Malpica – Páxina 17 – Concello de Malpica de Bergantiños

19Feb 2017

ACTUALIDADE,Cultura,Novas

Malpica celebra o mellor Entroido da volta

Co cocido da Asociación Cultural Raigañas entramos oficialmente no tempo de Entroido en Malpica. Serán dúas semanas repletas de actividades organizadas polo Concello en colaboración cunha ducia de entidades: Asociación Cultural Malante, ANPA Ventorrillo, ANPA do CEIP Joaquín Rodríguez Otero de Buño, Asociación de Redeiras Mar da Illa, Asociación Cultural Carcaxía, A.C.D. San Xulián, A.V. C. S. O Brizo, Asociación Cultural Raigañas, Asociación de Amigos da Mikaela, A. VV. de Leiloio, Asociación de Amas de Casa e pubs de Malpica.

O programa inclúe obradoiros, pasarrúas, concursos de disfraces, festas infantís, animación de rúa, degustacións, bailes e citas tan tradicionais coma o Concurso de Comparsas (domingo 26), Concurso de Doces de Entroido (martes 28), a Mikaela de Buño (sábado 4 de marzo), o percorrido dos Madamitos e Ghuardineros por Cerqueda, e os enterros do Faustino e o Farruco (domingo 5).

Descarga aquí o programa completo: FOLLETO ENTROIDO 2017

Ler máis

1Feb 2017

ACTUALIDADE,Novas

O Concello colabora co IES Urbano Lugrís na posta en marcha dun punto limpo no centro educativo

O alumnado do IES Urbano Lugrís vai un paso máis alá no seu proxecto educativo coa posta en marcha dun punto limpo que permitirá que os rapaces e rapazas apliquen dun xeito moi práctico os coñecementos adquiridos na aula. O alcalde de Malpica, Eduardo Parga, e o concelleiro de Obras e Servizos, Miguel Fernández, acudiron ao centro para colaborar co proxecto facendo entrega de colectores de residuos orgánicos, envases e papel/cartón. Grazas á colaboración do Concello de Malpica, Sogama achegou os primeiros recipientes para a construción do punto limpo, que neste momento xa conta tamén con colectores específicos para fluorescentes, tóner e pilas. “Se funciona ben, a idea é seguir ampliándoo no futuro, por exemplo con recollida de aceite usado”, explica Xacobo de Toro, profesor de Bioloxía e responsable do proxecto. Unha das materias que teñen que aprender os alumnos e alumnas na súa clase está relacionada cos 3R (reducir, reciclar, reutilizar), e Xacobo de Toro está convencido de que “para interiorizalo o mellor é que o fagan”.

Polo momento, os alumnos e alumnas de 4º de ESO están recibindo a formación necesaria para que sexan eles mesmos os encargados de mentalizar aos máis pequenos. O punto limpo está aberto a todo o alumnado e profesorado, e non só para que depositen os residuos xerados no propio instituto, senón tamén para que poidan traer das súas casas aqueles residuos para os que non teñen colectores específicos no lugar onde viven. O Concello de Malpica colaborará tamén coa retirada dos colectores cando estean cheos.

Ler máis

29Xan 2017

ACTUALIDADE,Cultura,Novas

O Concello envía exemplares de “Os bolechas van á Mostra da Olería de Buño” a 26 colexios e 7 bibliotecas da comarca

Sete bibliotecas e 26 centros escolares da comarca de Bergantiños están a recibir estes días exemplares de “Os bolechas van á Mostra da Olería de Buño”, un agasallo da Concellería de Educación, Cultura e Turismo, que dirixe Noelia Freijeiro Novo, para que os nenos e nenas de toda a comarca poidan desfrutar coas aventuras dos populares personaxes no noso concello.

A publicación, que foi presentada o pasado mes de agosto coincidindo coa visita dos bolechas corpóreos a Buño, fai un percorrido pola nosa tradición artesá e por algúns dos principais atractivos turísticos do municipio de Malpica da man de Carmiña, unha pequena oleira que se converte en protagonista e fío condutor da historia.

Ler máis

4Xan 2017

ACTUALIDADE,Novas

A UD Cerqueda entregou xoguetes para os nenos e nenas das familias usuarias do banco de alimentos de Malpica

A Unión Deportiva Cerqueda reforza a súa colaboración co departamento de Servizos Sociais do Concello de Malpica de Bergantiños. Na xornada de hoxe, representantes do club fixeron entrega ao banco de alimentos dun lote de xoguetes para que este Nadal os Reis Magos cheguen a todos os fogares e que “nestes días tan máxicos os nenos das familias con menos recursos non perdan o sorriso nin a ilusión”. A UD Cerqueda destinou á adquisición dos xoguetes a recadación do partido do 12 de decembro. Na entrega dos xoguetes estiveron presentes o alcalde, Eduardo Parga, o concelleiro Miguel Fernández, e un representante da entidade deportiva.

Xa é o segundo ano que a UD Cerqueda colabora coa Concellería de Servizos Sociais para que ningún neno nin nena quede sen xoguetes en Reis, pero tamén vén achegando ao banco de alimentos todo tipo de produtos adquiridos grazas á recadación do Torneo Solidario Os Petóns. Deste xeito, a UD Cerqueda reforza a súa faceta social.

Ler máis

7Dec 2016

ACTUALIDADE,Novas

O delegado territorial da Xunta supervisou as melloras realizadas con cargo ao Fondo de Compensación Ambiental

O delegado territorial da Xunta na Coruña, Ovidio Rodeiro, estivo hoxe en Malpica para analizar, nunha xuntanza co alcalde, Eduardo Parga Veiga, e o concelleiro de Obras e Servizos, Miguel Fernández, o resultado dos traballos realizados coa subvención destinada á mellora de servizos de protección do medio ambiente no municipio. Unha vez comprobada a execución destes proxectos, procedeuse á sinatura da acta de conformidade para o cobro da axuda.

O Goberno galego, a través da Vicepresidencia e Consellería de Presidencia, Administracións Públicas e Xustiza, financiou estas actuacións cunha achega de 80.660,23 euros correspondente ao Fondo de Compensación Ambiental, que permite aos concellos beneficiarse do canon eólico. O Fondo procede do canon eólico e xa leva sete anos beneficiando aos concellos galegos con explotacións eólicas a través de pequenas obras, pero moi necesarias.

Por unha banda, estes fondos serviron para a instalación por parte do concello de 40 módulos led en luminarias existentes e 12 novas luminarias led na praza de Luciano García Alén e zonas axardinadas e peonís de Buño, 57 luminarias led e un novo cadro de mando e de protección nas rúas Santa Catalina e Santa Filomena, e 64 luminarias led nas rúas Mouróns, Boa Vista, A Costa, Forno Novo e O Galo.

As novas luminarias ofrecen un alumeado público máis moderno, eficiente e respectuoso co medio ambiente. Así, con cargo ao plan impulsado desde a Xunta de Galicia, substituíronse as antigas luminarias de vapor de sodio por haloxenuros metálicos, que se caracterizan por emitir unha cor moi próxima ao branco, pola súa elevada eficiencia luminosa, un rendemento cromático óptimo e unha duración media moi elevada.

Por outro lado, parte desta axuda destinouse tamén á adquisición de colectores de vidro e lixo. En concreto, incorporáronse 36 colectores verdes de 800 litros, 15 colectores verdes de 360 litros e 10 colectores de vidro.

Ler máis

5Dec 2016

ACTUALIDADE,Novas

A iniciativa “Da cociña á mesa”, do CEIP Milladoiro, premiada pola Consellería de Educación no III Concurso de Traballo por Proxectos

A iniciativa Da cociña á mesa, do CEIP Milladoiro, vén de ser premiada no III Concurso de Traballo por Proxectos, na modalidade de Proxectos de investigación de ciclo/departamento, convocado pola Consellería de Educación. Dende o centro lembran que a aula de cociña naceu da man das profesoras Marta Couto e Sandra Cao, aínda que foi asumido de inmediato por toda a comunidade educativa: o Concello de Malpica, que facilitou as infraestruturas; a ANPA, electrodomésticos e menaxe, e o profesorado, “que tiña clara a utilidade pedagóxica dese laboratorio tan cercano que supón unha cociña”.

O CEIP Milladoiro converteuse nun colexio pioneiro con este proxecto, que botou a andar o 1 de marzo e que foi “apadriñado” por Fernando Agrasar e Carmen Verdes. Hoxe conta co seu propio blog “e xa é para nós unha dependencia máis do cole, co seu horario asignado por aulas coma os outros espazos comúns. Canto alí sucede –explican dende o centro- é curricular”. O proxecto Da cociña á mesa permite que os nenos e nenas experimenten coa medición de masas, o cálculo de densidades e volumes, a motricidade fina, a hixiene, a organización, as texturas, os etiquetados… un sinfín de coñecementos que adquiren de maneira natural, positiva e festiva.

O alcalde, Eduardo Parga, transmite os seus parabéns á comunidade educativa do CEIP Milladoiro polo premio e reitera a disposición do Concello de Malpica a seguir apoiando iniciativas que contribúen a mellorar a aprendizaxe dos nosos nenos e nenas, a traballar en proxectos de gran utilidade para a súa vida adulta e a promover políticas de igualdade.

Ler máis

30Nov 2016

ACTUALIDADE,Novas,Ofertas de Emprego

O Concello de Malpica inicia o proceso de contratación dun técnico/a de Turismo

O Concello de Malpica inicia o proceso para a contratación urxente dun/ha técnico/a de Turismo baixo a modalidade de contrato laboral temporal, así coma para a creación dunha bolsa de emprego para a contratación de técnicos/as de Turismo.

O obxecto desta convocatoria é a contratación laboral temporal (4 meses), a tempo completo, baixo a modalidade de contrato temporal de 1 técnico/a turismo. As funcións e tarefas a desempeñar serán as de Información Turística nas instalacións do Centro Cívico de Malpica, co fin de dar a coñecer a oferta turística do Concello de Malpica de Bergantiños e o seu entorno, nos términos do Programa de subvencións dirixido a concellos e agrupacións de concellos da Coruña de menos de 50.000 habitantes para financiar gasto de persoal das oficinas de turismo (BOP nº. 89 do 11 de maio de 2016), así como a Resolución pola que se aproba a concesión definitiva do programa anterior (DP0029), publicado no BOP nº 149, do 08.08.2016 e a Resolución de modificación das Bases específicas de ampliación de prazos publicado no BOP nº 222, do 23 de novembro de 2016.

A modalidade contractual será a dun contrato laboral temporal de duración determinada, por obra ou servizo determinado, e a súa duración será desde a súa sinatura ata o 30/04/2017. A persoa contratada estará obrigada a prestar a súa xornada de traballo na medida e forma requiridas polo interese do servizo, de acordo coa lexislación aplicable e as instrucións ditadas pola Alcaldía. As retribucións estipuladas para este posto son de 1.234,25 brutos (incluído tódolos conceptos salariais e pagas extraordinarias).

Podes consultar as bases completas aquí:

3. BASES TÉCNICO TURISMO

Ler máis

25Nov 2016

ACTUALIDADE,Cultura,Novas

A concelleira de Servizos Sociais pon á veciñanza de Malpica como exemplo na loita contra a violencia de xénero

Inaugurada a exposición “Por elas, por nós” coa presenza das e dos protagonistas das 12 fotografías que a integran

A concelleira de Servizos Sociais e Igualdade de Malpica, inaugurou hoxe a exposición “Por elas, por nós”, integrada por 12 fotografías protagonizadas por mulleres e homes do concello que poñen así o seu gran de area contra a violencia de xénero. No día internacional dedicado á eliminación desta lacra social, Marisol Blanco Gorín quixo poñer en valor, precisamente, a implicación da veciñanza malpicá, á que puxo como exemplo dunha loita que debe ser conxunta de toda a sociedade para evitar que se siga reproducindo.

“Esta forma de violencia comeza cada vez máis cedo. Son moitas as adolescentes que o están vivindo a mans das súas parellas, e ao non ser conscientes do que realmente sucede debemos dicirllo nós, tratar de explicarlles e de facerlles ver que esta situación non é normal. Non te quere máis por terte tan controlada, senón que está tratando de anularte, de illarte do teu círculo social para que dependas del”. Xunto a esta dura pero realista reflexión, que a concelleira de Servizos Sociais acompañou con datos, Marisol Blanco lamentou que sexa preciso sinalar unha data no calendario “para lembrarnos de que moitas mulleres son vítimas de malos tratos, sexan físicos ou psicolóxicos, ou, o que é peor e irreparable, que morran asasinadas polas súas parellas”. A concelleira fixo fincapé na necesidade de que as vítimas de violencia de xénero sexan conscientes de que o son, e instou á sociedade a axudalas a saír da situación na que se encontran.

Marisol Blanco lembrou que o 25 de novembro “é só unha vez ao ano, pero os outros 364 días debemos seguir traballando para erradicar esta lacra, debemos educar ás novas xeracións na igualdade. É o que tratamos de reflectir nesta exposición”. A concelleira de Servizos Sociais e Igualdade estivo acompañada polos seus compañeiros Miguel Fernández e Iago Espasandín, polos técnicos municipais da súa área e por moitos e moitas dos e das protagonistas da exposición, entre os que figuran a propia Marisol Blanco, o concelleiro do BNG e percebeiro Paco Souto, o cociñeiro Fernando Agrasar, a oleira Carmen Isabel e moitas outras persoas que teñen en común a súa repulsa á violencia de xénero. O acto de apertura da exposición, que permanecerá ata o Nadal no Centro Cívico, incluíu tamén a proxección do “lipdub” gravado o ano pasado e un aperitivo.

Ler máis

23Nov 2016

ACTUALIDADE,Novas

Malpica de Bergantiños, concello solidario co alzhéimer

Malpica de Bergantiños é un concello solidario co alzhéimer. Así o recoñece o diploma que recolleron onte na sede de Afaber (Asociación de Familiares de Enfermos de Alzhéimer de Bergantiños) o alcalde, Eduardo Parga Veiga, e a concelleira de Servizos Sociais, Marisol Blanco Gorín. O presidente de Afaber, Jesús Villar Antelo, agradeceu a colaboración e a sensibilidade do Concello de Malpica.

Ser solidario co alzhéimer, como recolle Ceafa, significa “contribuír a expandir a mensaxe da necesidade dunha política de Estado sobre o alzhéimer, informar aos seus cidadáns sobre a enfermidade e as súas consecuencias, promover as accións relacionadas coas súas asociacións máis próximas, facilitar a difusión desta mensaxe e concienciar á sociedade” sobre o obxectivo que se persigue.

Ler máis

22Nov 2016

ACTUALIDADE,Novas

Veciñas e veciños de Malpica volven a protagonizar os actos do Día Internacional contra a Violencia de Xénero

Despois do “lipdub” do ano pasado, que supera as 6.000 visualizacións en Youtube, homes e mulleres convértense en protagonistas da exposición fotográfica “Por elas, por nós”, que se presentará este 25 de novembro

A loita contra a violencia de xénero é unha causa que implica a toda a sociedade en Malpica de Bergantiños. O ano pasado conmemoramos o 25 de novembro cun “lipdub” protagonizado por entidades, veciñ@s e representantes políticos, e este ano son homes e mulleres de Malpica os e as protagonistas dunha exposición fotográfica que poderá verse a partir do venres no Centro Cívico. “Por elas, por nós” é o lema da iniciativa promovida dende a Concellería de Servizos Sociais e Igualdade, que dirixe Marisol Blanco Gorín, pero que implica a distintos departamentos municipais e que conta coa colaboración da Deputación Provincial da Coruña.

A exposición consta de 12 fotografías, unha por cada mes do ano, que teñen como protagonistas a homes e mulleres de distintas idades, sectores e parroquias, pero que teñen en común o seu rexeitamento á violencia de xénero. As imaxes son obra de Senén Insua Redonda, un fotógrafo que tamén se suma á causa coa súa colaboración desinteresada. Trátase de fotografías en branco e negro nas que se utiliza algún dos elementos presentes para lembrar, cun toque violeta, que estamos a conmemorar o Día Internacional contra a Violencia de Xénero.

O obxectivo, segundo explicou a concelleira Marisol Blanco, é “sensibilizar, concienciar e visibilizar a violencia que sofren as mulleres polo simple feito de ser mulleres”. A concelleira é unha das protagonistas da exposición, na que, ademais do mundo da política, están representados o mar, o agro, o ensino, a sanidade, a mocidade, a familia, a empresa… distintos sectores que integran a sociedade do noso concello.

A inauguración da campaña “Por elas, por nós” terá lugar o día 25, ás 13 horas, no Centro Cívico. Ademais da apertura da exposición por parte do alcalde, Eduardo Parga, e da concelleira de Servizos Sociais e Igualdade, está prevista a proxección do “lipdub” gravado o ano pasado tamén coa participación de veciñanza e entidades de Malpica. O obxectivo que nos marcamos o 25 de novembro do 2015, de acadar tantas visualizacións coma veciños e veciñas ten o concello, está amplamente superado, xa que a día de hoxe supera as 6.000 en Youtube. Tamén se distribuirán entre as persoas asistentes chapas e marcapáxinas, e, para rematar, agradecerase a ampla participación social na iniciativa cun aperitivo. “Cremos firmemente que coa forza da veciñanza e das entidades do noso concello, e coa súa conciencia social, gañaremos a guerra contra a violencia de xénero”, manifestou Marisol Blanco.

Ler máis