Galego
Castellano
9Xuñ 2018
|
|||||||||||||||||||||||||||||||||||||||||||||||||||
Malpica
9Xuñ 2018
Os actos de homenaxe ao garda civil José Antonio Pardines no 50º aniversario do seu asasinato rematan cun desfile militar
Un desfile militar e unha ofrenda floral porán fin a unha semana de actos en lembranza do garda civil José Antonio Pardines Arcay, primeira vítima de ETA, no 50º aniversario do seu asasinato. Malpica será este domingo o escenario dunha homenaxe organizada pola Comandancia da Garda Civil da Coruña.
A xornada comezará ás 12.00 horas cunha visita á exposición fotográfica sobre o atentado que está aberta no Centro Cívico. Ás 12.30 celebrarase un oficio relixioso na igrexa de San Xulián, e ás 13.15 comezará o desfile militar pola rúa Emilio Gonzále López, que rematará cunha ofrenda floral no monólito da praza Anselmo Villar Amigo.
Con motivo da celebración destes actos solemnes, a rúa Emilio González López permanecerá pechada ao tráfico rodado desde as 10.30 ata as 14.30 horas. Protección Civil e Policía Local indicarán as vías alternativas tanto á veciñanza como a visitantes, así coma as zonas de estacionamento recomendadas. Desde o Concello de Malpica agradecemos de antemán a colaboración de todas e todos para o bo desenvolvemento da xornada de homenaxe e pedimos desculpas polas molestias que se poidan ocasionar.
Semana intensa
Este domingo rematará una semana moi intensa, que comezaba o luns na Coruña cunha interesante mesa redonda. O martes, a Asociación Pro Garda Civil (APROGC) realizou unha ofrenda floral na tumba de José Antonio Pardines e inaugurou un monólito na súa memoria na praza Anselmo Villar Amigo. O mércores estivo en Malpica o conselleiro de Cultura para participar na presentación do libro Pardines. Cando ETA empezou a matar. E onte o alcalde, Eduardo Parga, e o tenente de alcalde, Miguel Fernández, participaron no Museo das Peregrinacións e de Santiago na inauguración da exposición Temos memoria. Vitimas do terrorismo en Galicia, na que tamén estiveron presentes o presidente da Xunta, Alberto Núñez Feijoo, e a presidenta da Fundación de Vítimas do Terrorismo, María del Mar Blanco.
8Xuñ 2018
A Romaría de Santo Hadrián celebra o 10º aniversario da súa declaración coma Festa de Interese Turístico de Malpica
O Concello de Malpica promociona a Romaría de Santo Hadrián e a Mostra da Olería de Buño en Festur, a Feira de Festas de Interese Turístico de Galicia, que se celebra dende onte ata o domingo en Silleda, no marco da 41ª Feira Internacional Abanca Semana Verde de Galicia. Durante toda a fin de semana, ademais do persoal de información, no stand de Malpica haberá demostracións a cargo do oleiro José Antonio Corral.
Este ano reforzamos a promoción da Romaría de Santo Hadrián, coincidindo con 10º aniversario da súa declaración coma Festa de Interese Turístico de Galicia. O Concello de Malpica volve a apostar pola difusión dos aspectos máis tradicionais da popular e concorrida celebración, que terá lugar o vindeiro domingo 17 de xuño, nesta ocasión cun forte contido audiovisual. De feito, ademais da cartelería, a campaña de promoción da Romaría de Santo Hadrián inclúe a edición dun tríptico, que se repartirá nos centros educativos e en Festur, que recolle os principais aspectos da festa, así coma un código QR a través do cal se accede directamente ao primeiro vídeo promocional da romaría.
A presentación oficial do vídeo realizouse en Festur coa presenza do alcalde, Eduardo Parga, e o concelleiro Miguel Fernández, ademais de diversos cargos autonómicos, pero todas as persoas interesadas poden velo tamén aquí. Así mesmo, e despois do éxito acadado nas dúas últimas edicións, volveremos a distribuír os panos de romeiro de Santo Hadrián, este ano de cor verde. As persoas interesadas poden recollelos na biblioteca municipal, no segundo andar do Centro Cívico, ata esgotar existencias.
6Xuñ 2018
O conselleiro de Cultura asistiu á presentación do libro “Pardines. Cando ETA empezou a matar” en Malpica
O conselleiro de Cultura, Educación e Ordenación Universitaria, Román Rodríguez, participou na presentación do libro Pardines. Cando ETA empezou a matar, en lembranza da primeira vítima mortal da banda terrorista. Durante o acto, celebrado na Casa do Pescador hoxe pola tarde, o conselleiro agradeceu especialmente a presenza dos familiares do falecido, así como o labor desenvolvido polas familias das vítimas para acabar con ETA, un fito que cualificou como “un triunfo da sociedade democrática, unha batalla que foi liderada polas familias e as súas vítimas”, e que ten posibilitado “que esteamos a escribir unha nova páxina da nosa historia, marcada polo respecto, pola esperanza e pola liberdade”.
Román Rodríguez quixo, ademais, poñer en valor o traballo realizado polas persoas colaboradoras en Pardines. Cando ETA empezou a matar, un amplo traballo de investigación e compilación que serve como testemuño do nacemento e evolución da banda e dos crimes perpetrados por ela, así como do labor das forzas de seguridade para derrotala. Neste sentido, o conselleiro salientou que este libro supón unha reflexión serena “que nos permite mirar cara adiante e incidir nos valores dunha convivencia social harmónica”.
Máis polo miúdo do libro falaron Gaizka Fernández Soldevilla, coordinador da publicación e representante do Centro para a Memoria das Vítimas do Terrorismo, e Javier Marrodán, profesor da Universidade de Navarra e co-autor do libro. Xunto a eles estiveron na mesa presidencial o alcalde de Malpica, Eduardo Parga; o concelleiro Miguel Fernández; o secretario xeral de Cultura, Anxo Lorenzo, e Manuel Pardines, irmán do homenaxeado.
5Xuñ 2018
José Antonio Pardines recibe o recoñecemento dos seus compañeiros e dos seus veciños na vila na que naceu
Cincuenta anos despois do atentado terrorista que truncou a súa vida con só 25 anos de idade e que o converteu na primeira vítima de ETA, o garda civil José Antonio Pardines Arcay recibiu na nosa vila, que tamén era a súa, a homenaxe e o recoñecemento dos seus compañeiros do instituto armado e dos veciños e veciñas de Malpica. O seu irmán Manuel, ex-alcalde de Malpica, e a muller que o criou, a súa segunda nai, asistiron moi emocionados aos actos organizados pola Asociación Pro Garda Civil (APROGC), nos que tamén participaron o alcalde, Eduardo Parga Veiga, e o presidente da Deputación da Coruña, Valentín González Formoso.
Despois dunha misa na igrexa de San Xulián e dunha ofrenda floral no cemiterio, a praza de Anselmo Villar Amigo foi escenario do acto central da xornada, o descubrimento dun monólito realizado pola Escola de Canteiros de Poio grazas á colaboración da Deputación de Pontevedra, que tamén estivo representada no acto. As carpas colocadas na praza quedaron pequenas, pero a choiva, que non cesou un segundo, non impediu que o pobo malpicán amosase a súa solidariedade.
O presidente da Asociación Pro Garda Civil, Fernando R. Trejo, abriu as intervencións agradecendo a presenza da familia de José Antonio Pardines e a colaboración tanto das deputacións de Pontevedra e A Coruña coma do Concello de Malpica, “marabillosa paraxe onde repousa o noso compañeiro José Antonio Pardines”. A APROG quixo, dalgún xeito, honrar tamén a todas as vítimas da barbarie terrorista. “Este magnífico monólito, esta obra exemplar, fará que a memoria de José Antonio Pardines sexa eterna coma a pedra de granito coa que foi construído. Hoxe –engadiu- colocamos 1.100 quilos de pedra que representan toneladas de sentimentos para homenaxear á primeira vítima de ETA”.
“Hoxe é un día para o recordo”, comezou o presidente da Deputación da Coruña. “Fronte aos que quixeron impor con pistolas as súas ideas, a unidade dos demócratas foi a clave fundamental para derrotar ao terrorismo en España. Despois de cinco décadas, gañou a democracia”, sostivo González Formoso, que apuntou que “o mellor que podemos facer polas vítimas é defender a verdade e transmitila ás novas xeracións para que aquelas páxinas negras da historia deste país non se terxivesen, non olviden e non volvan a repetirse nunca máis”, concluíu.
Despois de facer un repaso ás vítimas que deixa o terrorismo de ETA no noso país, o alcalde de Malpica fixo un chamamento para nunca nos esquezamos das persoas que pagaron coa vida “a loita contra o odio e a barbarie”. Por iso, o Concello de Malpica púxose desde o primeiro momento a disposición da APROG para colaborar en todo o posible para a celebración desta merecida homenaxe. “Hoxe toca recoñecerlles e agradecerlles o intenso traballo realizado, a súa capacidade de coordinar os esforzos de diferentes institucións para rematar con este simbólico acto de lembranza dun mozo malpicán, que morreu asasinado por facer o seu traballo: defender a seguridade e a liberdade dos seus veciños”, rematou Eduardo Parga.
Próximos actos
Pero os actos de lembranza de José Antonio Pardines non rematan. Para mañá, día 6, ás 20.00 horas está prevista na Casa do Pescador a presentación do libro Pardines. Cando ETA empezou a matar.
Os actos do 50º aniversario do primeiro asasinato de ETA rematarán o domingo 10 de xuño con outra xornada de homenaxe organizada neste caso pola Comandancia da Garda Civil da Coruña. Comezará ás 12.00 horas cunha visita á exposición de fotografía sobre o atentado que estará aberta no Centro Cívico. Media hora máis tarde celebrarase un acto relixioso na igrexa de San Xulián, e para as 13.15 horas está programado un desfile militar e unha ofrenda floral na rúa Emilio González López e a praza Anselmo Villar Amigo.
2Xuñ 2018
Malpica acollerá durante toda a semana actos de homenaxe ao garda civil José Antonio Pardines, primeira vítima de ETA
O 7 de xuño cumpriranse 50 anos do asasinato do garda civil José Antonio Pardines Arcay, primeira vítima da banda terrorista ETA. Coincidindo co aniversario, A Coruña e Malpica, a vila na que naceu e onde esta enterrado, acollerán durante toda a semana actos na súa honra.
Os primeiros, o luns 4 e o martes 5, están organizados pola Asociación Pro Guardia Civil (APROGC). O luns, ás 19.00 horas, o Auditorio A Fundación, no Cantón Grande da Coruña, será escenario da charla Pardines, principio e fin de ETA. 50 anos de loita pola liberdade, na que participarán José Antonio Vázquez Taín, xuíz; Florencio Domínguez Iribarren, director do Centro Memorial de las Víctimas del Terrorismo;bManuel Sánchez, coronel xefe da UCO da Garda Civil, e Gonzalo Araluce, xornalista.
O día 5 de xuño os actos trasladaranse a Malpica. Comezarán ás 11.00 horas cun oficio relixioso na igrexa de San Xulián. Ás 12, a APROGC realizará unha ofrenda floral na tumba de José Antonio Pardines, que tiña só 25 anos cando foi asasinado. A xornada rematará ás 13.00 horas coa inauguración dun monólito conmemorativo na praza de Anselmo Villar Amigo. O monumento foi elaborado pola Escola de Canteiros de Poio, que se suma deste xeito á homenaxe organizada pola APROG. Máis información, aquí.
Con motivo deste aniversario, a Fundación Centro para la Memoria de las Víctimas del Terrorismo (FCMVT), adscrita ao Ministerio del Interior, en colaboración coa Xunta de Galicia, pon en marcha en Galicia diversas iniciativas en recordo da memoria de Pardines e para que sirvan de reflexión sobre o a actividade criminal de ETA. Entre esas iniciativas inclúese a publicación do libro Pardines. Cando ETA empezou a matar, que será presentado o 6 de xuño, ás 20:00 horas, na Casa do Pescador de Malpica de Bergantiños.
Na presentación intervirán representantes da Xunta de Galicia, o Concello de Malpica, a familia de José Antonio Pardines; Gaizka Fernández Soldevilla, un dos coordinadores da obra e representante do Centro para la Memoria de las Víctimas del Terrorismo, e Javier Marrodán, profesor da Universidade de Navarra e un dos coautores do libro.
Desfile militar e ofrenda floral
Os actos do 50º aniversario en Malpica rematarán o domingo 10 de xuño con outra xornada de homenaxe organizada neste caso pola Garda Civil e a Subdelegación do Goberno. Comezará ás 12.00 horas cunha visita á exposición de fotografía sobre o atentado que estará aberta no Centro Cívico. Media hora máis tarde celebrarase un acto relixioso na igrexa de San Xulián, e para as 13.15 horas está programado un desfile militar e unha ofrenda floral na rúa Emilio González López e a praza Anselmo Villar Amigo.
2Xuñ 2018
A homenaxe deste domingo a Francisco Bernis converterá a Malpica na capital da ornitoloxía española
Neste mes de xuño cúmprense 70 anos da presenza do ornitólogo Fransico Bernis Madrazo nas illas Sisargas para realizar un estudo do estado das súas aves. Ese foi o motivo polo que o Concello de Malpica de Bergantiños quixo homenaxear unha figura fundamental da ornitoloxía española así como destacar o seu vínculo coas terras malpicás. Francisco Bernis foi o primeiro autor que publicou artigos en extensión sobre as aves nas Sisargas, textos que a posteriori foron e son citados aínda polas novas fornadas de ornitólogos.
Polo tanto, a vila de Malpica de Bergantiños converterase este domingo día 3 na capital da ornitoloxía española porque, ademais de realzar a figura dun dos fundadores de SEO/BirdLife, se contará coa presenza de dúas fillas deste doutor en Zooloxía, Cristina e Carmen Bernis, con Carlota Viada Sauleda, secretaria xeral da Sociedade Española de Ornitología SEO/BirdLife; Álvaro Barros López, biólogo e vocal da Sociedade Galega de Ornitoloxía; Antonio Sandoval Rey, escritor e divulgador ambiental; así como un importante elenco de persoas relacionadas co mundo das aves.
Os primeiros participantes comezaron a chegar na tarde de hoxe sábado e para a mañá do domingo está prevista unha visita guiada por tres enclaves turísticos básicos do concello de Malpica: Buño, Nariga e cabo Santo Hadrián.
Xa na tarde do comingo, ás cinco, no salón de actos da Casa do Pescador, presentarase o libro «Francisco Bernis, Las islas Sisargas en 1948. Dos visitas ornitológicas» publicado na colección Costa da Morte de Edicións Embora. A edición corre a cargo de Antonio Sandoval e Xosé Manuel Varela. Nel recuperan os dous artigos que Francisco Bernis publicou no Boletín de la Real Sociedad Española de Historia Natural xunto cun manuscrito coas notas de campo nas Sisargas do propio Francisco Bernis.
Ademais dos editores, neste acto participarán Eduardo Parga Veiga, alcalde de Malpica de Bergantiños; Carlota Viada Sauleda, secretaria xeral da Sociedad Española de Ornitología SEO/BirdLife; Álvaro Barros López, vogal da Sociedade Galega de Ornitoloxía; e Carmen e Cristina Bernis Carro.
Esta xornada de aniversario pecharase coa entrega de agasallos institucionais conmemorativos á familia de Bernis, a editores e a institucións colaboradoras.
31Mai 2018
Presentación do libro “Pardines. Cando ETA empezou a matar”, o día 6 no salón de actos da Casa do Pescador
O vindeiro 7 de xuño de 2018 cumpriranse 50 anos do asasinato do garda civil José Antonio Pardines Arcay, primeira vítima da banda terrorista ETA, na localidade guispuscoana de Aduna. O axente tiña 25 anos e era orixinario de Malpica de Bergantiños, onde está soterrado.
Con motivo deste aniversario, a Fundación Centro para la Memoria de las Víctimas del Terrorismo (FCMVT), adscrita ao Ministerio del Interior, en colaboración coa Xunta de Galicia, pon en marcha en Galicia diversas iniciativas en recordo da memoria de Pardines e para que sirvan de reflexión sobre o a actividade criminal de ETA.
Entre as iniciativas impulsadas arredor deste aniversario inclúese a publicación do libro Pardines. Cando ETA empezou a matar, que será presentado o 6 de xuño, ás 20:00 horas, na Casa do Pescador de Malpica de Bergantiños, municipio natal de Pardines.
Na presentación da obra intervirán:
• A Xunta de Galicia.
• O Concello de Malpica de Bergantiños.
• A familia de Antonio Pardines (representada por un irmán).
• Gaizka Fernández Soldevilla, un dos coordinadores da obra e representante do Centro para la Memoria de las Víctimas del Terrorismo.
Javier Marrodán, profesor de la Universidad de Navarra e un dos coautores del libro
Distribuiranse exemplares do libro entre as persoas asistentes.
PARDINES. CANDO ETA EMPEZOU A MATAR
A publicación Pardines. Cando ETA empezou a matar convida, a partir da exposición de feitos e testemuñas, á análise e reflexión ao redor da historia terrorista durante un período de máis de 40 anos: desde 1968, data do primeiro atentado, ata o anuncio do cese definitivo da actividade armada, no ano 2011.
O volume, que ofrece unha compilación bibliográfica coa que tamén se pretende facer fincapé no valor da paz e da convivencia no seo da sociedade, conta cun prólogo do autor de Patria, Fernando Aramburu, e con introdución a cargo de Florencio Domínguez Iribarren, director do Centro para la Memoria das Víctimas do Terrorismo. Este último é o coordinador da obra, xunto con Gaizka Fernández Soldevilla.
O libro, que foi traducido ao galego coa colaboración da Consellería de Cultura, Educación e Ordenación Universitaria, está distribuído en 10 capítulos, realizados por 12 destacados especialistas no ámbito do terrorismo: Juan Avilés Farré, Santiago de Pablo, Gaizka Fernández Soldevilla, Raúl López Romo, Juan Antonio Pérez Pérez, Javier Gómez Calvo, Jesús Casquete, Óscar Jaime Jiménez, Roscesvalles Labiano JuanGarcía, Javier Marrodán Ciordia, María Jiménez Ramos e José María Ruiz Soroa.
29Mai 2018
A APROGC organiza unha serie de actos en lembranza de José Antonio Pardines Arcay, primeiro garda civil asasinado por ETA
A Asociación PRO Guardia Civil (APROGC) ten programados para primeiros de xuño unha serie de actos, tanto na Coruña coma en Malpica, con motivo do 50º aniversario do asasinato de José Antonio Pardines Arcay _primeiro garda civil vítima de ETA_, que tivo lugar o 7 de xuño de 1968 en Villabona (Guipúzcoa).
O actos comezarán o día 4, ás 19 horas, na Coruña coa charla-coloquio Pardines, principio e fin de ETA. 50 anos de loita pola liberdade, que estará modera polo xuíz José Antonio Vázquez Taín e que contará coa participación do director do Centro Memorial das Vítimas do Terrorismo, Florencio Dominguez Iribarren; o coronel xefe da Unidade Central Operativa (UCO) da Garda Civil, Manuel Sánchez Corbí, e o xornalista Gonzalo Araluce.
O día 5 os actos trasladaranse a Malpica. Comezarán ás 11.00 horas cunha misa funeral polo garda José Antonio Pardines na igrexa parroquial. A continuación realizarase unha ofrenda floral na súa tumba, e para as 13.00 horas está prevista a inauguración dun monólito na súa memoria na praza de Anselmo Villar Amigo.
28Mai 2018
O Certame de Poesía Erótica Illas Sisargas reivindica Malpica como lugar de referencia para a cultura galega
O Certame de Poesía Erótica Illas Sisargas non só é único en Galicia, senón que co paso do tempo tense convertido nun premio de referencia. Tanto é así que, segundo anunciou o presidente da Asociación Cultural Caldeirón, Francisco Quiroga (Paco de Tano), na presentación desta 13ª edición, desde Allariz interesáronse este ano en reservarlle un espazo dentro do seu prestixioso Festival Internacional de Xardíns.
Caldeirón volve a contar unha vez máis coa colaboración do Concello e Malpica na organización do certame. “Despois de 13 anos vai a máis, o cal quere dicir que acertamos, e creo que está máis ca consolidado”, manifestou o alcalde, Eduardo Parga. Ademais de expresar o agradecemento do Concello a Caldeirón pola iniciativa, o alcalde convidou á participación e tivo palabras de lembranza para Paco Souto, que foi un dos principais impulsores do premio. “Hai unha persoa que nos falta, pero que segue estando con nós e hoxe estaría contento de ver que isto segue”, engadiu Eduardo Parga.
Pero o Certame de Poesía Erótica Illas Sisargas non é só un premio literario, senón que contribúe, en palabras de Paco de Tano, “a facer marca Malpica”. Con esa mesma intención, a Asociación Cultural Caldeirón volve a contar co apoio do Concello de Malpica, e neste caso tamén da Asociación Cultural Malante, para a organización doutro evento que tamén reivindica Malpica como lugar de referencia para a cultura galega: a I Feira do Libro de Poesía “Paco Souto”, que se celebrará do 1 de 3 de xuño no Mercado Municipal.
“É unha iniciativa que tiñamos pendente desde hai tempo, pero se hai vontade e o Concello colabora as cousas son máis sinxelas”, sinalou o presidente de Caldeirón. Neste caso, ademais, tamén se pretende dinamizar o Mercado Municipal e “darlle un pulo”, ademais de involucrar á hostalaría, porque “se a xente non vai á poesía, a poesía ten que ir á xente”, engadiu Paco de Tano.
Librerías e editoriais teñen expresado xa a súa intención de participar na iniciativa, que reunirá a nomes da cultura galega tan destacados coma Eduardo Estévez, Marta da Costa, Xurxo Souto, Rosalía Fernández Rial, Carlos Lourenzo ou Ricardo Seixo, a artistas plásticos e a entidades e persoeiros locais coma a Asociación Cultural Malante ou Andrés Mourente. “En Malpica poderiamos ser todos poetas, porque Malpica é unha poesía en si. Polo tanto, é normal facer unha feira da poesía e seguir facendo marca Malpica”, asegurou Paco e Tano.
Bases do Certame de Poesía Erótica e premiados
O prazo de participación no Certame de Poesía Erótica está aberto ata o 30 de setembro. Os interesados poden enviar as súas obras ao Concello de Malpica (Avda. Emilio González López, 1-15113 Malpica de Bergantiños), indicando no sobre “XIII Certame de Poesía Erótica Illas Sisargas”. O fallo farase público coincidindo coa Cea das Letras, en novembro, e na que tamén se fará a presentación pública da obra gañadora na pasada edición. O Concello de Malpica financia a edición da obra gañadora e o premio, dotado con 1.000 euros. Consulta as bases completas aquí: BASES XIII CERTAME DE POESIA EROTICA ILLAS SISARGAS 2018
Relación de gañadores das edicións anteriores:
- “Arredor do teu corpo”, Antonio García Teijeiro
- “Baile Átha Cliath”, Alberte Momán
- “Xoguetes póstumos”, Enma Pedreira
- “Rúa da cancela”, Eli Ríos e Eduardo Estévez
- “Amantes”, María Lado
- “Carnia Haikai”, Elvira Riveiro
- “Chamádeme Eva”, Mercedes Leobalde
- “Dominio público”, Ramón Neto
- “O episodio”, Verónica Martínez Delgado e Alberte Momán
- “A razón do perverso”, Mário J. Herrero Valeiro
- “O home invisíbel”, Xabier Queipo
- “Diáspora de amor balea”, Andrea Nunes Brións e María Rosendo