• ACTUALIDADE,Novas

Comeza o curso de vela de Malpica con 30 participantes

Trinta nenos/as e mozos/as de 9 a 18 anos iniciaron hoxe en Malpica o curso de vela organizado pola Deputación Provincial da Coruña coa colaboración do Concello. As sesións desenvolveranse ata o venres, en dúas quendas diarias. Malpica é a sede de Bergantiños, polo que entre os/as participantes hai rapaces de toda a comarca, que hoxe recibiron a benvida do alcalde, Eduardo Parga; o tenente de alcalde, Miguel Fernández, e o concelleiro de Deportes, Iago Espasandín.

A actividade deportiva en Malpica continúa ao longo de todo o mes coa liga de fútbol praia infantil, que rematará o 26. Así mesmo, do 22 ao 25 terán lugar os cursos de vela promovidos polo club Silfo para nenas e nenos de 8 a 16 anos, e do 29 ao 31 realizaranse os cursos de kayak do Club Náutico de Malpica para pequenos/as de 9 anos en diante.

• ACTUALIDADE,Novas

Máis de 70 nenos e nenas participan este ano na liga de fútbol praia organizado pola Concellería de Deportes

Este verán a liga infantil de fútbol praia de Malpica bate récords de participación. Máis de setenta nenos e nenas iniciaron este mes a competición, que se desenvolve na praia de Area Maior ou no polideportivo, segundo permitan as mareas. Os participantes están divididos en dous grupos en función das súas idades, que van dende os 7 ata os 15 anos.

O alcalde, Eduardo Parga, e o concelleiro de Deportes, Iago Espasandín, acompañaron aos mozos e mozas deportistas na xornada inaugural da liga, que se desenvolverá ao longo do mes de agosto. As finais disputaranse o día 26.

O concelleiro de Deportes destacou a boa acollida que ten cada ano esta actividade e amosou a súa satisfacción polo incremento do número de participantes. Así mesmo, Iago Espasandín subliñou que dende o seu departamento inténtase que nenas e nenos poidan practicar os seus deportes favoritos tamén durante o verán. Neste sentido apuntou que, á parte do campamento, a saída de aventura ou o campus de fútbol que se desenvolveron no mes de xullo, en agosto aínda queda unha ampla oferta de actividades por desenvolver. Deste xeito, do 8 ao 12 deste mes terá lugar o curso de vela organizado pola Deputación Provincial da Coruña, que ten en Malpica a sede da comarca de Bergantiños. Así mesmo, do 22 ao 25 terán lugar os cursos de vela promovidos polo club Silfo para nenas e nenos de 8 a 16 anos, e do 29 ao 31 realizaranse os cursos de kayak do Club Náutico de Malpica para pequenos/as de 9 anos en diante.

• ACTUALIDADE,Novas

Cartel de luxo para o Trofeo Solidario Os Petóns

A UD Cerqueda volve a demostrar que é máis que un club con esta iniciativa, á que se suman este ano o Bergantiños FC e a SD Sofán

A UD Cerqueda volve a demostrar que os partidos non sempre se xogan nos campos de fútbol, e que unha entidade deportiva pode ser moito máis ca iso. Un ano máis, o equipo da 2ª Autonómica impulsa a celebración do Trofeo Solidario Os Petóns, cuxos beneficios irán destinados ao banco de alimentos do Concello de Malpica. Pero este ano, ademais, o cartel é de auténtico luxo, xa que no triangular tamén participarán o Bergantiños FC e a SD Sofán.

Representantes dos tres equipos asistiron ao acto de presentación do torneo no salón de plenos do Concello de Malpica. Luis Cendán, do Bergantiños FC, louvou a iniciativa da UD Cerqueda, que ademais axudará á posta a punto dos xogadores de cara á vindeira temporada. “É un gran pracer, e noraboa ao Concello de Malpica e ao Cerqueda por promover un torneo solidario, e aquí nos terán para vindeiras edicións”, dixo. Na mesma liña manifestouse Ricardo Serrano, presidente da SD Sofán, quen ademais desexou que a recadación “sexa a máxima posible”. O capitán da UD Cerqueda, Daniel García Reixía, fixo un chamamento aos veciños e veciñas da comarca a que se acheguen o sábado ao campo de Xaviña “porque a ocasión -dixo- ben o merece”.

Por parte do Concello de Malpica asistiron o alcalde, Eduardo Parga; o primeiro tenente de alcalde, Miguel Fernández, e o concelleiro de Deportes, Iago Espasandín, que unha vez máis amosaron o apoio do goberno municipal ao deporte e agradeceron o xesto solidario da UD Cerqueda e dos outros dous equipos participantes, que serán agasallados con cadansúa peza de olería de Buño.

O calendario de partidos é o seguinte:
18.00 horas: SD Sofán-UD Cerqueda
19.00 horas: Bergantiños FC-SD Sofán
20.00 horas: UD Cerqueda-Bergantiños FC

• ACTUALIDADE,Novas

O deporte volve a amosar a súa cara máis solidaria en Malpica

A Travesía Sisargas e a UD Cerqueda colaboran co banco de alimentos que xestionan a Concellería de Servizos Sociais e Amigos de Galicia

A solidariedade e o deporte van unidos, unha vez máis, en Malpica. Grazas ás iniciativas impulsadas polos organizadores da Travesía Sisargas e pola UD Cerqueda, as 21 familias usuarias do banco de alimentos que xestionan a Concellería de Servizos Sociais e a Fundación Amigos de Galicia, e do que se benefician un total de 64 persoas, recibirán unha axuda extra.

Daniel Gambón, promotor da Travesía a Nado, vén de facer entrega ao Concello de Malpica de 200 quilos de alimentos para o banco municipal. Por segundo ano consecutivo, cada participante na proba deportiva colabora con esta iniciativa cun quilo de produtos non perecedoiros. Aos 190 quilos de arroz, conservas, leite, azucre, aceite e demais alimentos achegados polos 190 participantes, a organización engadiu outros dez, ata completar os 200. A concelleira de Servizos Sociais, Marisol Blanco Gorín, que recibiu os alimentos xunto co alcalde, Eduardo Parga, e o concelleiro Miguel Fernández, expresou o seu agradecemento a Daniel Gambón e aos participantes na Travesía Sisargas por “este xesto tan altruísta e tan importante, porque beneficia a familias que carecen dos recursos necesarios para cubrir necesidades tan básicas coma a alimentación”.

Convencidos tamén de que o deporte debe ir moito máis alá da competición, os membros da xunta directiva da UD Cerqueda tamén destinarán este ano a recadación do Trofeo Solidario Os Petóns, que se disputará este sábado 6 de agosto, ao banco de alimentos do Concello de Malpica.

• ACTUALIDADE,Novas

O Concello de Malpica tivo que repoñer nas últimas semanas os aros salvavidas que foran roubados de varias praias

Hoxe desapareceu o das Torradas, que será reposto esta mesma tarde

O salvavidas de Barizo, antes e despois de ser reemprazado

O roubo dos aros salvavidas repítese un ano tras outro nas praias de Malpica malia as chamadas á responsabilidade que realizan tanto o Concello de Malpica coma a Agrupación de Voluntarios de Protección Civil mediante os carteis informativos nos que se advirte da inexistencia de servizo de salvamento e de que, polo tanto, é especialmente importante que os aros salvavidas se atopen nas debidas condicións para poder ser utilizados en caso de necesidade.

Pero este tipo de chamamentos non sempre acada a resposta pretendida. De feito, nas últimas semanas o Concello de Malpica tivo que volver a colocar, como ocorreu en Barizo, o aro salvavidas e a corda, que estaban tirados, ou repoñelos onde foran roubados, como sucedeu en Beo e, esta mesma noite, na praia das Torradas, onde tanto o aro como os 200 metros de corda roubados serán repostos hoxe pola tarde polas Agrupación de Voluntarios de Protección Civil.

O goberno municipal de Malpica lembra que o servizo de salvamento e socorrismo, integrado por seis profesionais, funciona nas praias de Area Maior e Canido, que son as máis concorridas. Nas demais están colocados aros salvavidas, que chegado o momento poden ser fundamentais para axudar a evitar un afogamento. Por ese motivo fai, unha vez máis, un chamamento ao sentido común e ao civismo.

• ACTUALIDADE,Novas

Vinte nenos e nenas de 6 a 14 anos iniciaron no Paseo da Praia de Malpica unha nova edición de Pintar na Rúa

O obradoiro, impartido un ano máis pola artista Paula Fraile, desenvolverase durante dúas semanas

Xa está en marcha unha nova edición de Pintar na Rúa, un proxecto artístico que está axudando a recuperar espazos degradados de Malpica e que cada ano esperta máis interese. De feito, na última edición foron 14 os nenos e nenas participantes, pero este ano completáronse as 20 prazas dispoñibles e hai lista de agarda.

Hoxe tivo lugar a primeira toma de contacto entre as nenas e nenos de seis a catroce anos_que se reparten en dúas quendas (de 11 a 12.30 e de 12.30 a 14 horas)_ co espazo do Paseo da Praia no que van pintar e coa súa monitora, a artista Paula Fraile, que por terceiro ano consecutivo imparte o obradoiro. Tamén os acompañaron o alcalde, Eduardo Parga, e o concelleiro Miguel Fernández, que animaron aos participantes a seguir enchendo de cor os muros malpicáns.

Deste xeito, Pintar na Rúa seguirá cambiando a faciana urbana de Malpica. Despois da explosión de cor do ano pasado no muro situado entre os bares Submarino e Leño, as nenas e nenos pintarán nesta ocasión na mesma zona, nunha parede que xa empezaron a preparar hoxe con lixas e imprimación para poder empezar a aplicar a pintura, que é o que máis lles gusta, o antes posible. O motivo é un segredo moi ben gardado polo momento por Paula Fraile e a rapazada, pero seguirá a liña trazada o verán pasado.

• ACTUALIDADE,Novas

A Banda de Gaitas da Asociación Cultural Malante actúa este ano no Festival Intercéltico de Lorient

O Festival Intercéltico de Lorient converte cada ano esta cidade da Bretaña francesa no punto de encontro de centos de miles de persoas chegadas dende todas as latitudes para ver aos mellores intérpretes de música celta. Entre todas as actuacións que se levarán a cabo nesta edición, entre o 5 e o 14 de agosto, estarán as da Banda de Gaitas da Asociación Cultural Malante de Malpica.

A Asociación Cultural Malante naceu o 23 de agosto do ano 2003 por iniciativa dun grupo de mozas e mozos que entraran no mundo da música a través da Escola Municipal de Actividades Escénicas de Malpica. O seu principal obxectivo é a promoción da cultura tradicional galega, e froito dese interese naceu no ano 2005 a Banda de Gaitas. Na actualidade está integrada por trinta músicos de 14 a 40 anos, perfectamente compenetrados para que soen á perfección 16 gaitas, 6 tambores, 5 bombos e 4 pandeiretas. En Malpica temos a sorte de poder escoitalos de cando en vez, pero o público de Lorient terá a oportunidade de descubrilos nas actuacións que ofrecerán os días 6, 9, 10 e 11 en distintos escenarios do festival.

Despois de participar no Festival Internacional do Mundo Celta de Ortigueira e no Festival de Danzas e Músicas do Mundo de Montignac, a presenza no Festival Intercéltico de Lorient supón un soño cumprido para a asociación malpicá.

Nesta ligazón tedes a información do propio festival sobre a presenza da Banda de Gaitas da AC Malante en Lorient.

• ACTUALIDADE,Novas

Concello de Malpica e Deputación da Coruña asinan o convenio de colaboración para a Mostra da Olería

O alcalde de Malpica, Eduardo Parga Veiga, e o deputado de Promoción Económica e Empresa, José Luis García García, asinaron hoxe o convenio de colaboración entre o Concello de Malpica e a Deputación Provincial da Coruña para o financiamento da Mostra da Olería de Buño. As dúas institucións consideran “de gran interese para a provincia potenciar que o sector da olería se converta nunha actividade rendible de futuro que repercute favorablemente como medio de desenvolvemento económico, social e xerador de emprego e riqueza non só a nivel local, senón tamén provincial”, e proba dese interese é o acordo asinado.

A Deputación Provincial da Coruña achegará un total de 80.000 euros, que supoñen o 80 % do orzamento da 33ª Mostra da Olería de Buño, que se celebrará do 5 ao 15 de agosto. Este ano o programa inclúe varias novidades, entre elas actuacións musicais todos os días, unha ofrenda floral de homenaxe ao Doutor Luciano García Alén o día da inauguración, un tren turístico que funcionará as fines de semana ou a visita dos Bolechas, que coincidirá coa presentación do libro infantil “Os Bolechas visitan a Mostra da Olería”. Os postos de exposición e venda estarán situados no Parque Luciano García Alén, onde tamén se desenvolverán a maior parte das actividades. O Ecomuseo do Forno do Forte será outro dos escenarios da Mostra da Olería, coa Cocedura Tradicional como prato forte o sábado 6.

• ACTUALIDADE,Novas

O presidente de Portos de Galicia visitou as obras do porto de Malpica

O presidente de Portos de Galicia, José Juan Durán, acompañado polo alcalde de Malpica, Eduardo Parga, o concelleiro Miguel Fernández e o patrón maior, Pedro Pérez, visitou as obras realizadas polo seu departamento para mellorar os servizos aos usuarios do porto malpicán, entre elas a reconstrución do noiro da Atalaia e a urbanización do espazo ocupado pola antiga lonxa. O investimento realizado, que ascende a preto de 700.000 euros, garante a estabilidade e a seguridade do muro e permite mellorar de maneira substancial o acceso ás instalacións para camións e tráilers, dando así resposta a unha vella demanda do sector que fora trasladada a Portos polo alcalde. Ademais de gañar en operatividade, o terreo gañado permitiu crear unha nova área de aparcamento e lecer, harmonizando o espazo resultante coas actuacións realizadas no porto de Malpica nos últimos anos.

Portos de Galicia tamén investiu 22.000 euros na instalación de 15 vigas galvanizadas para as defensas de rosario (ringleiras de rodas que se colocan adosadas ao muro para protexer as embarcacións de posibles danos) e outros 70.000, financiados con fondos FEDER, na construción de dous pantaláns para embarcacións menores, aos que se accede por unha pasarela articulada de estrutura de aluminio e piso de madeira. Esta pasarela dá acceso a un pantalán adosado ao peirao de 12 metros de longo por 3 de ancho que, á súa vez, conecta con outro transversal de 29,5 x 2,5 metros. Estas dúas estruturas están realizadas con perfís principais de aluminio e piso de madeira, e contan cun sistema de flotadores que garante a súa estabilidade con mareas vivas.