• ACTUALIDADE,Novas

O presidente de Portos e o director de Augas de Galicia supervisan as obras previas á construcción da EDAR de Malpica

Acompañados polo alcalde e o concelleiro de Obras visitaron as novas casetas dos mariñeiros, xa rematadas e entregadas a Portos

O presidente de Portos de Galicia, José Juan Durán, e o director de Augas de Galicia, Gonzalo Mosqueira, visitaron hoxe as novas casetas dos mariñeiros de Malpica, rematadas e recibidas xa por Portos. No percorrido polas instalacións estiveron acompañados polo alcalde, Eduardo Parga, e o concelleiro de Obras, Miguel Fernández. A edificación das novas casetas supón un paso imprescindible de cara á construcción da estación depuradora de augas residuais (EDAR) na zona do Monte da Plancha, onde está situados os actuais departamentos para usuarios, que serán demolidos.

O novo edificio acollerá as 13 casetas que hai que derrubar. Todas terán subministro de auga, electricidade e conexión ao saneamento, e algúns dos departamentos destinaranse ao oficinas e ao Club Náutico.

A EDAR, segundo indicaron hoxe os representantes da Xunta, estará lista a finais do ano que vén. A empresa construtora xa está a traballar na estabilización dos taludes do Monte da Plancha. Segundo indicou o alcalde, Eduardo Parga, a finalidade das obras é asegurar a ladeira na zona na que irá ubicada a EDAR.

A construción da EDAR, unha importante infraestrutura que solucionará de xeito definitivo os problemas de saneamento da vila, está financiada pola Consellería de Medio Ambiente, Territorio e Infraestruturas da Xunta e o Feder (Fondo Europeo de Desenvolvemento Rexional), que achega o 80% dos 5,4 millóns de euros consignados para a obra. A depuradora de Malpica empregará un tratamento biolóxico, en concreto, unha tecnoloxía de biofiltros no seu proceso de depuración. Esta avanzada tecnoloxía permite reducir ao mínimo o espazo que ocupará a planta. Este aspecto, xunto co feito de que a EDAR emprazarase nun edificio de formigón, pedra e madeira, facilitará a súa integración no entorno portuario, reducindo significativamente o seu impacto visual. A EDAR situarase no extremo sur do peirao. A localización foi consensuada entre a Consellería de Medio Ambiente, Portos de Galicia e o Concello de Malpica tras o estudio de distintas alternativas.

A estación depuradora de Malpica de Bergantiños dará servizo a máis de 7.000 habitantes. 

• ACTUALIDADE,Novas

O Concello de Malpica pon en marcha cursos de xardinería e cociña saudable para persoas maiores ou con diversidade funcional

Nas actividades, que se desenvolverán nos meses de novembro e decembro, participarán en total máis de vinte persoas

A Concellería de Servizos Sociais de Malpica, que dirixe Marisol Blanco Gorín, porá en marcha este mes novas iniciativas formativas para persoas con diversidade funcional e da terceira idade.

Despois da excelente acollida que tivo o obradoiro de pequenos arranxos de xardinería, que permitiu acondicionar o xardín da praza do Cruceiro de Buño (na imaxe), o Concello de Malpica decide darlle continuidade a esta actividade. Deste xeito, e grazas a unha subvención da Deputación da Coruña, o día 11 comezará un novo taller de xardinería para persoas con diversidade funcional, no que repiten moitos dos que participaron no anterior. A acción formativa, que correrá a cargo da Asociación Íntegro, desenvolverase os martes, mércores e xoves, de 11.00 a 13.00 horas. Nesta ocasión, os alumnos e alumnas farán as prácticas nas zonas axardinadas do Centro Cívico e do centro médico de Malpica.

Este mes tamén comezarán dous cursos de cociña saudable, un deles dirixido a maiores e o outro, a persoas con diversidade funcional. Os dous serán impartidos tamén por Íntegro. O primeiro celebrarase todos os xoves, de 17.00 a 19.00 horas, dende o 13 deste mes ata o 18 de decembro. O segundo será os martes, no mesmo horario, dende o 11 deste mes ata o 16 de decembro. As clases impartiranse no Centro Cívico, onde se utilizarán as instalacións da cafetería para preparar e degustar a comida.

Para facilitar o desenvolvemento dos cursos e que os asistentes saquen o maior aproveitamento posible está previsto formar grupos reducidos, pero en total participarán máis de vinte persoas.

• ACTUALIDADE,Novas

Dez espectáculos encherán Malpica de títeres, circo, cabaré, monólogos e maxia no décimo aniversario da Mostra de Teatro

O ciclo estenderase dende o 7 de novembro ata o 20 de decembro

A Mostra de Teatro de Malpica cumpre dez anos, e a Concellería de Cultura, que dirixe Noelia Freijeiro, quere celebrar este aniversario cunha oferta á altura das circunstancias. Na programación colaboran a Deputación da Coruña, a Asociación Cultural Caldeirón e a Asociación Teatral Os Amigos de Malpica. Este ano pasarán polo escenario do Centro Cívico dez espectáculos nos que haberá títeres, circo, cabaré, monólogos, maxia e moita comedia. O obxectivo é achegar as artes escénicas máis variadas a todo o púbico, dende os máis pequenos ata os maiores, e no cartel que hoxe se presenta haberá propostas feitas á medida de todos.

A X Mostra de Teatro arrincará o 7 de novembro coa divertida proposta de Producións Teatrais Excéntricas ?Da Vinci tiña razón?, especialmente dirixida a maiores de 13 anos. Todas as funcións serán ás 20.30 horas agás o espectáculo escolar previsto para o 12 de decembro, que comezará ás 11.30.

O cartel da X Mostra de Teatro de Malpica é o seguinte:

Venres 7 de novembro, ás 20.30 h.
Da Vinci tiña razón. Producións Teatrais Excéntricas
Duración: 100 minutos
Xénero: comedia
Público preferente:  a partir de 13 anos

Venres 14 de novembro, ás 20.30 h.
Gala de Circo. Culturactiva
Duración: 100 minutos
Xénero: novo circo, clown, malabares e acrobacias aéreas
Público preferente:  todos os públicos

Venres 21 de novembro, ás 20.30 h.
Os anos 80 vistos polo Mago Teto. Mago Teto
Duración: 100 minutos
Xénero: maxia
Público preferente:  todos os públicos

Venres 28 de novembro, ás 20.30 h.
Misión sapiens (Operación Comedia). Malasombra producións
Duración: 75 minutos
Xénero: monólogos cómicos
Público preferente:  a partir de 13 anos

Venres 5 de nadal, ás 20.30 h.
A súa vida. Rabadiero promocións
Duración: 45 minutos
Xénero: títeres de luva, contacontos, etc.
Público preferente:  nenos/as de 3 a 12 anos

Venres 12 de nadal, ás 11.30 h.
A modernidade chega á vila.  Fanfarra Títeres (A. Galega Fanfarra de Soños). (Función Escolar).
Duración: 50 minutos
Xénero: títeres e sombras chinesas
Público preferente:  a partir de 5 anos (primaria)

Venres 12 de nadal, ás 20.30 h.
Bailando cos contos. Baobab Teatro
Duración: 45 minutos
Xénero: infantil
Público preferente:  familiar a partir de 4 anos

Sábado 13 de nadal, ás 20.00 h.
Cipriano de Bequelar (Historia de amor e morte). Grupo de Teatro Carrachanacacha (A.C. O Aturuxo de Melpómene)
Duración: 75 minutos
Xénero: Comedia surrealista agro punk
Público preferente:  a partir de 13 anos

Venres 19, ás 20.30 h.
Fóra de lugar. Grupo de Teatro Teruca Bouza (Sociedade de Amigos da Paisaxe).
Duración: 70 minutos
Xénero: Comedia
Público preferente:  a partir de 12 anos

Sábado 20, ás 20.00 h.
Cabaré Manicómico. Creacións manicómicas. (Asociación Cultural Manicómicos).
Duración: 80 minutos
Xénero: cabaré (novo circo, mimo, clown, teatro xestual …)
Público preferente:  a partir de 13 anos

• ACTUALIDADE,Novas

Industria tentará chegar a un acordo coa aseguradora antes de emprender a vía xudicial polos danos da balsa de Monte Neme

No caso de xuízo, cada parte reclamará de forma individualizada

A Consellería de Economía e Industria da Xunta de Galicia tentará chegar a un acordo coa aseguradora AXA polos danos derivados da rotura dunha balsa mineira en Monte Neme o pasado 10 de febreiro deste ano. Así, e dado que a antiga concesionaria está en concurso de acredores, tanto a consellería como os concellos afectados, Carballo e Malpica, consideran que AXA debería facerse cargo dos gastos derivados dos danos provocados ao ser a entidade aseguradora responsable no momento do suceso. Dado que AXA rexeita asumir esta responsabilidade, barallouse a posibilidade de emprender a vía xudicial, mais a consellería tratará antes de chegar a un acordo que evite os xulgados. Esta é unha das principais conclusións da xuntanza mantida en Santiago de Compostela entre o alcalde de Carballo, Evencio Ferrero; o de Malpica, Eduardo Parga Veiga, e o concelleiro de Obras e Servizos de Carballo, Luís Lamas, con Borja Verea Fraiz, responsable da Secretaría Xeral Técnica de Industria; Ángel Bernardo Tahoces, director xeral de Enerxía e Minas; Isidoro Martínez Arca, Xefe Territorial da Coruña, e Francisco Conde López, conselleiro de Economía e Industria. Así mesmo, e en caso de que non prospere o acordo amigable, falouse dos pasos que se darán en caso de que a situación se dirima nos tribunais. Chegouse á conclusión de que cada parte, os concellos por un lado e a consellería por outro, deberá reclamar de forma individualizada, aínda que exista a posibilidade de chegar a un acordo para que a causa a leve o mesmo avogado e as argumentacións vaian en sintonía.

Por último, outro dos asuntos abordados durante a reunión foi a situación dos particulares afectados, un total de 15 entre os dous concellos. Así, expúxose diante dos responsables da Consellería a posibilidade de que os particulares tamén teñan a oportunidade de reclamar en caso de chegarse a xuízo. Os responsables da Xunta manifestaron que a cuestión será obxecto de estudo. Hai que lembrar que a rotura dunha das tres balsas mineiras de Monte Neme orixinou unha vertedura de máis de 24.000 metros cúbicos de auga, e deixou unha greta de 10 metros de alto por catro de ancho. Máis do 70 por cento dos danos correspóndense co Concello de Malpica, no que as riadas causaron maiores danos, e o restantes foron en Razo da Costa. Os danos están cifrados en 140.758 euros e xa teñen sido abonados polos dous concellos afectados.

• ACTUALIDADE,Novas

Período medio de pago a provedores correspondente ao terceiro trimestre de 2014

(Real Decreto 635/2014, de 25 de xullo)

• ACTUALIDADE,Novas

Cincuenta veciños do municipio de Malpica participan nos cursos de envellecemento activo inaugurados hoxe

A empresa de economía social + Porvir, creada pola asociación Íntegro, realizou en Buño a súa presentación en sociedade con esta actividade

A Concellería de Servizos Sociais de Malpica puxo en marcha hoxe dous talleres de envellecemento activo na Casa do Oleiro de Buño e no Centro Cívico. Na iniciativa participan 50 persoas, repartidas entre ámbolos grupos, e mesmo hai lista de agarda. De feito, este tipo de cursos teñen en cada edición unha excelente acollida por parte dos participantes.

Este ano hai moitas novidades, tal como explicou a concelleira de Servizos Sociais, Marisol Blanco Gorín, empezando pola empresa que vai desenvolver os talleres. De feito, ás catro da tarde presentouse en Buño + Porvir, unha empresa de economía social creada no seo da asociación Íntegro que presta servizos especializados na atención ás persoas con diversidade funcional, aos maiores e á infancia. O presidente de Íntegro, Adolfo López Baña, agradeceu o apoio do Concello de Malpica, “a primeira Administración que confía en nós”, dixo.

O alcalde, Eduardo Parga, reiterou esa confianza e expresou o seu desexo de que os participantes se involucren nas actividades previstas “porque estou segurO -dixo- de que van gañar en benestar e autonomía”.

O curso de envellecemento activo pretende, de feito, ofrecer aos maiores unha serie de ferramentas que lles axuden a mellorar a súa calidade de vida. Monitores e participantes traballarán nos ámbitos da saúde, a participación na sociedade, a seguridade e a formación continua, catro grandes bloques que abranguen propostas coma alimentación saudable, mantemento físico, club de lectura, festas, teatro, cine, visitas a balnearios, prevención de riscos no fogar ou busca de afeccións. O obradoiro desenvolverase ata finais de novembro.

• ACTUALIDADE,Novas

Rematan en Malpica os obradoiros de lendas, que serán recollidas nun catálogo e un libro ilustrado

Xosé Manuel Varela, coordinador do proxecto, cualificou como “moi satisfactorios” os talleres desenvolvidos nos centros de ensino

Hoxe remataron os obradoiros de lendas organizados polo Concello de Malpica, co apoio da Secretaría Xeral de Política Lingüística da Xunta de Galicia, dentro do programa de dinamización lingüística que coordina o filólogo Xosé Manuel Varela. As últimas sesións celebráronse pola mañá no IES Urbano Lugrís de Seaia e pola tarde no CEIP Xoaquín Rodríguez Otero de Buño, cunha gran participación por parte dos escolares. O coordinador do proxecto cualificou os talleres como “moi satisfactorios”, malia que a folga no ensino reduciu o grupo de alumnos de 3º da ESO na xornada matinal.

Unha vez recollidas as achegas dos escolares e dos usuarios das aulas de lecer de Buño e Malpica, o seguinte paso consistirá na redacción dun catálogo de lendas para o Concello de Malpica e a Secretaría Xeral de Política Lingüística. Así mesmo, Xosé Manuel Varela e o pintor Miguel Anxo Calvo están a traballar xa nun libro ilustrado de lendas malpicás que esperan ter rematado de aquí a fin de ano.

Os obradoiros permitiron realizar unha recolleita de literatura oral transmitida de xeración en xeración e comprobar a súa riqueza. De feito, hai lendas de santos, furnas, covas, túneles, mouros e mouras, carballos, mosteiros, meigas, vigas de ouro, caldeiras de ouro, pedras con pegadas… pero haberá que esperar á publicación do libro para coñecelas en detalle.

• ACTUALIDADE,Novas

O plan de mantemento do Concello de Malpica permitiu mellorar máis de 20.000 metros de vías municipais

O goberno municipal xestionou unha achega da Deputación para facer fronte a un investimento que supera os 226.000 euros

O Concello de Malpica de Bergantiños vén de rematar un plan de acondicionamento e mantemento que permitiu mellorar un total de 20.489 metros de vías municipais. O programa de actuación deseñouse en función das necesidades, de maneira que nalgúns casos só foi preciso acometer a limpeza das cunetas, pero na maioría leváronse a cabo tarefas de adecuación dos firmes, bacheos repavimentacións ou novas pavimentacións.

O goberno municipal de Malpica xestionou unha achega da Deputación por importe de 226.578,80 euros para poder levar a cabo o plan de mantemento, que afectou a un total de 21 tramos de vías repartidos polos lugares de Barizo, Asalo, Mens, Beo, Seia, Taraio, Aldeola, Buño, Cambre, Pedrosa, Piñeiros, Santiso, Vilarnovo e Seixas.

As intervencións foron diferentes en cada caso. A actuación realizada no núcleo de Beo, por exemplo, incluíu o derrubo dun muro para ensanchar a calzada uns dous metros, o que facilita tanto o tráfico rodado, ao permitir que circulen dous vehículos en paralelo, coma peonil. Tanto o alcalde, Eduardo Parga, como o concelleiro de Obras, Miguel Fernández, destacaron especialmente este último aspecto por tratarse dunha rúa urbana que estaba moi deteriorada e que foi totalmente pavimentada con cemento.

En Asalo asfaltáronse dous tramos, un de zahorra e outro de terra, e o primeiro tamén foi ampliado para mellorar a mobilidade. Outra das vías ensanchadas foi a de Sorrío (Seaia), onde ademais acometeuse a canalización das augas pluviais para intentar resolver as inundacións que todos os invernos afectan ás fincas e á mesma estrada. A canalización das augas foi unha actuación complementaria, así mesmo, en Leiloio, onde a pista foi ensanchada e asfaltada. En Buño as obras leváronse a cabo no límite co municipio de Ponteceso. De feito, os dous concellos puxéronse de acordo para realizar o asfaltado nos seus treitos correspondentes.

• ACTUALIDADE,Novas

Clausurado en Buño o curso de pequenos arranxos de xardinería para persoas con diversidade funcional

Os alumnos do obradoiro, impartido por Íntegro, completarán en abril os traballos de acondicionamento do xardín da praza do Cruceiro

O alcalde de Malpica, Eduardo Parga; os concelleiros de Servizos Sociais e Obras, Marisol Blanco Gorín e Miguel Fernández, e o presidente da asociación Íntegro, Adolfo López Baña, clausuraron hoxe en Buño un curso que permitiu a formación de 11 persoas con diversidade funcional para realizar pequenos arranxos de xardinería doméstica. O rexedor malpicán expresou o compromiso do goberno municipal coas iniciativas formativas que, coma neste caso, poden contribuír a mellorar o currículo dos participantes e a facilitar a súa inserción no mundo laboral. Neste sentido, o presidente de Íntegro comentou que a xardinería é nestes momentos un dos nichos de traballo que ten detectado a entidade. Adolfo López Baña avogou pola organización doutras actividades que permitan cubrir ese baleiro, e Eduardo Parga manifestou a súa disposición a colaborar nese sentido.

Neste caso, o obradoiro foi subvencionado pola Deputación Provincial da Coruña e durou algo máis dun mes. Ao longo deste tempo, os alumnos e alumnas recibiron formación teórica na Casa do Oleiro e realizaron prácticas no xardín da praza do Cruceiro de Buño. Ata alí desprazáronse hoxe os representantes do Concello de Malpica e da asociación Íntegro. Aínda que o cambio é evidente, o mal tempo impediu completar o proxecto, que quedará rematado nos vindeiros días. Ademais, a acción formativa inclúe unha segunda parte centrada no mantemento da nova área verde que se desenvolverá no mes de abril.

Miguel Álvarez, monitor do curso, destacou o traballo realizado polos alumnos e a utilización de materiais que permiten reflectir a esencia de Buño. Así, no axardinamento utilizouse grava de ladrillo, e na decoración, ánforas e outras pezas de olería. Plantas de tempada e arbustos completan a intervención realizada.

Despois da visita ao xardín, alumnos, autoridades e persoal municipal compartiron un aperitivo na Casa do Oleiro. 

• ACTUALIDADE,Novas

Os concellos de Malpica e Carballo sumaranse á demanda contra a aseguradora da empresa mineira do Monte Neme

Os alcaldes, Eduardo Parga e Evencio Ferrero, reuníronse hoxe para estudar accións conxuntas

Os alcaldes de Carballo, Evencio Ferrero, e Malpica, Eduardo Parga Veiga, mantiveron hoxe, martes 14 de outubro, unha xuntanza na Casa do Concello carballesa para falar da negativa da entidade aseguradora AXA a facerse cargo dos gastos derivados dos danos provocados pola rotura dunha balsa mineira no Monte Neme o pasado 10 de febreiro.

Os danos están cifrados en 140.758 euros e xa teñen sido abonados polos dous concellos afectados, mais ante o feito de que a aseguradora rexeite facerse cargo dos custes, barállase a opción de adoptar medidas legais, xa que a antiga concesionaria está en concurso de acredores e sinala a AXA como responsable. Así, ante a intención manifestada pola Consellería de Industria da Xunta de Galicia de interpoñer unha demanda contra AXA para que a aseguradora asuma a súa responsabilidade, esta mañá Ferrero e Parga Veiga acordaron solicitar unha xuntanza co Director Xeral de Enerxía e Minas, Ángel Bernardo Tahoces, para que os concellos tamén teñan a oportunidade de personarse nesta demanda.

Así mesmo, esperan poder estudar os posibles mecanismos que se poderían poñer en marcha para que os veciños e veciñas afectados tamén sexan quen de reclamar de forma conxunta. Hai que lembrar que a rotura dunha das tres balsas mineiras de Monte Neme orixinou unha vertedura de máis de 24.000 metros cúbicos de auga, e deixou unha greta no noiro de 10 metros de alto por catro de ancho. Máis do 70 por cento dos danos correspóndense co Concello de Malpica, no que as riadas causaron maiores danos, e o restante son danos cuantificados en Razo da Costa.