Aberto o prazo de inscrición para o Concurso de Barcanas e Castelos de Area “Praia de Area Maior”
O certame celebrarase o venres 21 de agosto e, como é tradicional, coincidirá coas Festas do Mar de Malpica
O Concello de Malpica de Bergantiños abre o prazo de inscrición para o Concurso de Barcanas e Castelos de Area “Praia de Area Maior”, que despois de 15 anos de historia está xa consolidado como parte das Festas do Mar. O certame celebrarase o venres 21 de agosto, de 10.30 a 14.00 horas, segundo as bases que figuran de seguido.
BASES DO XV CONCURSO DE BARCANAS E CASTELOS DE AREA “PRAIA DE AREA MAIOR”
1. OBXECTO: O presente concurso terá por obxecto o fomento da cultura.
2. PUBLICIDADE: As presentes bases permanecerán expostas no taboleiro de anuncios do Concello dende a súa aprobación ata a finalización do procedemento, dada a súa escasa contía e de acordo co disposto no apartado VI) 6 do Anexo I das BEO do Concello de Malpica, asemade, daráselles publicidade mediante a páxina web do Concello de Malpica e cartelería.
3. PRAZO DE INSCRICIÓN: O prazo de inscrición rematará o venres día 21 de agosto ás 11.00 h. as inscricións poderán realizarse tanto no Departamento de Educación e Cultura do Concello ata o día 20 de agosto, como na Praia de Area Maior o día 21 de agosto de 2015, de acordo cos modelos de solicitudes facilitados polo Concello e que deberán ser remitidos, debidamente cumprimentadas, ó rexistro xeral de acordo co disposto no apartado VI)7 do Anexo I das BEO.
4. REQUISITOS DOS PARTICIPANTES:
– Cada participante ou grupo de participantes só poderá participar cunha única obra.
– Existiran tres modalidades: Infantil (até os 10 anos), amateur (de 10 anos en adiante) e barcanas (barcanas tradicionais de area sen límites de idade).
– No caso de menores de idade as solicitudes virán presentadas polos pais/nais ou titores que os representen, que terán a condición de beneficiarios.
– Para optar ó premio infantil todos os autores da obra deberán ter como máximo 10 anos cumpridos.
5. Existirán seis premios: 1º, 2º e 3º na modalidade amateur, premio á mellor barcana, premio infantil e premio especial do público.
6. CONTÍA MÁXIMA DOS PREMIOS: Os premios estarán dotados do seguinte xeito:
Premios amateur:
1º premio: 130,00 EUROS e trofeo
2º premio: 70,00 EUROS e trofeo
3º premio: 40,00 EUROS e trofeo
Premio á mellor Barcana: trofeo
Premio Infantil: trofeo
Premio Especial do Público: trofeo
7. REQUISITOS, LUGAR E PRAZO DA REALIZACIÓN DAS OBRAS:
– A obras realizaranse na Praia de Area Maior nas zonas balizadas polo Concello de Malpica para este fin.
– As obras realizaranse con posterioridade á inscrición do/a participante ou participantes e en calquera caso entre ás 11.00 h. e as 13.00 h. do día 21 de agosto de 2015.
– Para a elaboración das obras só se poderán utilizar area e materiais que se atopen depositados na praia.
– Para a elaboración das obras permitirase o uso de ferramenta, difusores de auga, etc. aínda que estes en ningún caso poderán formar parte da obra unha vez rematada.
– Na elaboración das obras non está permitido utilizar ningún produto compactante ou fixador da area, agás a auga.
8. CRITERIOS :
– O xurado valorará a calidade artística e a orixinalidade de cada proposta de acordo cos seguintes criterios:
ü Calidade técnica da obra
ü Complexidade da obra realizada
ü Deseño da obra
ü Dimensións da obra realizada
ü Vinculación da obra co Concello de Malpica
ü Orixinalidade da obra
– Para a elección do premio especial do público instalarase unha urna, entre as 13.00 h. e as 13.30 h. na Praia de Area Maior na que tódolos espectadores/as do concurso poderán participar, sendo agraciada a obra con maior número de votos, agás que xa obtivera outro premio por parte do xurado, nese caso outorgaríase á seguinte obra máis votada.
9. O fallo do xurado será inapelable, e será notificado ós presentes no acto.
10. COMPOSICIÓN DO XURADO: O xurado estará composto por 2 representantes do Concello de Malpica nomeados polo Alcalde (que determinará quen dos dous actuará como Presidente e como vogal) e 2 das entidades colaboradoras (Asociación de Amas de Casa de Malpica e/ou Asociación de Mulleres Redeiras Artesás Mar da Illa) a proposta destas e nomeados/as polo Alcalde e que actuarán como vogais. Actuará como secretario/a do mesmo un/unha funcionario/a do Concello de Malpica designado a tal fin pola Alcaldía.
11. XUSTIFICACIÓN E PAGAMENTO: Unha vez elaborada a acta do xurado propoñendo os beneficiarios, o órgano competente, acordará a concesión e recoñecemento de obrigas a favor dos mesmos. O pagamento efectuarase en efectivo tras o fallo do xurado. Os beneficiarios acreditarán suficientemente a súa identidade e a recepción do premio correspondente perante o Concello segundo o modelo facilitado ao efecto.
12. PUBLICIDADE DOS BENEFICIARIOS: Publicarase no taboleiro de anuncios do Concello a resolución ou acordo polo que se concedan os premios aos que se refiren as presentes bases.