todos os martes e xoves, na Casa do Oleiro de Buño de 16.00 a 18.00 horas e no Centro Cívico de Malpica de 18.15 a 20.15. As persoas participantes traballarán a estimulación cognitiva e a psicomotricidade a través de actividades coma musicoterapia, pilates, xogos de palabras, sendeirismo, decoración de vidro, xogos ao aire libre ou termalismo, que é unha das propostas que goza de maior aceptación. O programa rematará cunha festa de clausura e a entrega de diplomas.

Ler máis

8Mai 2018

ACTUALIDADE,Novas

O Concello de Malpica pon en marcha un novo programa de envellecemento activo para maiores de 60 anos

A Concellería de Servizos Sociais de Malpica aposta un ano máis por una actividade que potencia a autonomía persoal das persoas maiores, favorece a súa socialización e fomenta a súa participación social. Trátase do programa de envellecemento activo, unha alternativa lúdica, dinámica e formativa dirixida ás persoas maiores de 60 anos.

O prazo de inscrición estará aberto desde o 9 ata o 14 de maio ou ata cubrir prazas. Dada a boa acollida da iniciativa en anos anteriores e dado que as prazas son limitadas, a asignación realizarase por rigorosa orde de solicitude. Os/as interesados/as poden pasar polo Departamento de Servizos Sociais (Centro Cívico) ou chamar ao número de teléfono 981 720 280.

As actividades desenvolveranse desde o 15 de maio ata o 21 de xuño todos os martes e xoves, na Casa do Oleiro de Buño de 16.00 a 18.00 horas e no Centro Cívico de Malpica de 18.15 a 20.15. As persoas participantes traballarán a estimulación cognitiva e a psicomotricidade a través de actividades coma musicoterapia, pilates, xogos de palabras, sendeirismo, decoración de vidro, xogos ao aire libre ou termalismo, que é unha das propostas que goza de maior aceptación. O programa rematará cunha festa de clausura e a entrega de diplomas. O programa completo pode consultarse no documento adxunto.

Desde a área que dirixe Marisol Blanco preténdese previr o deterioro cognitivo a través de exercicios prácticos, favorecendo así a autonomía persoal; ofrecer estratexias para un envellecemento feliz, para a mellora das relacións persoais e sociais de xeito que se optimicen as relacións das persoas participantes no obradoiro co seu entorno; aprender novas formas de comunicación e participación a través das TIC’s, previr o deterioro físico e ensinar unha serie de exercicios sinxelos para o mantemento físico que as persoas participantes poidan reproducir con facilidade no seu fogar, realizar pequenos traballos manuais cos que estimular e mellorar a coordinación motora fina, fomentar o consumo saudable ou dar a coñecer os beneficios da lectura para manter a mente activa.

PROGRAMA_ENVELLECEMENTO_ACTIVO_2018

Ler máis

28Abr 2018

ACTUALIDADE,Novas

Voluntariado de protección civil de toda a provincia participou en Buño nun curso sobre manexo de desfibriladores

O antigo centro comarcal de Buño acolle nesta xornada de sábado un curso para agrupacións de voluntarios de protección civil organizado pola Academia Galega de Seguridade Pública (Agasp), a Dirección Xeral de Protección Civil e o Concello de Malpica a través da agrupación que dirixe Iván Muíño. O obxectivo da acción formativa é que os/as participantes, un total de 24, adquiran a formación necesaria para a utilización e o manexo dos desfibriladores externos, de xeito que sexa posible, por unha banda, aumentar as taxas de supervivencia nos pacientes con morte súbida conseguindo un aceso precoz a un sistema de emerxencias médicas e, por outra, acurtar os tempos para realizar reanimación cadiopulmonar e a desfibrilación precoz.

Na presentación do curso, que é gratuíto, participaron o alcalde de Malpica, Eduardo Parga; o concelleiro de Seguridade, Miguel Fernández, e a xefa da área técnica de emerxencias, Chus Leiras, que convidaron ás/aos participantes, procedentes de agrupacións de toda a provincia, a sacar o máximo rendemento da actividade. Con esa finalidade, o programa formativo inclúe unha parte teórica e outra práctica.

Tanto os representantes do goberno local como o xefe da Agrupación de Voluntarios de Protección Civil de Malpica, Iván Muíño, expresaron o seu agradecemento á Academia Galega de Seguridade Pública por incluír o noso concello no programa de actividades descentralizadas, que permite achegar a formación ás comarcas galegas e facilitar a participación do voluntariado.

Ler máis

20Abr 2018

ACTUALIDADE,Novas

As escolas municipais de ximnasia rítmica de Malpica e Cabana participarán o 28 de abril no Día do Ritmo

O sábado 28 de abril celebrarase o Día do Ritmo, que ao longo das súas 13 edicións anteriores ten acadado gran éxito de participación e de público. O pavillón municipal de Malpica será escenario dun espectáculo de deporte e música aberto a todos os públicos, que comezará cunha exhibición de ximnasia rítmica a cargo das escolas municipais de Cabana e Malpica e rematará cunha demostración do alumnado da escola municipal de baile moderno do Concello de Malpica.

Nos últimos años, desde a área de Deportes do Concello de Malpica vense realizando un importante esforzo na promoción das modalidades deportivas de baile moderno e ximnasia rítmica. Con esa intención, á marxe de difundir a súa práctica involucrando a diferentes entidades, incluso de fóra do municipio, estableceuse a organización dun evento co obxecto de dar unha maior difusión a ditas actividades e poder ofrecer tamén un espazo específico para realizar demostracións do aprendido durante o curso.

A cita esta fixada para o día 28 a partir das 11.30 horas. A entrada é libre e de balde.

Ler máis

20Abr 2018

ACTUALIDADE,Novas

O Concello e Protección Civil de Malpica colocan trampas para a velutina en zonas axardinadas ou frecuentadas por nenos/as

A campaña de trampeo da avespa velutina iniciada hai un mes polo Concello de Malpica e a Agrupación de Voluntarios de Protección Civil xa está a dar froitos, e os primeiros datos de capturas de raíñas empezaron a chegar esta semana á Casa do Concello. En total repartíronse un centenar de trampas e líquido atraente entre apicultores, sobre todo, pero tamén entre veciñas e veciños interesados en axudar a combater a praga.

Agora o Concello de Malpica e Protección Civil dan un paso máis, e hoxe mesmo iniciaron a colocación de trampas en zonas axardinadas, nas que abundan as árbores que exercen maior atracción sobre as avespas asiáticas, como camelias ou rododendros; pero tamén nas proximidades de edificios e espazos públicos frecuentados por nenos e nenas.

O alcalde, Eduardo Parga; o concelleiro de Obras, Servizos e Seguridade, Miguel Fernández, e o coordinador da Agrupación de Voluntarios de Protección Civil, Iván Muíño, agradeceron a colaboración veciñal e reiteraron a importancia de realizar un trampeo o máis amplo posible durante a primavera para evitar a proliferación de niños nos vindeiros meses.

Ler máis

18Abr 2018

ACTUALIDADE,Cultura,Novas

Susana Seivane e Luar na Lubre serán os pratos fortes da XI Festa Galega, que se celebrará os días 17 e 18 de agosto

Luar na Lubre

Este verán a música tradicional galega volverá a inundar as rúas de Malpica con motivo da celebración da XI Festa Galega, que terá lugar os días 17 e 18 de agosto. E este ano farao cun cartel de luxo encabezado por dous dos máximos expoñentes do folclore galego de sona internacional, como vén de confirmar a Concellería de Cultura, que xa se atopa inmersa na organización do festival. A gaiteira Susana Seivane e a célebre banda Luar na Lubre, dúas iconas do panorama actual, serán os pratos fortes dunha edición na que tamén se darán cita algunhas das mellores voces da música folk da Costa da Morte.

Susana Seivane

Os asistentes á Festa Galega deste ano terán a oportunidade de gozar e bailar ao son dos mellores. E non é unha frase feita, porque o vindeiro mes de agosto pasarán pola localidade dous referentes do folk en Galicia con maior proxección fóra das nosas fronteiras. O venres 17, Susana Seivane, herdeira dunha das máis prestixiosas familias de gaiteiros e artesáns galegos, será a primeira en subirse ao escenario para ofrecer un xenuíno concerto no que fusionará o estilo máis enxebre da gaita coa influencia de novas tendencias musicais nun espectáculo cheo de frescura e orixinalidade. Ao día seguinte, o sábado 18, será a quenda da mítica formación galega Luar na Lubre. Con máis de 30 anos de traxectoria, 17 discos editados e 300.000 copias vendidas, o célebre grupo de música celta protagonizará unha auténtica viaxe ás súas orixes para sorprendernos co seu último traballo recompilatorio, co que está a colleitar grandes éxitos.

O departamento de Cultura, que dirixe Noelia Freijeiro, segue a traballar na elaboración do programa da XI Festa Galega para converter a Malpica no epicentro da música folk durante toda unha fin de semana.

Ler máis

14Abr 2018

ACTUALIDADE,Novas

O Concello de Malpica inviste case 90.000 euros na mellora de vías en Buño, Cerqueda, Barizo e Mens

O Concello de Malpica realizará un investimento de 87.754,08 euros na mellora de vías en catro parroquias: Buño, Cerqueda, Barizo e Mens. O alcalde, Eduardo Parga Veiga, asinou o contrato coa empresa adxudicataria, Construcciones Dámaso Ferreiro, nun acto no que tamén estivo presente o concelleiro de Obras e Servizos, Miguel Fernández.

Os traballos, que se acometerán en canto o tempo o permita, teñen un prazo de execución de 3 meses, e están financiados con cargo ao POS+ 2017. Un dos proxectos, adxudicado por 47.454 euros, ten como finalidade o arranxo de vías nas parroquias de Buño e Cerqueda; mentres que os 40.300,08 euros restantes corresponden ao proxecto redactado para Barizo e Mens.

Con esta actuación, o goberno municipal de Malpica mantén o seu compromiso coa mellora das infraestruturas que permiten prestar un mellor servizo á cidadanía.

Ler máis

13Abr 2018

ACTUALIDADE,Novas

O xerente do Consorcio Galego de Servizos de Igualdade e Benestar, Perfecto Rodríguez, visitou hoxe a escola infantil de Malpica

O xerente do Consorcio Galego de Servizos de Igualdade e Benestar, Perfecto Rodríguez, visitou hoxe a escola infantil de Aldeola acompañado polo alcalde, Eduardo Parga, e polo primeiro tenente de alcalde, Miguel Fernández, así como pola dirección do centro. Os representantes municipais trasladáronlle algunhas peticións para mellorar os servizos que se prestan á familia nesta escola da rede pública Galiña Azul e realizaron un percorrido por todas as dependencias.

O número de nenos matriculados na escola infantil de Malpica, que entrou en servizo no ano 2015, aumentou de xeito considerable nos últimos anos, pasándose de 28 pequenos en febreiro do curso 2015-2016 a 35 en febreiro do presente curso 2017-2018. Ademais, e á vista das solicitudes de praza xa rexistradas para o próximo curso (2018-2019), a previsión é que volva medrar o número de alumnos.

O centro malpicán manterá o próximo curso (2018-2019) a súa oferta de prazas, cun total de 41, o que sitúa a taxa de cobertura pública nese concello coruñés en escolas para nenos de 0 a 3 anos no 83,67%, moi por riba da recomendación da Unión Europea para os seus estados membros, así como da taxa de referencia do 50%.

Esa oferta permite prestar servizo, ademais, non só ao concello de Malpica, senón tamén ofrecer recursos para facilitar a conciliación da vida laboral e familiar a pais e nais doutros concellos da área que teñen elevada demanda de prazas, que carecen de escolas públicas, como Laxe, ou que non contan con centros da rede A Galiña Azul, como Cabana de Bergantiños.

Ler máis