Síguenos en
gl_ES
Tempo Malpica de Bergantiños
Sábado 20°
16°
Domingo 19°
15°
Luns 20°
16°
tiempo.com   +info
  1.  
  2. ACTUALIDADE
  3. Novas

Novas

11Set 2017

O balance de visitas ao Ecomuseo Forno do Forte confirma o importante tirón turístico do noso concello

Forno do Forte

O balance das visitas que recibiu este verán o Ecomuseo Forno do Forte vén confirmar o importante o gran potencial turístico do noso concello. Nos últimos dous meses pasaron polo complexo etnográfico un total de 8.786 persoas: 2.154 en xullo e 6.632 en agosto. Un dos factores que influíu de maneira máis decisiva nesta notable diferenza entre ámbolos meses foi a Mostra da Olería, que, tal como indica Paco Doval, xerente do ecomuseo, “ten un tirón indiscutible que atrae a gran cantidade de público interesado na nosa artesanía”.

Desde o Forno do Forte realizan un balance positivo do verán, que é a época de maior actividade turística na contorna, e destacan que este ano non só se rexistrou un incremento de visitantes, senón tamén un maior número de excursións organizadas por empresas turísticas, asociacións e institucións. En xeral percíbese un maior interese dos turoperadores pola nosa comarca, aínda que a maioría dos visitantes continúan sendo grupos familiares ou de amigos.

Procedencia dos visitantes

En canto á procedencia do público do Forno do Forte, o 23,44% dos visitantes procedían de fóra de Galicia. Case un terzo, de Madrid, que é a comunidade con máis peso, seguida das provincias de Barcelona, Sevilla e Valencia. De feito, este ano detectouse un incremento importante de turistas procedentes de Andalucía e do Levante, que xa empezaron a destacar nas estatísticas do verán anterior. Deste xeito parece consolidarse o interese dos habitantes do sur e do leste do país por Malpica en particular e pola Costa da Morte en xeral.

SAMSUNG CAMERA PICTURES

Con respecto ao público estranxeiro, supuxo o 5,39% dos visitantes do ecomuseo, cun claro dominio dos turistas procedentes de Francia, que representan algo máis do 35% do total, seguidos por ingleses, suízos, alemáns e estadounidenses. Diminúen os visitantes suramericanos e aumentan os europeos. Neste sentido destacamos a presenza de turistas rusos, que ata este ano practicamente eran inexistentes.

O 81,17% restante de visitantes foron galegos, dominando claramente os procedentes da comarca e do resto da Costa da Morte. As cidades da Coruña, Vigo e Santiago tamén achegan unha parte importante dos turistas, así como as Rías Baixas.

En xeral, o visitante do Forno do Forte amosa gran curiosidade por coñecer a vida tradicional dos oleiros e como eran as súas vivendas, e gozan especialmente coa demostracións do oleiro do ecomuseo ou facendo as súas propias pezas no torno.

8Set 2017

Oito locais de hostalería participarán na fin de semana do 22 ao 24 deste mes na 2ª Ruta de Tapas Malpica Sabe a Mar

A Concellería de Promoción Económica e o sector hostaleiro de Malpica volven a unir as súas forzas para desenvolver unha iniciativa conxunta que enlazará tres sectores fundamentais da economía local: a pesca, a hostalería e a olería. A 2ª Ruta de Tapas Malpica Sabe a Mar celebrarase na fin de semana do 22 ao 24 deste mes, segundo se acordou na xuntanza celebrada este xoves, poñendo fin deste xeito a un verán de récord turístico na nosa vila.

Malpica Sabe a Mar pretende diferenciarse doutras iniciativas semellantes incluíndo os produtos pesqueiros como ingrediente de todas as tapas, o que permitirá, por unha banda, poñer en valor o produto local e o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que incluiría a ruta sería a olería, xa que para a ocasión elaboraranse no Ecomuseo do Forno do Forte pratos artesanais que se repartirían entre os 8 establecementos participantes: Taberna do Lesto, Restaurante O Burato, Café bar Humboldt, Café Bar Ibarra, Café bar JB, Restaurante San Francisco, Larada Bar e O Pescador.

A Ruta de Tapas Malpica Sabe a Mar arrancará o venres. As tapas serviranse nesa primeira xornada de 20.00 a 23.00 horas; o sábado, de 12.00 a 14.00 e de 20.00 a 23.00, e o domingo, de 12.00 a 14.00 horas. As tapas custarán 1,5 euros, e con cada unha entregaráselle ao cliente un rasca que lle permitirá obter premios directos.

Iniciativa dos hostaleiros

Ao longo do mes de setembro continuará a actividade en Malpica grazas á iniciativa dun grupo de hostaleiros para dinamizar as noites dos sábados. Deste xeito, o día 16 actuará na praza o Trío Platino; o 23, coincidindo coa ruta de tapas, os gaiteiros de Malante farán un percorrido polos locais, e o 30 tocará de novo na praza o Dúo Café.

7Set 2017

O Concello de Malpica convida por segundo ano á hostalería local a participar nunha ruta de tapas de temática pesqueira

HUMBOLDT

Despois do éxito acadado o ano pasado, a Concellaría de Promoción Económica de Malpica fai un novo convite á hostalería local para celebrar a segunda edición da ruta de tapas Malpica Sabe a Mar, unha iniciativa que naceu para impulsar o turismo enogastronómico e poñer en valor as tradicións pesqueira e oleira do noso concello.

A concelleira de Promoción Económica, Pilar Doldán, mantivo un primeiro encontro co sector no que a práctica totalidade dos hostaleiros e hostaleiras que participaron na anterior edición expresaron a súa intención de repetir. De todos os xeitos, hoxe xoves celebrarase unha nova xuntanza ás 17.30 horas, na Casa do Concello, á que poden asistir todos os interesados.

TAPAS 1

Malpica sabe a Mar diferénciase doutras iniciativas semellantes porque inclúe os produtos pesqueiros como ingrediente de todas as tapas, o que permite, por unha banda, poñer en valor o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que inclúe a ruta é a olería, xa que para a ocasión volverán a elaborarse pratos artesanais que se repartirían entre os establecementos participantes.

5Set 2017

Os campións mundiais demostraron a súa superioridade no I Master Futbolín Malpica, que reuniu aos mellores xogadores do país

PEDRO - JUANDI GANADORES MOVEMENTO PRO

Pedro e Juandi, gañadores absolutos en Movemento

A parella formada por Pedro e Juandi, posuidora do título do Campionato Mundial de Futbolín e Punta Umbría, demostrou no I Master Futbolín Malpica a súa superioridade, no que se proclamaron gañadores da categoría Pro, que equivale á primeira división do futbolín, na modalidade de movemento. Na categoría máster os campions foron Lupi e Pérez. Na modalidade de parado, os campións absolutos foron Alberto e Merose, mentres que en máster impuxéronse Unai e Albano.

Oitenta parellas de toda España participaron durante a fin de semana no I Master Futbolín Malpica, unha iniciativa conxunta de Recreativos A Velas Vir, Tsunami Futbolín e A.D. A Pedreira na que colaborou o Concello de Malpica. O porto converteuse no escenario dunha competición que nos permitiu ver en acción ás mellores parellas do país, e que volveu a encher de animación a nosa vila despois dun mes de agosto de récord. Os concelleiros Iago Espasandín e Miguel Fernández, xunto cos membros da organización, foron os encargados de entregar os trofeos aos gañadores.

2Set 2017

O turismo disparouse no mes de agosto en Malpica, que recibiu o dobre de visitantes que en xullo

OFICINA TURISMO (9)

Desde que abriu as súas portas, a primeiros de xullo, a nova oficina de información turística de Malpica, situada na planta baixa da casa consistorial, atendeu a un total de 3.785 visitantes. A esta cifra habería que engadir todas as persoas que pasaron pola instalación para recoller rueiros ou folletos informativos pero que non solicitaron información da técnica de Turismo que atende o servizo. En calquera caso, os números reflicten o tirón do noso concello. Agosto é o mes vacacional por excelencia, como demostran as 2.534 visitas rexistradas, fronte ás 1.251 de xullo.

O turismo nacional é maioritario. Madrid é a comunidade de procedencia do groso dos visitantes, seguida de Cataluña, Galicia, País Vasco, Valencia, Castela-León, Aragón e Andalucía. A maioría dos visitantes chegan a Malpica en coche, e en menor medida desprázanse en caravana, furgoneta, autobús, bicicleta e incluso a pé. En xullo houbo máis veraneantes que viaxaban en parella, mentres que o turismo de agosto é máis familiar con nenos. En canto aos visitantes estranxeiros, este verán supuxeron o 12%, e visitáronnos máis en xullo ca en agosto.

Entre os usuarios da oficina de turismo non só se encontran as persoas que se aloxan no noso concello, e que supoñen aproximadamente a metade das persoas atendidas, senón moitas que se atopan de paso ou que veranean noutras vilas galegas pero queren coñecer Malpica. Polo que se refire á información máis demanda, as persoas que visitan o noso concello queren saber que ver, onde comer e que rutas de sendeirismo poden realizar, tanto en Malpica como no resto da Costa da Morte.

A oficina de turismo está aberta de martes a sábados, en horario de 10.00 a 14.30 e de 16.00 a 18.30.

1Set 2017

O I Master Futbolín Malpica reunirá esta fin de semana aos mellores xogadores do país

Xogadores de toda España participarán esta fin de semana no I Master Futbolín Malpica, unha iniciativa conxunta de Recreativos A Velas Vir, Tsunami Futbolín e A.D. A Pedreira na que colabora o Concello de Malpica. Será unha oportunidade única para ver en acción ás mellores parellas do país, xa que por Malpica pasarán os actuais campións e varios excampións do Campionato Mundial de Futbolín de Punta Umbría (Huelva), que se celebra desde hai 25 anos.

O I Master Futbolín Malpica celebrarase o sábado e o domingo no porto, e ademais dunha interesante competición que se disputará mañá a partir das 11 horas e o domingo a partir das 12, tamén haberá gastronomía e música.

O prazo de inscrición remata hoxe venres ás 21 horas, e pode realizarse no teléfono 661945828. A cota é de 50 euros por parella para as dúas modalidades establecidas: movemento e parado. A organización repartirá 4.000 euros en premios.

 

FUTBOLIN

31Ago 2017

Clausurado o Torneo de Fútbol Praia e Fútbol Sala Infantil, que pecha a programación deportiva do verán

Coa entrega de medallas rematou o Torneo de Fútbol Praia e Fútbol Sala Infantil, unha das numerosas e participativas actividades organizadas ao longo do verán pola Concellería de Deportes de Malpica. O delegado da área, Iago Espasandín; o alcalde, Eduardo Parga, e o concelleiro Miguel Fernández participaron no acto de clausura, celebrado no paseo marítimo.

Na categoría de MAIORES, os resultados foron os seguintes:
1ª División4
Campión: “Bombonas rotas”
Subcampión: “Pokemon go”
2ª División
Campión: “Uno y uno siete”
Subcampión: “New team”
3ª División
Campión: “Japos”
Subcampión: “Tronzapernas”

A categoría de PEQUES quedou así:

11ª División:
Campión: “Futboleros”
Subcampión: “Invencibles”
2ª División:
Campión: “Chocolateros”
Subcampión: “Los cojos”
3ª División:
Campión: “Los magos”
Subcampión: “Los pirulos”

As nenas e os nenos de Malpica non pararon un minuto este verán, porque xa desde o mes de xuño participaron nun feixe de actividades organizadas pola Concellería de Deportes coa colaboración de entidades e empresas. Surf, kayak de mar, excursión de aventura a Asturias, Día da Bicicleta, Campamento Deportivo Costa Bergantiñá, Campus de Fútbol Costa Bergantiñá, Curso de Vela da Deputación da Coruña e o Campamento Deportivo da Deputación, que rematará mañá, completaron a oferta.

28Ago 2017

A Liga Reumatolóxica Galega instalou unha mesa informativa e organizou un concerto solidario coincidindo coas Festas do Mar

LIGA REUMATOLOXICA 2

A festa e a solidariedade non están rifadas, como demostrou este domingo a Liga Reumatolóxica Galega, que regresou a Malpica, despois da difusión da campaña “Polos teus ósos” de finais do ano pasado, para seguir informando á sociedade sobre un tipo de patoloxías que afectan ao 40% da poboación. Coincidindo coas Festas do Mar, o domingo a asociación instalou unha mesa informativa no paseo da praia na que vendeu doces e rifas para o sorteo dunha fin de semana nun balneario, ademais de ofrecer información. E ademais, para visibilizar as enfermidades reumatolóxicas entre os máis novos, organizou, coa colaboración do Concello de Malpica e a comisión de festas, un concerto solidario a cargo do grupo 7 Setenta.

O alcalde, Eduardo Parga, e os concelleiros Miguel Fernández e Noelia Freijeiro visitaron o posto informativo e agradeceron a presenza da Liga Reumatolóxica Galega en Malpica.

28Ago 2017

As Festas do Mar consolidan a vila de Malpica como unha das principais referencias turísticas da Costa da Morte

PROCESION (7)

Malpica volveu a estar abarrotada esta fin de semana. Despois dun mes de agosto de moitísima actividade cultural e lúdica, as Festas do Mar ofrecéronnos unha despedida do verán por todo o alto, con millares de persoas enchendo as rúas, as praias, o porto e mesmo os barcos que participaron na procesión marítima. As Festas do Mar, en definitiva, consolidaron a nosa vila como unha das principais referencias turísticas da Costa da Morte.

As celebracións comezaron o venres coa 17ª edición do Concurso de Barcanas e Castelos de Area “Praia de Area Maior” , que xa acadou unha participación moi alta, con máis de cen inscritos/as e un total de 17 figuras realizadas. O bo tempo contribuíu a converter a praia no centro da actividade desas primeiras horas das Festas do Mar, que continuaron ofrecendo durante toda a xornada un variado programa musical. O sábado foi o día, ou máis ben a noite, grande de Malpica. Milleiros de persoas ateigaron as rúas, os establecementos de hostalería, as atraccións das festas e a carpa da verbena, onde non cabía un alfinete durante a actuación estelar do Combo Dominicano. Malpica quedou pequena, e as ringleiras de coches e a multitude de visitantes obrigaron a establecer medidas especiais de vixilancia. A falta de incidentes foi outro dos aspectos positivos das Festas do Mar.

O domingo foi o día central das celebracións relixiosas. O tempo respectou, agás por unhas pingueiras de choiva, a procesión marítima. A Virxe do Carme viaxou a bordo do “Ladrón de Bagdag” na súa travesía anual, na que estivo acompañada por decenas de embarcacións do noso porto. E, pola noite, a gran sesión de fogos puxo o broche a unha fin de semana redonda. Ata o ano que vén!

28Ago 2017

A “Costa máxica de Malpica” gaña o primeiro premio do Concurso de Barcanas e Castelos de Area “Praia de Area Maior”

PARTICIPANTES (2)

A “Costa máxica de Malpica”, unha creación impresionante tanto polo tamaño como polos detalles, acadou o primeiro premio do Concurso de Barcanas e Castelos de Area “Praia de Area Maior”, un clásico que marca o comezo das Festas do Mar. “A balea”, inspirada na obra de Lugrís, mereceu o segundo premio, e o terceiro foi para “O arroarte”, un arroaz moi logrado. O xurado, integrado por representantes do Concello de Malpica e das asociacións de Amas de Casa e de redeiras Mar da Illa, volveu a telo moi complicado, xa que a calidade e a orixinalidade das obras vai en aumento cada ano.

O premio á mellor barcana foi para “O marítimo”, mentres que o infantil acadárono as “Tartarugas na area”. Polo que se refire ao premio especial do público, os votos depositados na urna outorgáronllo a “A barcana dos Inchopic”. O alcalde, Eduardo Parga, e os concelleiros Miguel Fernández e Iago Espasandín, entregaron os premios aos máis de cen participantes no concurso.

A elaboración das 17 figuras participantes encheu de animación durante toda a mañá a praia de Area Maior. Ás 13 horas rematou o tempo outorgado para a realización das obras e comezou a deliberación do xurado. Todos os galardoados recibiron unha peza de Olería de Buño e os tres primeiros, ademais, premios en metálico. Así mesmo, para todos os nenos e nenas participantes houbo doces.

Página 30 de 106« Primera...1020...2829303132...405060...Última »