O concello de Malpica de Bergantiños está localizado ó noroeste da provincia da Coruña, na comarca de Bergantiños, na mítica e afamada Costa da Morte. Á beira do Océano Atlántico, co que linda na súa parte Norte e sobre o que cimenta a súa costa de Oeste a Leste, desde o Monte Nariga ata a Punta de Razo, extremo occidental do areal de Baldaio (Carballo). No medio desta liña de costa, sobresae o Cabo de Santo Hadrián, fronte ó cal se erguen as illas Sisargas. De 60,5 km2 de extensión, cunha densidade de poboación de 140h/km2, o seu principal porto pesqueiro é o da capital, Malpica de Bergantiños, adicado fundamentalmente a pesca de baixura e marisqueo.

Ó Leste, limita co concello de Carballo. Ó Sur, linda co de Ponteceso. O relevo é de formas suaves e redondeadas, debido sobre todo á erosión da auga e dos fortes ventos que azoutan estes lares. Destacan como principais alturas as do Monte Neme (387 m.) e Leutoño. A súa doada comunicación tanto por estrada como por mar coas cidades de Santiago de Compostela e A Coruña, ademais dos seus múltiples atracticos, facultan ó concello de Malpica como un crecente destino turístico. Paisaxe e gastronomía abundante en peixes e mariscos, artesanía do barro coa Olería de Buño, patrimonio histórico artístico coa pegada de Urbano Lugrís, as torres medievais e igrexa románica de Mens, os seus oito areais brancos e pouco frecuentados (agás a Area Maior de Malpica, laureada coa Bandeira Azul)...son alicientes dabondo para visitar este recuncho atlántico.