• ACTUALIDADE,Novas

O Concello proxecta a reforma do Centro Social das Pozacas de Cerqueda a través do Plan Único da Deputación da Coruña

O Concello de Malpica proxecta a reforma do Centro Social das Pozacas, en Cerqueda, cuns traballos que contarán cun orzamento base de 36.379,90 euros. Esta intervención incluirase no compendio de obras dentro do Plan Único da Deputación e que conta con financiamento provincial.

Así, contémplase a reforma da planta do edificio eliminando o escenario existente no salón de actos, a eliminación de tres aseos existentes para incorporar ao almacén adosado e o derrube de dous tabiques entre almacéns para a formación de aula.

Acondicionaranse, tamén, as dependencias que teñen humidades coa incorporación de adosado de material de pladur illante nas paredes. Cóntase que a intervención estea rematada a finalizar o ano 2021. O alcalde de Malpica, Walter Pardo, sinala que “serán uns traballos que uniformarán este espazo e que as persoas usuarias poderán contar cun servizo de primeiro nivel cando poidamos reverter toda esta situación”.

• ACTUALIDADE,Novas

Malpica transformará a Casa do Oleiro de Buño nun centro de día antes de que remate o ano

A Casa do Oleiro de Buño quedará convertida nun centro de día antes de que remate o 2021. O alcalde do Concello de Malpica, Walter Pardo, asinou esta semana a acta de reformulación para a reforma da infraestrutura.

Así, está cada vez máis cerca de converterse en realidade unha das demandas históricas da veciñanza do municipio. O proxecto conta cun orzamento total de 272.170 euros que serán cofinanciados pola Xunta de Galicia.

Esta actuación permitirá reconducir a finalidade da infraestrutura para dotar dun servizo de atención cidadá a unha vintena de persoas usuarias. Neste sentido, o rexedor malpicá destacou “o importante incremento no nivel de benestar da veciñanza que se conseguirá unha vez remate o proceso de transformación das instalacións”.

Walter Pardo subliñou que se trata dunha iniciativa “coa que se dá resposta a unha necesidade que manifestou de xeito directo o noso pobo durante moitos anos” e coa que se segue “unha liña de traballo do goberno local que se mantén man a man coa veciñanza de Malpica.

• ACTUALIDADE,Novas

Malpica trasládalle ao Goberno as demandas do sector pesqueiro e solicita colaboración para mellorar as súas infraestruturas

O Concello de Malpica puido trasladarlle esta mañá ao Delegado do Goberno en Galicia, José Miñones, as demandas do municipio en materia de infraestruturas e axudas ao sector pesqueiro nunha reunión na que tamén participou a Confraría de Pescadores malpicá.

A corporación municipal, en compañía da xerente de Suelo Empresarial del Atlántico (SEA), Beatriz Sestayo, mantivo unha xuntanza institucional co obxectivo de axilizar os trámites e que o Goberno central poida traballar en Malpica coñecendo de primeira man todas as súas problemáticas.

Neste sentido, o goberno local trasladoulle ao Delegado unha serie de solicitudes entre as que se inclúe o apoio institucional para conseguir un aumento nas cotas de pesca e asegurar o futuro do gremio. Desde a Confraría de Pescadores transmitiuse esta mesma inquedanza, “unha cuestión que pedimos que se reconsidere e que se flexibilice para velar por un traballo no mar digno”.

Ademais, Concello e Confraría lembraron a problemática existente na dársena de Malpica coas correntes de auga e o perigo que supón para os traballadores. Nunha visita que o levou por diversos recunchos da vila, José Miñones comprobou en primeira persoa a necesidade de buscarlle unha solución para a boca de entrada do porto.

Unha das posibles vías que se estiman é a ampliación do actual dique, se ben se trata dun recurso “custoso, pero que traería moitísimo beneficio económico a Malpica, un sitio estratéxico a nivel mariñeiro”, segundo expuxo o alcalde, Walter Pardo.

Logo de pasear pola zona do porto, desprazáronse á zona da atalaia, dende onde o alcalde lle trasladou ao Delegado a necesidade de crear unha senda na contorna coa que “aproveitar as marabillosas vistas que nos ofrece este espazo de cara o Atlántico”. 

José Miñones mostrou a súa vontade de funcionar como “ligazón entre a Administración central e o Concello para que este poida dar solución a estas problemáticas do xeito máis rápido posible”. Do mesmo xeito que o rexedor malpicá, agradeceu “a disposición de colaboración” entre ambas institucións e avogou por chegar a acordos “cos que beneficiar a toda a súa poboación”.

Situación do polígono industrial

De xeito previo á chegada do Delegado do Goberno en Galicia, a xerente de SEA, Beatriz Sestayo, mantivo xunto a membros do goberno local unha xuntanza con representantes dos empresarios do municipio.

Nesta reunión tendéronse pontes para mellorar a situación do polígono industrial de Buño e asegurar o seu correcto funcionamento tanto no curto como no medio e longo prazo.

• ACTUALIDADE,Novas

Curso de formación de ‘Alternativas de xestión ao minifundio forestal’

O Concello de Malpica, xunto co GDR da Costa da morte, ofrecerá un curso de formación de “Alternativas de xestión ao minifundio forestal” durante este outono.

A duración do mesmo será de 44 horas lectivas. O curso terá lugar dos días 27 de outubro ao 6 de novembro en horario de 10:00 a 14:00 horas. Impartirase no antigo Centro Comarcal de Bergantiños.

Este curso está destinado a persoas vinculadas ao sector primario e á cadea forestal-madeira ou con expectativas de incorporación a estes sectores.

Toda a información sobre os obxectivos do programa está dispoñible no documento adxunto.

A reserva de prazas debe facerse a través de gdrcostadamorte@gdrcostadamorte.com
ou en informacion@foresin.es

Tamén está habilitado o 981 717 358 – GDR da Costa da Morte.

• ACTUALIDADE,Novas

Teatro, música e cultura para toda a familia no mes de agosto en Malpica cos ‘Seráns na rúa’

A Concellería de Cultura de Malpica, dentro da Rede Cultural 2021 da Deputación da Coruña, acaba de presentar unha programación para o mes de agosto repleta de teatro, música e diversión para todos os públicos. Os ‘Seráns na rúa’ comezarán o sábado 7 de agosto e celebraranse durante os fins de semana ata o día 21.

A primeira das actuacións será apta para todos os públicos e realizarase no paseo da Praia. O sábado 7 de agosto chega ‘Velliñas’, de Butaca Zero Inherente Teatro, a partir das 20:00 horas.

Nese mesmo horario, pero o sábado 14 de agosto, chegará o segundo dos espectáculos programados. ‘A música das buguinas’, de Mamá Cabra & Bellón e Maceiras, trátase dunha actuación para toda a familia que se representará na praza do Campo.

O domingo 15 de agosto será a quenda dunha cita musical dobre a Canido que comezará ás 21:00 horas co concerto de Arredores. Unha hora máis tarde, ás 22:00, Xabier Díaz e Adufeiras de Salitre continuarán co espectáculo enriba do escenario.

Finalmente, o sábado 21 de agosto a partir das 20:00 horas pecharanse os ‘Seráns na rúa’ coa representación de ‘Isolada’ a cargo de Pajarito. Neste caso, a obra está recomendada para maiores de 8 anos.

O aforo estará limitado a 50 persoas en todos os espectáculos agás nos concertos de Arredores con Xabier Díaz e Adufeiras de Salitre, nos que estarán dispoñibles 150 entradas. Só será necesario reservar asentos no caso do concerto a través do enderezo malpicacultura@gmail.com. No resto de actuacións poderanse gardar asentos 30 minutos antes do seu inicio.

No caso de que queden entradas sen reservar, estará permitido o acceso ata completar o aforo máximo permitido. Para calquera dúbida ou consulta, está dispoñible o teléfono 981 707 104 (Departamento de Educación e Cultura) en horario de 9:00 a 13:00 horas.

• ACTUALIDADE,Novas

O Concello favorecerá a conciliación de 30 familias do municipio co lanzamento do seu campamento urbano de verán

As solicitudes poderán tramitarse no departamento de Servizos Sociais do Concello entre o 26 e o 30 de xullo.

Promover a conciliación, a valoración da contorna e hábitos de vida saudables. Eses son os obxectivos que o Concello de Malpica busca alcanzar co lanzamento do seu campamento urbano de verán, no que poderán participar 30 nenos e nenas de entre 4 e 12 anos. O concelleiro de Benestar e Promoción Económica, Sergio García Villar, incide na intención do goberno local de “por en marcha medidas e iniciativas e favorezan a conciliación da vida laboral e familiar, máis aínda na situación sanitaria actual”.

O programa, 100% gratuíto, terá lugar de luns a venres de 9.00 a 14.00 horas, arrincando o 2 de agosto e prolongándose ata o 31 dese mesmo mes. Ao longo das 22 xornadas de campamento, os nenos e nenas participarán en actividades de expresión artística, saídas de coñecemento e valorización da contorna, accións de sensibilización ambiental, papiroflexia, xogos na praia, e propostas vinculadas tamén á igualdade de xénero. Así mesmo, o 20 de agosto, os cativos e cativas participarán no XX Concurso de Barcanas e Castelos de Area Praia de Area Maior. A base dos campamentos será o Centro Cívico de Malpica, pero para realizar todas estas propostas levaranse a cabo tamén saídas á contorna.

As solicitudes poderán tramitarse no departamento de Servizos Sociais do Concello (1º andar do Centro Cívico) entre o luns, 26 de xullo, e o venres, día 30. Para acceder a toda a información sobre a convocatoria e á solicitude podedes facer clic na ligazón.

Protocolo covid-19

O campamento urbano de Malpica levarase a cabo atendendo a un estrito protocolo de seguridade para reducir o risco de contaxio pola covid-19. Deste xeito, o Concello establecerá unhas medidas para a entrada e a saída dos nenos e nenas da instalación. Estas incluirán a identificación de cada participante e da nai/pai que recolla ou deixe á crianza. O documento de seguridade sinala, así mesmo, o control de temperatura á entrada da actividade, a desinfección de mans e o uso da máscara segundo indica a normativa en vigor. 

• ACTUALIDADE,Novas

Malpica presenta a XXXVII Edición da Mostra de Olería de Buño que se celebrará do 12 ao 15 de agosto

O Concello de Malpica presentou esta mañá a XXXVII Edición da Mostra da Olería de Buño no Forno dos Mouróns ás 10:30 horas. Celebrarase do 12 ao 15 de agosto e seguirá as pautas da celebrada o pasado ano. Estiveron presentes o alcalde, Walter Pardo; a concelleira de Cultura e Olaría, Leticia Varela; o concelleiro de Deportes, Miguel Varela; o edil de Turismo, Alfredo Cañizo e membros da Asociación Oleira.

O cartel está baseado nunha ilustración de Leandro Lamas, un pintor e ilustrador de Neda, que fixo a súa primeira exposición no ano 1998. A súa idea foi empregar as cores tradicionais da cerámica de Buño e a muller como protagonista, representada dando forma a unha peza. 

En canto á programación, tratarase de darlle protagonismo unicamente á olaría, habendo postos de venda, exposicións permanentes no parque Luciano García Alén e demostracións co torno. 

Contarase tamén con representacións folclóricas tradicionais mediante pasarrúas das asociacións culturais municipais e daráselle un protagonismo principal á muller oleira coa exposición “Sen elas non hai olería”, coa charla coloquio “Alfarería e a muller”, e conseguintemente tamén o espazo expositivo das xa coñecidas Zoquiñas Vermellas. 

Tamén haberá espectáculos para a rapazada con maxia, xogos tradicionais e obradoiros adaptados ás súas idades.