• ACTUALIDADE,Cultura,Novas

A “Costa máxica de Malpica” gaña o primeiro premio do Concurso de Barcanas e Castelos de Area “Praia de Area Maior”

A “Costa máxica de Malpica”, unha creación impresionante tanto polo tamaño como polos detalles, acadou o primeiro premio do Concurso de Barcanas e Castelos de Area “Praia de Area Maior”, un clásico que marca o comezo das Festas do Mar. “A balea”, inspirada na obra de Lugrís, mereceu o segundo premio, e o terceiro foi para “O arroarte”, un arroaz moi logrado. O xurado, integrado por representantes do Concello de Malpica e das asociacións de Amas de Casa e de redeiras Mar da Illa, volveu a telo moi complicado, xa que a calidade e a orixinalidade das obras vai en aumento cada ano.

O premio á mellor barcana foi para “O marítimo”, mentres que o infantil acadárono as “Tartarugas na area”. Polo que se refire ao premio especial do público, os votos depositados na urna outorgáronllo a “A barcana dos Inchopic”. O alcalde, Eduardo Parga, e os concelleiros Miguel Fernández e Iago Espasandín, entregaron os premios aos máis de cen participantes no concurso.

A elaboración das 17 figuras participantes encheu de animación durante toda a mañá a praia de Area Maior. Ás 13 horas rematou o tempo outorgado para a realización das obras e comezou a deliberación do xurado. Todos os galardoados recibiron unha peza de Olería de Buño e os tres primeiros, ademais, premios en metálico. Así mesmo, para todos os nenos e nenas participantes houbo doces.

• ACTUALIDADE,Cultura,Novas

O Concurso de Barcanas e Castelos de Area marca o comezo das nosas tradicionais Festas do Mar

O Concurso de Barcanas e Castelos de Area “Praia de Area Maior” leva xa 16 anos marcando o comezo das tradicionais Festas do Mar. E este ano non será diferente, porque mañá venres a partir das 10.30 horas desenvolverase a 17ª edición coa finalidade de seguir promovendo a cultura popular e fomentando o uso lúdico da nosa praia. As inscricións poderán realizarse ata as 11 horas na mesma praia.

O Concello de Malpica establece tres modalidades de participación: infantil (ata 10 anos), amateur (a partir de 10 anos) e barcanas tradicionais de area (sen límites de idade). Cada participante ou grupo de participantes deberá realizar unha única obra. Na categoría amateur haberá tres premios dotados con 130, 70 e 40 euros, respectivamente, e trofeo. Tamén recibirán trofeos os gañadores dos premios á mellor barcana, á mellor obra infantil e á máis votada polo público, que terá á súa disposición unha urna para votar entre as 13 e as 13.30 horas.

O xurado, que estará formado por representantes do Concello de Malpica, da Asociación de Amas de Casa e da Asociación de Mulleres Redeiras Artesás Mar da Illa, valorará a calidade técnica da obra, a súa complexidade, o deseño, as dimensións, a orixinalidade e a vinculación con Malpica.

Festas do Mar

Co Concurso de Barcanas e Castelos de Area arrancan as Festas do Mar, organizadas pola Asociación Cultural e Deportiva Estádiga, e que contarán tamén nesta primeira mañá de celebracións cos pasarrúas dos gaiteiros da Asociación Cultural Malante. Pero haberá música durante toda a xornada, xa que na sesión vermú das 14 horas actuará o Dúo Libertad, ás 18 actuarán no paseo da praia os grupos Inerttes e Aula 11, e pola noite haberá verbena con Los Mecánicos e o Dúo Diamante.

O sábado 26 actuarán de novo os gaiteiros de Malante ao longo da mañá, e na sesión vermú estará o dúo Calú. A partir das 16 horas haberá inchables na praia, e no paseo tocarán ás 19 horas Monoulious Dop. Verbena de luxo con Armonía Show e El Combo Dominicano. As Festas do Mar rematarán o domingo con outra xornada chea de actividades: pasarrúas cos gaiteiros de Malante e coa Banda de Música de Abegondo, que actuará a partir das 11 dentro do ciclo da Concellería de Cultura “Música na rúa”, sesión vermú con O Tren da Unha, e despois da procesión marítima volverá a música ao paseo da praia co Grupo 7 Setenta. Disco Fabrik e Grupo Bomba animarán a verbena, e ás 24 horas terá lugar a gran sesión de fogos de artificio na praia.

• ACTUALIDADE,Cultura,Novas

A música volverá a fin de semana por partida dobre tras o aprazamento da actuación de Killer Cats por mor da choiva

Malpica volverá a ofrecer esta fin de semana un programa cultural moi completo, no que a música terá un protagonismo moi especial. O venres teremos unha noite de concertos coas bandas The Cerne e Strobos, que amenizarán a velada no paseo maritimo durante dúas horas e media. E o sábado ás 22 horas celebrarase o concerto do grupo Killer Cats que estaba previsto para o pasado día 4, pero que tuvo que ser aprazado por mor da choiva. Os carballeses actuarán tamén no paseo marítimo, onde farán un completo repaso ao seu repertorio.

Esta fin de semana, ademais, chega á súa fin unha nova edición do Retablo de Fantoches Rafael Dieste. A compañía Lucecús ofrecerá o sábado ás 20.30 horas, tamén no paseo marítimo, a obra de títeres “PingüSOS”, dirixida ao publico familiar. En caso de choiva a actuación trasladarase ao auditorio do Centro Cívico.

• ACTUALIDADE,Cultura,Novas

Ampliado ata o venres o prazo para participar na ruta polo Camiño dos Faros desde Malpica ata Barizo

O vindeiro domingo celebrarase unha ruta polo Camiño dos Faros desde o porto de Malpica ata a praia de Barizo. O Concello de Malpica ampliou ata o venres o prazo de inscrición, que pode realizarse ben na Oficina de Turismo, situada na planta baixa da casa consistorial, ben no Centro Cívico.

Os participantes realizarán un percorrido de 13 quilómetros e dificultade baixa. Á saída de Malpica será ás 9 horas e a chegada ao destino está previsto para as 13. Desde Barizo haberá autobuses a disposición das persoas interesadas a un prezo de 3 euros por viaxeiro/a (o pago realizarase o mesmo domingo antes da saída do porto de Malpica, e prégase levar o importe xusto), que farán a súa saída ás 13.30 horas.

A organización establece un máximo de 275 participantes, e recoméndalles levar calzado axeitado, protección solar, gorra, auga, unha toalla pequena e calcetíns de reposto. E ademais fai un chamamento a que os/as camiñantes non se saian do sendeiro marcado e non deixen ningún residuo ao seu paso. A ruta, de feito, discorre por un terreo sensible, pegada á costa. Despois de saír do porto os participantes rodearán a península do Santo Hadrián antes de chegar ao merendeiro de Beo, onde haberá un descanso para avituallamento, e proseguirán por Seiruga, o río de Va e o Monte da Insua antes de chegar a Barizo.

• ACTUALIDADE,Cultura,Novas

Os nenos e nenas de Malpica crean a súa propia lenda da balea no proxecto Pintar na Rúa

Os nenos e as nenas que participaron este ano no proxecto Pintar na Rúa conseguiron crear unha lenda propia a través dunha figura tan lugrisiana e malpicá como a balea. O debuxo do mural que pode verse xa no parque infantil da Rúa Patria Galega converte a balea nunha especie de illa “enriba da que se forma un país, unha cultura, unha forma de vivir”. Así o explica a ilustradora carballesa Laura Tova, autora do deseño e monitora do obradoiro que se veu impartindo desde o 24 de xullo.

O proxecto de rexeneración urbana promovido pola Concellería de Educación, Cultura e Turismo tamén inclúe a homenaxe da autora e dos participantes “ao amigo” Paco Souto, que dalgún xeito foi inspirador do mural. De feito, o seu poema “A percebeira é unha illa” dá título á propia pintura.

Nesta cuarta edición, Pintar na Rúa seguiu conquistando espazos da vila malpicá. Despois do Centro Cívico e o Paseo da Praia, os nenos e nenas deixaron nesta ocasión a súa pegada no parque infantil. Na vindeira edición seguiremos estendendo a arte urbana por Malpica.

• ACTUALIDADE,Cultura,Novas

O vídeo do alumnado do IES Urbano Lugrís “6 pasos para falar malpicán”, premiado no Festival de Pardiñas

O vídeo que presentou o alumnado do IES Urbano Lugrís ao concurso de Youtubeir@s, e polo que conseguiu a “Mención honorífica á calidade lingüística”, foi tamén premiado esta fin de semana no Festival de Pardiñas, nun acto no que participaron alumnos e alumnas, profesores e o alcalde de Malpica, Eduardo Parga, que felicitou a todo o equipo do instituto polo traballo realizado.

O vídeo “6 pasos para falar malpicán” é un titorial que en só tres minutos fai un percorrido moi completo polas singularidades da nosa fala, explicadas polos alumnos e alumnas do IES Urbano Lugrís. O vídeo ronda xa as 10.000 visualizacións en YouTube.

• ACTUALIDADE,Cultura,Novas

O Ecomuseo do Forno do Forte recupera os ouriñais, que deixaron de fabricarse hai anos, na Cocedura Tradicional

Este ano cocéronse arredor de 1.500 pezas no Forno do Forte, e entre elas figuran, por primeira vez, os tradicionais ouriñais ou pericos. “Era algo que había en todas as casas e que se facía en todas as olerías, e en Buño tamén”, sinalou o director do ecomuseo, Paco Doval, quen destacou o éxito desta 19ª Cocedura Tradicional: “Saíu todo moi ben”. Ademais dos ouriñais, que poden ser reproducidos grazas a que se atopou unha peza antiga nun faiado, mañá desenfornaranse todo tipo de pezas de tamaño mediano e grande, todas elas tradicionais.

Aínda que sempre hai novidades na Cocedura Tradicional, outras cousas non cambian, coma a presenza do oleiro Antonio Pereira, O Rulo, á fronte do equipo de traballo que dedica toda unha fin de semana a revivir unha das nosas tradicións máis arraigadas e do que forma parte tamén o alcalde de Malpica, Eduardo Parga, que despois de tantos anos xa é case un experto. Despois de traballar durante toda a mañá do sábado, arredor das 16 horas, co forno xa cargado, o alcalde e Manuela de Mariñán prenderon o lume. E durante toda a tarde os atizadores encargáronse de manter a temperatura arredor dos 1.000 graos que se precisan para que as pezas queden ben cocidas. A xornada rematou coa Festa da Carroa, aproveitando as brasas para preparar un bo churrasco que serviu de escusa para comentar as anécdotas da xornada antes de dar renda solta á diversión coa música do grupo Pelepau.

O Ecomuseo do Forno do Forte converteuse no principal centro de atracción da segunda xornada da Mostra da Olería de Buño. Ao longo de todo o día recibiu a máis de mil persoas procedentes de todo o territorio español e, aínda que en moita menor cantidade, tamén do estranxeiro.

As persoas que queiran ver o resultado da Cocedura Tradicional poderán achegarse mañá domingo a partir das 11 ata o Ecomuseo do Forno do Forte. Mañá tamén, a partir das 13.30, haberá sesión vemú co grupo De Vacas no Parque Luciano García Alén.

• ACTUALIDADE,Cultura,Novas

A Mostra da Olería de Buño estrea imaxe disposta a garantir o futuro do colectivo oleiro máis importante de Galicia

Xa está en marcha unha nova edición da Mostra da Olería de Buño. Son 34 anos xa de historia e moitos retos por cumprir aínda, pero quizais o máis importante sexa garantir o futuro da comunidade oleira máis importante de Galicia. A ese obxectivo referíronse todas as autoridades no acto inaugural, celebrado hoxe no parque Luciano García Alén coa participación da presidenta da Asociación Oleira de Buño, Carmen Isabel Labrador; o alcalde de Malpica, Eduardo Parga; a vicepresidenta da Deputación, Goretti Sanmartín, e o conselleiro de Economía, Emprego e Industria, Francisco Conde.

O acto celebrouse baixo a carpa e o orballo, que acompañou todo o percorrido das autoridades polos postos, este ano situados no adro da igrexa. A presidenta da Asociación Oleira agradeceu a colaboración do párroco para poder realizar o cambio pero destacou sobre todo a nova imaxe da Mostra da Olería, porque “este ano pensamos a Mostra dun xeito distinto”, máis moderno, pero coa intención de contribuír a que a olería de Buño perdure. Carmen Isabel Labrador rematou a súa intervención convidando ao público a “desfrutar de 10 días de artesanía e vida”.

Á nova imaxe da Mostra da Olería referiuse tamén o alcalde, quen destacou que aínda que Buño é a comunidade oleira máis importante de Galicia, tamén se atopa “nunha encrucillada decisiva para o seu futuro”. Ese futuro, engadiu Eduardo Parga, debe contar coa “participación de todas e todos”, polo que convidou aos profesionais da olería a esquecer discrepancias e traballar cóbado con cóbado, e fixo un chamamento á “complicidade das Administracións”.

Goretti Sanmartín expresou o compromiso da Deputación da Coruña coa olería de Buño, como se demostra a través do Ecomuseo do Forno do Forte, pero apelou á necesidade de apostar aínda “máis forte” para evitar que a nosa artesanía acaba esmorecendo. Nese sentido apuntou a necesidade de que haxa un relevo xeracional, malia as dificultades que existen na sociedade actual para dedicarse a un sector como o da artesanía. Para a vicepresidenta, a Mostra da Olería é unha oportunidade para que “os nenos aprendan a meter as mans no barro, porque é a forma de construír o futuro”.

O conselleiro pechou as intervencións destacando a capacidade dinamizadora que ten a olería de Buño, tanto desde o punto de vista económico como da tradición e da “vinculación co territorio”. Francisco Conde subliñou que “non se entende un verán en Galicia sen Mostra da Olería, que ademais é a feira decana de Galicia”, e tivo palabras de lembranza para Luciano García Alén.

A Mostra da Olería de Buño permanecerá aberta ata o día 13.

• ACTUALIDADE,Cultura,Novas

Asinado o convenio de colaboración entre o Concello e a Deputación para o financiamento da Mostra da Olería

O presidente da Deputación da Coruña, Valentín González Formoso, e o alcalde de Malpica de Bergantiños, Eduardo Parga Veiga, asinaron un convenio de colaboración mediante o cal a institución provincial achega 80.000 euros para financiar a Mostra da Olería de Buño.

Esta achega custeará o 80% do orzamento total do evento, incluíndo os gastos en publicidade, material gráfico, o alugueiro das carpas e os espazos expositivos, actividades coma obradoiros para nenos e outras animacións, ademais dos gastos de persoal para a organización do encontro.

Valentín González Formoso, destacou que co apoio á mostra, a Deputación pretende impulsar a “olería de Buño non só como recurso cultural e turístico senón tamén como motor para a creación de emprego e riqueza na comarca” e confirmou que a institución provincial continuará colaborando no seu desenvolvemento. Pola súa banda, Eduardo Parga agradeceu a achega da Deputación e resaltou a importancia de traballar para preservar unha artesanía secular de sona internacional.

A Mostra da Olería de Buño, que cumpre a súa 34 edición, desenvolverase entre o 4 e o 13 deste mes, e incluirá actividades coma rutas turísticas, actuacións musicais, obradoiros e distintos tipos de artesanía. A mostra desenvolverase no parque Luciano García Alén, onde se situarán as casetas de venda, e no Ecomuseo Forno do Forte, que acollerá a xa emblemática cocedura tradicional.

O Ecomuseo, adquirido e rehabilitado pola Deputación da Coruña e xestionado polo Concello de Malpica, tamén ofrecerá distintas exposicións e visitas ás coleccións sobre a tradición oleira da comarca.

• ACTUALIDADE,Cultura,Novas

O Concello de Malpica promociona a Mostra da Olería de Buño na praza de María Pita da Coruña

O Concello de Malpica iniciou na Coruña unha campaña de promoción da Mostra da Olería de Buño (MOB), que se celebrará do 4 ao 13 de agosto. Este ano a tradicional feira de artesanía de Buño estrea imaxe e aposta por unha programación que trata de atraer a un maior número de visitantes e de abrir o abano a todas as idades. Os detalles déronse a coñecer na Praza de María Pita, na que o principal reclamo para o público foi a presenza do oleiro José Antonio Corral facendo unha demostración no torno.

Ao longo da xornada foron moitas as persoas que se achegaron ata o novidoso stand promocional da Mostra da Olería, no que tamén estivo presente o alcalde de Malpica, Eduardo Parga. Así mesmo, o Concello de Malpica aproveitou a ocasión para iniciar a distribución do novo mapa turístico de Buño, que estará a disposición de todo o público tanto na oficina de información turística de Malpica como no Ecomuseo do Forno do Forte.

A Mostra da Olería volverá a celebrarse no Parque de Luciano García Alén, no que estarán abertas as casetas de venda de 11.00 a 14.00 e de 17.00 a 21.00 horas, unha exposición do fotógrafo Peter Schneider, outra de artesanía, unha zona gastronómica e outra infantil. Pero a Mostra terá tamén como escenario o Ecomuseo do Forno do Forte, onde haberá a diario obradoiros de barro e exposición dos oleiros e oleiras de Buño.

PROGRAMA DE ACTIVIDADES
VENRES 4 DE AGOSTO
17.30 Concerto Raigañas no Parque Luciano García Alén
18.00 Acto oficial de inauguración
18.30 Visita ás instalacións da Mostra da Olería de Buño

SÁBADO 5 DE AGOSTO
11.00 a 20.00 Cocedura Tradicional no Forno do Forte
19.30 Actuación de Carcaxía no Parque Luciano García Alén
21.00 Carroa no Forno do Forte
22.30 Actuación de Pelepau no Forno do Forte

DOMINGO 6 DE AGOSTO
11.00 a 14.00 Descarga do Forno do Forte
13.30 Sesión vermú con De Vacas (Parque Luciano García Alén)

LUNS 7 DE AGOSTO – DÍA DO NENO
A partir das 17.30 Busca do tesouro e outras actividades

MARTES 8 DE AGOSTO
12.00 A 14.00 e 18.00 a 20 Ruta dos fornos guiada
22.30 Curtametraxes en familia

MÉRCORES 9 DE AGOSTO
19.00 e 21.00 Show The Momento Impro

XOVES 10 DE AGOSTO – FESTOLERÍA
A partir das 21.00 horas: Hellorice, The Cove, Cachas&Cousins, Dj Manuele Caamagno

VENRES 11 DE AGOSTO
17.30 Concurso infantil de modelado
21.00 Actuación Entrelas

SÁBADO 12 DE AGOSTO
17.30 Trofeo de fútbol MOB
21.30 Queimada tradicional e actuacións de Batuko Tabanka, Festicultores, Dj La SinCereza

DOMINGO 13 DE AGOSTO
12.00 a 14.00 e 18.00 a 20.00 Ruta dos fornos guiada
13.30 Sesión vermú coa Familia Caamagno