gl_ES
Tempo Malpica de Bergantiños
Xoves 21°
14°
Venres 19°
15°
Sábado 20°
14°
tiempo.com   +info
  1.  
  2. 2018
  3. Agosto

Agosto 2018

31Ago 2018

Aberto o prazo de inscrición para participar nun curso de coidadores/as de persoas con alzheimer

coidándose para coidar mellor

Xa está aberto o prazo de inscrición para participar no curso para coidadores de persoas con alzheimer, que organiza a Asociación de Familiares de Enfermos de Alzheimer de Bergantiños (Afaber) en colaboración coa Concellería de Servizos Sociais de Malpica.

A actividade, que será de balde, terá lugar os días 17, 18, 19, 24 e 25 de setembro no Centro Cívico, en horario de 10:30 a 12:30. As persoas interesadas poderán anotarse chamando ao departamento que dirixe Marisol Blanco Gorín (981 720 280) ou poñéndose en contacto coa entidade no 981 758 545 e no 625 980 691.

Coidándose para coidar mellor é o título desta nova acción formativa, que pretende proporcionar a coidadores/as e familiares a asistencia psicoterapéutica necesaria para o correcto desempeño das súas funcións. Recursos emocionais, saber pedir axuda, atender as súas propias necesidades e prestar os coidados necesarios sen comprometer a súa saúde son algunhas das materias que se abordarán durante o curso.

30Ago 2018

Consellos básicos para evitar as picaduras de avespa velutina

Este ano está habendo moitos casos de picaduras de avespa velutina, entre outras causas porque estes animais cambiaron os seus hábitos e fixeron os niños nos lugares máis insospeitados, coma unha pedra ou un pé de millo. Por iso é preciso extremar as precaucións, sobre todo por parte das persoas que traballan nos sectores forestal e/ou agrario.
 
Toma nota destes consellos básicos:
➡️Antes de empezar a traballar, realizar un recoñecemento da parcela para comprobar que non existen niños. É frecuente que aparezan entre as silveiras.
➡️ Se atopas un niño de velutina non te achegues nin lle toques, porque se sentirán atacadas. Chama ao 012 ou ao 112 para que acudan a retiralo.
➡️ No caso dun ataque fuxe o máis rápido posible e intenta refuxiarte nalgún lugar pechado coma o coche, protexe a cara e a parte de atrás do pescozo (teñen tendencia a picar nesa parte do corpo) e non fagas movementos bruscos. Se a atacada é outra persoa non te achegues, chama rapidamente ao 112. E se es alérxico procura levar sempre contigo a medicación precisa.
velutina-ISGA-724x1024
 
Difunde!
29Ago 2018

Últimos días de inscrición para a III Carreira Pedestre Concello de Malpica, que se celebrará o 8 de setembro

3carreirapedestre

O Concello de Malpica organiza por terceiro ano consecutivo a Carreira Pedestre Concello de Malpica, que se celebrará o 8 de setembro a partir das 18.00 horas. A inscrición pode realizarse ata o día 4 de setembro aquí. A cota para a 10K é de 4 euros, un dos cales irá destinado á Asociación Española contra o Cancro. Os/as participantes que non teñan chip poderán alugalo por 1 euro. As carreiras das categorías infantil, cadete, alevín, benxamín e biberón son gratuítas.

Ademais do percorrido de 10 quilómetros para os nacidos no ano 2002 e anteriores, haberá outros adaptados a cada categoría: 3.200 metros para infantil (2005-2006) e cadete (2003-2004), 1.400 metros para alevín (2007-2008), 700 metros para benxamín (2009-2012) e 100 metros para biberóns (nacidos no 2013 e posteriores).

A carreira principal sairá da praza de Anselmo Villar Amigo por Eduardo Vila Fano, rúa do Porto, Dársena, Camiño do Río, Eduardo Vila Fano, Guardia Pardines, Paseo da Praia, Canido, Cancela de Areas, Seaia, estrada da praia de Seaia, IES Urbano Lugrís, estrada de Santo Hadrián ata a capela, Camiño do Santo, Canido e Paseo da Praia, onde estará situada a meta. “Este traxecto permítenos combinar dureza, con varios cambios de superficie, e paisaxe, xa que as vistas durante o percorrido son espectaculares”, comentou o alcalde de Malpica, Eduardo Parga.

Todos os participantes contarán con seguro, e ademais disporán de servizos de ducha e gardarroupa, avituallamento e un agasallo. O Concello de Malpica porá a disposición dos participantes na carreira o pavillón polideportivo para que se podan cambiar e duchar, así como un servizo de gardarroupa no mesmo pavillón, onde tamén se recollerán os dorsais e chips o mesmo día 8 en horario de 10.00 a 13.00 e de 15.00 a 17.30.

Podes descargar aquí o regulamento e a autorización para os/as menores:

regulamento III carreira pedestre concello de Malpica

AUTORIZACION menores

28Ago 2018

Abrimos o prazo de inscrición para o ximnasio municipal, que empezará a funcionar o 3 de setembro

ximnasio_municipal (1)

Mañá mércores abriremos o prazo de inscrición para o ximnasio municipal, que empezará a funcionar o luns 3 de setembro. A cota é de 15 euros por mes, e as anotacións poden realizarse no Departamento de Deportes, onde tamén se ofrecerá todo tipo de información sobre o servizo. O ximnasio municipal de Malpica funcionará de luns a venres en horario de 16.00 a 22.00.

Segundo se recolle na ordenanza reguladora do servizo, as persoas usuarias deben acatar as seguintes normas de funcionamento:

  • Por motivos hixiénicos é obrigatorio levar unha toalla para realizar os exercicios nos distintos aparatos que sexan utilizados.
  • Debe facerse un uso adecuado das máquinas, en caso de dúbida, preguntar ó persoal encargado.
  • O usuario/a deberá respectar o material da sala e colocalo non seu sitio unha vez que remate o seu uso.
  • O usuario/a debe deixar a máquina ou o aparato a utilizar entre series, de xeito que permita unha rotación a outros usuarios/as.
  • No caso de que estean persoas esperando debe respectar o tempo de limitación estipulado para as máquinas de traballo cardiovascular e musculación (sendo este nas máquinas de cardio de 30 min).
  • A capacidade máxima do ximnasio é a do mesmo número de máquinas coas que conte o ximnasio.
  • Non está permitida a entrada no ximnasio a menores de 16 anos agás estean a participar nun programa dirixido polo Concello de Malpica de Bergantiños.
  • Para ser usuario/a do ximnasio esíxese ter cumpridos os 18 anos. En caso de estar entre os 16 e 18 anos esixirase autorización por escrito dos pais ou titores.
  • Non se permite a entrada á sala con mochilas, botellas de cristal e comida.
  • Non se pode acceder á sala co mesmo calzado que se utilice para acceder dende o exterior, e deberá ser sempre calzado deportivo, non podendo realizar ningunha actividade sen camiseta.
  • A requirimento do persoal da instalación o usuario/a terá a obriga de identificarse mediante o carné.

Descarga aquí a folla de inscrición:

27Ago 2018

A Concellería de Servizos Sociais porá en marcha en setembro un taller de arranxos florais

Na Concellería de Servizos Sociais e Igualdade xa estamos preparando as actividades do curso, e a primeira que poremos en marcha será un taller de arranxos florais. Favorecer a autonomía persoal e as habilidades básicas, mellorar as capacidades cognitivas, eliminar o estrés, facilitar novos coñecementos en diversas áreas e crear un ambiente positivo entre flores son, tal como explica a concelleira Marisol Blanco Gorín, os principais obxectivos do obradoiro, que será impartido por Victoria Couñago Gómez, da florería Vina’s de Malpica.

O taller, xestionado pola empresa de economía social Máis Porvir, levarase a cabo do 5 de setembro ao 18 de outubro. Haberá dous grupos, un en Malpica os mércores e outro en Buño os xoves, cun máximo de 15 participantes en cada un. En ámbolos dous casos o horario será de 16.00 a 18.00.

O prazo de inscrición está aberto ata o 4 de setembro ou ata esgotar prazas. As persoas interesadas poden dirixirse ao departamento de Servizos Sociais no Centro Cívico ou a través do teléfono 981 720 280.

TALLER ARRANXOS FLORAIS

23Ago 2018

O Concurso de Barcanas e Castelos de Area marca o comezo das nosas tradicionais Festas do Mar

CARTEL CASTELOS AREA AGOSTO 18

O Concurso de Barcanas e Castelos de Area “Praia de Area Maior” leva xa 17 anos marcando o comezo das tradicionais Festas do Mar. E este ano non será diferente, porque mañá venres a partir das 10.30 horas desenvolverase a 18ª edición coa finalidade de seguir promovendo a cultura popular e fomentando o uso lúdico da nosa praia. As inscricións poderán realizarse ata as 11 horas na mesma praia.

O Concello de Malpica establece tres modalidades de participación: infantil (ata 10 anos), amateur (a partir de 10 anos) e barcanas tradicionais de area (sen límites de idade). Cada participante ou grupo de participantes deberá realizar unha única obra. Na categoría amateur, coa colaboración de SonPress, haberá tres premios dotados con 130, 70 e 50 euros, respectivamente, e trofeo. Tamén recibirán trofeos os gañadores dos premios á mellor barcana, á mellor obra infantil (Premio Asociación de Amas de Casa de Malpica) e á máis votada polo público (Premio Asociación de Mulleres Redeiras Artesás Mar da Illa), que terá á súa disposición unha urna para votar entre as 13 e as 13.30 horas.

O xurado, que estará formado por representantes do Concello de Malpica, da Asociación de Amas de Casa e da Asociación de Mulleres Redeiras Artesás Mar da Illa, valorará a calidade técnica da obra, a súa complexidade, o deseño, as dimensións, a orixinalidade e a vinculación con Malpica.

Programa das Festas do Mar

cartel festas

Co Concurso de Barcanas e Castelos de Area arrancan as Festas do Mar, organizadas pola Asociación Cultural e Deportiva Estádiga coa colaboración do Concello, e que contarán tamén nesta primeira mañá de celebracións cos pasarrúas dos gaiteiros da Asociación Cultural Malante. Pero haberá música durante toda a xornada, xa que na sesión vermú das 14 horas actuará o Dúo Ciclón, ás 16 empezarán as actividades no mar na praia de Area Maior, ás 18 soará a música de Os Mecánicos no paseo e despois do pregón de Selina Otero, previsto para as 22 horas, chegará a verbena con Dúo Diamante, Smoke Trío, Monoulious Dop e Los Hijos de la Pandilla.

O sábado 26 actuarán de novo os gaiteiros de Malante ao longo da mañá, e na sesión vermú, que este ano terá dous escenarios, tocarán o Dúo De Festa (centro de saúde) e Calú (praza de Anselmo Villar Amigo). A partir das 17 horas haberá inchables na praia e ás 19 a Mekánica Rolling Band animará as rúas da vila. A verbena arrancará ás 23 horas cun cartel de luxo: Palladium e El Combo Dominicano.

As Festas do Mar rematarán o domingo con outra xornada chea de actividades: pasarrúas cos gaiteiros de Malante, misa cantada pola Coral de Malpica ás 12, sesión vermú ás 14 con O Tren da Unha, procesión marítima a partir das 17.30 e pasarrúas con Kilomberos de Monte Alto xa desde as 18 horas. Na última verbena, a partir das 22 horas, música variada con Disco Móbil Impacto, Grupo Bomba e Malpica Tomorrowland para pechar a festa tras a sesión de fogos de artificio na praia ás 24 horas.

19Ago 2018

O artesán rianxeiro Roberto Figueira Martínez entregou ao alcalde o escudo do Concello de Malpica tallado en madeira

ESCUDO CONCELLO

O artesán rianxeiro Roberto Figueira Martínez participou por segunda vez na Feira Medieval Mariñeira de Malpica, e por segunda vez despídese da nosa vila deixándonos un agasallo. Despois de pouco máis dunha xornada de traballo, onte fixo entrega ao alcalde, Eduardo Parga Veiga, do escudo do Concello tallado en madeira. No acto participaron tamén o primeiro tenente de alcalde, Miguel Fernández, e unha das responsables da empresa organizadora do mercado. O ano pasado, Roberto Figueira xa contribuíu a enriquecer o patrimonio artístico de Malpica coa doazón dunha imaxe da Virxe do Carme.

O artesán, iniciando o traballo

O artesán, iniciando o traballo

Roberto Figueira talla con gubias case todo tipo de madeiras, aínda que ten preferencia polas autóctonas, e deseña e fabrica todo tipo de obxectos, tanto colgantes e complementos decorativos como mobles ou elementos estruturais. A escultura da Virxe do Carme, está realizada en piñeiro roxo. Relevos, esculturas de pequeno e mediano formato, carpintería e ebanistería son as especialidades deste rianxeiro, que ademais realiza demostracións en eventos como a Feira Medieval Mariñeira.

Normalmente empeza unha peza en cada feira, e en Malpica puxo mans á obra xa dende o primeiro momento co escudo do Concello, de xeito que o público puido ver o proceso completo da creación.

16Ago 2018

A Feira Medieval Mariñeira inclúe este ano máis de 25 postos de artesanía e actividades de animación durante todo o día

ANUNCIO FESTA GALEGA DIARIO 255X152 MM pandereta

Na súa sexta edición, a Feira Medieval Mariñeira de Malpica non só encherá a nosa vila de artesanía senón tamén de animación, porque ademais dos 25 postos nos que atoparemos xoguetes de madeira, embutidos, chocolates artesáns, macramé, cadros infantís, sandalias de algodón ou garrapiñadas, durante os tres días inclúe un amplo e variado programa de actividades e actuacións para todos os públicos.

A Feira Medieval Mariñeira será inaugurada mañá venres ás 11.00 horas, e media hora despois desembarcarán na vila os Piratas de Turdión para ofrecernos un dos pasarrúas musicais que protagonizarán durante a fin de semana. Ás 12.00 horas o artesán Roberto Figueira comezará a tallar o escudo de Malpica en madeira para doarllo ao Concello ao remate da feira. Ademais dos Piratas de Turdión, pola tarde, a partir das 18.00 horas, contaremos coa Princesa Piruleta e a súa Unicornia, os Piratas e a Trasga do Mar coa súa bola xigante e a Bailarina de lume.

O sábado, ademais, contaremos cun taller de circo (12.30), contacontos (13.00), música en vivo (12.00, 14.00, 18.00 e 20.00 horas), os globos con figuras da Trasga Saltarina (18.30) e un espectáculo de lume ás 22.00 horas. O domingo continuará a música (actuacións ás 12.00, 13.30, 18.00, 19.30 e 21.30 horas), volverá a Trasga coa súa bola xigante (12.30) e haberá de novo taller de circo (18.30) e contacontos (20.00 horas). Para os nenos e nenas, ademais, durante todo o mercado teremos unha barca balancín, cama saltarina e zona de xogos e talleres. E, para todo o público, estará aberta unha exposición de cascos e armas e teremos exhibicións en vivo dos artesáns Roberto Figueira, de talla en madeira, e Salvador de Paz, de acibeche.

Os postos da Feira Medieval Mariñeira estarán abertos de 11.00 a 14.30 e de 18.00 a 23.00 horas.

Cartel de luxo na Festa Galega

O mercado convivirá coa Festa Galega, que chega á súa 11ª edición cun cartel de luxo. Catro grandes nomes da música tradicional galega pasarán polo escenario do porto entre os días 17 e 18 de agosto: Susana Seivane, Os da Porfía, Luar na Lubre e Coanhadeira. E non serán os únicos, porque, como é costume, na Festa Galega contamos coas agrupacións de música tradicional do noso concello e con bandas de gaitas locais e convidadas.

A música galega comezará a soar mañá venres ás 22.00 horas coas Pandereteiras da A.C. Raigañas sobre o escenario do porto, ao que subirán ás 22.30 as Feiticeiras da A.C. Malante. Para as 23.00 horas está previsto o concerto de Susana Seivane, unha das nosas gaiteiras máis internacionais, que está a piques de lanzar o seu quinto disco, e para pechar a velada contaremos a partir das 00.15 horas con Os da Porfía, sete homes que despois de formar parte durante anos de distintas agrupacións decidiron iniciar un proxecto común interpretando temas recollidos por eles e cunha indumentaria que xa é un dos seus sinais de identidade.

O día 18, ás 12.00 horas, sairá do Centro Cívico o tradicional Desfile de Bandas de Gaitas da Asociación Cultural Malante, un encontro de música tradicional que cumpre seis anos e que xunta, á parte da entidade organizadora, ás bandas de gaitas de Calo (Teo), Ximiela (Louro-Muros) e Ortigueira. Para pechar a mañá do sábado está prevista unha xurelada tradicional coa colaboración da A.C.D. A Estádiga.

A música volverá pola noite ao porto. A segunda sesión nocturna da Festa Galega arrancará ás 22.30 horas coas Cantareiras Meigallo da A.C Carcaxía. Para as 23.00 horas está programado o concerto de Luar na Lubre, a banda celta máis internacional de Galicia, que leva máis de 30 anos sobre os escenarios e que continúa reinterpretando a nosa música tradicional. Pero o luxo do concerto do día 18 será dobre, porque para pechar a velada contaremos, a partir da 01.00, con Coanhadeira, unha banda ourensá de folk que desde o ano 2006 está dedicada a amosar a música conservada ata os nosos días a través da tradición oral.

CARTEL

14Ago 2018

Unha festa sorpresa organizada polos nenos e nenas puxo fin á primeira quenda do obradoiro “Pintar na rúa”

14 agosto

Finalmente haberá segunda quenda do obradoiro Pintar na Rúa. Ante o elevado número de solicitudes recibidas no segundo prazo de inscrición habilitado, a Concellaría de Educación e Cultura optou por darlle continuidade ao proxecto ata o día 29. Deste xeito, a partir deste xoves 16, un total de 18 nenos e nenas, repartidos en dous grupos, empezarán a encher de cor a parede do parque infantil da rúa Patria Galega.

Hoxe rematou a primeira quenda do obradoiro, no que se completaron as 20 prazas dispoñibles. Os nenos e nenas prepararon unha festa sorpresa para a súa monitora, a artista carballesa Emi de las Heras, que despois de ter participado noutras iniciativas coma Derrubando Muros con Pintura, este ano sumouse ao proxecto de recuperación de espazos urbanos degradados que vimos desenvolvendo nos últimos anos.

Como podedes ver na imaxe, o deseño artístico vai cobrando forma. Nesta primeira quenda os traballos centráronse na preparación da parede e no debuxo do deseño, no que teñen cabida algúns dos elementos distintivos do noso concello, coma o mar, a pesca ou a olería. Os nenos e nenas que participarán na segunda quenda serán os encargados de rematar a proposta artística enchéndoa de cor. Pero para ver o resultado final haberá que agardar á finalización deste divertido e creativo taller o vindeiro 29 de agosto.

7Ago 2018

Susana Seivane, Os da Porfía, Luar na Lubre e Coanhadeira, catro grandes grupos para unha gran Festa Galega

CARTEL

Cada vez falta menos para un dos grandes acontecementos do verán, a nosa Festa Galega, que cumpre 11 anos e que volve acompañada dunha Feira Medieval Mariñeira para garantir a animación da mañá á noite. Catro grandes nomes da música tradicional galega pasarán polo escenario do porto entre os días 17 e 18 de agosto: Susana Seivane, Os da Porfía, Luar na Lubre e Coanhadeira. E non serán os únicos, porque, como é costume, na Festa Galega contamos coas agrupacións de música tradicional do noso concello e con bandas de gaitas locais e convidadas.

Se a Festa Galega acada xa a súa 11ª edición, a Feira Medieval Mariñeira cumpre 6 anos. Coa apertura dos postos de artesanía e gastronomía que se situarán ao longo da rúa Eduardo Vila Fano comezaremos a celebración a partir das 11.00 horas do día 17 de agosto. A música galega comezará a soar ás 22.00 horas coas Pandereteiras da A.C. Raigañas sobre o escenario do porto, ao que subirán ás 22.30 as Feiticeiras da A.C. Malante. Para as 23.00 horas está previsto o concerto de Susana Seivane, unha das nosas gaiteiras máis internacionais, que está a piques de lanzar o seu quinto disco, e para pechar a velada contaremos a partir das 00.15 horas con Os da Porfía, sete homes que despois de formar parte durante anos de distintas agrupacións decidiron iniciar un proxecto común interpretando temas recollidos por eles e cunha indumentaria que xa é un dos seus sinais de identidade.

O día 18 volverá a animación ás rúas de Malpica desde as 11.00 horas coas actividades da Feira Medieval Mariñeira. E tamén pola mañá, ás 12.00 horas, sairá do Centro Cívico o tradicional Desfile de Bandas de Gaitas da Asociación Cultural Malante, un encontro de música tradicional que cumpre seis anos e que xunta, á parte da entidade organizadora, ás bandas de gaitas de Calo (Teo), Ximiela (Louro-Muros) e Ortigueira. Para pechar a mañá do sábado está prevista unha xurelada tradicional coa colaboración da A.C.D. A Estádiga.

A música volverá pola noite ao porto. A segunda sesión nocturna da Festa Galega arrancará ás 22.30 horas coas Cantareiras Meigallo da A.C Carcaxía. Para as 23.00 horas está programado o concerto de Luar na Lubre, a banda celta máis internacional de Galicia, que leva máis de 30 anos sobre os escenarios e que continúa reinterpretando a nosa música tradicional. Pero o luxo do concerto do día 18 será dobre, porque para pechar a velada contaremos, a partir da 01.00, con Coanhadeira, unha banda ourensá de folk que desde o ano 2006 está dedicada a amosar a música conservada ata os nosos días a través da tradición oral. Os seus directos están cargados de forza, como poderemos comprobar en agosto.

E despois de dous días de música, o domingo 19 continuará a Feira Medieval Mariñeira con animación durante doce horas, de 11.00 a 23.00.

Página 1 de 212