Síguenos en
gl_ES
Tempo Malpica de Bergantiños
Sábado 20°
14°
Domingo 17°
14°
Luns 17°
14°
tiempo.com   +info
  1.  
  2. ACTUALIDADE
  3. Novas

Novas

5Set 2015

A Concellería de Obras e Servizos acondiciona o tramo do Camiño dos Faros que atravesa o municipio

Na vila malpicá está situado o Km 0 da ruta que remata en Fisterra
540-f-foto

A Concellería de Obras, Servizos e Seguridade de Malpica está a traballar no acondicionamento do tramo do Camiño dos Faros que atravesa o municipio. Segundo informou o concelleiro delegado da área, Miguel Fernández, nos tramos nos que non é posible empregar maquinaria, e que supoñen un total duns 3 quilómetros de lonxitude, a limpeza estase a realizar a man por parte da brigada municipal. O concelleiro Miguel Fernández avanzou que os traballos quedarán rematados a vindeira semana, co cal o tramo malpicán estará listo para a próxima edición da ruta organizada.

 

En Malpica, de feito, sitúase o Km 0 do Camiño dos Faros, que se estende ata Fisterra pola beira do mar ao longo de 200 quilómetros, e que pasa por todos os faros dese treito da Costa da Morte e outros lugares de interese. A primeira etapa abrangue dende o porto de Malpica ata a praia de Niñóns, cun total de 22 quilómetros ao longo dos cales se divisan ata media ducia de praias, as Illas Sisargas e Punta Nariga.

4Set 2015

Case 7.000 persoas visitaron este verán o Forno do Forte

O de Buño é un dos principais reclamos museísticos da Costa da Morte durante todo o ano
540-f-foto

Un total de 6.936 persoas visitaron o Ecomuseo do Forno do Forte de Buño dende o 1 de xuño ata o 31 de agosto. Este último, como é habitual dende a apertura ao público da instalación no ano 2006, foi o mes de maior afluencia cun total de 3.908 persoas, e con picos que superaron as 350 en determinados días. O xerente do ecomuseo, Paco Doval, salientou o interese que esperta o Forno do Forte, e o mundo da olería en xeral, non só durante o verán, senón ao longo de todo o ano. De feito, o de Buño foi o recurso turístico da Deputación Provincial da Coruña máis concorrido durante a Semana Santa na Costa da Morte, e durante o curso escolar pasaron por el un total de 1.758 nenas e nenos de 31 colexios da provincia.

 

Os visitantes locais son maioría. Malpica e o municipio de procedencia da porcentaxe máis ampla, seguido de A Coruña, Madrid e Santiago. Por comarcas, Bergantiños e a Costa da Morte achegan o maior número de usuarios. Dentro de Galicia, a provincia que leva a palma é A Coruña, e por comunidades autónomas o ránking está liderado por Madrid, seguida de Cataluña, Valencia e Castela-León, estas dúas moi igualadas. Este verán, segundo indicou Paco Doval, notouse un aumento de visitantes de Francia, que foi o país europeo con máis presenza no ecomuseo seguido por Italia, Inglaterra, Escocia, Alemaña e Suíza. Tamén se rexistrou un incremento de persoas procedentes de Sudamérica.

 

O Forno do Forte seguirá aberto durante o mes de martes a sábado de 11 a 14 e de 16 a 18 horas, e os domingos de 10 a 14 horas.

 

3Set 2015

O Concello de Malpica amplía ata o domingo o servizo de salvamento e socorrismo nas praias de Area Maior e Canido

A Concellería de Obras e Servizos vén de reparar a escaleira de acceso ao areal de Beo para mellorar a seguridade dos usuari@s
540-f-foto

O Concello de Malpica amplía ata o domingo o servizo de salvamento e socorrismo nas praias de Area Maior e Canido, segundo informou o concelleiro de Obras, Servizos e Seguridade, Miguel Fernández. Á vista das previsións meteorolóxicas e da elevada afluencia que se agarda para a fin de semana, o Concello de Malpica optou por garantir a seguridade e prorrogar uns días os contratos dos seis socorristas, que empezaron a traballar o 20 de xuño.

 

Este verán o servizo reforzouse grazas á colaboración da Agrupación de Voluntarios de Protección Civil, que se sumou á vixilancia as fines de semana, e á disposición dun maior número de medios materiais. O equipo inclúe unha embarcación, tubos de rescate, boias torpedo, un taboleiro espiñal para a inmobilización de posibles lesións medulares, un desfibrilador e un taboleiro de rescate innovador, xa que ao ser inchable é máis lixeiro e polas súas dimensións permite realizar vixilancias dinámicas pola praia.

 

O servizo de salvamento estará operativo esta fin de semana nas praias de Area Maior e Canido en horario ininterrompido de 12 a 20. Nas praias do municipio que non dispoñen de socorristas hai aros salvavidas e a sinalización correspondente para que os usuarios tamén poidan gozar delas.

 

A Concellería de Obras, Servizos e Seguridade acometeu, así mesmo, ao longo do verán, unha serie de obras de acondicionamento dos areais, fundamentalmente orientadas a garantir a seguridade dos usuarios. Neste sentido, a última actuación que se levou a cabo foi a mellora da escaleira de acceso á praia de Beo, o que permitiu reducir a perigosidade da baixada.

 

2Set 2015

A conselleira de Sanidade visitou as obras do centro de saúde de Buño

O edificio está practicamente rematado e prevese que entre en servizo entre finais deste ano e principios do que vén
540-f-foto

A conselleira de Sanidade, Rocío Mosquera, visitou hoxe as obras do centro de saúde de Buño, unhas instalacións completamente novas que unha vez en funcionamento poderán atender a unha poboación de ao redor de 1.800 persoas.

 

O edificio -cofinanciado nun 50% por fondos do Estado, dentro do Plan de Desenvolvemento Rural Sustentable- ten un importe de 624.810 euros, e a superficie que se construíu é de 524 metros cadrados. Contará cunha área médica con tres consultas de medicina xeral e unha consulta de enfermería; e unha área de administración cun arquivo, almacéns e outros servizos comúns, necesarios para o correcto funcionamento do centro.

A obra de construción comezou o pasado mes de febreiro e a empresa agarda tela rematada en outubro. Despois, a Consellería de Sanidade e o Concello de Malpica acometerán os traballos de urbanización da parcela, que inclúen a construción de beirarrúas, zona de aparcamento, accesos e áreas axardinadas. Ao mesmo tempo procederase ao equipamento, que está nestes momentos en fase de licitación, polo que as previsións do departamento autonómico son que o novo centro de saúde entre en servizo entre finais deste ano e principios do que vén.

O de Buño foi o primeiro dunha serie de 15 centros de saúde cuxas obras están xa en marcha ou a piques de empezar, e que supoñen un investimento previsto neste ano 2015 de 20,3 millóns de euros. Estes centros virán a sumarse aos 20 xa rematados e postos en funcionamento, e aos 9 reformados, así como 2 novos consultorios: entre todos eles, prestan servizos de Atención Primaria a 300.000 cidadáns.

“Así, nun momento economicamente tan difícil, na maior crise económica coñecida, fomos quen de buscar financiamento para mellorar as infraestruturas, non só de atención primaria, senón tamén dos hospitais”, observou a conselleira.

1Set 2015

O banco de alimentos do Concello de Malpica e a Fundación Amigos de Galicia mellora os fogares de dúas familias

O servizo cumpriu este verán dous anos en funcionamento e ten nestes momentos un total de 21 familias usuarias
540-f-foto

O banco de alimentos do Concello de Malpica de Bergantiños, xestionado pola Fundación Amigos de Galicia e a Concellería de Servizos Sociais, está a mellorar os fogares de dúas familias. No mes de agosto facilitouse un colchón a un matrimonio usuario e amoblouse por completo a vivenda dunha familia monoparental con dous fillos a cargo. O banco de alimentos achegou os mobles e o Concello de Malpica adquiriu os electrodomésticos.

 

Nos dous anos que leva en funcionamento (cumpríronse o 19 de xullo), o banco de alimentos do Concello de Malpica ten contribuído á mellora das condicións de habitabilidade de varios fogares. Nestes momentos o servizo conta con 21 familias usuarias que todos os meses, á parte das necesidades específicas que se poidan atender, reciben alimentos básicos. Na última entrega, á parte de todo tipo de produtos non perecedoiros, os paquetes incluíron polo, peixe, tomates, pementos, froita e salchichas. A concelleira de Servizos Sociais, Marisol Blanco; o concelleiro de Obras, Servizos e Seguridade, Miguel Fernández, e o alcalde, Eduardo Parga, supervisaron o reparto.

 

 

UD Cerqueda

O banco de alimentos contará a partir de agora, ademais, coa colaboración da Unión Deportiva Cerqueda. Para empezar, o club destinará os 379 euros recadados no Torneo Solidario Os Petóns á adquisición dos produtos con máis demanda ou que máis escasean nestes momentos. Pero dende a xunta directiva xa se fixo pública a intención de ampliar esa colaboración a todo o ano.

 

Tanto o alcalde, Eduardo Parga Veiga, coma a concelleira de Servizos Sociais, Marisol Blanco Gorín, agradeceron o xesto solidario da UD Cerqueda e valoraron moi positivamente o convenio coa Fundación Amigos de Galicia, xa que a atención ás familias con máis necesidades é unha prioridade para o goberno municipal.

 

31Ago 2015

O Concello de Malpica e a Asociación Protectora de Animais Gatocán colaboran no control dunha colonia de gatos vagabundos

Para evitar que a colonia siga aumentando os felinos son castrados, e para que non haxa problemas de hixiene son aloxados nunha caseta especialmente deseñada para eles
540-f-foto

O Concello de Malpica e a Asociación Protectora de Animais Gatocán veñen de asinar un convenio para o control dunha colonia de gatos vagabundos que estaba a provocar molestias entre os residentes da zona de Canido.

 

Mediante o acordo, voluntarios da protectora encárganse de capturar aos felinos e levalos ao refuxio de Gatocán para proceder á súa castración. Posteriormente, os gatos son trasladados de novo a Malpica para integrarse nunha colonia controlada que estará situada nunha caseta especialmente deseñada para eles que xa está instalada a poucos metros da praia.

 

A caseta foi inaugurada onte, e xa aloxa aos seus primeiros inquilinos despois de ser desparasitados e castrados. O interior está preparado para que os felinos poidan durmir e comer, e será o propio Concello de Malpica o que se encargará de facilitarlles a alimentación de xeito controlado. Neste sentido, dende o Concello e Gatocán pídese aos veciños e veciñas que non dean de comer aos gatos, xa que estas prácticas só contribúen a que proliferen cada vez máis e a que se produzan os problemas de hixiene que xa teñen provocado as queixas da cidadanía.

 

Segundo os cálculos iniciais, os voluntarios de Gatocán terán que dar captura a máis de corenta gatos. A protectora, que xa ten experiencia neste tipo de prácticas noutros concellos galegos, considera que esta é a forma máis “civilizada” de poñer fin ao problema, xa que, por unha banda, permítese que os gatos sigan vivindo na zona, e, por outra, “empezan a adquirirse bos costumes que, ademais de mellorar a calidade de vida dos animais, facilitan a convivencia”.

 

O Concello de Malpica faise cargo dos gastos de desprazamento, castración e construción da caseta, o cal pode supoñer, en total, arredor dos 1.500 euros. 

 

30Ago 2015

Recaudados 379 euros no Torneo Solidario Os Petóns

O Boimorto proclamouse campión do trofeo organizado pola UD Cerqueda
540-f-foto

O Boimorto proclamouse campión do Torneo Solidario Os Petóns, organizado pola Unión Deportiva Cerqueda coa colaboración do Concello de Malpica de Bergantiños. O equipo anfitrión foi o segundo clasificado, e o Baíñas quedou terceiro. O alcalde de Malpica, Eduardo Parga, participou na entrega dos galardóns, tres pezas de olería de Buño doadas polo propio Concello.

Pero o máis importante non foi a competición, senón o carácter solidario do trofeo. A recadación entre rifas e cantina ascendeu a 379 euros, que se destinarán integramente ao banco de alimentos do Concello de Malpica, xestionado pola Fundación Amigos de Galicia e do que se benefician 21 familias do municipio.

Grazas á UD Cerqueda, aos equipos participantes e ao público pola súa solidariedade!

30Ago 2015

Multitudinaria despedida do mes de agosto

Teatro, música tradicional e rock encheron de animación a tarde-noite do sábado
540-f-foto

Veciños de Malpica e visitantes ofreceron unha despedida multitudinaria ao mes de agosto. Centos de persoas participaron nas distintas actividades culturais e deportivas que tiveron lugar na tarde ? noite do sábado, dende o Torneo Solidario Os Petóns no campo de fútbol de Xaviña (Buño) ata o concerto de Five Strings Band na terraza do pub Leño (Malpica).

 

Especialmente multitudinaria foi a última función do Retablo de Fantoches Rafael Dieste. Nenos e nenas, e tamén moitos papás e mamás, congregáronse no paseo marítimo ás 20.30 horas para desfrutar coa representación de “As mil e unha noites”, un dos últimos espectáculos de Teatro dos Ghazafelhos, que resultou todo un éxito e deixou aos asistentes con ganas de máis.

Pouco antes das 22.00 horas, en plena rúa principal, daba comezo outro espectáculo que reuniu a numeroso público, entre o que se atopaban o alcalde, Eduardo Parga, e o concelleiro Miguel Fernández. A Agrupación Folclórica Aturuxo, que este ano celebra o seu 60º aniversario, é unha entidade coruñesa con lazos co municipio malpicán grazas ao grupo de pandereteiras de Mens que se integraron nel a principios dos anos setenta. A actuación de música e baile, que se prolongou durante máis dunha hora, foi moi aplaudida.

 

Tamén se quedaron con ganas de máis os asistentes ao concerto da banda ferrolá Five Strings Band organizado polo pub Leño no paseo marítimo. O grupo do mítico Tony Torres demostrou por que está considerado como un dos mellores de Europa no seu estilo.

29Ago 2015

A Xunta de Galicia inviste máis de 6 millóns de euros en tres grandes obras que mellorarán substancialmente a calidade dos servizos públicos en Malpica

A escola infantil de Aldeola entrará en funcionamento en setembro, e antes de fin de ano estarán rematados o centro de saúde de Buño e a EDAR de Malpica
540-f-foto

O 2015 marcará un antes e un despois na calidade dos servizos públicos aos que ten acceso a veciñanza do municipio de Malpica de Bergantiños. Grazas ao esforzo inversor da Xunta de Galicia, este ano poderán entrar en funcionamento tres grandes infraestruturas que darán resposta a tres vellas demandas veciñais: a escola infantil de Aldeola, o centro de saúde de Buño e a estación depuradora de augas residuais (EDAR) de Malpica, que supoñen un investimento total de 6,4 millóns de euros.

 

As obras do centro de saúde de Buño están moi avanzadas, e todo indica que poderá entrar en servizo este mesmo ano. O proxecto, cofinanciado nun 50% por fondos do Estado dentro do Plan de Desenvolvemento Rural Sustentable, ten un orzamento de 624.810 euros. O novo edificio sanitario, que constrúe a empresa Orega SL, terá unha superficie construída de 524 metros cadrados, nos que albergará un área médica con tres consultas de medicina xeral, unha consulta de enfermería, unha sala polivalente e unha área de administración con arquivo, almacéns e outros servizos comúns. O centro de saúde poderá atender a unha poboación de 1.800 persoas de Buño e das parroquias máis próximas. O resto da cidadanía seguirá sendo atendida no centro de saúde de Malpica.

 

Moito máis avanzada está a escola infantil de Aldeola. De feito, só falta o equipamento, polo que entrará en servizo nas vindeiras semanas. Neste caso, a obra foi cofinanciada polo Fondo Europeo de Desenvolvemento Rexional (Feder), tras o convenio asinado polo alcalde, Eduardo Parga, e a conselleira de Traballo e Benestar, Beatriz Mato. O Consorcio Galego de Igualdade e Benestar adxudicou os traballos á empresa Atlántica de Construcción y Medio Ambiente SL por un importe de 354.175 euros. A escola infantil de Malpica contará con 3 unidades, polo que dará cabida a 41 nenos e nenas de cero a tres anos de idade. O novo edificio terá dúas plantas. Na baixa estarán as aulas, un espazo de usos múltiples, cociña e aseo; mentres que na planta alta emprazaranse a sala de profesores, o despacho de dirección e unha zona de xogos.

 

Para finais deste ano está prevista, ademais, a entrada en funcionamento da EDAR de Malpica, unha importante infraestrutura que solucionará de xeito definitivo os problemas de saneamento da vila. A obra está financiada pola Consellería de Medio Ambiente, Territorio e Infraestruturas da Xunta e o Feder (Fondo Europeo de Desenvolvemento Rexional), que achega o 80% dos 5,4 millóns de euros consignados para a obra, e da execución encárgase a UTE Copasa & Veolia Water Systems Ibérica. A EDAR situarase no extremo sur do peirao e poderá dar servizo a máis de 7.000 habitantes. A partir da conclusión dos traballos, a UTE continuará durante un ano coa explotación en probas da nova infraestrutura.

 

28Ago 2015

A Ludoteca de Malpica pechou as súas portas

A nova escola infantil, que entrará en funcionamento nas vindeiras semanas, permitirá mellorar o servizo que se viña prestando ás familias dende hai 13 anos
540-f-foto

Esta semana pechou as súas portas a Ludoteca de Malpica, un servizo municipal de atención ás familias que viña funcionando regulamente na planta baixa da casa consistorial dende febreiro do ano 2002. O centro, tal como figura no seu regulamento de réxime interior, naceu para atender á poboación infantil de 2 a 12 anos de idade co obxectivo de “potenciar o xurdimento dunha actividade lúdica favorecedora do desenvolvemento mental, psicomotor, afectivo e sensorial do neno, así como posibilitar o acceso ao mundo da actividade lúdica de aqueles sectores cun entorno sociocultural menos favorecido”. As súas 15 prazas estaban ocupadas polos nenos e nenas máis pequenos, que a partir de agora terán a posibilidade de acceder a un servizo más amplo na nova escola infantil de Aldeola. Os usuarios e usuarias da ludoteca e as súas monitoras celebraron unha festa de despedida con xogos e merendola.

 

A entrada en funcionamento da nova escola infantil, prevista para as vindeiras semanas, permitirá ampliar e mellorar o servizo que se viña prestando ás familias na ludoteca municipal. De feito, esta nova infraestrutura viña sendo reclamada polas nais e pais dende hai moito tempo. A escola infantil de Malpica contará con 3 unidades, polo que dará cabida a 41 nenos e nenas de cero a tres anos de idade. O novo edificio terá dúas plantas. Na baixa estarán as aulas, un espazo de usos múltiples, cociña e aseo; mentres que na planta alta emprazaranse a sala de profesores, o despacho de dirección e unha zona de xogos.

 

Segundo a planificación da Consellería de Traballo e Benestar, nos primeiros días de setembro contactarase coas familias das nenas e nenos matriculados para realizar entrevistas individuais, e antes do comezo da actividade ordinaria celebrarase unha xornada de portas abertas.

Página 80 de 127« Primera...102030...7879808182...90100110...Última »