• ACTUALIDADE,Novas

Visita do xefe provincial do Servizo de Emerxencias á base de Protección Civil de Malpica

O xefe provincial do Servizo de Emerxencias, Víctor Pérez, e a xefa da área técnica de Emerxencias, María Jesús Leiras, visitaron hoxe a base da Agrupación de Voluntarios de Protección Civil de Malpica dentro dunha rolda de contactos que están a manter coas diferentes agrupacións da provincia coa finalidade de coñecer os medios dos que dispoñen, as súas necesidades e as posibles dificultades ás que se enfrontan no seu labor cotián. Os representantes da Administración autonómica estiveron acompañados polo concelleiro de Seguridade e primeiro tenente de alcalde, Miguel Fernández, e polo presidente e o vicepresidente da Agrupación de Voluntarios de Protección Civil, Iván Muíño e Rubén Díaz, respectivamente, que lles ofreceron detallada información.

“A nosa intención é pulsar como están as 73 agrupacións que temos na provincia, ademais de aproveitar para visitar os GES e os parques de bombeiros”, explicou o xefe provincial, ademais de avanzar a súa intención de realizar novas visitas coincidindo “con operativos programados para ver como traballan e para estar cos voluntarios, porque tamén é unha forma de apoialos”. Víctor Pérez comentou ao respecto que o Servizo de Emerxencias ten en marcha nestes momentos unha campaña de promoción do voluntariado, e nese sentido destacou o importante labor que realizan agrupacións como a de Malpica, unha das poucas integradas exclusivamente por persoal voluntario.

Ademais de revisar as instalacións e os medios materiais da Agrupación de Voluntarios de Protección Civil de Malpica, o xefe provincial do Servizo de Emerxencias recompilou información de cara a elaboración dunha base de datos actualizada que permitirá coñecer en detalle a situación de cada agrupación e a dotación que teñen tanto de medios humanos como materiais.

• ACTUALIDADE,Novas

O goberno local de Malpica aborda co conselleiro de Política Social a mellora dos servizos aos maiores

O alcalde de Malpica, Eduardo Parga, e o primeiro tenente de alcalde, Miguel Fernández, mantiveron hoxe unha reunión co conselleiro de Política Social, José Manuel Rey Varela, dentro dunha rolda de xuntanzas orientadas a optimizar os recursos locais e autonómicos de cara a acadar melloras na atención e nos servizos sociais destinados á cidadanía.

Na reunión, celebrada en San Caetano e na que tamén participou o xerente do Consorcio Galego de Servizos de Igualdade e Benestar, acordouse continuar coa colaboración entre as dúas Administracións. Neste sentido, na reunión fíxose un balance moi positivo da posta en marcha da escola infantil e do incremento de 70 horas no Servizo de Axuda no Fogar (SAF), ata acadar as 1.878 horas actuais, que benefician a 37 usuarios/as. Na mesma liña, o conselleiro comprometeuse cos representantes do goberno municipal de Malpica a realizar un novo aumento de horas que permitirá eliminar a lista de agarda actual.

O alcalde realizou una valoración moi positiva da ampliación das horas para poder dar resposta a todas as solicitudes. Así mesmo, Eduardo Parga presentou a José Manuel Rey a posibilidade de construción dun centro de día para maiores. A este respecto, o conselleiro avanzou que o seu departamento está a traballar na posta en marcha dunha nova rede de centros sociais, unha posibilidade que estudarán ámbalas Administracións coa finalidade de ver a viabilidade de incluír a Malpica nesa rede.

• ACTUALIDADE,Novas

Chega a Malpica o proceso de participación pública na elaboración do Atlas das Paisaxes de Galicia

A Consellería de Medio Ambiente e Ordenación do Territorio, a través do Instituto de Estudos do Territorio, está levando a cabo un proceso para fomentar a participación pública na definición de paisaxes que merecen unha protección especial e tamén para establecer que medidas se deben tomar. Nese contexto, o concelleiro de Urbanismo de Malpica, Iago Espasandín, informou de que maña martes celebrarase na Casa do Oleiro de Buño un obradoiro no que se explicará o funcionamento do programa habilitado pola consellería para que toda a poboación poida participar nese proceso. As persoas e/ou entidades interesadas poden achegarse á aula de informática da Casa do Oleiro ás 18.30 horas. A entrada é libre.

A Xunta ten habilitado un portal de Internet dentro do programa de promoción da participación pública na elaboración do Atlas das Paisaxes de Galicia, previsto dentro do convenio de colaboración entre o Instituto de Estudos do Territorio da propia Xunta e o Laboratorio do Territorio do GI Territorio e Biodiversidade da Universidade de Santiago de Compostela. A través deste portal calquera persoa poche achegar os seus obxectivos de calidade paisaxística, así como a súa valoración da paisaxe e das posibles medidas de protección, xestión e ordenación da mesma.

• ACTUALIDADE,Novas

O Concello de Malpica formaliza a súa adhesión á Rede Dixital de Emerxencias de Galicia

O vicepresidente da Xunta, Alfonso Rueda, e a directora da Axencia para a Modernización Tecnolóxica de Galicia (Amtega), Mar Pereira, fixeron entrega hoxe na Estrada de 239 terminais da Rede Dixital de Emerxencias de Galicia, RESGAL, a case un cento de concellos galegos, entre eles o de Malpica de Bergantiños. Ao acto asistiron o alcalde, Eduardo Parga, e o concelleiro de Seguridade, Miguel Fernández.

A entrega realizouse no marco dunha xornada formativa sobre a rede corporativa de comunicacións móbiles dixitais de emerxencias e seguridade de Galicia, que se celebra na Agasp e conta con máis de 300 participantes, entre servizos de emerxencias municipais e supramunicipais.

RESGAL integra, por primeira vez, nun mesmo sistema a todos os colectivos que participan na resolución das emerxencias. Unha rede única para facilitar unha intervención máis efectiva e eficaz dos efectivos implicados e simplificar as tarefas de coordinación entre eles.

Precisamente, Rueda explicou que na nova rede se están a integrar de xeito progresivo todos os efectivos de emerxencias de Galicia, desde bombeiros a policías, pasando por voluntarios de protección civil, os profesionais do 061 e polos axentes que loitan contra os incendios forestais.

A directora da Amtega, Mar Pereira, destacou que RESGAL emprega tecnoloxía TETRA, a máis punteira para este tipo de comunicacións, que garante a súa dispoñibilidade cando o resto de redes de telefonía móbil se colapsa, posibilita a xeolocalización en tempo real a posición de todos os dispositivos de emerxencia, os envíos de sms a persoas ou grupos, a consulta de bases de datos ou a gravación de conversas e o encriptado das comunicacións, garantindo a súa confidencialidade.

• ACTUALIDADE,Novas

O Concello convoca o proceso de selección de dous auxiliares de policía local

Convocatoria proceso de selección de dous auxiliares de policía local para o Concello de Malpica de Bergantiños durante a época estival.

Mediante resolución de alcaldía nº 141/2016 de data de 14 de abril de 2016 se procedeu á aprobación das Bases para a selección de dous Auxiliar da Policía Local, en réxime de contratación laboral temporal, que desenvolverá o seu traballo no Servizo da Policía Local de acordo coas necesidades do servizo.

Duración contrato: dous meses (tempada estival ano 2016)

O prazo de presentación de instancias: 10 días naturais contados dende o día seguinte ó da publicación do anuncio da convocatoria no Diario La Voz de Galicia, todo isto de conformidade co establecido no punto terceiro (presentación de instancias) das bases que rexen a convocatoria.

As bases da convocatoria atópanse nas oficinas xerais do concello de Malpica (teléfono: 981-720001).

O alcalde,

Eduardo José Parga Veiga

• Descargar bases

• ACTUALIDADE,Novas

O Concello convoca o proceso para a contratación laboral temporal de seis socorristas

Convocatoria proceso para a contratación laboral temporal de seis socorristas para a unidade de socorrismo acuático que prestará o servizo de socorrismo en praias a realizar na praia Area Maior do Concello de Malpica de Bergantiños durante a época estival.

Mediante resolución de alcaldía nº 143/2016 de data de 14 de abril de 2016 se procedeu á aprobación das Bases contratación laboral temporal de seis socorristas para a unidade de socorrismo acuático que prestará o servizo de socorrismo en praias a realizar na praia Area Maior do Concello de Malpica de Bergantiños durante a época estival.

Duración contrato: dous meses e medio dende a formalización do contrato.

O prazo de presentación de instancias: 15 días naturais dende o día seguinte ao da publicación do anuncio no Diario de Bergantinos , conforme ao recollido no punto 4º das bases que rexen selección.

As bases da convocatoria atópanse nas oficinas xerais do concello de Malpica (teléfono: 981 720 001).

O alcalde,

Asdo. Eduardo José Parga Veiga

• Descargar bases

• ACTUALIDADE,Novas

Malpica acollerá o día 15 de abril un obradoiro sobre “Manexo do estrés e a ansiedade” aberto a toda a cidadanía

As persoas interesadas poden inscribirse no Departamento de Servizos Sociais ata completar as 50 prazas dispoñibles

O Concello de Malpica, en colaboración co Plan de Inclusión Social, organiza para o día 15 deste mes un obradoiro sobre “Manexo do estrés e a ansiedade”, que será impartido por unha docente do SERGAS e que está dirixido a pacientes, familiares e poboación en xeral. O obradoiro terá lugar no salón de actos do Centro Cívico, de 16.30 a 20.30 horas. Segundo informou a concelleira de Servizos Sociais e Igualdade, Marisol Blanco Gorín, o aforo está limitado a 50 persoas, polo que as interesadas deben inscribirse no Departamento de Servizos Sociais ou chamando ao 981 720 280.

Os obxectivos do obradoiro son aprender a xestionar as emocións, conseguir un manexo axeitado do estrés e da ansiedade e lograr unha adaptación óptima a calquera situación de cambio e/ou transición vital: xubilación, enfermidade, dolo, etc…

• ACTUALIDADE,Novas

O Concello de Malpica súmase á convocatoria da FEMP e chama a gardar un minuto de silencio en repulsa dos atentandos de Bruxelas

O Concello de Malpica de Bergantiños fai un chamamento aos veciños e veciñas para que se concentren hoxe, mércores 23, ás 12.00h, ás portas do Concello de Malpica en sinal de condea e repulsa a estes actos de barbarie.

O Concello de Malpica únese á dor das víctimas, ás súas familias e aos cidadáns de Bruxelas e manifesta o seu máis contundente rexeitamento e condea dos feitos acontecidos. O Concello de Mapica de Bergantiños reafirmase no compromiso inquebrantable coa vida, a  paz, a liberdade e a dignidade de todos os seres humanos.

• ACTUALIDADE,Novas

A corporación municipal de Malpica aprobou o Plan de Aforro e Investimento (PAI 2016) por 170.150,18 euros

O Concello investirá os fondos na mellora do alumeado de Barizo, Malpica, Mens e Vilanova, así como na marquesiña do Milladoiro

A corporación municipal de Malpica aprobou no pleno do xoves o Plan de Aforro e Investimento 2016 por un total de 170.150,18 euros. Todos os grupos, agás AIM, votaron a favor da proposta presentada polo goberno municipal. O Concello de Malpica destinará 46.409,77 euros á redución da débeda, e o resto, a infraestruturas. En concreto, cos fondos do PAI acometerase a segunda fase da marquesiña do Milladoiro, por 31.222,25 euros, e o proxecto de mellora do alumeado público de Barizo, Malpica, Mens e Vilanova, por 92.518,16 euros.

• ACTUALIDADE,Novas

A Concellería de Servizos Sociais de Malpica organiza unha excursión a Salamanca para as persoas maiores

O prazo de inscrición está aberto ata o 15 de abril ou ata completar as 104 prazas dispoñibles           

A Concellería de Servizos Sociais e Igualdade de Malpica organiza, como todos os anos, unha excursión para as persoas maiores. A viaxe levarase a cabo do 2 ao 6 de maio e nesta ocasión o destino será a provincia de Salamanca. Os participantes viaxarán acompañados polo alcalde, Eduardo Parga, e pola concelleira de Servizos Sociais, Marisol Blanco.

O prazo de inscrición está aberto ata o 15 de abril ou ata completar as 104 prazas dispoñibles. O prezo da viaxe é de 240 euros por persoa, que inclúe pensión completa agás o almorzo do día de partida e a cea do día de chegada. Os participantes na viaxe deben incluír nas súas equipaxes traxe de baño, gorro e chanclas, xa que o programa inclúe unha sesión de spa.

A empresa Autocares Pedro Pombo encargarase do transporte. A saída farase dende Buño ás 07.00 horas. Os horarios de recollida polas distintas parroquias darase a coñecer nos días previos á viaxe. O programa inclúe visitas a Salamanca, Ciudad Rodrigo, Peña de Francia, Alberca, Béjar, Candelario, o parque natural das Batuecas, San Martín do Castañar e Mogarraz. Neste cartel tedes máis detalles.