Os veciños e as veciñas afectad@s poden solicitar axuda a través de varios teléfonos
Segundo os últimos datos facilitados pola Consellería de Sanidade, o noso municipio rexistra 19 casos activos de covid-19 a día de hoxe, 7 de decembro.
Dende o Concello de Malpica pedimos prudencia a todos os veciños e as veciñas para deter a pandemia.
Do mesmo xeito, recordamos que, se estás contaxiado e precisas axuda, non dubides en poñerte en contacto coa área de Servizos Sociais no teléfono 981 720 280 ou con Protección Civil a través dos números 661 626 166 e 693 400 673.
Comeza mañá, martes 7 de decembro, e haberá dous días máis de percorrido polas casas
A empresa Collecting Oil levará a cabo unha nova recollida de residuos urbanos especiais no Concello de Malpica esta semana. O percorrido polas casas comeza mañá, martes 7 de decembro. Estes son os lugares que inclúe o primeiro traxecto: Porto do Fondo, As Casas Novas, Mens, O Miñón, Asalo, Bocelo e Badarra.
O xoves continuarán por Filgueira, A Fonte dos Bois, Seixas, Vilarnovo, Piñeiros, Rúa Ventorrillo, Pedra Queimada, As Neves, A Camuza, Travesía I A Camuza A. A última xornada será o venres nas rúas Ventorrillo, Escorial e Emilio González López.
Promove esta iniciativa a Concellaría de Turismo, Festexos, Policía e Tráfico, Seguridade Cidadá e Protección Civil, Medio Rural, Mar e servizos, con tenente alcalde Alfredo Cañizo á fronte.
Esta recollida inclúe ata oito tipoloxías de residuos:
Aceite de cociña usado: de fritura, de conservas…
Graxas e manteigas: animal, de roxóns…
Pilas e baterías: de botón, AAA, alcalinas, electrónicas e de vehículos a motor…
Bombillas: de baixo consumo, LED e fluorescentes…
Electrodomésticos e electrónicos pequenos do fogar: microondas, tostadores, secadores, radios, teléfonos, ordenadores, ferramentas eléctricas…
Consumibles de impresoras: tóner, cartuchos e tambores…
Residuos téxtiles e roupa: non importa o seu estado (roto, destinguido…), só se solicita que estea limpo.
Restos metálicos pequenos do fogar: tixolas, moldes, potas, enxoval do fogar, bandexas…
O día da ruta, os residuos deberanse deixar nun lugar accesible antes das 9.00 horas. Pódese contactar coa empresa responsable a través do número de teléfono 639 920 936 (tanto por chamada como mediante WhatsApp) ou no correo electrónico info@collectingoil.com.
A 17ª Mostra de Teatro do Concello chegará o próximo venres ó seu fin
O auditorio do Centro Cívico de Malpica acolleu durante esta fin de semana dúas obras incluídas na 17ª Mostra de Teatro do Concello.
O venres foi a quenda de “Pinocchio”, da compañía Teatro Ghazafelhos. Foi unha representación musical na que o monicreque universal encheu ó público de risa e emoción. Da man de Pepablo Patinho, Montse Piñón, Jorge Casas, Paty Lesta e Cristian Leggiero viviuse unha tarde-noite de aventura que marabillou ás familias malpicás.
“Crónica dunha heterosexual insatisfeita”, de Verdeveras Expresións Artísticas, en coprodución co Centro Dramático Galego, chegou o sábado. Este espectáculo, dirixido e interpretado por Mª Ángeles Iglesias, abordou temas como a sexualidade, a parella, os soños, as frustracións, os desexos e as fantasías da muller. Convidou, así, ás espectadoras a reflexionar sobre normas ou parámetros establecidos que se fan propios sen pensar se hai unha opción diferente que teña máis que ver con cada persoa.
Esta última obra está subvencionada pola Área de Igualdade da Deputación da Coruña-Teatro en Igualdade. A concelleira de Igualdade en Malpica, Marisol Blanco, non a quixo perder. Mesmo conversou coa directora e protagonista e mercou o libro que recolle o guión da obra.
Próxima cita
A próxima e última cita será o vindeiro venres con “Vida de cans”, de Talía Teatro (auditorio do Centro Cívico a partir das 20:30 horas). Esta iniciativa, que conta co apoio da Deputación da Coruña, conta cun aforo limitado debido á pandemia, polo que é necesario reservar as entradas (gratuítas) en auditoriodemalpica@gmail.com, indicando nome completo, número de DNI e un teléfono de contacto.
Agrupacións locais e internacionais actuaron no festival organizado pola Concellaría de Turismo e Festexos, coa colaboración do veciño Manu Ferreiro
O rock regresou a Malpica tempo despois da man da Concellaría de Turismo e Festexos e coa colaboración do veciño Manu Ferreiro. Organizou o festival Malpica Rock no que actuaron agrupacións locais e internacionais.
A cita celebrouse este sábado á noite na rúa principal do centro urbano, a Vila Fano. Foron moitos os veciños que, pese ó mal tempo característico destas datas, se animaron a gozar da boa música. Unha carpa colocada polo Concello serviu de moita axuda neste sentido.
Ambigüo, de A Laracha; El puto Antón e artistas convidados; 58 Shots, de Francia, e Recambios Tucho deleitaron ós asistentes coas súas interpretacións. Esta música xa ten o seu percorrido na localidade, con eventos consolidados como referentes a nivel galego.
Seguimos traballando para dinamizar a vila da vida na Costa da Morte! Foi a antesala do Nadal, datas para as que xa hai programadas numerosas actividades.
Actuarán na cita organizada polo Concello grupos locais e internacionais
Malpica, a 2 de decembro do 2021
A Concellaría de Turismo e Festexos de Malpica ten preparado para este sábado o festival Malpica Rock. Haberá representación de grupos locais pero, tamén, internacionais. A iniciativa arrancará a partir das 21:30 horas na Rúa Vila Fano, centro neurálxico da vila.
Forman o cartel as agrupacións Ambigüo, de A Laracha; El puto Antón e artistas convidados; 58 Shots, de Francia, e Recambios Tucho. O mal tempo, en caso de habelo, non será un inconveniente, recordan dende o Concello, pois haberá unha carpa preparada. O ambiente está asegurado e axudará a dinamizar distintos negocios do núcleo.
O pobo malpicán segue, así, sendo fiel a esta música que tantas boas celebracións trouxo á vila. “Non hai escusas para faltar!”, animan dende o departamento encargado da organización da cita.
A actividade de esquí está dirixida a participantes de 12 a 15 anos e realizarase en xaneiro en Asturias
Ó Concello de Malpica de Bergantiños correspóndenlle cinco prazas (con preferencia para os empadroados) para a primeira quenda da Campaña de neve da Deputación da Coruña, que transcorrerá dende o día 14 ao 17 do próximo mes de xaneiro. A actividade celebrarase na estación de Valgrande-Pajares (Asturias).
O prazo de inscrición remata o 14 de decembro. As idades dos participantes serán de 12 a 15 anos inclusive, cumpridos a 31 de decembro do 2021. A cota de participación é de 85 euros. Os interesados poden consultar máis información en www.dicoruna.es/deportes/actividades ou no Departamento de Deportes do Concello de Malpica de Bergantiños.
O Concello segue a fomentar boas prácticas co medio ambiente
Unha nova recollida de residuos urbanos especiais levarase a cabo a próxima semana en Malpica. O Concello segue a fomentar boas prácticas co medio ambiente.
Dende o próximo luns, 29 de novembro, ata o venres, 3 de decembro, recolleranse porta a porta este tipo de residuos, que inclúen ata oito tipoloxías:
Aceite de cociña usado: de fritura, de conservas…
Graxas e manteigas: animal, de roxóns…
Pilas e baterías: de botón, AAA, alcalinas, electrónicas e de vehículos a motor…
Bombillas: de baixo consumo, LED e fluorescentes…
Electrodomésticos e electrónicos pequenos do fogar: microondas, tostadores, secadores, radios, teléfonos, ordenadores, ferramentas eléctricas…
Consumibles de impresoras: tóner, cartuchos e tambores…
Residuos téxtiles e roupa: non importa o seu estado (roto, destinguido…), só se solicita que estea limpo.
Restos metálicos pequenos do fogar: tixolas, moldes, potas, enxoval do fogar, bandexas…
Son residuos que, debido ás súas características ou perigosidade, necesitan dunha recollida especial. “Todo xunto é lixo. Por separado, son recursos. Aproveitemos os nosos bens”, trasladan dende o consistorio malpicán.
A continuación, relátanse as rutas que se farán cada un dos días:
Luns 29 de novembro: Aviño, Cambre, Pedrosa-A Tremoa e Rabuceiras.
Martes 30 de novembro: A Raxeira, Brión, O Castro, Feira Nova, Vilar, O Empalme e A Camposa.
Mércores 1 de decembro: O Piñeiro, Rúa Costa, Rúa Santa Catalina (vivendas con números pares), Rúa Forno Novo, Rúa Santa Filomena (vivendas con números pares) e Rúa Xaviña.
Xoves 2 de decembro: Rúa Nova, Rúa Santa Filomena (vivendas con números impares), Rúa Gaio, Praza Cruceiro, Rúa Costa, Rúa Boavista, Rúa Santa Catalina (vivendas con números impares), Rúa Piñeiro, Buño, Aldeola, O Ceán, A Lagoa e Loroxo.
Venres 3 de decembro: Pozacas-Leduzo, Taraio, Cerqueda e Pasacondía-Aldeola.
A empresa Collecting Oil será a encargada de realizar este traballo. O día da recollida, os residuos deberanse deixar nun lugar accesible antes das 9.00 horas. Podes contactar coa empresa a través do número de teléfono 639 920 936 (tanto por chamada como mediante WhatsApp) ou no correo electrónico info@collectingoil.com. O Concello de Malpica anima ós veciños e ás veciñas a participar nesta iniciativa.
Foi a quinta cita da 17ª Mostra de Teatro do Concello
O auditorio do Centro Cívico de Malpica acolleu a última hora da tarde deste venres a representación “A pluma viva de Rosalía”, de Os Quinquilláns. Foi a quinta cita da 17ª Mostra de Teatro do Concello.
O espectáculo versou sobre liberdade e igualdade a partir de textos da célebre Rosalía de Castro. Está baseado nun feito real de censura á obra da escritora galega.
Próxima cita
A programación continuará o sábado, no espazo e horario habituais (Centro Cívico, 20.30 horas), con “Bravas”, de Isabel Risco. Trátase dunha produción que xira sobre mulleres sen medo, mulleres que forman parte dun valoroso clan, o clan que elas mesmas paren, aleitan, manteñen, constrúen cos piares da rebeldía, da rebelión, da ilusión, do inconformismo, da valentía, da xustiza social, da empatía, da humanidade.
Dende o consistorio recordamos que, debido á pandemia, o aforo é limitado, polo cal os interesados en asistir deberán reservar a entrada a través do correo auditoriodemalpica@gmail.com, indicando nome completo, número de DNI e un teléfono de contacto. Colabora nesta iniciativa a Deputación da Coruña: @DACCultura, en Twitter, e facebook.com/Culturadac
Hai un positivo máis respecto ao pasado martes, día 16
O Concello de Malpica informa que, segundo os datos facilitados polo Servizo Galego de Saúde, o municipio rexistra 9 casos de covid-19 a día de hoxe, 23 de novembro. Hai un positivo máis respecto ao pasado martes, día 16.
Dende o consistorio pedimos prudencia a todos os veciños e veciñas para deter a pandemia. Do mesmo xeito, recordamos que, se estás contaxiado e precisas axuda, non dubides en poñerte en contacto coa área de Servizos Sociais do Concello no teléfono 981 720 280 ou con Protección Civil de Malpica a través dos números 661 626 166 e 693 400 673. Recorda que no Concello malpicán temos concellaría de Sanidade!
Lerase un manifesto e levarase a cabo un coloquio con dous invitados de altura
Con motivo do Día Internacional contra a Violencia cara a Muller, a Concellaría de Igualdade de Malpica ten preparada unha campaña de sensibilización que anima á cidadanía a intervir contra a violencia de xénero e a reflexionar sobre esta lacra social.
Celebraranse dúas actividades ao longo do 25 de novembro:
Lectura do manifesto ás doce da mañá na praza Anselmo Villar Amigo.
Coloquio con dous invitados de altura, David Kaplún e Ana Saavedra, ás seis da tarde no Centro Comarcal de Buño.
O 25N céntrase na homenaxe a todas as mulleres asasinadas e en solidariedade con aquelas que sofren a violencia machista, reivindicando o dereito de mulleres e nenas a unha vida libre de violencia e en igualdade. Durante o coloquio, profundarase nunha análise da sociedade e do proceso de socialización para comprender por que se perpetúan estereotipos e roles e por que se lexitima a discriminación cara as mulleres. Con esta charla queremos “invitar ás mulleres e homes do municipio a acudir ao centro comarcal para charlar de xeito ameno e reflexionar sobre a necesidade de visibilizar e erradicar dunha vez os comportamentos machistas e patriarcais”.
O acto contará coa participación de dous referentes a nivel estatal en materia de xénero e igualdade:
Ana Saavedra, sobrevivinte de violencia de xénero e presidenta da Asociación Mirabal, recentemente galardoada ca Medalla Emilia Pardo Bazán.
David Kaplún, membro da Asociación de Homes pola Igualdade de Xénero, antropólogo, documentalista, investigador e experto en xénero, diversidade cultural e violencia, tanto en España como na América Latina.
A entrada será libre ata completar o aforo. A ambos actos asistirán o alcalde, Eduardo Parga, e a concelleira de Igualdade, María Soledad Blanco.
Este sitio utiliza cookies para mellorar a experiencia do usuario - Ocultar detalles
• Social media Facebook, Twitter e outras Redes Sociais precisan utilizar cookies para recoñecerte.
• Analytics Os datos recollidos polas cookies de Google Analytics son anónimos e só se usan para valorar a experiencia do usuario no nosa web.
• Anuncios Este sitio pode albergar publicidade propia, de afiliados, ou de redes publicitarias.
• Cookies propias Este sitio utiliza cookies propias para facilitar o acceso e mellorar a navegación e experiencia ao usuario Aviso Legal ACEPTOLeer más
Galego
Castellano
