• ACTUALIDADE,Novas

O Concello de Malpica convida á hostalería local a participar nun concurso de tapas de temática pesqueira

Os empresarios do sector interesados poden inscribirse ao longo desta semana no Centro Cívico ou no correo electrónico concellodemalpica@gmail.com

As concellerías de Promoción Económica e Turismo de Malpica unen as súas forzas para poñer en marcha unha nova iniciativa que unirá tres sectores fundamentais na economía local: a pesca, a hostalería e a olería. O 1º Concurso de Tapas Malpica sabe a Mar nace, de feito, coa finalidade de impulsar o turismo enogastronómico coincidindo co inicio da temporada de verán, e, por outro lado, de poñer en valor a tradición pesqueira da vila malpicá.

Segundo a proposta presentada pola concelleira de Promoción Económica, Pilar Doldán, nun primeiro encontro coa hostalería local, o concurso celebraríase nos primeiros días de xullo, coincidindo con fin de semana, sempre e cando se reúna un número mínimo e suficiente de participantes como para poder deseñar unha ruta. Malpica sabe a Mar pretende diferenciarse doutras iniciativas semellantes incluíndo o peixe como ingrediente de todas as tapas, o que permitirá, por unha banda, poñer en valor o produto local e o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que incluiría a ruta sería a olería, xa que para a ocasión elaboraríanse pratos artesanais que se repartirían entre os establecementos participantes.

O Concello de Malpica, tal como explicou a concelleira de Promoción Económica, encargaríase da organización, a promoción e o subministro de material promocional aos locais.

Os interesados en participar poden inscribirse ou solicitar máis información a través do correo electrónico concellodemalpica@gmail.com ou chamando ao número de teléfono 610 553 362. O prazo estará aberto durante toda esta semana.

• ACTUALIDADE,Novas

A Asociación Cultural Caldeirón e o Concello de Malpica presentan o único Certame de Poesía Erótica de España

O alcalde, Eduardo Parga, e o presidente da entidade organizadora, Paco de Tano, reiteran o seu apoio ao concurso e agardan que siga medrando

O alcalde de Malpica, Eduardo Parga, e o presidente da Asociación Cultural Caldeirón, Paco de Tano, presentaron hoxe a 11ª edición do Certame de Poesía Erótica Illas Sisargas, que ten o apoio total do Concello “porque cremos nesta iniciativa e esperamos que siga indo a máis, como ata agora”. Así o asegurou o rexedor, que lembrou o nacemento do certame coincidindo coa súa etapa de concelleiro de Cultura e asegurou que agora recolle o testemuño dende a Alcaldía “para que as persoas que fan este tipo de literatura teñan un foro no que expresarse e nós poidamos darlles o noso recoñecemento”.

O presidente de Caldeirón agradeceu ese apoio a un certame que supón unha diferenciación e que xa está a pasar á historia da literatura galega grazas á colección de libros editados con todas as obras premiadas. “Hoxe por hoxe podemos dicir que é unha colección que non hai en ningún outro sitio de España e non sei se a nivel Europeo. En España somos un referente, e a nivel da literatura galega xa non digamos”, subliñou Paco de Tano. Pero esa diferenciación tamén implica facer un labor constante de promoción “para que os escritores participen. Nesta 11ª edición xa entramos na adolescencia, e iso quere dicir que imos medrando”.

O prazo de inscrición estará aberto dende mañá ata o 30 de setembro. Os interesados poden enviar as súas obras ao Concello de Malpica (Avda. Emilio González López, 1-15113 Malpica de Bergantiños), indicando no sobre “XI Certame de Poesía Erótica Illas Sisargas”. O fallo farase público coincidindo coa Cea das Letras, na primeira fin de semana de novembro. O Concello de Malpica financia a edición da obra gañadora e o premio, dotado con 1.000 euros.

Descarga as bases aquí.

Relación de gañadores das edicións anteriores:

1.       “Arredor do teu corpo”, Antonio García Teijeiro

2.      “Baile Átha Cliath”, Alberte Momán

3.      “Xoguetes póstumos”, Enma Pedreira

4.      “Rúa da cancela”, Eli Ríos e Eduardo Estévez

5.      “Amantes”, María Lado

6.      “Carnia Haikai”, Elvira Riveiro

7.      “Chamádeme Eva”, Mercedes Leobalde

8.      “Dominio público”, Ramón Neto

9.      “O episodio”, Verónica Martínez Delgado e Alberte Momán

10.  “A razón do perverso”, Mário J. Herrero Valeiro

• ACTUALIDADE,Novas

A Agrupación de Voluntarios de Protección Civil de Malpica conta cun traxe específico para a loita contra a vespa velutina

A Agrupación de Voluntarios de Protección Civil de Malpica de Bergantiños recibiu hoxe pola mañá un traxe específico para a loita contra a vespa velutina, nun acto ao que asistiron o alcalde, Eduardo Parga; o concelleiro de Seguridade, Miguel Fernández, e o coordinador de Protección Civil, Iván Muiño. A entrega coincidiu cunha xornada formativa organizada pola Academia Galega de Seguridade Pública da Consellería de Presidencia, a través da cal téntase conseguir que as persoas que traballan na xestión das emerxencias conten cos mellores medios e traballen en condicións óptimas.

O delegado territorial da Xunta na Coruña, Diego Calvo, que fixo entrega dos traxes aos representantes de 31 concellos da provincia, incidiu na importancia da formación e de contar con equipamentos axeitados, dous dos piares para que os grupos de emerxencias poidan ofrecer un servizo óptimo á cidadanía.  Grazas aos traxes hoxe pódese levar a cabo con seguridade a destrución e retirada de niños por parte das asociacións de voluntarios de Protección Civil dos concellos onde esta especie estea actuando ou se prevea un posible avance.

Dende a administración autonómica insístese na importancia da coordinación entre as diferentes administracións na loita contra a vespa velutina e o esforzo que está a realizar a Xunta para facer fronte a este problema. Neste sentido, Diego Calvo lembrou que a Consellería de Medio Rural retirou ou inactivou o pasado ano máis de 5.600 niños desta especie en 170 concellos de toda Galicia. Na provincia da Coruña retiráronse 1.979 niños.

Cando un cidadán localiza un destes niños ten que chamar ao 012 para alertar da súa presenza, dando a localización máis exacta do mesmo e a súa descrición de cara a que os servizos de emerxencia poidan confirmar se se trata ou non dun niño de esta especie, que son grandes e redondos, están colgados en zonas altas e son de cor amarela.

• ACTUALIDADE,Novas

O Concello de Malpica estrea o Fondo Lugrís cunha exposición conxunta de Xulio Maside, Xoán Pardiñas e Fernando Riveiro

“odesexo” enche de contido a sala circular do Centro Cívico

O Centro Cívico suma un novo espazo expositivo. A sala circular da segunda planta convértese no Fondo Lugrís coa intención de albergar unha mostra permanente das obras de arte adquiridas polo Concello de Malpica de Bergantiños ao longo dos últimos anos e das que poidan incorporarse no futuro. Dende hoxe pola mañá, o Fondo Lugrís acolle unha mostra conxunta de tres homes imprescindibles da pintura galega actual. “odesexo” é un proxecto plástico e literario asinado por Xulio Maside, Xoán Pardiñas e Fernando Riveiro, pero tamén por Ramón Neto, Verónica Martínez, Lino Braxe, Emma Pedreira, Eli Ríos, Eduardo Estévez, Mercedes Leobalde, Alberte Momán, Antonio G. Teijeiro, Miguel Mato, Paco de Tano, Xosé Iglesias e Paco Souto, é dicir, 13 dos 15 poetas que gañaron o Certame de Poesía Erótica Illas Sisargas ao longo dos seus dez anos de vida. E igual que o premio literario, a exposición “odesexo” é froito da colaboración entre a Asociación Cultural Caldeirón e o Concello de Malpica.

Dadas as limitacións do espazo, na exposición inagurada este domingo non figuran as máis de corenta obras creadas por Maside, Riveiro e Pardiñas para “odesexo”, pero si todas as incluídas no catálogo editado, no que cada obra pictórica vai acompañada dun poema. Algúns dos autores deses versos ofreceron un pequeno recital no acto de inauguración, ao que tamén asistiron os pintores Riveiro e Pardiñas. O Concello de Malpica estivo representado pola concelleira Marisol Blanco Gorín, e a Asociación Cultural Caldeirón, por Paco Souto.

A exposición estará aberta ata o 15 de xuño.

• ACTUALIDADE,Novas

300 nenos e nenas da provincia participarán en Malpica na 2ª Fase de Niveis da Federación Galega de Patinaxe

Malpica dará a benvida esta fin de semana ás promesas do patinaxe de toda a provincia da Coruña. Un total de 300 nenas e nenos de 19 clubs participarán na 2ª Fase de Niveis organizada pola Federación Galega de Patinaxe e o Club Patín Velúa de Malpica coa colaboración do Concello de Malpica, Malpica Deporte e a Deputación da Coruña. O sábado acudirán os clubs Fervello, Buxaina, Alquimia, Liceo, Maxia, Oleiros e Compañía de María; mentres que o domingo será a quenda de Aura, As Pontes, Conxuro, Radeansa, Raiola, Dominicos, Axel, Anca, Coristanco e Cristo Rey, ademais do anfitrión.

Nenas e nenos de Arteixo, A Laracha, Oleiros, Ferrol, Carral, A Coruña, Culleredo, As Pontes, Coristanco e outros concellos da provincia daranse cita no pavillón municipal para realizar as probas de nivel. A competición desenvolverase de 10.00 a 19.30 horas, tanto o sábado como o domingo. O concelleiro de Deportes de Malpica, Iago Espasandín, destacou a elección de Malpica como sede da 2ª Fase de Niveis, tanto dende o punto de vista deportivo como do turístico, xa que a vila converterase durante a fin de semana no destino de centos de nenas e nenos coas súas familias. Nese sentido agradeceu o traballo desenvolvido polo Club Patín Velúa, que ten a súa sede en Malpica, e da propia Federación Galega de Patinaxe.

• ACTUALIDADE,Novas

O Concello complementa o equipamento da nova embarcación “Malpica 2” para seguir mellorando o servizo de salvamento

Co inicio da temporada de praias á volta da esquina, o Concello de Malpica vén de realizar un importante esforzo para mellorar os servizos de salvamento completando o equipamento da nova embarcación “Malpica 2”, entregada o pasado mes de febreiro pola Xunta de Galicia dentro do plan de mellora dos medios materiais dos que dispoñen os servizos de Protección Civil de Galicia. A embarcación pneumática de salvamento e rescate, de cinco metros de eslora, dispón agora do mellor equipamento, como puideron comprobar o alcalde, Eduardo Parga; o concelleiro de Seguridade, Miguel Fernández, e o coordinador de Protección Civil, Ivan Muíño.

O Concello de Malpica instalou na nova embarcación un equipo de GPS sonda ploter 92sv, sistema VHF con megáfono, altofalantes e antena; focos led e luz xiratoria de emerxencia co correspondente panel de control.  A lancha está rexistrada na 8º lista coa matrícula CO-2-1-16.

Con este investimento, a Agrupación de Voluntarios de Protección Civil de Malpica, unha das poucas que funciona exclusivamente con persoal voluntario, é unha das mellor equipadas da zona. Deste xeito, como xa o está a facer, pode colaborar de forma permanente con Salvamento Marítimo, ademais de estar ao servizo da seguridade en todo tipo de probas deportivas náuticas que se disputan en augas malpicás ou en calquera outro punto da costa no que sexa requirido o seu apoio.

En canto a medios destinados ao salvamento no mar, o servizo conta agora con dúas embarcacións, tubos de rescate, boias torpedo, un taboleiro espiñal para a inmobilización de posibles lesións medulares, un desfibrilador e un taboleiro de rescate innovador, xa que ao ser inchable é máis lixeiro e polas súas dimensións permite realizar vixilancias dinámicas pola praia durante a época estival. Precisamente nos vindeiros días terán lugar as probas de selección dos seis socorristas que desenvolverán o seu labor na praia de Area Maior a partir do 18 de xuño.

• ACTUALIDADE,Novas

O Concello de Malpica doa 32 pezas de Olería de Buño á Fundación Eduardo Pondal para as Festiletras

O alcalde de Malpica, Eduardo Parga, e a concelleira de Servizos Sociais e Igualdade, Marisol Blanco, fixeron entrega hoxe ao alcalde de Ponteceso, Lois García Carballido, de 32 pezas de Olería de Buño que se utilizarán como agasallos institucionais durante a celebración das Festiletras. No acto, que tivo lugar no Forno do Forte, participaron tamén Paco Doval, xerente do Ecomuseo, onde foron elaboradas as pezas, e José María Varela, xerente do Padroado da Fundación Eduardo Pondal, organizadora dos actos conmemorativos do 17 de maio.

José María Varela agradeceu “moitísimo” a colaboración do Concello de Malpica, que se vén repetindo dende hai cinco anos, porque “a Olería de Buño é un agasallo que a xente valora moito”. Fontes, tarteiras, chocolateiras… Todas as pezas doadas son tradicionais e “únicas, porque non hai dúas iguais”, destacou Eduardo Parga.

Lois García Carballido agradeceu tamén a colaboración do Concello de Malpica e avogou non só por mantela, senón por ampliala a outro tipo de iniciativas que contribúan a reforzar a comarca de Bergantiños como destino turístico.

• ACTUALIDADE,Novas

Multitudinario acto de entrega dos títulos da parcelaria de Cerqueda coa presenza da conselleira de Medio Rural  

A conselleira de Medio Rural, Ángeles Vázquez Mejuto, entregou hoxe os títulos de propiedade da concentración parcelaria de Cerqueda, poñendo fin deste xeito a un proceso que durou 24 anos. “Foi moito tempo”, recoñeceu a conselleira, quen animou aos veciños e veciñas a aproveitar as vantaxes que supón esta redistribución do terreo, que suma unha superficie de 793 hectáreas e beneficia a preto dun millar de veciños.

A conselleira, acompañada polo director xeral de Desenvolvemento Rural, Miguel Pérez Dubois; o delegado territorial da Xunta na Coruña, Diego Calvo, e o alcalde de Malpica, Eduardo Parga, destacou a importancia destes procesos reorganizativos do territorio posto que redunda nunha mellora da calidade de vida dos veciños. Neste senso, destacou que das 4.585 parcelas iniciais se pasou a ter 1.849 novas fincas, aumentando a superficie media de cada parcela en preto do dobre.

Este incremento territorial beneficia directamente ás explotacións agrogandeiras, salientou Ángeles Vázquez, xa que permite ampliar a base territorial das mesmas e reducir así custos. Por iso, a reestruturación parcelaria é fundamental para que o agro galego siga estando vivo e sexa unha opción de futuro.

O alcalde de Malpica, que cualificou a xornada como histórica, destacou a iniciativa dos veciños e veciñas de Cerqueda ao impulsar unha concentración parcelaria “que marca un antes e un despois na distribución das terras e nas súas posibilidades de aproveitamento agrogandeiro”. Eduardo Parga agradeceu á conselleira de Medio Rural o impulso que se lle dou nos últimos anos á concentración parcelaria “a pesar da situación de crise” e expresou a súa esperanza de que o proceso culminado hoxe “axude a revitalizar o sector agrogandeiro na parroquia de Cerqueda e anime a outros veciños doutras parroquias a seguir o voso exemplo”.

Hoxe no Centro Cívico de Malpica estaban convocadas as máis de 400 persoas que acudiron semanas atrás a entregar os seus datos. Para as que non puideron asistir, a partir de mañá os títulos de propiedade estarán dispoñibles, de forma indefinida, na Xefatura do Servizo de Infraestruturas Agrarias (edificio administrativo de Monelos, 6º andar, na rúa Vicente Ferrer, núm. 2 – A Coruña).

• ACTUALIDADE,Novas

A conselleira de Medio Rural desprazarase mañá a Malpica para entregar os títulos da concentración parcelaria de Cerqueda

A conselleira de Medio Rural, Ángeles Vázquez Mejuto, desprazarase mañá a Malpica para asistir ao acto de entrega dos títulos da concentración parcelaria de Cerqueda, que terá lugar no Centro Cívico a partir das 11.00 horas. Xunto á conselleira estarán o director xeral de Desenvolvemento Rural, Miguel Ángel Pérez; o delegado territorial da Xunta de Galicia na Coruña, Diego Calvo, e o alcalde de Malpica, Eduardo Parga.

O acto de mañá porá fin a un proceso iniciado hai 24 anos. A Consellería de Medio Rural investiu preto de 1,8 millóns de euros para a asistencia técnica e as obras nunha superficie a concentrar de 793 hectáreas. O proxecto permitiu aos 969 propietarios reducir o número de parcelas das 4.585 iniciais ás 1.849 resultantes, acadando deste xeito unha superficie media de 3.700 metros cadrados.

Todos eses propietarios poderán recoller mañá os seus títulos, ben en persoa ou ben a través dun terceiro, pero sempre presentando o recibo que lles entregaron as técnicas da Consellería de Medio Rural hai unhas semanas. No caso de non dispoñer do recibo tamén se poderá retirar o título presentando o DNI e, no caso de tratarse dun terceiro, a autorización do titular da parcela. A partir de mañá, e para as persoas que non poidan acudir, os títulos de propiedade estarán dispoñibles na Xefatura do Servizo de Infraestruturas Agrarias (edificio administrativo de Monelos, 6º andar, na rúa Vicente Ferrer, núm. 2 – A Coruña).

• ACTUALIDADE,Novas

O Concello de Malpica pon a punto os campos de fútbol de Xaviña e A Pedra Queimada

Dentro da súa política de mantemento e mellora dos servizos municipais, a Concellería de Deportes de Malpica aproveitou os últimos días de bo tempo para poñer a punto os campos de fútbol de Xaviña (Buño) e A Pedra Queimada (Malpica), dúas instalacións que rexistran un elevado nivel de uso.

En Xaviña remataron onte os traballos de cepillado mecánico, unha operación que permite que o céspede se manteña en posición vertical. No campo da capital municipal, que é unha instalación máis antiga, antes de proceder ao cepillado foron renovadas varias zonas nas que o céspede se atopaba moi deteriorado. O concelleiro de Deporte, Iago Espasandín, e o alcalde en funcións, Miguel Fernández, supervisaron os traballos.