Galego
Castellano
22Dec 2018
|
|||||||||||||||||||||||||||||||||||||||||||||||||||
Malpica
20Dec 2018
A corporación municipal decreta dous días de loito oficial polo falecemento de José Ángel Sanjurjo no afundimento do pesqueiro “A Silvosa”
O pesqueiro, despois de afundir de madrugada
A corporación municipal de Malpica vén de decretar dous días de loito oficial no noso concello polo falecemento de José Ángel Sanjurjo Láuzara, patrón do pesqueiro “A Silvosa”, que se afundiu a pasada madrugada no porto.
Ás 13.30 horas celebrouse un pleno extraordinario e urxente no que se gardou un minuto de silencio na memoria do noso veciño e foi aprobada unha declaración institucional que comeza así: “Hoxe é un día de loito para esta corporación municipal, para o noso pobo e para o mundo do mar, un sector tan importante en Malpica”. A corporación municipal, no nome dos veciños e veciñas de Malpica, traslada o pésame á familia e aos compañeiros de traballo do finado, e fai extensivo ese sentimento de dor e solidariedade ás familias dos mariñeiros falecidos no barco “Sen Querer 2”.
Durante os dous días de loito decretados polo pleno, mañá venres e o sábado, as bandeiras ondearán a media asta no Concello. Ademais quedan suspendidos os seguintes actos:
- Venres 21: ágape da festividade de Nadal entre os/as traballadores/as do Concello e a corporación municipal e os Cantos no Nadal de Emilio Rúa e Rosa Cedrón.
- Sábado 22: proxección da película “Sicixia”.
20Dec 2018
O Concello de Malpica únese ao Proxecto de Accesibilidade Cognitiva de Autismo Galicia coa colocación de pictogramas en espazos municipais
Algúns dos edificios públicos do Concello de Malpica son, dende esta semana, máis comprensibles para as persoas con Trastorno do Espectro do Autismo (TEA) grazas ao Programa de Accesibilidade Cognitiva promovido pola Federación Autismo Galicia.
En colaboración coa Concellería de Educación e Cultura vimos de implantar 129 pictogramas nos seguintes espazos: Centro Cívico de Malpica, Casa de Cultura de Seaia, Centro sociocultural das Pozacas e pavillón polideportivo municipal.
O proxecto realizado no Concello de Malpica supón un esforzo pola sensibilización e concienciación sobre as persoas con Trastorno do Espectro do Autismo e as súas dificultades cognitivas e de comunicación.
As persoas con Trastornos do Espectro do Autismo (TEA) son pensadoras visuais, polo que comprenden mellor a información que se presenta de forma visual. Por iso, para facer a súa contorna máis accesible nos axudamos de apoios visuais, pictogramas, que son debuxos sinxelos que representan espazos e accións de maneira simplificada.
Os pictogramas supoñen para as persoas con autismo, persoas maiores ou mesmo estranxeiros, claves visuais claras e seguras que lles sitúan no espazo e no tempo e anticípanlles os feitos que van ocorrer, o que lles conduce cara a un estado de benestar e seguridade.
15Dec 2018
21 entidades e centros educativos colaboran coa Concellería de Cultura para ofrecerche o mellor “Malpica Nadal”
Asociación Cultural Malante, Asociación Cultural Raigañas, Asociación Cultural Carcaxía, Asociación Cultural e Deportiva San Xulián, ANPA Ventorrillo, ANPA do CEIP Joaquín Rodríguez Otero, ANPA Orxeira, Asociación Veciñal e Cultural Viradeira de Buño, A. C. A Feira, A. V. C. S. O Brizo, Asociación Veciñal Río de San Antonio, A. VV. de Leiloio, A.C.D. Estádiga, Asociación de Amigos da Mikaela, Senda Nova, CEIP Milladoiro, CEIP JRO, CRA Nosa Señora do Faro, A Galiña Azul de Aldeola e IES Urbano Lugrís son as 21 entidades e centros educativos que colaboran coa Concellería de Educación e Cultura na programación de Malpica Nadal, que comezou co Concurso Escolar de Debuxo e Pintura. Aquí tedes ás gañadoras e o gañador.
- Aroa Veiga Cerdeira – CRA A Nosa Señora do Faro – Mens – Premio Cartel
- Carla Varela 4 ESO do IES Urbano Lugris – Premio Sauda Redes Sociais
- Nagore Rodríguez Blanco, alumna de Infantil do CEIP Joaquín Rodríguez Otero, gañadora do premio Pantalla
- Pablo Varela Añon – 3 de primaria do Milladoiro – Saúda de Nadal Dixital
Unha chea de propostas coma obradoiros, visitas de Papá Noel, O Apalpador, o Carteiro Real e os Reis Magos, campamentos, excursións, festas infantís e para maiores, conferencia, proxeccións audiovisuais… Ata o 6 de xaneiro non vai haber tempo para o aburrimento co intenso programa que debullamos a continuación:
Día 16 de Nadal (domingo)
- Nadal Xogo: Festa Infantil, visita de Papá Noel e Chocolatada a partir das 16.00 h. ata ás 20.00 h. na Casa dos Veciños de Leiloio (A Raxeira). Colabora: A. VV. de Leiloio.
Día 18 de Nadal (martes)
- Obradoiro de adornos de Nadal en Malpica, na Aula de Manualidades do Centro Cívico, Abriranse 15 prazas para nenos/as de 3 a 11 anos. Organiza: ANPA Milladoiro.
Horarios: de 16.00 h. a 18.00 h.
Inscricións: os días 14 e 17 de decembro, de 9.00 h. a 10.00 h. no local da ANPA no CEIP Milladoiro.
Día 19 de Nadal (mércores)
- O Carteiro Real visitará o CEIP Joaquín Rodríguez Otero ás 10.00 h.
- Os Reis Magos visitarán o CEIP Milladoiro de Malpica ás 10.30 h. Colabora: CEIP Milladoiro.
- O Carteiro Real visitará a Galiña Azul ás 11.15 h.
- O Carteiro Real visitará a Escola de Mens ás 12.00 h.
- O Carteiro Real visitará a Escola de Barizo ás 12.30 h.
- Obradoiro de adornos de Nadal, en Malpica na Aula de Manualidades do Centro Cívico, Abriranse 15 prazas para nenos/as de 3 a 11 anos. Organiza: ANPA Milladoiro.
Horarios: de 16.00 h. a 18.00 h.
Inscricións: os días 14 e 17 de decembro, de 9.00 h. a 10.00 h. no local da ANPA no CEIP Milladoiro.
Día 21 de Nadal (venres)
- Papá Noel visitará o CEIP Joaquín Rodríguez Otero de 13.00 h. a 14.00 h. Organiza: ANPA Xaviña do CEIP J.R.O.
- Cantos no Nadal con Emilio Rúa e Rosa Cedrón, no Auditorio do Centro Cívico ás 20.30h. Rede Dinamización Lingüística.
Día 22 de Nadal (sábado)
- Colocación familiar dos adornos na árbore de Nadal, na Praza Anselmo Villar Amigo das 11.00 ás 12:00 horas. A cargo dos participantes nos obradoiro de Adornos de Nadal das ANPAS e o Obradoiro de Manualidades do Concello de Malpica. Organizan: ANPA Ventorrillo do CEIP Milladoiro, ANPA Xaviña do CEIP J.R.O. e Concello de Malpica de Bergantiños.
Os menores deberán estar acompañados dun adulto.
- Nadal Xogo: Chocolatada e Festa infantil, das 16.00 h. ás 18.00 h. no Centro Sociocultural das Pozacas. Colabora: A.C. Raigañas.
- Taller de centros de mesa navideños, de 16.30 h. a 18.30 h., na Casa da Cultura de Seaia, para xoves e adultos a partir de 12 anos. 10 prazas. Prezo: Socios: 12,00 € / Non socios: 15,00 €. Inscricións ate o 20 de decembro, os venres á tarde na Casa da Cultura de Seaia ou no 657 919 272. Organiza: A. C. Carcaxía.
- Proxección de Sicixia, ás 20.30 h., no Auditorio do Centro Cívico de Malpica.
Día 23 de Nadal (domingo)
- Actuación do Mago Charlangas de 16.30 h. a 17.30 h. na Casa da Cultura de Seaia. Organiza: A. C. Carcaxía.
- O Apalpador visitará os nenos as 17.30 h. na Casa da Cultura de Seaia. Organiza: A. C. Carcaxía.
- Nadal Xogo: Festa Infantil con inchables e merenda saudable, das 17.30 h. ás 20.30 h. na Casa da Cultura de Seaia. Colabora: A. C. Carcaxía.
Día 24 de Nadal (luns)
- Pasarrúas de Panxoliñas das cantareiras da C. Malante a partir das 18.00 h. pola vila de Malpica.
- Papá Noel entregará os regalos ós rapaces ás 18.30 h. na Fonte da Praza Anselmo Villar Amigo. Organiza: A. C. Malante.
En caso de choiva realizarase no Mercado Municipal.
Día 26 de Nadal (mércores)
- Campamento Urbano de Nadal, para rapaces/zas de 3 a 12 anos, de 10.30 h. a 13.30 h., na Casa da Cultura de Seaia. Prazas: 30. Prezo: socios 20,00 € / Non socios: 25,00 € /Día solto 10,00 €. Inscrición ata o día 24 de decembro, os venres na Casa da Cultura de Seaia ou no 657 919 272. Organiza: A.C. Carcaxía.
- Nadal Xogo: Festa Infantil con inchables e chocolatada das 16.30 h. ás 19.30 h. no Pavillón Polideportivo do CEIP Joaquín Rodríguez Otero de Buño. Colabora: ANPA do CEIP J.R.O.
Día 27 de Nadal (xoves)
- Campamento Urbano de Nadal, para rapaces/zas de 3 a 12 anos, de 10.30 h. a 13.30 h., na Casa da Cultura de Seaia. Prazas: 30. Prezo: socios 20,00 € / Non socios: 25,00 € /día solto 10,00 €. Inscrición ata o día 24 de decembro, os venres na Casa da Cultura de Seaia ou no 657 919 272. Organiza: A.C. Carcaxía.
Día 28 de Nadal (venres)
- Campamento Urbano de Nadal, para rapaces/zas de 3 a 12 anos, de 10.30 h. a 13.30 h., na Casa da Cultura de Seaia. Prazas: 30. Prezo: socios 20,00 € / Non socios: 25,00 € /Día solto 10,00 €. Inscrición ata o día 24 de decembro, os venres na Casa da Cultura de Seaia ou no 657 919 272. Organiza: A.C. Carcaxía.
- Visita ó Silleda Park. Saída de Buño (Diante do Restaurante A Cunca), ás 15.00 h., regreso previsto a partir das 22.00 h. Para rapaces/as de 0 a 99 anos. Prezo: 10,00 € socios e 12,00 € non socios. Inscricións ate o 26 de decembro no 667 458 481. Organiza: ANPA JRO. Colabora: Autocares Pedro Pombo.
Día 29 de Nadal (sábado)
- Nadal Xogo: Tómbola de Nadal, no Pavillón Polideportivo de Malpica, de 17.00 h. a 19.00 h. Organizan: A. C. Malante e ANPA Orxeira.
- Centenario do filántropo Anselmo Villar Amigo. Conferencia, a cargo de: Xosé María Rey Lema e Xosé Manuel Varela Varela, no Salón de Actos da Casa do Pescador, ás 19.00h.
Día 30 de Nadal (domingo)
- Nadal Xogo: Festa infantil con inchables das 16.30 h. ás 19.30 h. na Escolas de Pontella. Colabora: AVCS O Brizo de Vilanova.
Día 31 de Nadal (Luns)
- 3ª San Silvestre Malpicana, Saída ás 12.00 h. da Fonte da Praza Anselmo Villar Amigo. Percorrido: Fonte de Anselmo Villar – Mirador de Santo Hadrián- Fonte Anselmo Villar Amigo (incluirá brindis cun viño galego e txacolí na Praza Anselmo Villar Amigo). Inscricións de balde en Wata Boutique e nos teléfonos 620 927 729 (Walter) e 620 661 699 (Martu) preferiblemente a través do wasap). Organizan: A. C. Malante e A.C.D. Estádiga.
- Festa de Fin de Ano, a partir das 23.45 h., no Auditorio do Centro Cívico de Malpica amenizada polo Dúo D´Café, uvas, cava e cotillón.
Día 2 de xaneiro (mércores)
- Obradoiro de construción de instrumentos musicais, 25 prazas, para rapaces/zas de 7 a 13 anos, no Centro Cívico de 10.30 h. a 13.00 h. Inscrición no Departamento de Educación e Cultura, a partir do 19 de decembro en horario de 10.00 horas a 14.00 horas. Prezo: 16,75 €.
- Nadal Xogo: Festa infantil con inchables das 16.30 h. ás 19.30 h. no Pavillón Polideportivo de Malpica. É imprescindible levar calzado axeitado para estas instalacións. Colabora: ANPA Ventorrillo.
- Proxección do documental “Hoxe quen baila?” do proxecto Inverno Ancestral, na Casa do Oleiro de Buño, ás 20.00 h. Organiza: Senda Nova.
Día 3 de xaneiro (xoves)
- Obradoiro de construción de instrumentos musicais, 25 prazas, para rapaces/zas de 7 a 13 anos, no Centro Cívico de 10.30 h. a 13.00 h. Inscrición no Departamento de Educación e Cultura, a partir do 19 de decembro en horario de 10.00 horas a 14.00 horas. Prezo: 16,75 €.
Día 4 de xaneiro (venres)
- Obradoiro de construción de instrumentos musicais, 25 prazas, para rapaces/zas de 7 a 13 anos, no Centro Cívico de 10.30 h. a 13.00 h. Inscrición no Departamento de Educación e Cultura, a partir do 19 de decembro en horario de 10.00 horas a 14.00 horas. Prezo: 16,75 €.
- Quedada para rapazada de 11 a 17 anos. Dj, merenda e sorpresas. De 19.00 h. a 22.00 h. na Auditorio do Centro Cívico. Organiza ANPA Orxeira.
Día 5 de xaneiro (sábado)
- Os Reis Magos de Oriente chegarán a:
Ruta 1
- Cambre, ás 17.00 h., saída do Local Sociocultural de Cambre.
- Buño, ás 17.30 h., parada no Teleclube, con chocolatada.
Ruta 2
- Cerqueda, ás 17.30 h., parada no Centro Sociocultural das Pozacas.
- Vilanova, parada no adro da igrexa, ás 18.30 h.
Ruta 3
- Mens, saída do Centro Sociocultural de Mens ás 17.30 h.
- Barizo, parada no Centro Sociocultural Barizo ás 18.00 h.
- Seaia, parada na Casa da Cultura, ás 18.30 h.
A cabalgata unicamente realizará as paradas que se relacionan. A chegada a Malpica está prevista para as 19.00 h.
Organizan: Concello de Malpica, A. C. Malante, A. C. Raigañas, A. C. Carcaxía, Asociación Veciñal e Cultural Viradeira de Buño, A. V. C. S. O Brizo, Asoc. Veciñal Río de San Antonio, ANPA Milladoiro, ANPA J.R.O. e Asociación de Amigos da Mikaela.
- Leiloio, a partir das 18.30 h. Saída da Feira Nova. Organiza: A.C. A Feira.
- Seaia, ás 22.00 h. Os Reis entregarán os regalos polas casa. Organiza: A. C. D. San Xulián.
Día 6 de xaneiro (domingo)
- Os Reis Magos de Oriente chegarán a:
Seaia, ás 10.00 h. saída da Casa da Cultura e a continuación percorrido pola parroquia. Organiza: A. C. D. San Xulián.
A partir das 18.00 h. inchables no campo da festa. Organiza: A. C. D. San Xulián.
4Dec 2018
A organización do Camiño sen Límites agradeceu a colaboración do Concello de Malpica, a Policía Local e Protección Civil
Rosario Fernández Cancela, en representación das entidades que organizaron a terceira edición do Camiño sen Límites, entregou hoxe os diplomas de agradecemento ao Concello de Malpica, representado polo alcalde, Eduardo Parga, e o concelleiro Miguel Fernández; á Policía Local, representada por David Souto, e á Agrupación de Voluntarios de Protección Civil, representada por Iván Muiño.
Fedanpas Costa da Morte e Rompendo Límites recompensan deste xeito o apoio recibido para a organización da segunda etapa, que se desenvolveu no noso concello. O alcalde expresou o agradecemento do Concello e do pobo de Malpica ás entidades organizadoras da iniciativa polo importante labor de integración social que desenvolven ao longo de todo o ano.
4Dec 2018
O día 12 presentaranse as curtametraxes “Vento de fóra”, realizada polas alumnas do obradoiro de cinema de Malpica, e “A nena azul”
O vindeiro día 12 teremos a oportunidade de coñecer o traballo desenvolvido polas mulleres que participaron no obradoiro de cinema celebrado en xuño coa colaboración da Concellería de Servizos Sociais e Igualdade. Vento de fóra é o título da curtametraxe que presentarán ás 17.00 horas na aula de lecer do Centro Cívico, nun acto aberto a toda a cidadanía. Pero ademais de ver o resultado da interesante experiencia desenvolvida no noso concello, a xornada inclúe tamén a proxección de A nena azul, a película gañadora do Premio Luisa Vilalta de Proxectos Culturais pola Igualdade, convocado pola Deputación da Coruña.
No acto do día 12 participará Sandra Sánchez, directora de A nena azul, que foi tamén unha das integrantes do equipo docente do obradoiro de cinema de Malpica xunto con Ángeles Huerta, guionista e directora, e Lucía C. Pan, directora de fotografía.
O obradoiro A Nena Azul: Mulleres que contan. Narrativas femininas do eu a través da cámara permitiu ás participantes aprender a contar as súas propias historias a través do cinema, utilizando ferramentas tan accesibles coma unha tablet ou un teléfono móbil. En só cinco sesións, as alumnas puideron coñecer os procesos de creación dunha película e trasladar as súas propias ideas a esta peza audiovisual conxunta que nos presentarán o día 12. Non faltedes!
30Nov 2018
Xornadas sobre patrimonio cultural e desenvolvemento local en Vimianzo
Malpica estará presente nas Xornadas sobre patrimonio cultural e desenvolvemento local que se van celebrar os días 30 de novembro e 1 de decembro na escola de Señoráns, no concello de Vimianzo.
A actividade está organizada pola Asociación de Profesionais de Desenvolvemento Local de Galicia (Afiprodel), coa colaboración do Concello de Vimianzo, Deputación da Coruña, GDR Costa da Morte, GALP Costa da Morte e a Asociación de Turismo CMAT.
Consulta aquí o programa FOLLETO XORNADAS PATRIMONIO
30Nov 2018
Asinado o contrato da obra de reforma do centro de saúde de Malpica, no que investiremos preto de 60.000 euros
O Concello de Malpica vai investir 58.682,42 euros no centro de saúde da vila coa finalidade de solucionar as deficiencias que presenta o edificio debido á súa antigüidade. O alcalde, Eduardo Parga, asinou hoxe o contrato coa empresa que levará a cabo a reforma, Groma Obras S.L., que dispón dun prazo de 1 mes para acometela a partir da sinatura da acta de comprobación de replanteo. No acto de sinatura tamén estivo presente o concelleiro de Obras e Servizos, Miguel Fernández.
As obras afectarán tanto ao exterior coma ao interior do inmoble. No exterior actuarase nas fachadas para limpalas e proceder á súa impermeabilización. Tamén está previsto selar, pintar e crear aliviadeiros nas terrazas, así coma selar a carpintería exterior e substituír as gomas e os picaportes.
Xa dentro do edificio serán saneadas e pintadas as zonas nas que se aprecian humidades, e no canón das escaleiras tamén se farán traballos de acondicionamento tanto das paredes coma dos propios chanzos. As pechaduras e picaportes das portas interiores serán substituídas e procederase á revisión das instalacións de calefacción, electricidade e iluminación. Todo o edificio será pintado.
Ademais das melloras sinaladas, o proxecto inclúe a incorporación de dúas novas consultas de medicina e enfermaría, unha na planta baixa e outra no primeiro andar, para o cal utilizarase unha parte das salas de espera
25Nov 2018
A Consellería do Mar e Portos de Galicia están a traballar conxuntamente para solucionar as deficiencias do porto de Barizo
O alcalde de Malpica, Eduardo Parga, vén de manter unha xuntanza coa conselleira do Mar, Rosa Quintana, e o presidente de Portos de Galicia, José Juan Durán, para interesarse pola tramitación das melloras precisas no porto de Barizo. Ambos departamentos están traballando de maneira conxunta para dar solución ás deficiencias trasladadas xa no mes de marzo polo alcalde a raíz das demandas que lle presentaron os usuarios do porto.
Nestes momentos están a elaborarse os proxectos correspondentes aos arranxos precisos nas casetas, o peche do recinto e os aseos coa finalidade de acometelos á maior brevidade posible. Pero a principal necesidade para o sector pesqueiro e marisqueiro, como insistiu o alcalde, é dispoñer dunha grúa en boas condicións. Por parte de Portos de Galicia estábase a tramitar o arranxo da primeira avaría, pero a raíz da segunda non se descarta a substitución da grúa actual por unha nova. A decisión tomarase tamén en cuestión de días, en función do que determinen os informes técnicos sobre a solución máis viable.
Eduardo Parga confía en que as necesidades expresadas polos usuarios teñan pronta solución e que as melloras en marcha contribúan a revitalizar a actividade no porto de Barizo.
25Nov 2018
Malpica lembrou con 44 globos morados e 8 brancos ás vítimas mortais da violencia de xénero
O movemento asociativo do noso concello sumouse á convocatoria da Concellería de Servizos Sociais e Igualdade para render homenaxe ás vítimas da violencia de xénero, e malia a intensa chuvia que caeu durante toda a tarde, numerosas entidades estiveron representadas no acto conmemorativo do Día Internacional para a Eliminación da Violencia contra a Muller, que celebramos onte pola tarde.
O mal tempo obrigou a modificar o programa e a trasladar ao salón de plenos todos os actos programados. 52 globos, 44 de cor morada en lembranza das mulleres asasinadas polas súas parellas ou ex-parellas este ano en Galicia, e 8 brancos polos nenos e nenas que tamén morreron vítimas da violencia machista, presidiron a xornada, que comezou cun minuto de silencio na súa lembranza.
A concelleira de Servizos Sociais e Igualdade, Marisol Blanco Gorín, púxolles nomes a esas 44 mulleres asasinadas, “mulleres _dixo_ con familia, cunha vida e soños por cumprir que lles foron arrebatados”. Ela foi tamén a encargada de presentar a curtametraxe Corazón amoratado, gañadora do II Concurso de guións contra a violencia de xénero da Deputación da Coruña, que se proxectou de seguido. Unha das súas guionistas, Uxía Carreira, estivo presente no acto e explicou a orixe da cinta e o significado que ten.
O alcalde de Malpica, Eduardo Parga, pechou o acto ofrecendo algúns dos arrepiantes datos que nos deixa a violencia de xénero, “datos abrumadores e complicados de entender na sociedade en que vivimos”, engadiu. O alcalde destacou a posta de recursos de axuda ás vítimas coma o Sistema de seguimento integral de casos de violencia de xénero ou o teléfono 016, e rematou coa frase coa que tamén remata a curtametraxe proxectada onte: “Podes entregar a chave da túa vida a quen queiras, pero tamén podes cambiar de pechadura”.
A conmemoración rematou na Praza da Fonte, coa solta dos 52 globos.