Dolmen Pedra da Arca

Pedra da Arca data do período en entre o 3500 e o 2700 a. de C., a fase de máximo esplendor da cultura megalítica. Aínda se conserva parte da mámoa (terra que recubría o dolmen), na que se aprecian os restos dunha coiraza de pedras.

É un dos dolmens máis grandes de Galicia, con cámara poligonal e corredor orientado cara ao leste. Consta dunha pedra de cuberta, que está partida á metade (o negativo do barreno aínda é visible no centro da liña de fractura) e seis chantos verticais que lle serven de soporte.

A cuberta ten unha lonxitude de 4 metros por un ancho de 1’80 metros, cun grosor medio de 70 cm. En canto aos chantos, o máis alto mide 2’5 metros por 1’90 metros de ancho e o máis pequeno, 1’90 metros de alto por 1 metro de ancho.

Se es máis de lendas e de misterio, has de saber que a tradición conta que unha moura construíu Pedra da Arca. Fíxoo carrexando as pedras na cabeza mentres fiaba e daba de mamar a un neno.