Síguenos en
gl_ES
Tempo Malpica de Bergantiños
Xoves 12°
Venres 13°
Sábado 12°
tiempo.com   +info
  1.  
  2. ACTUALIDADE

ACTUALIDADE

10Feb 2018

Presentación do equipo do novo servizo de limpeza viaria, adxudicado ao centro especial de emprego Aspaber por 2 anos

aspaber

O centro especial de emprego Aspaber resultou adxudicatario do servizo de limpeza viaria para os próximos dous anos por un importe de 82.031,49 euros. Francisco Costa, Dolores Fernández e José Luis Villar, en representación de Aspaber, desprazáronse ata Malpica para presentar, xunto co alcalde, Eduardo Parga, e o concelleiro de Obras e Servizos, Miguel Fernández, o equipo humano e técnico da concesión.

IMG_0388

O servizo de limpeza está integrado por un mínimo de 4 persoas e dispón, entre outros medios materiais, de hidrolimpadora, equipo soprador, carriño porta-caldeiros de limpeza e desbrozadora. As súas funcións xerais consisten na limpeza de rúas, prazas e paseos da vila, incluíndo o varrido, baldeo e desatasque de tragantes, así como na eliminación de maleza en pavimentos. Tamén lle corresponde o baleirado de sumidoiros ou rexiñas, a limpeza de papeleiras, a eliminación de herbas nos alcorques, a limpeza e retirada de excrementos da vía pública, o baldeo de rúas ou a limpeza de vías e espazos onde se celebren festas nas distintas parroquias.

Nos labores de varrido manual os operarios deberán prestar unha atención especial aos espazos nos que se sitúen os contedores, os accesos aos colexios, as zonas nas que haxa bancos ou mobiliario público e aquelas nas que se acumulen residuos de calquera tipo.

IMG_0369Ademais desas tarefas xerais, o contrato inclúe outros traballos puntuais, entre os cales figuran a limpeza de solares municipais, a retirada de chicles da vía pública, a eliminación de pintadas ou as limpezas extraordinarias en caso de accidentes ou de fortes choivas ou desprendementos de terra. Tamén figura un apartado específico para o mercado dos sábados, no que o servizo de limpeza realizará o varrido, baldeo, soprado e baleirado de papeleiras. Os ríos de lavar, por exemplo, limparanse 3 días ao ano; a Fonte Vella de Malpica, 8 veces no ano; os parques infantís, unha vez ao mes, e as áreas de ocio, tres veces ao ano.

O centro especial de emprego Aspaber renova a súa vinculación co Concello, xa que dende mediados do ano 2013 levaba desenvolvendo tarefas de limpeza viaria en Malpica. O alcalde expresou a súa satisfacción por poder seguir contando con Aspaber, non só polo bo facer que ten demostrado, senón tamén porque este novo contrato permite ao Concello de Malpica seguir materializando o seu compromiso coa integración laboral das persoas con discapacidade.

5Feb 2018

O presidente da Xunta pon o parque eólico de Malpica como exemplo da enerxía eólica máis eficiente

IMG_5314

O presidente da Xunta, Alberto Núñez Feijoo, considera que o parque eólico de Malpica demostra que é posible “facer unha enerxía eólica máis eficiente, porque produce máis enerxía con menos infraestrutura, e menos invasiva, xa que o número de aeroxeradores redúcese nun 90%”. Este luns, precisamente, Alberto Núñez foi testemuña do remate das obras de repotenciación do parque de Pemalsa, que, malia reducir de 69 a 7 o número de aeroxeradores, producirá o dobre de enerxía, un aspecto no que incidiron tanto o presidente da Xunta como o alcalde de Malpica, Eduardo Parga.

IMG_5335

O alcalde foi o encargado de abrir o acto, ao que asistiron tamén os rexedores de Ponteceso e Chantada; o delegado territorial da Xunta na Coruña e o conselleiro de Industria, ademais de directivos do grupo Elecnor, que ten unha participación do 95,55% no parque a través da súa filial de desenvolvemento e explotación de enerxía eólica, Enerfín. Eduardo Parga destacou que os avances tecnolóxicos permitíronnos entrar na vangarda das enerxías renovables hai 20 anos, coa instalación dun dos primeiros parques eólicos de Galicia e de España, e que hoxe volven a situar a Malpica á vangarda con este proxecto de repotenciación. “Para nós –manifestou- é un motivo de satisfacción que Malpica volva a estar na vangarda, tanto a nivel de producción como desde o punto de vista paisaxístico e ambiental”.

Na mesma liña, o presidente da Xunta aseverou que este proxecto conxuga un triplo compromiso: co ambiente, cunha redución do número de aeroxeradores, que pasan de 69 a 7; coa industria das renovables, xa que este é o segundo parque que se repotencia en Galicia, reducíndose a infraestrutura pero non a potencia nin a eficiencia enerxética, e cos concellos de Malpica e Ponteceso, xa que, ademais dun investimento de 22 millóns de euros durante a súa execución, fixa industria e emprego.

IMG_5322

“En definitiva, estamos a falar dun parque que manterá a décima parte dos aeroxeradores, que duplicará a súa produción de enerxía equivalente ao consumo eléctrico de 18.500 fogares, e que diminuirá nunha hectárea a superficie total ocupada”, dixo, incidindo na aposta da Xunta pola repotenciación para renovar a flota de aeroxeradores instalados en Galicia, buscando un equilibrio entre a sustentabilidade ambiental e a eficiencia da eólica galega.

26Xan 2018

Julio José Vila Díaz, do PP, e Sergio García Villar, do PSOE, tomaron posesión como novos concelleiros en Malpica

PLENO 25 XANEIRO 2018 (13)

A corporación municipal de Malpica volve a estar ao completo tras a toma de posesión dos novos concelleiros do PP e o PSOE no pleno ordinario do xoves 25 de xaneiro.

PLENO 25 XANEIRO 2018 (20)

Julio José Vila, primeiro pola dereita

O popular Julio José Vila Díaz substitúe no grupo de goberno a Iago Espasandín Varela, que presentou a súa renuncia por motivos laborais, ao igual que o seguinte na lista, Gabriel Costa García. O novo edil non asume polo momento ningunha área de goberno. Das concellerías de Urbanismo e Deportes, das que se ocupaba Iago Espasandín, encargaranse Álvaro Carril Rodríguez, no primeiro caso, e polo alcalde, Eduardo Parga Veiga, no segundo, tal como informou o propio rexedor no pleno tras a preguntas da oposición.

No grupo mixto tamén houbo relevo. O socialista Sergio García Villar incorporouse á corporación en substitución de Isabel Loureiro Varela, que dimitiu o pasado mes de novembro por motivos persoais e profesionais, pero estivo presente no pleno deste xoves, nesta ocasión entre o público.

PLENO 25 XANEIRO 2018 (10)

O novo concelleiro socialista, coa súa compañeira do BNG no grupo mixto

Ademais da toma de posesión dos novos concelleiros, a corporación debateu sobre as taxas pola utilización do ximnasio municipal, que o goberno pretende reabrir o antes posible. A proposta quedou sobre a mesa para un estudo máis detallado. Os rogos e preguntas da oposición completaron a sesión, na que a corporación non estivo ao completo pola ausencia dunha concelleira de AIM.

25Xan 2018

Mikaela, Madamitos, Faustino, Farruco, bailes, concursos, doces e unha chea de propostas máis para vivir o Entroido

O Entroido é unha das festas grandes do noso concello, e por iso tanto o Departamento de Cultura como o tecido asociativo e a hostalaría traballamos man a man para ofrecervos o mellor programa posible. Así, un ano máis presentamos un Entroido cheo de propostas para todos os públicos que nos converterán nunha das referencias das celebracións en toda Galicia.

IMG-20160208-WA0002

Comezaremos o venres 9 co pasarrúas do alumnado do CEIP Milladoiro a partir das 10.30 horas e o concurso de disfraces que se celebrará a partir das 24.00 horas polos pubs da vila, que un ano máis terán preparadas cestas de lacóns e chourizos para os mellores. E remataremos o día 18, despois de moitos días de troula coa Mikaela, os Madamitos e Ghuardineros, o Faustino, o Farruco, os concursos, os doces, as festas infantís, os bailes e tamén os cocidos.

Para que todo isto sexa posible contamos coa implicación dos pubs Jofra, Submarino, Brebaxe, O Patio, Prisma e Don Paco, así como de todas estas entidades: Asociación Cultural Malante, ANPA Ventorrillo, ANPA do CEIP Joaquín Rodríguez Otero de Buño, Asociación de Redeiras Mar da Illa, Asociación Cultural Carcaxía, A.C.D. San Xulián, A.V. C. S. O Brizo, Asociación Cultural Raigañas, Asociación de Amigos da Mikaela, A. VV. De Leiloio e Asociación de Amas de Casa.

A continuación detallamos o programa de actividades:

Venres de Entroido, 9 de febreiro

En Malpica

  • Pasarrúas do CEIP MILLADOIRO, a partir das 10.30 h.
  • Concurso de Disfraces de Entroido, a partir das 24.00 horas polos pubs da vila. Cestas de lacóns e chourizos para os mellores disfraces. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan os pubs: Jofra, Submarino, Brebaxe, O Patio, Prisma e Don Paco.

Sábado de Entroido, 10 de febreiro

En Seaia

  • Festa de Disfraces Infantil con inchable e merenda saudable con doces de entroido sen gluten, a partir das 16.30 h. na Casa da Cultura de Seaia. Colabora: A. C. Carcaxía.

En Leiloio

  • Festa infantil con inchables a partir das 17.00 h. na Casa dos Veciños de Leiloio. Colabora: Asociación de Veciños de Leiloio.
  • Desfile de disfraces infantil e de adultos a partir das 20.30 h. seguido do Concurso de Doces para rematar con actuación dun Dj.  Organiza: Asociación  de Veciños de Leiloio.

En Malpica

  • Concurso de Disfraces de Entroido, a partir das 24.00 horas polos pubs da vila. Premios en metálico para os mellores disfraces: 1º Premio 250,00 €, 2º Premio 150,00 € e 3º Premio 100,00 €. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan Pubs: Jofra, Submarino, Brebaxe, O Patio, Prisma e Don Paco.

IMG-20170226-WA0032

Domingo de Entroido, 11 de febreiro

En Malpica

  • Desfile de Disfraces Infantil, Percorrerá a vila saíndo do Centro Cívico ás 17.30 h. e rematando na Praza Villar Amigo. Organiza: Asociación Cultural Malante.
  • Actuación da Charanga NBA polas rúas da vila, a partir das 17.30 horas.
  • Nos pubs da Vila, daranse Doces de Entroido a partir das 17.00 h. Organizan pubs: Jofra, Submarino, Brebaxe, O Patio, Prisma e Don Paco.
  • Concurso de Comparsas do Entroido polas principais rúas da vila de Malpica a partir das 17.30 horas. Cestas de Entroido para as mellores comparsas. Entrega de premios a partir das 19.00 horas na Praza Villar Amigo.
  • Concurso de piñatas do Entroido na Praza Villar Amigo a partir das 18.00 horas. Entrega de premios ás 19.30 horas. Colaboran: A. C. Malante e C. Carcaxía.
  • Baile Social de Disfraces de Maiores e Concurso de disfraces para maiores das 20.00 h. ás 23.00 h no Auditorio do Centro Cívico amenizado polo Duo D´Café.

Luns de Entroido, 12 de febreiro

En Buño

  • Festa de Disfraces Infantil con inchables, chocolatada e degustación de doces de Entroido das 16.30 h. ás 19.30 h. no Pavillón Polideportivo do CEIP Joaquín Rodríguez Otero. Colabora: ANPA do CEIP Joaquín Rodríguez Otero.
  • Concurso de Disfraces Infantil ás 19.30 h. no Pavillón Polideportivo do CEIP Joaquín Rodríguez Otero. Premios ós mellores disfraces. Organiza: ANPA do CEIP Joaquín Rodríguez Otero.

Martes de Entroido, 13 de febreiro

En Malpica

  • Festa de Disfraces Infantil con inchables (rapaces/as ata 14 anos), no Pavillón Polideportivo de Malpica das 17.00 ás 20.00 horas. Colabora: ANPA Ventorrillo.
  • Concurso Gastronómico de Doces do Entroido, a partir das 15.30 h., no Pavillón Polideportivo de Malpica. Fallo do xurado e degustación ás 19.00 horas. Colaboran: Asoc. de Redeiras Mar da Illa, Asoc. de Amas de Casa e ANPA Ventorrillo.

Inscrición: No Departamento de Educación e Cultura ou en calquera das entidades colaboradoras.

MAR CASAL 1

Sábado de Piñata, 17 de febreiro

En Buño

  • A partir das 13.00 h. Sesión Vermú da Mikaela a cargo da Orquestra JERUSALÉN. Con pulpería e churrasquería no campo da festa.
  • A partir das 14.00 h. Degustación de cocido en todos os Restaurantes de Buño.
  • A partir das 17.00 h. Mikaeliña Infantil con inchables e chocolatada para os máis novos.
  • A Mikaela sairá ás 16.30 horas do Restaurante Canta la Rana percorrendo todos os bares e tabernas de Buño. Ás 22.30 h. queima da Mikaela e a partir das 23.00 h. actuación da Orquestra JERUSALËN e ó remate de festa con Disco Mobil, no aparcamento do Restaurante Casa Elias. Organiza: Asociación de Amigos da Mikaela.

Domingo de Piñata, 18 de ebrero

En Cerqueda

  • Percorrido dos Madamitos e Ghuardineros pola parroquia acompañados por unha comitiva de Entroido. Saída ás 15.00 h. itinerario: Os Resios, O Ceán, FIlgueira, As Cortes, Cerqueda, Leduzo e as Pozacas. Organizan: A.C. Raigañas.

En Vilanova

  • Festa de Disfraces Infantil e degustación de doces do Entroido a partir das 16.30 h. na Escola Unitaria de Beo. Colabora: A.V.C. S. O Brizo.

En Seaia

  • Cocido do Farruco e Faustino, para todos/as os/as participantes no Enterro do Farruco e o Faustino imprescindible asistir disfrazado. No Restaurante O Esqueiro a partir das 15.00 h. Inscricións no propio restaurante ou no Super MM até o xoves 15 de febreiro. Prezo: 15.00 € adultos e 10 euros os nenos. Organiza: A.C.D. San Xulian.
  • Actuación da Charanga MEKANIKA polas rúas de Seaia, a partir das 16.30 horas.
  • Enterro do Farruco, sairá en procesión ás 16.30 horas do Restaurante O Esqueiro percorrendo as rúas de Seaia. Xuntarase co seu curmán o Faustino no Centro Cívico e o acompañará ata o porto. Organiza: A.C.D. San Xulián.

En Malpica

  • Actuación da Charanga MEKANIKA polas rúas da vila, a partir das 17.30 horas.
  • Enterro do Faustino, que sairá do Centro Cívico ás 17.30 horas para percorrer as rúas da vila. Organiza: Asociación de Redeiras Mar da Ila.

Sábado 24 de febrero

En Cerqueda

Cocido de Entroido, no Restaurante Cantalarrana ás 22.00 h. Prezo: 20,00 € socios, 25,00 € non socios e 15,00 € nenos/as menores de 12 anos. Inscricións antes do mércores día 15 no Malpica Cen, no Centro Sociocultural das Pozacas (só os sábados) e nos teléfonos: 608 669201, 634 723 139, 638 673 057 e 698 173 659. Organiza: A. C. Raigañas.

24Xan 2018

Eduardo Parga asinou o contrato do servizo de recollida do lixo por 455.000 euros para os vindeiros catro anos

SINATURA CONTRATO LIXO

O alcalde de Malpica, Eduardo Parga, asinou hoxe o contrato do servizo de recollida e transporte dos residuos sólidos urbanos coa empresa Servizos dos Concellos Galegos SL. O noso concello destinará un total de 455.293,97 euros a xestión do lixo durante os vindeiros catro anos, prazo inicial de duración do contrato, que poderá ampliarse por dous anos máis.

O contrato asinado hoxe, nun acto no que tamén estivo presente o concelleiro de Obras e Servizos, Miguel Fernández, ten como finalidade a recollida dos residuos e o seu posterior traslado a planta de transferencia de Ponteceso, así como a limpeza e a conservación dos colectores e o mantemento dun inventario actualizado dos mesmos. A empresa debe aportar como medios materiais un camión de recollida de carga traseira, un dumper autocargable ou vehículo similar, un camión lava-contedores e unha hidrolimpadora. En canto aos medios humanos, o equipo de traballo estará composto por dous condutores, tres peóns e un encargado a xornada completa ou parcial. A maiores, e sen custe para o concello, cada ano achegará 15 soportes para colectores.

Segundo a oferta presentada, Servizos dos Concellos Galegos comprométese tamén a recoller a diario os residuos dos colectores das praias durante os meses de xullo e agosto, e na segunda quincena de xuño e a primeira de setembro tamén pero o día da ruta.

15Xan 2018

O Concello de Malpica de Bergantiños volverá a ter proxección turística internacional en FITUR

O alcalde de Malpica, Eduardo Parga, e a concelleira de Educación, Cultura e Turismo, Noelia Freijeiro, partirán mañá martes con rumbo a Madrid para participar na Feira Internacional de Turismo (FITUR), o principal escaparate turístico do país. O Concello de Malpica de Bergantiños volverá a ter proxección turística internacional desde o stand de Galicia, que este no aposta por un turismo diferenciado e de calidade, feito con imaxinación e para gozar sen présas.

jose-antonio-corral-baja

Entre os numerosos produtos que se presentarán en FITUR 2018 hai varios nos que ten cabida o noso concello, como Galicia Surfing, que identifica un cento de praias aptas para o surf con propostas de viaxe para coñecer os recursos asociados; o Club da Auga, dentro do que se integra a Ruta dos Faros de Galicia, ou Escenarios ao volante, unha escolma das 25 mellores rutas polo territorio galego.

O Concello de Malpica completará as experiencias xerais con propostas particulares como a Olería de Buño e publicacións como os novos mapas turísticos. O alcalde e a concelleira tamén participarán o mércores ás 17.30 horas na presentación dos produtos turísticos de Costa da Morte Asociación Turística (CMAT).

10Xan 2018

Xa está a disposición da veciñanza a senda Xornes- Buño- Canta La Rana, que incrementa a seguridade e comodidade nos desprazamentos cotiáns

visita ethel (1)

A conselleira de Infraestruturas e Vivenda, Ethel Vázquez, visitou hoxe a comarca de Bergantiños, na que a Xunta vén de rematar dúas sendas peonís e ciclistas, a de Laracha-Paiosaco e a de Xornes-Buño-Canta la Rana, para facilitar os desprazamentos cotiáns dos veciños en condicións de seguridade. No noso concello a conselleira estivo acompañada polo alcalde, Eduardo Parga, e o concelleiro de Obras e Servizos, Miguel Fernández, ademais doutras autoridades da comarca e da Xunta.

visita ethel (3)

O itinerario Xornes- Buño- Canta la Rana, nos Concellos de Malpica e Ponteceso, que o Goberno galego rematou tras o investimento de 530.000 euros, conta con case 2 quilómetros de lonxitude en dous treitos, pola marxe dereita das estradas AC-421 e AC-422. Comunica Buño, onde se atopan os principais equipamentos municipais, como o colexio, o cemiterio ou o campo de fútbol na zona de Xaviña, cos dous núcleos de poboación máis próximos, Xornes e Canta la Rana.

A actuación incluíu non só o tratamento en superficie, senón tamén a instalación de servizos de telecomunicacións, drenaxe, abastecemento e alumeado. Así mesmo, o Concello de Malpica financiou outras melloras a maiores, como a construción dun treito de saneamento.

29Dec 2017

Renovado o convenio anual entre a Deputación da Coruña e o Concello de Malpica para a xestión do Forno do Forte

convenio forno do forte

O alcalde de Malpica, Eduardo Parga, e o deputado provincial de Contratación, Patrimonio e Equipamento, Xesús Soto, asinaron o convenio de colaboración anual para a xestión do Forno do Forte de Buño. A Deputación da Coruña achegará no 2018 o 100% dos gastos para o funcionamento do complexo etnográfico, que xestionará integramente o Concello de Malpica.

Segundo figura no convenio, o Concello encargaranse do mantemento e dinamización do centro, a compilación de patrimonio etnográfico da zona, o fomento do estudo e a investigación ou a promoción de actividades culturais arredor do mundo da olería. Establécese un horario mínimo de atención ao público de 11 a 14 horas e de 16 a 19 horas de martes a domingo.

Nas instalacións do ecomuseo do Forno do Forte de Buño o propio espazo expositivo recupera e conserva os elementos arquitectónicos propios dunha casa dedicada á olería de Buño. As persoas visitantes achéganse no ecomuseo a todo o proceso de produción de pezas, desde o torneado ao cocido ou o secado, nun centro que contribúe a conservar e poñer en valor a cultura popular e é tamén un recurso turístico da comarca.

29Dec 2017

O goberno municipal aposta pola mellora da mobilidade e dos servizos ás familias no POS + 2018

A corporación municipal vén de aprobar as obras que se executarán con cargo ao POS + 2018. A proposta do goberno municipal céntrase, por unha banda, na mellora da mobilidade e, por outra, na ampliación e modernización dos servizos que se prestan ás familias, e todo coa intención de seguir mellorando a calidade de vida dos nosos veciños e veciñas.

SAMSUNG CAMERA PICTURES

Deste xeito, a partida máis importante, cun total de 119.736,08 euros, vai destinada á construción dunha senda peonil pola marxe esquerda da estrada entre Vilar e As Rabuceiras, na parroquia de Leiloio. O alcalde, Eduardo Parga, destaca a importancia deste tipo de infraestruturas para mellorar a mobilidade e a seguridade viaria, como se ten demostrado coas actuacións realizadas en Buño ou en Piñeiros, e nese sentido o goberno municipal ten a intención de seguir impulsándoas noutros puntos do concello.

SAMSUNG CAMERA PICTURES

Na parroquia de Malpica está prevista, por unha banda, a mellora das infraestruturas na Pedreiriña, cun orzamento de 98.872,83 euros. Tamén se realizarán melloras no parque infantil da Rúa Patria Galega, consistentes na instalación dunha pista polideportiva e de xogos biosaudables, cun investimento de 82.013,42 euros que permitirá optimizar o espazo e abrir a súa utilización a sectores sociais como os adolescentes ou os maiores. Os proxectos complétanse coa mellora da accesibilidade, a instalación de redes e a pavimentación entre as rúas Emilio González, Os Agros e Orxeira, para o cal destínanse 40.252,66 euros.

O goberno municipal de Malpica tamén decidiu reservar 90.591,19 euros para gasto corrente. Deste xeito, esa cantidade quedará liberada dos recursos propios para poder acometer outros investimentos sen necesidade de depender dos prazos establecidos pola Deputación da Coruña.

27Dec 2017

A UD Cerqueda implica aos máis pequenos nas causas solidarias co 1º Minitrofeo Os Petóns

A UD Cerqueda volve a demostrar que os partidos non sempre se xogan nos campos de fútbol, e que unha entidade deportiva pode ser moito máis ca iso. Pero ademais o club malpicán quere transmitir esa filosofía ás novas xeracións, e por iso este ano organiza por primeira vez unha versión “mini” do trofeo solidario Os Petóns. Deste xeito tamén implicará aos máis pequenos nas causas solidarias.

OS PETONS MINI

Hoxe tivo lugar a presentación do torneo na Casa do Concello de Malpica, coa participación do alcalde, Eduardo Parga; o concelleiro Miguel Fernández; o presidente e o capitán do Cerqueda, Roberto García e Daniel Reixía, e o presidente da SD Sofán, Ricardo Serrano. O club carballés, que xa participou co equipo sénior en edicións anteriores do trofeo Os Petóns, comparte plenamente a filosofía da UD Cerqueda.

O I Minitrofeo Os Petóns disputarase este sábado 30 no campo de Xaviña (Buño). Ás 11 xogarán os equipos benxamíns de ámbolos dous clubs e as 12, os infantís. Do mesmo xeito que a recadación do torneo sénior vai destinada á compra de comida para o banco de alimentos, nesta ocasión os cartos que se consigan servirán para mercar xoguetes para os nenos e as nenas de familias con poucos recursos.

Por iso, tanto desde os equipos participantes como desde o propio Concello de Malpica faise un chamamento a toda a veciñanza para que se achegue este sábado ao campo de Xaviña, “porque a ocasión -sinalaron- ben o merece”.

CARTEL

Página 68 de 149« Primera...102030...6667686970...8090100...Última »