Novas – Páxina 56 – Concello de Malpica de Bergantiños

23Abr 2019

ACTUALIDADE,Novas

O fútbol base volveu a conquistar Xaviña no I Memorial Ramón Calvete Gómez

O V Torneo de Fútbol Base Concello de Malpica – I Memorial Ramón Calvete Gómez converteu nunha festa do fútbol e da deportividade o campo municipal de Xaviña (Buño), no que se deron cita case 500 nenos e nenas.

O xoves foi o día de benxamíns e infantís, con 16 equipos en total. As Escolas de Fútbol Luis Calvo Sanz alzáronse co campionato na categoría benxamín, despois de superar á SD Sofán por 6-2. O Imperátor OAR da Coruña foi terceiro e o Galicia Gaiteira, cuarto. Nos trofeos individuais, Lucas Suárez, das EF Luis Calvo Sanz, recibiu o Trofeo Ramón Calvete Gómez ao mellor xogador, mentres que o gardameta da SD Sofán A, Ismael Cancela, foi elixido como mellor porteiro do torneo.

Na categoría infantil o título foi para o Corme, que se impuxo ao Cabana na final. O Bergantiños foi terceiro e o Concello de Zas, cuarto. O Trofeo Ramón Calvete Gómez ao mellor xogador foi para Borja Torrado, do Corme CF, mentres que o mellor porteiro do torneo foi Yago Pazos, da Cabana SD.

O venres foi a quenda de prebenxamíns e o alevíns.

Na categoría prebenxamín, as Escolas de Fútbol Luis Calvo Sanz mostráronse intratables de principio a fin e gañaron o torneo. Tordoia foi segundo; Cee, terceiro, e Camariñas, cuarto. No que respecta aos premios individuais, o Trofeo Ramón Calvete Gómez ao mellor xogador foi para Iker López, da SD Tordoia, e o de mellor porteiro foi para Iago Marcote, do UC Cee.

Por último, na categoría alevín tamén se impuxeron as EF Luis Calvo Sanz, tras vencer na final ao Cerqueda. O terceiro posto foi para o Sofán, que gañou ao Cabana na quenda de penaltis. O Trofeo Ramón Calvete Gómez ao mellor xogador foi para Manu Abelenda, das EF Luis Calvo Sanz, e o de mellor porteiro, para Kelyan Faria, do Cabana SD.

Ler máis

23Abr 2019

ACTUALIDADE,Novas

O Día do Ritmo ofrecerá este venres en Malpica un espectáculo de baile moderno e ximnasia rítmica

O venres 26 celébrase o Día do Ritmo, que cumpre 14 anos consolidado como unha cita de éxito, tanto polo espectáculo que ofrece como pola elevada participación de deportistas e de público. O pavillón municipal de Malpica será escenario dun espectáculo de deporte e música aberto a todos os públicos, que comezará cunha exhibición de ximnasia rítmica a cargo das escolas municipais de Cabana e Malpica e rematará cunha demostración do alumnado da escola municipal de baile moderno do Concello de Malpica.

O espectáculo comezará ás 18.00 horas, e a entrada é libre.

Nos últimos años, desde a área de Deportes do Concello de Malpica vense realizando un importante esforzo na promoción das modalidades deportivas de baile moderno e ximnasia rítmica. Con esa intención, á marxe de difundir a súa práctica involucrando a diferentes entidades, incluso de fóra do municipio, estableceuse a organización dun evento co obxecto de dar unha maior difusión a ditas actividades e poder ofrecer tamén un espazo específico para realizar demostracións do aprendido durante o curso.

Ler máis

17Abr 2019

ACTUALIDADE,Novas

Medio millar de nenos renderanlle homenaxe a Ramón Calvete en Xaviña

O Campo Municipal de Xaviña xa conta as horas para acoller a quinta edición do Torneo de Fútbol Base Concello de Malpica, que se celebrará o xoves 18 e o venres 19 de abril no municipal oleiro para render homenaxe a un dos seus grandes impulsores como foi o gran Ramón Calvete Gómez.

O Concello de Malpica e a Asociación Deportiva Vidú xa están ultimando os detalles do V Torneo de Fútbol Base Concello de Malpica – I Memorial Ramón Calvete Gómez, que unha Semana Santa máis será unha gran festa do fútbol base e a cal, a partires desta edición, terá unha toque sentimental, xa que dende a organización decidiron renderlle homenaxe a un home de fútbol, unha persoa que o deu todo pola súa paixón e polo seu Buño como foi ex presidente branquiazul Ramón Calvete Gómez.

Nada máis e nada menos que cerca de medio millar de nenos e nenas que compoñen os 29 equipos participantes serán os que encherán dun gran ambiente de fútbol e de convivencia deportiva o Campo Municipal de Xaviña.

Neste evento, que xa está consolidado na axenda deportiva de cada Semana Santa, estarán representados os seguintes 16 clubs: Corme CF, Buño SCD, EF Luis Calvo Sanz, Cabana SD, CF Dumbría, Galicia Gaiteira, UD Cerqueda, SD Tordoia, SD Sofán, Camariñas FC, UC Cee, Bergantiños FC, Victoria CF, Imperátor OAR, Concello de Zas e Muxía CF.

Na xornada do xoves, os benxamíns e os infantís serán os encargados de facer gozar aos afeccionados que se acheguen ata Xaviña dende as 10 da mañá ata as 8 da tarde, mentres que o venres será a quenda dos prebenxamíns e dos alevíns nunha xornada que comezará ás 10.30 da mañá e rematará ás 8.20 da tarde.

Como adoita ser habitual nos eventos nos que está metida a Asociación Deportiva Vidú, haberá representación feminina xa que é unha das premisas da entidade cormelana, e neste V Torneo de Fútbol Base Concello de Malpica – I Memorial Ramón Calvete Gómez haberá dous equipos formados totalmente por nenas como son as promesas das EF Luis Calvo Sanz que competirán na categoría benxamín e as infantís do Victoria CF da Coruña.

Dende a organización convidan a todos aqueles que sexan afeccionados ao fútbol que se acheguen ao Campo Municipal de Xaviña (Buño) para gozar dun evento que sempre é unha gran xornada de convivencia futbolística para todos os participantes e tamén para os espectadores.

Ler máis

13Abr 2019

ACTUALIDADE,Cultura,Novas

O Ecomuseo do Forno do Forte de Buño ampliará o seu horario de apertura e a súa oferta de actividades durante a Semana Santa

O Ecomuseo do Forno do Forte de Buño ampliará o seu horario de apertura durante a Semana Santa coa finalidade de converterse nun recurso de referencia para as persoas que visiten a nosa comarca durante eses días. Deste xeito, dende o luns 15 ata o sábado 20 o ecomuseo estará aberto de 10 a 14 e de 16 a 20 horas, e o domingo 21 poderá visitarse de 10 a 14 horas.

Paralelamente, ao longo da semana levaranse a cabo varias actividades. De martes a venres, de 11.30 a 13.30 e de 16.30 a 18.30, haberá obradoiros de barro para nenos e nenas, cun máximo de 25 participantes por quenda. Pero á parte de que os pequenos teñan o seu primeiro contacto co barro no cabanote do Forno do Forte, os maiores poderán probar a sentarse no torno.

Así mesmo, o venres e o sábado realizaranse rutas guiadas polo Buño oleiro. O ecomuseo será o punto de partida ás 12.00 horas e tamén o de chegada ás 14.00 horas. Ao longo da Ruta Oleira visitaranse os fornos da Costa e Os Mouróns, así coma o centro da vila, onde os visitantes non só terán a oportunidade de ver e saber máis sobre as tendas, os alfares ou a tradición oleira, senón tamén sobre a igrexa, o cruceiro e outros elementos patrimoniais de relevancia. Nos fornos restaurados faranse paradas específicas para explicar as súas características e o proceso de cocción.

Ler máis

9Abr 2019

ACTUALIDADE,Cultura,Novas

O Ecomuseo Forno do Forte achega 14 pezas de olería á exposición “Pensar coas mans”, que será inaugurada o venres no Museo Centro Gaiás

Unha cazola, un xerro, un pucheiro, un barreño, unha tarteira, unha chocolateira, unha escudela, unha cunca, un cunquelo, unha cacheleira, unha fonte, un falsete, un botixo de rosca e unha buxina son as 14 pezas da segunda metade do século XIX e do século XX que representarán á Olería de Buño na exposición “Pensar coas mans. Cestería, cerámica e xoiería de Galicia”, que será inaugurada este venres 12, ás 12.00 horas, no Museo Centro Gaiás.

Ata Santiago de Compostela desprazarase o alcalde de Malpica, Eduardo Parga, que participará no acto de apertura da exposición xunto aos conselleiros de Cultura e Turismo, Román Rodríguez, e Economía, Emprego e Industria, Francisco Conde, entre outras autoridades.

A exposición, organizada pola Fundación Cidade da Cultura de Galicia coa colaboración da Fundación Artesanía de Galicia e a Secretaría Xeral de Igualdade, propón unha viaxe no tempo a través de 250 pezas da artesanía galega. Entre elas estarán as 14 cedidas polo Ecomuseo Forno do Forte da súa colección de olería tradicional. A mostra poderá visitarse ata o 8 de setembro de 10.00 a 20.00 horas.

A tradición oleira de Buño remóntase á etapa prehistórica coa creación dos primeiros cacharros feitos a man. Pero foi nos séculos XVIII e XIX cando acadou a súa idade de ouro. Grazas a un arduo traballo de recuperación e á inestimable colaboración dos artesáns e veciños/as da localidade, na actualidade podemos desfrutar dunha das coleccións de pezas tradicionais máis antigas e voluminosas da nosa olería, custodiadas no Ecomuseo Forno do Forte e divididas, segundo a clasificación realizada no seu momento por Luciano García Alén, en tres series: ancestral (anteriores ao ano 1700), antiga (do 1700 ao 1900) e moderna (posteriores ao ano 1900).

Ler máis

8Abr 2019

ACTUALIDADE,Novas

Voluntarios da agrupación local de Protección Civil participan nun curso de intervención en accidentes de tráfico

Mellorar a seguridade cidadá é un dos obxectivos do goberno municipal. Nesa mesma liña, persoal da Agrupación de Voluntarios de Protección Civil está a participar dende o día 5 nun curso de prevención e intervención en accidentes de tráfico organizado pola Academia Galega de Seguridade (Agasp) e que se desenvolve na base de Protección Civil de Carballo.

O curso, de 34 horas lectivas, inclúe formación en primeiros auxilios, excarceración, mercadorías perigosas e accidentes con risco ambiental.

Ler máis

8Abr 2019

ACTUALIDADE,Novas

O Concello de Malpica ofrece aos clubs de fútbol formación no manexo de desfibriladores

O Concello de Malpica quere mellorar a seguridade de deportistas e persoas usuarias das instalacións deportivas municipais, e con esa finalidade ofrece aos clubs de fútbol que militan nos grupos 2º (Segunda Galicia) e 4º (Terceira Galicia) da Costa a posibilidade de formarse no manexo de desfibriladores automáticos externos.

O vindeiro sábado 13, a partir das 10.00 horas, celebrarase no pavillón polideportivo municipal un curso intensivo dirixido ás persoas que determinen os propios clubs.

Ler máis

17Mar 2019

ACTUALIDADE,Cultura,Novas

Emilio Rúa e Rosa Cedrón estarán o sábado 23 en Malpica para ofrecer o concerto suspendido no Nadal

O vindeiro sábado, 23 de marzo, celebrarase en Malpica o concerto de Emilio Rúa e Rosa Cedrón que estaba previsto para o 21 de decembro pasado e que foi suspendido debido aos dous días de loito decretados tras o falecemento de José Angel Sanjurjo no afundimento do pesqueiro “A Silvosa”.

Rosa Cedrón e Emilio Rúa ofrecerannos o espectáculo Diversións, incluído na Rede de Dinamización Lingüística da Xunta de Galicia, no que interpretarán pezas compostas por ambos os intérpretes e versións propias de pezas tradicionais.

O concerto comezará ás 20.00 horas no Auditorio do Centro Cívico, e a entrada será libre e de balde.

Ler máis

12Mar 2019

ACTUALIDADE,Novas

O Concello e Protección Civil de Malpica poñen en marcha unha nova campaña de trampeo de avespa velutina

O Concello de Malpica anticipa a campaña de trampeo da avespa velutina debido a que tamén se adiantou a aparición das primeiras raíñas da temporada. En colaboración coa Agrupación de Voluntarios de Protección Civil vimos de poñer en marcha unha campaña aberta á participación e colaboración tanto de apicultores/as como de veciños e veciñas que queiran axudar a combater a praga, ao tempo que iniciamos a colocación de trampas en zonas axardinadas, nas que abundan as árbores que exercen maior atracción sobre as avespas asiáticas, como camelias ou rododendros, pero tamén nas proximidades de edificios e espazos públicos como centros escolares ou parques infantís.

As persoas interesadas poden pasar pola Casa do Concello e solicitar trampas e líquido atraínte que deberán colocar o antes posible en zonas con plantas ou árbores con flores (camelios e rododendros están entre os preferidos pola avespa asiática). Tanto na trampa como no envase do líquido explícanse os pasos que se deben seguir, ademais de recordar ao voluntariado que tamén se poden preparar trampas con botellas de plástico e líquidos de uso habitual en calquera fogar como viño, cervexa, zume ou simplemente auga con azucre.

A campaña foi presentada polo alcalde, Eduardo Parga, e membros de Protección Civil. No acto lembraron a importancia de que as persoas que queiran colaborar na campaña faciliten os seus datos no momento de solicitar as trampas e un número de teléfono de contacto para poder realizar un seguimento da campaña. Nas oficinas xerais da primeira planta do Concello de Malpica ofreceráselles toda a información.

Ler máis

7Mar 2019

ACTUALIDADE,Novas

O Concello de Malpica celebra o Día da Muller co lema “Modelando a sociedade, desenredando o noso futuro”

O Concello de Malpica de Bergantiños súmase á celebración do Día Internacional da Muller co lema “Modelando a sociedade, desenredando o noso futuro”, unha homenaxe a dous sectores laborais representativos do noso concello: a olería, exemplo das dificultades que atopan as mulleres para acceder a traballos copados polos homes, e a pesca, no que o labor fundamental que desenvolven as redeiras careceu de recoñecemento ata non hai tanto tempo.

Oleiras e redeiras serán, precisamente, as protagonistas do acto conmemorativo do Día Internacional da Muller organizado pola Concellería de Servizos Sociais e Igualdade, que se celebrará o día 15. O primeiro colectivo estará representado pola presidenta da Asociación Oleira de Buño, Carmen Isabel Labrador Fariña, e o segundo, pola presidenta da Asociación de Redeiras O Fieital, Ángeles Millé Rodríguez. Xunto a ela estará Ana López Lorenzo, presidenta de Mulleres en Igualdade da provincia da Coruña, que explicará os obxectivos da asociación.

A concelleira de Servizos Sociais e Igualdade, Marisol Blanco Gorín, fai un chamamento aos veciños e veciñas para que poñan o seu gran de area participando no acto que celebraremos o venres 15, ás 19.30 horas, no Centro Cívico de Malpica. As persoas interesadas poden confirmar asistencia chamando ao número de teléfono 638 791 939.

Ler máis