ACTUALIDADE – Páxina 78 – Concello de Malpica de Bergantiños

8Xuñ 2017

ACTUALIDADE,Cultura,Novas

O Concello de Malpica promociona a Romaría de Santo Hadrián e a Mostra da Olería de Buño en Festur

O Concello de Malpica promociona a Romaría de Santo Hadrián e a Mostra da Olería de Buño en Festur, a Feira de Festas de Interese Turístico de Galicia, que se celebra dende onte xoves e ata o domingo en Silleda, no marco da 40ª Feira Internacional Abanca Semana Verde de Galicia.

A partir de hoxe e durante a fin de semana, ademais do persoal de información, no stand de Malpica haberá demostracións a cargo do oleiro José Antonio Corral. Entre os visitantes que terá o stand nesta xornada de venres estarán o alcalde, Eduardo Parga, e o tenente de alcalde, Miguel Fernández, que se achegarán pola tarde ata Silleda.

As persoas que visiten o stand do Concello de Malpica de Bergantiños atoparanse con algunhas novidades, entre elas, e especialmente destacada, é a nova imaxe da Mostra da Olería de Buño, que nesta edición aposta por un cambio tanto estético como de contidos. Neste sentido, o programa que se dará a coñecer nas vindeiras semanas incluirá aspectos novidosos con respecto a anos anteriores.

Tamén hai novidades relacionadas coa promoción da Romaría de Santo Hadrián. O Concello de Malpica volve a apostar por segundo ano consecutivo pola difusión dos aspectos máis tradicionais da popular e concorrida celebración, que terá lugar o vindeiro domingo 18, cun programa que tamén se fará público en breve.

Ler máis

8Xuñ 2017

ACTUALIDADE,Novas

Malpica, sede da II Copa da Costa de fútbol sala feminino

O Concello de Malpica de Bergantiños será a sede da II Copa da Costa de fútbol sala feminino organizada pola Asociación Deportiva Vidú baixo a tutela da Federación Galega de Fútbol Sala.

Nesta segunda edición, que terá lugar o sábado 10 de xuño no pavillón municipal de Malpica de Bergantiños, serán tres os equipos participantes, un menos que na primeira Copa da Costa de fútbol sala feminino debido a que o actual campión da liga provincial, o SD A Baña, e o Ponteceso FSF, actual campión da copa provincial, non poden asistir por falta de efectivos para a data na que se celebrará esta competición.

Por tanto, un Fisober que este ano fixo unha gran tempada que o levou a acadar a ansiada permanencia na Segunda División Nacional do fútbol sala feminino; un Villa de Cee que na súa primeira campaña na Liga Autonómica acadou manterse na categoría e competir moi ben en cada un dos seus partidos; e un Atletes que segue medrando e crecendo a pesar da súa xuventude; serán os equipos que participarán nesta segunda edición da Copa da Costa FSF que se comeza a afianzar no panorama do fútbol sala feminino da Costa da Morte.

Debido a que tan só competirán tres equipos nesta segunda edición da Copa da Costa de fútbol sala feminino, a organización decidiu que a competición se xogase mediante liguilla en lugar de por eliminatoria, polo que todos os equipos se enfrontarán uns aos outros.

Pola mañá haberá dous encontros nos que ao Atletes de Esteiro lle tocará dobre ración xa que as esteiranas enfrontaranse ao Villa de Cee e ao Fisober, ás 11.00h. e ás 13.00h., respectivamente. Mentres que pola tarde, ás 18.00h., serán o Villa de Cee e o Fisober os que se verán as caras no derradeiro partido da competición.

Este ano, a Copa da Costa de fútbol sala feminino terá como madriña a unha ilustre da zona deste deporte como é a muxiá Patri Romaní, que actualmente milita no Viaxes Amarelle FSF.

Dende a entidade malpicá animan a todos os afeccionados ao fútbol sala que se acerquen ata o pavillón municipal de Malpica de Bergantiños para desfrutar desta gran festa do fútbol sala feminino da Costa da Morte.

Ler máis

5Xuñ 2017

ACTUALIDADE,Novas

Nace a Malpica Vidú Cup

O Concello de Malpica de Bergantiños e a Asociación Deportiva Vidú organizan a I Malpica Vidú, un torneo de fútbol 11 de categoría Sub15 no que estarán algúns dos mellores clubs de Galicia e co que tentarán promover o fútbol base na zona.

Desde a organización facemos unha aposta forte por este evento e conseguimos a participación de equipos de renome como o son o Vitória Sport Clube e o GD Chaves (dous clubs portugueses que militan en Primeira División), e varios dos equipos máis grandes de Galicia, aos que se suman dous combinados de calidade como son a Selección Coruñesa e a recentemente creada Selección da Costa.

Este evento celebrarase o vindeiro domingo día 11 de xuño nos campos municipais da Pedra Queimada (Malpica de Bergantiños) e Xaviña (Buño). A actividade futbolística dará comezo ás 10.00 da mañá en ámbolos campos onde se disputará a fase de grupos. O grupo para formado por Selección Coruñesa, RC Deportivo, GD Chaves e o Pontevedra CF disputarase na Pedra Queimada, mentres que no que respecta ao grupo B, serán a Selección da Costa da Morte, o CD Lugo, o Vitória de Guimarães e o Atlético Coruña Montañeiros CF, quen se verá as caras en Xaviña.

Todos os partidos que se disputen durante este novo evento terán unha duración de 35 minutos e desde as 10.00h. ata as 13.55h non cesarán en ningún instante. Tras o parón para comer, a actividade futbolística retomarase unicamente en Xaviña (Buño), a iso das 16.30h, coa disputa da fase final do torneo, na que os oito equipos participantes buscarán selar o seu nome nos anais desta Malpica Vidú Cup ao proclamarse campión da primeira edición.

Ademais, este torneo será a segunda cita para a recentemente creada Selección da Costa Sub-15, a cal terá a oportunidade de enfrontarse a rivais de gran nivel en partidos que seguramente queden gravados para sempre na mente dos protagonistas.

Desde a organización desta I Malpica Vidú Cup convidamos a todos os amantes do fútbol que se acheguen ata Xaviña e A Pedra Queimada para gozar desta gran festa do fútbol base.

Normativa I Malpica Vidú Cup

I Malpica Vidú Cup

Ler máis

1Xuñ 2017

ACTUALIDADE,Cultura,Novas

Clausurado o obradoiro de manualidades infantís, no que participaron 23 nenas e nenos de catro a dez anos

Os 23 nenos e nenas que participaron este curso no obradoiro de manualidades organizado pola Concellería de Educación, Cultura e Turismo recibiron os seus diplomas e tamén medallas, porque demostraron ser uns campións tanto en comportamento como en creatividade.

Ao longo de todo o curso, e coa axuda da súa monitora, Lucía Villanueva, puxeron en práctica a reutilización e a reciclaxe, convertendo a parte metálica das pinzas da roupa en brazaletes ou os cartóns dos ovos en obxectos de decoración. Segundo as épocas do ano tamén fixeron os centros para as mesas de Nadal, os agasallos para o Día do Pai e o Día da Nai… Aprenderon a traballar con madeira, con goma eva e distintas técnicas de pintura. E boa parte do que fixeron pode verse xa na exposición inaugurada onte polo alcalde, Eduardo Parga, na planta baixa do Centro Civico.

O alcalde foi tamén o encargado de entregar os diplomas aos nenos e ás nenas, para o cal contou coa axuda do tenente de alcalde Miguel Fernández. O acto tivo lugar no auditorio, no que se deron cita tamén as familias dos alumnos, nenos e nenas de catro a dez anos de idade moi traballadores e “sempre dispostos a aprender”, como dixo a súa monitora. Despois do acto oficial, todas e todos participaron nunha merenda.

Pero as clausuras continúan. Mañá venres ás 19 horas celebrarase o remate do curso para as 12 alumnas do curso de manualidades para adultos que tamén organiza a Concellería de Educación, Cultura e Turismo.

Ler máis

31Mai 2017

ACTUALIDADE,Novas

O Concello de Malpica convida por segundo ano á hostalería local a participar nunha ruta de tapas de temática pesqueira

Despois do éxito acadado o ano pasado, a Concellaría de Promoción Económica de Malpica fai un novo convite á hostalería local para celebrar a segunda edición da ruta de tapas Malpica Sabe a Mar, unha iniciativa que naceu para impulsar o turismo enogastronómico e poñer en valor as tradicións pesqueira e oleira do noso concello.

A concelleira de Promoción Económica, Pilar Doldán, mantivo un primeiro encontro co sector no que a práctica totalidade dos hostaleiros e hostaleiras que participaron na anterior edición expresaron a súa intención de repetir. De todos os xeitos, o prazo de inscrición está aberto ata o 15 de xuño. Para facilitar a participación dos locais ponse á súa disposición o enderezo de correo electrónico concellodemalpica@gmail.com, aínda que os interesados e interesadas tamén poden dirixirse ao Centro Cívico (departamento de Educación, Cultura e Turismo) ou á Casa do Oleiro (oficina de Promoción Económica).

Segundo a proposta dos participantes na primeira xuntanza, a segunda edición da ruta celebrarase do 22 ao 24 de setembro. Malpica sabe a Mar diferénciase doutras iniciativas semellantes porque inclúe os produtos pesqueiros como ingrediente de todas as tapas, o que permite, por unha banda, poñer en valor o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que inclúe a ruta é a olería, xa que para a ocasión volverán a elaborarse pratos artesanais que se repartirían entre os establecementos participantes.

O Concello de Malpica, tal como explicou a concelleira de Promoción Económica, encargarase da organización, a promoción e o subministro de material promocional en colaboración cos propios locais.

Ler máis

26Mai 2017

ACTUALIDADE,Cultura,Novas

Fin de semana teatral coa estrea da nova montaxe de Os amigos de Malpica e o maratón do obradoiro infantil municipal

Esta fin de semana o teatro chega por partida dobre a Malpica.

Mañá sábado, ás 19.30 horas, a compañía Os Amigos de Malpica estreará a súa nova montaxe, “Aquí mando eu, entendido?”, unha comedia dirixida por Andrés Mourente Castro e protagonizada por Xurxo Alfeirán Chouciño, María del Carmen Varela Caravel, Adriana Reigía Martínez, Luis Mato Lema e Manuel Bugallo Chouciño, que ademais contarán coa axuda do apuntador Jesús Rodríguez Bello. O protagonista da obra é Xaquín, un viúvo autoritario e teimudo afeito a impoñer o seu parecer a base de ameazas a todo o mundo, incluída a súa única filla… Para coñecer o resto da historia haberá que asistir á función de mañá no auditorio do Centro Cívico. A obra está recomendada para maiores de 10 anos.

E o domingo, dentro do programa Nos Tempos das Letras, sairán a escena os alumnos e alumnas do Obradoiro de Animación Teatral do Concello de Malpica. A partir das 18 horas, tamén no auditorio do Centro Cívico, celebrarase un maratón de teatro infantil no que se representarán as obras “O punto e final”, “Unha de bruxas”, “Margarida, a filla de don Importante” e “Acampada no cemiterio”.

En ámbolos dous casos, a entrada é libre ata completar aforo.

Ler máis

26Mai 2017

ACTUALIDADE,Novas

95 persoas actúan na gala de clausura das escolas municipais de aeróbic e baile moderno, ximnasia rítimica e patinaxe

A medida que se achega o mes de xuño toca ir poñendo fin ás actividades culturais e deportivas organizadas polo Concello de Malpica durante o curso académico. As primeiras en despedirse son as alumnas das escolas municipais de aeróbic e baile moderno, ximnasia rítmica e patinaxe, que ofrecerán mañá venres unha exhibición na que participarán un total de 95 deportistas.

O pavillón municipal de Malpica abrirá as súas portas ás 17 horas para recibir ás participantes e a todas as persoas que queiran acompañalas. As primeiras en saír á pista serán as alumnas de aeróbic e baile moderno. Despois será a quenda das de ximnasia rítmica, ás que seguirán as nenas e nenos de patinaxe de Buño e de Malpica.

Ao remate, segundo informou o concelleiro de Deportes, Iago Espasandín, haberá un agasallo para cada participante e unha merenda para todos. Na clausura tamén participarán o alcalde, Eduardo Parga, e o concelleiro Miguel Fernández.

Ler máis

22Mai 2017

ACTUALIDADE,Cultura,Novas

O Certame de Poesía Erótica Illas Sisargas incluirá este ano unha homenaxe a Paco Souto

Este ano o Certame de Poesía Erótica Illas Sisargas será especial porque, como lembrou hoxe Paco de Tano, presidente da Asociación Cultural Caldeirón, “é a primeira vez que o celebramos sen Paco Souto”. O que foi secretario de Caldeirón e un dos principais impulsores do premio, faleceu o pasado 30 de marzo, e tanto os seus compañeiros e compañeiras da asociación como o Concello de Malpica queren dedicarlle dalgún xeito esta 12ª edición. Con esa intención, segundo anunciou o presidente de Caldeirón na presentación do certame, que tivo lugar hoxe no Centro Cívico, coincidindo coa Cea das Letras, no mes de novembro, celebrarase unha homenaxe a Paco Souto.

Unha das propostas que se barallaron foi o cambio de nome do propio certame, pero Paco de Tano explicou que finalmente desestimouse “porque a fin de contas foi el o que lle puxo o nome de Illas Sisargas”. Do papel fundamental que xogou Paco Souto na historia do certame falou tamén o alcalde de Malpica, Eduardo Parga, e nese sentido considera que é preciso lembrar a súa figura.

Do mesmo xeito que Paco de Tano manifestou a intención da Asociación Cultural Caldeirón de manter o premio, o alcalde de Malpica expresou o compromiso do Concello de seguir colaborando como ata agora. “O certame de poesía erótica ten o noso apoio total porque cremos nesta iniciativa e esperamos que siga indo a máis, como ata agora”.

O prazo de inscrición está aberto ata o 30 de setembro. Os interesados poden enviar as súas obras ao Concello de Malpica (Avda. Emilio González López, 1-15113 Malpica de Bergantiños), indicando no sobre “XII Certame de Poesía Erótica Illas Sisargas”. O fallo farase público coincidindo coa Cea das Letras, na primeira fin de semana de novembro, e na que tamén se fará a presentación pública da obra gañadora na pasada edición. O Concello de Malpica financia a edición da obra gañadora e o premio, dotado con 1.000 euros. Consulta as bases completas pinchando aquí.

BASES XII CERTAME DE POESIA ERÓTICA ILLAS SISARGAS 2017

Relación de gañadores das edicións anteriores:

“Arredor do teu corpo”, Antonio García Teijeiro
“Baile Átha Cliath”, Alberte Momán
“Xoguetes póstumos”, Enma Pedreira
“Rúa da cancela”, Eli Ríos e Eduardo Estévez
“Amantes”, María Lado
“Carnia Haikai”, Elvira Riveiro
“Chamádeme Eva”, Mercedes Leobalde
“Dominio público”, Ramón Neto
“O episodio”, Verónica Martínez Delgado e Alberte Momán
“A razón do perverso”, Mário J. Herrero Valeiro
“O home invisíbel”, Xabier Queipo

Ler máis

13Mai 2017

ACTUALIDADE,Novas

O Concello de Malpica participa na campaña “Quere o teu mercado” co sorteo dun lote de pezas de Olería de Buño

O de Malpica é un dos 90 mercados galegos que participan na campaña internacional “Quere o teu mercado”, coa que se pretende apoiar, promocionar e visibilizar o papel dos mercados nas vilas, fomentando así a compra do produto local e a profesionalidade dos praceiros e praceiras. En Galicia a campaña está promovida pola Dirección Xeral de Comercio e Consumo da Xunta, e desenvólvese arredor do 27 de maio, Día do Mercado.

As 5 pezas xa están preparadas para o sorteo

O Concello de Malpica e as praceiras e praceiros súmanse á iniciativa cunha campaña que se levará a cabo dende o 15 ata o 27 de maio, e que rematará co sorteo de cinco pezas tradicionais da nosa Olería de Buño. Con cada compra, os clientes dos postos do mercado recibirán un boleto, que deberán cubrir cos seus datos persoais e depositar nunha urna situada na entrada do edificio. O sorteo celebrarase o día 27, ás 12 horas, no propio mercado.

O Concello de Malpica anima aos veciños e veciñas a facer as súas compras no mercado municipal, onde atoparán produtos frescos, de calidade e da nosa contorna, favorecendo así a produción de proximidade e a economía local. E ademais, do 15 ao 27 de maio, a túa compra pode ter premio. Participa e sorte!

Se queres saber máis sobre a campaña Quere o teu mercado pincha aquí.

Ler máis

12Mai 2017

ACTUALIDADE,Novas

SEA pon á venda 14 parcelas no parque empresarial de Malpica cun 25 % de desconto

O alcalde de Malpica ten participado en varias xuntanzas con SEA para reclamar unha rebaixa nos prezos que fagan o polígono máis competitivo

Suelo Empresarial del Atlántico (SEA), que é a empresa promotora do parque empresarial de Malpica, pon á venda 14 parcelas cun 25% de desconto sobre o prezo orixinal. As persoas interesadas poden presentar as súas ofertas na sede da entidade, en Santiago, ata as 13 horas do día 26 de maio. A documentación precisa pode consultarse aquí, e se alguén precisa máis información pode chamar ao número de teléfono 981 575 469.

Para a adxudicación das parcelas SEA opta por un procedemento aberto que se decidirá polo prezo que ofrezan os licitadores. Para participar, os interesados deben depositar unha garantía do 5% do prezo base das parcelas. As ofertas presentaranse en dous sobres: A, coa documentación xeral, e B, coa proposta económica.

No parque empresarial de Malpica hai 14 parcelas dispoñibles con superficies que van dende os 1.000 metros cadrados, por un prezo de saída de 60.750 euros, ata os 5.578 metros que ten a parcela máis grande, e que sae a licitación por 317.997,25 euros.

Ler máis