• ACTUALIDADE,Novas

Once veciños do municipio de Malpica con diversidade funcional fórmanse en pequenos arranxos de xardinería

Os alumnos farán as prácticas no xardín da praza situada xunto ao cruceiro

O alcalde de Malpica, Eduardo Parga; os concelleiros de Servizos Sociais e Obras, Marisol Blanco Gorín e Miguel Fernández, e o presidente da asociación Íntegro, Adolfo López Baña, inauguraron hoxe en Buño un curso que formará a 11 persoas con diversidade funcional para realizar pequenos arranxos de xardinería doméstica. O obradoiro, subvencionado pola Deputación Provincial da Coruña, terá unha duración de algo máis dun mes. As clases teóricas serán impartidas na Casa do Oleiro, onde tivo lugar hoxe pola mañá a presentación da actividade, e as prácticas realizaranse no xardín da praza situada no centro de Buño, xunto ao cruceiro.

 

O alcalde de Malpica expresou o seu desexo de que esta actividade formativa contribúa a mellorar o currículo dos participantes e a facilitar a súa inserción no mundo do traballo. Ademais do aspecto laboral, Eduardo Parga subliñou o carácter social da iniciativa, dado que favorecerá as relacións e a comunicación entre os alumnos e as alumnas.

 

O monitor do obradoiro, Miguel Álvarez, explicoulles que o traballo comezará por aprender a manexar a maquinaria e por coñecer os sistemas de seguridade que deben utilizarse. Na parte práctica, engadiu, tamén aprenderán a deseñar un xardín ?que practicamente non necesitará mantemento?. Nese sentido, a concelleira de Servizos Sociais explicou que o curso terá unha segunda parte no mes de abril para realizar o mantemento das zonas axardinadas que se van crear agora, e que ese labor continuará posteriormente a cargo do Concello de Malpica.

 

O presidente de Íntegro achegou un aspecto máis do proxecto. ?O importante ?dixo- é que se vexa Buño reflectido nel?. Nese sentido, no xardín utilizarase grava de ladrillo de Buño e na decoración, ánforas de olería. Plantas de tempada e arbustos completarán o deseño.