Síguenos en
gl_ES
Tempo Malpica de Bergantiños
Luns 19°
14°
Martes 18°
13°
Mércores 18°
15°
tiempo.com   +info
  1.  
  2. Uncategorized

Uncategorized

26Ago 2021

Malpica avoga por un modelo híbrido para coidar o medio ambiente impulsando tamén as axudas a causas sociais

O Concello de Malpica, a través das concellarías de Medio Ambiente e Servizos Sociais, continúa coa súa firme aposta polo coidado do medio á par que impulsa axudas a causas sociais. 

Corazóns solidarios
Corazóns solidarios

Recentemente instaláronse catro novos colectores baixo a denominación de Corazóns Solidarios, que funcionarán como recollida de tapóns de plástico e lle darán tamén outro aspecto ás rúas malpicás. 

Lembramos que ao longo do termo municipal xa se instalaran diante do Centro Cívico, a carón da parada de taxis, na entrada do CEIP Xoaquín Rodríguez Otero e no parque García Alén, de Buño. 

14Ago 2021

O Concello dá os primeiros pasos para reactivar a Agrupación de Voluntarios de Protección Civil de Malpica

O Concello de Malpica está a dar os primeiros pasos para reactivar a Agrupación de Voluntarios de Protección Civil do municipio. O alcalde, Walter Pardo, mantivo esta semana unha xuntanza con integrantes do colectivo.

A través desta reunión, o goberno local pretende revitalizar a súa actividade e darlle un novo pulo ás súas funcións no termo municipal.

Segundo explicou o rexedor malpicá, “a agrupación ofrécelle un servizo á veciñanza de enorme importancia que non vai quedar sen o apoio institucional do Concello”. Neste sentido, adiantou que se está a traballar de xeito “conxunto para reactivar a formación e seguir actuando en Malpica cando o pobo así o requira”. A Agrupación de Voluntarios de Protección Civil malpicá fundouse no ano 1996 e desde aquel momento prestou servizo á veciñanza en emerxencias como desaparicións, incendios ou desastres naturais coma o do ‘Prestige’.

12Ago 2021

Buño comeza a súa XXXVII edición da Mostra de Olería en clave feminina e coa tradición como bandeira

Xa está oficialmente en marcha a XXXVII edición da Mostra de Olería de Buño, que este ano se celebra os días 12, 13, 14 e 15 de agosto. Esta mañá tivo lugar o acto de inauguración do evento, que este ano se dedica á figura da muller dentro do oficio oleiro.

No acto de presentación participou o alcalde de Malpica, Walter Pardo Añón; a concelleira de Olería, Leticia Naya Varela; o presidente da Asociación de Olería de Buño, Fran Gorín; a secretaria da Delegación Territorial da Xunta na Coruña, Patricia Rodríguez Franco; e a subdelegada do Goberno na provincia da Coruña, María Rivas López.

Fran Gorín foi o encargado de introducir a todas as personalidades presentes no acto inaugural. O presidente de Olería de Buño, que rexenta o Obradoiro Gorín, agradeceu “todo o esforzo das entidades e persoas implicadas por sacar adiante esta edición da Mostra a pesar de todas as dificultades sanitarias”.

Pola súa banda, a concelleira da Mostra fixo extensible este recoñecemento “a todo o tecido asociativo do municipio por facilitar e colaborar á hora de confeccionar a programación deste ano”. Cómpre destacar que durante os vindeiros días haberá, ademais das clásicas demostracións do oficio, diversas exposicións, charlas, coloquios, espectáculos, pasarrúas e un concerto a cargo de Guadi Galego.

Neste sentido, Patricia Rodríguez Franco explicou que se trataba “dun ano moi emotivo para retomar a celebración da Mostra logo das complicacións xurdidas a raíz da situación sanitaria”. Así, agardou que nesta edición “Buño siga a demostrarlle ao resto do mundo as súas potencialidades como referente artesán galego e peninsular”.

A subdelegada do Goberno na provincia da Coruña dedicou a súa intervención a poñer en valor “o corazón e o cerebro co que traballan as decenas de oleiros e oleiras que seguen a manter vivo o oficio en Buño”. “Esta é unha oportunidade excepcional para amosar a universalidade de Galicia e o excepcional do noso patrimonio cultural”, engadiu.

O alcalde, Walter Pardo, pechou o ciclo de agradecementos destacando “a memoria viva coa tradición oleira que mantén Buño 37 anos despois da primeira edición da Mostra”. “O Concello segue e seguirá traballando man a man coa Olería de Buño para avivar a chama desta celebración de todas e todos os malpicáns”, concluíu.

Programación deste xoves

Logo das intervencións, o grupo realizou unha visita polos postos instalados no percorrido da Mostra logo da actuación gaiteira da Asociación Cultural Malante. Pouco despois comezaría a primeira demostración de olería ao torno da xornada na Praza de Santa Xusta, que se habería repetir pola tarde.

Ás 18:00 horas, a Asociación Visibles inaugurou a exposición ‘Sen elas non hai olería’. A partir das 19:00 horas, Malante puxo de novo banda sonora ás últimas horas do día cunha actuación polas rúas de Buño. O mago Álex Louzao pechou este primeiro día da Mostra cun espectáculo para todos os públicos ás 20:00 horas. Lembramos que todos os eventos están condicionados á normativa sanitaria vixente, que é de cumprimento obrigatorio. A organización do evento, na que se inclúe o Concello de Malpica, a Asociación Olería de Buño e a Deputación da Coruña, traballa conxuntamente co obxectivo de reducir ao máximo as posibilidades de contaxio por covid-19.

8Xul 2021

Suelo Empresarial del Atlántico presenta en Malpica un plan para impulsar o polígono de Buño

Suelo Empresarial del Atlántico presentou esta mañá un plan para impulsar o polígono empresarial de Buño que inclúe tanto a promoción e difusión como a mellora da oferta económica.

Con este obxectivo, a xerente Beatriz Sestayo reuniuse no Concello co alcalde, Walter Pardo, o concelleiro Alfredo Cañizo, o concelleiro de Promoción Económica, Sergio García e o secretario da asociación de empresarios, Fernando Couto, para explicar a oferta de máis da metade da superficie en Dereito de Superficie.

SEA
Imaxe da xuntanza desta mañá | Suelo Empresarial del Atlántico

Dentro das medidas expostas para impulsar o polígono, no último Consello de Administración aprobouse ampliar a oferta de chan en dereito de superficie, a modo de alugueiro con opción a compra, a preto de 15.000 metros cadrados, co que se duplica a oferta existente ata o momento. As cifras que deberían abonar os emprendedores son moi reducidas, de só 90 euros ao mes para parcelas de 1.000 metros cadrados e de 109 euros para as de ata 1.466 metros cadrados.

Na modalidade de Dereito a Superficie, as empresas poden instalarse sen necesidade de afrontar o gasto da compra do chan. Así, poderían continuar nesta modalidade durante un período de ata 30 anos ou ben optar por comprar a parcela, cunha redución parcial das cantidades abonadas previamente.

En paralelo, dentro das medidas adoptadas, Beatriz Sestayo presentou o vídeo promocional elaborado para impulsar o polígono industrial e que recolle a súa proximidade ao porto pesqueiro, á Coruña, a Santiago e as súas enormes posibilidades como área empresarial para distintos sectores. O vídeo foi entregado ao Concello e será difundido por “SEA”, dependente do Ministerio de Transportes a través do SEPES, en distintos foros económicos e empresariais.

O alcalde, Walter Pardo, en nome do goberno local, agradeceulle a Beatriz Sestayo “política e persoalmente o esforzo para promocionar o noso polígono, en busca de sinerxias co empresariado local para fomentar a economía e xerar emprego, obxectivos fundamentais para nós”, sinalou.

Pola súa banda, Beatriz Sestayo apuntou que “imos apostar por Malpica, e tentaremos dinamizar o polígono buscando distintas fórmulas que cremos que servirán de revulsivo, coa colaboración do Concello e atendendo as propostas das asociacións de empresarios”, explicou.

9Xuñ 2021

Malpica presenta a XVI edición do Certame de Poesía Erótica ‘Illas Sisargas’

O Certame de Poesía Erótica ‘Illas Sisargas’ chega este ano á súa XVI edición de man da concellería de Cultura do Concello de Malpica e a Asociación Cultural Caldeirón. O galardón deste ano constará da publicación da 1ª edición da obra gañadora e dun premio en metálico de 1.500 euros.

Este mércores presentáronse as bases do concurso nun acto na Casa do Concello no que participaron o alcalde, Walter Pardo, a concelleira de Cultura, Leticia Naya, e o presidente da Asociación Cultural Caldeirón, Paco de Tano.

Do mesmo xeito que en anos anteriores, poderán optar ó premio todas aquelas autoras e autores que presenten un libro inédito de temática erótica en galego e que non recibira galardóns previamente. Os textos deberán enviarse en formato PDF ó correo electrónico premio@caldeiron.org ata a medianoite do 19 de setembro do 2021.

O galardón componse dun premio en metálico de 1.500 euros e a publicación da 1ª edición da obra na colección Illas Sisargas da Editorial Calderón, cunha tirada de 400 exemplares.

1Xuñ 2021

A Xunta asegura que os traballos para o apuntalamento da dársena de Malpica comezarán a vindeira semana

Os traballos para o apuntalamento da dársena de Malpica comezarán, segundo asegurou a presidenta de Portos de Galicia, Susana Lenguas, a partir da semana que vén.

Esta confirmación chegou durante unha reunión que mantivo en Santiago o alcalde, Walter Pardo, coa titular do organismo autonómico. Nesta xuntanza abordáronse diversas problemáticas que afrontan os espazos portuarios do municipio para intentar atopar unha solución o antes posible.

Entre as prioridades para o goberno local e a veciñanza de Malpica está a reapertura da vía que une o porto e a lonxa, que necesita duns traballos de apuntalamento para poder asegurar as súas condicións de circulación. Segundo explicou a presidenta de Portos de Galicia, o inicio dos traballos preparativos para esa intervención está marcado na primeira quincena de xuño.

O rexedor malpicán trasladou unha vez máis a “preocupación de moitas familias que dependen directa e indirectamente desta actuación” e instou ó organismo a rematar os traballos no menor tempo posible.

Por outra banda, tamén se insistiu na necesidade de buscar unha solución para as saídas da dársena coa que asegurar as condicións de seguridade das embarcacións e do persoal a bordo. Portos de Galicia afirmou ter en marcha estudos técnicos para reducir este risco.

Entre os temas tratados tamén estivo a urxencia de aprobar un convenio para regular o uso dos espazos portuarios para outras actividades, a autorización para a pesca deportiva en algunhas zonas dos portos e o arranxo da grúa do porto de Barizo.

Infraestruturas do porto

O alcalde, Walter Pardo, tamén solicitou a colaboración do ente autonómico para lograr a substitución de parte do mobiliario do porto malpicán que se atopa a carón da dársena seca.

Neste sentido, a presidenta de Portos de Galicia, Susana Lenguas, comprometeuse a estudar a opción de substituír os elementos deteriorados por outros cun material que poida manterse mellor conservado.

7Mai 2021

Malpica prepara a conmemoración das Letras Galegas cun compendio de actividades culturais

O Concello de Malpica, da man da concellaría de Cultura, presenta a programación para conmemorar as Letras Galegas do ano 2021, cun compendio de actividades entre as que se destacan sesións de poesía, música ou a presentación das obras gañadoras do certame de poesía erótica Illas Sisargas.

As actividades darán comezo na mañá do venres 14 de maio no que o espectáculo ‘O exército das paxariñas’ protagonizado por Soraya Lema e Adela Dios recorrerá os centros de ensino do Concello, a súa chegada ó CEIP Milladoiro, CEIP Joaquin Rodriguez e ás escolas unitarias de Barizo e Mens, do CRA A Nosa Señora do Faro, achegará ó alumnado de educación infantil e primaria a figura de Xela Arias, autora homenaxeada nas Letras Galegas 2021.

Na busca da Fraga das paxariñas faladoras, fábula creada por Xela Arias, dúas rapazas aventureiras atópanse co exército das paxariñas: a paxariña tradutora, a poeta, a música e a reivindicativa, todas elas forman a alma de Xela e todas falan moitas linguas mais hai unha lingua que as une a todas: a lingua galega. A través de fábulas e contos acompañados de música co acordeón, ukelele, tambor e a frauta van descubrindo a vida e obra da escritora, que este ano se lle dedican as Letras Galegas 2021. Con este espectáculo de narración oral e música pretendemos que as nenas e os nenos coñezan o valor da poesía e a maxia das palabras da man de Xela. O exército das Paxariñas é un espectáculo de narración oral con música en directo acordeón, ukelele, tambor e frauta.

O propio 14 de maio, ás 20h o fogar do pensionista da Casa do Pescador acollerá a presentación das obras gañadoras das últimas dúas edicións do Certame de poesía erótica Illas Sisargas, ‘rascamaceiras’ de Laura Ramos Cuba e ‘O cuarto de Jane’ de Charo Pita, da man do colectivo Caldeirón. A actividade continuará na xornada do domingo 16 de maio, na que ó longo de todo o día a Praza do Campo acollerá unha completa programación:

Ás 12:00 horas será o momento para as familias acompañadas da rapazada para gozar cos ‘Arrolos con Mamá Cabra’ nos que Gloria Mosquera e Diego Maceiras interpretan e ensinan ás familias participantes neste pequeno obradoiro algúns arrolos cos que adormecer, aleitar, e tamén cos que gozar da música nos primeiros días e meses de vida.

O obxectivo do grupo Mamá Cabra dende o seu nacemento é o de transmitir o gusto pola música dende a primeira infancia e este obxectivo comeza nas voces das súas familias coas que comparten estas cancións para arrolar en galego.

Ás 13:00 horas chega a hora do Vermú das Letras da man do grupo de Malpica Meigallo, da A.C.D Carcaxía, que comezou a súa andadura no ano 2003, formado nos seus inicios por 5 mozas con ganas de aprender e conservar a cultura musical e artística deste país. Durante o primeiro ano, coa axuda da súa mestra, Marina Torrado, coa que con grande esforzo e meses de ensaios e máis ensaios, descubriron que tanto esforzo valía a pena e saborearon finalmente o agrado do público, e dos profesionais do gremio, que as recompensaron en diversas ocasións con premios nos concursos de música tradicional Xiradela de Arteixo e Xacarandaina da Coruña.

E isto converteuse en algo case aditivo, en algo tan forte que as impulsou a non baixar o listón, a seguir aprendendo, mellorando as técnicas, superando cada vez retos máis difíciles. Pero non só a satisfacción persoal de adicarse a algo que as apaixona é o motor deste grupo, a súa maior motivación é que a riqueza artística máis valiosa que ten este país, esa que naceu das inquedanzas dos nosos bisavós, sen que ninguén llas ensinara, e que se conservou de pais a fillos de forma natural, sen obriga ningunha, esa que é diferente en cada comarca, en cada concello, en cada parroquia, esa que lles invade o corazón, non se esqueza xamais.

Ás 17:30 horas é o momento do ‘Café con Letras’ no que nos acompañará Atenea García con ‘De ti e mailo mundo que apañes’ que pretende ser un humilde percorrido pola obra da poeta, tradutora e editora Xela Arias, un percorrido que nada ten de cronolóxico pero moito de persoal, co que a nós se refire.

Revoltas pola palabra achegámonos excitadas á súa obra, posuídas por esa escrita extrema que remove pel e ósos. Aparece entón a dúbida, o medo ao non estar á altura de semellante extremidade, a de Xela, a dos extremos. Pero nese xusto momento o poema tranquilízanos. De ti e mailo mundo que apañes é un espectáculo dirixido á mocidade que combina a narración oral con outras linguaxes escénicas. Esta proposta tenta facer un breve percorrido pola obra da poeta Xela Arias, mergullándonos tanto na súa poesía como na súa breve pero interesante obra narrativa. Xela, a poeta que ten máis de actual que de histórica.

E a fin desta intensa xornada chegará ás 19:30h co concerto de Acordeireta, grupo formado por Patricia González e Alejandro Balbuena. Despois dunha longa traxectoria individual, deciden xuntar o acordeón e a pandeireta para divertirse, para seguir alimentando as súas almas, polo gusto de transmitir un sentimento arraigado ás nosas raíces, por reivindicar temas sociais dos nosos tempos, por homenaxear con música a persoas queridas e admiradas e sobre todo, para dignificar a nosa lingua, a cultura galega e compartilo con vós.

A programación continuará o propio Día das letras, o luns 17 de maio a cita será ás 12:00 horas na praza Villar Amigo e alí cunha lectura poética aberta a toda a cidadanía que se achegue e na compañía de A.C. Malante de Malpica poremos fin a esta primeira edición dun Malpica un mar de Letras que nace co obxectivo de gozar e coñecer as nosas letras da man da produción cultural local e do país.

Malante constitúese como tal logo de formar parte da Escola Municipal de Artes escénicas. Así, as persoas integrantes de entre 20 e 30 anos deciden asociarse, para unha maior capacidade de autoxestión e participar nun maior número de intercambios culturais. Os socios fundadores eran arredor de 15 persoas. Comezaron a realizar actividades de baile, pandeireta e gaita e aos dous anos montaron unha banda de gaitas que percorreu toda Galicia e parte do estranxeiro, como Portugal e Francia. Participaron, entre outros festivais internacionais, no de Ortigueira e no de Montignac.

Para seguir toda a actualidade de cultura na provincia, podedes seguir as redes de Facebook, Instagram e Twitter do Departamento de Cultura da Deputación da Coruña.

1Mai 2021

O Concello homenaxea a Adrián Verdes, operario de Protección Civil de Malpica durante 25 anos

O Concello de Malpica rendeu homenaxe esta mañá a
Adrián Verdes, operario de Protección Civil de Malpica durante 25 anos. Walter Pardo, alcalde de Malpica, entregoulle unha distinción ao malpicán no Salón de Plenos.

O alcalde, Walter Pardo, entregoulle unha distinción a Adrián Verdes, o homenaxeado | Concello de Malpica


Supón isto, un recoñecemento a toda unha carreira marcada pola solidariedade, a empatía e a prestación dun servizo esencial para a veciñanza. Nas verbas do propio Adrián, di sentirse “moi orgulloso” de pertencer á agrupación de Protección Civil de Malpica, pobo que “levo e levarei sempre no corazón.”

Pola súa banda, o goberno local destacou a “boa vontade” de Verdes á hora de “ser de axuda e prestar apoio a toda a xente que o necesita, dun xeito
completamente altruísta e dedicado cen por cen á causa”, incidiron. “Adrián é un claro exemplo dun cidadán exemplar, que posúe valores que deben servir de exemplo ás novas xeracións.”

6Mar 2021

Malpica inaugura a Rúa dos Contos para galardoar as persoas premiadas no certame de microrrelatos

O Concello de Malpica, a través da concellaría de Cultura, inaugurou hoxe a Rúa dos Contos para galardoar as persoas premiadas no certame de microrrelatos. Hoxe terá lugar tamén, á súa vez, un novo certame de Poesía Erótica ‘Illas Sisargas’, que este ano cumpre a súa XV edición. A compañía Aldaolado, pola súa banda, marcará o reinicio das representacións culturais no Centro Cívico coa súa obra ‘Epístola ás neofalantes’.

Mañá, 7 de marzo, o pano volverase abrir a partir das 18:00 horas, con Tarabela Creativa escenificando ‘Tabú’, de Carmen Conde, e que servirá para conmemorar o Día Internacional da Muller.

O domingo 14 de marzo, á mesma hora, será a quenda do Teatro da Ramboia con ‘O meu mundo non é deste reino’. A última actuación do mes, programada para o 21 de marzo ás 18:00, estará a cargo de Producións Teatrais Excéntricas, que deleitará ao público con ‘Medida x Medida’.

27Feb 2021

Malpica súmase á iniciativa da compostaxe e facilitará colectores e formación entre a veciñanza

O Concello de Malpica acaba de adherirse ao Programa de Compostaxe Doméstica, de Sogama, mediante o cal facilitará composteiros e formación entre a veciñanza interesada sobre esta forma de reciclaxe natural. 

O obxectivo desta iniciativa é o de promover a autoxestión de refugallos orgánicos, converténdoos en abono co que fertilizar hortas, xardíns e terras de cultivo. Deste xeito, conséguese reducir a cantidade de residuos xerados e o uso de produtos artificiais que contaminen o solo. 

Calquera veciño ou veciña de Malpica que teña interese en sumarse ó programa deberá cubrir o formulario correspondente ao que pode acceder en www.concellomalpica.com e remitilo ás oficinas do Concello mediante o enderezo medioambientemalpica@gmail.com. Tamén se atenden solicitudes no teléfono 981 72 00 01. 

O único requisito é dispoñer dunha vivenda unifamiliar con horta ou xardín. Unha vez aceptada a inscrición, farase entrega dun composteiro e impartirase unha pequena formación sobre o proceso.

A concelleira de Medio Ambiente, María Álvarez, destacou “os grandes beneficios que aporta a compostaxe para o noso medio, que non deixa de ser a recuperación da reciclaxe natural e tradicional para converter os refugallos en fertilizantes”. 

“Coa adhesión do Concello de Malpica ao programa, agardamos que a veciñanza tome parte e se sume á iniciativa”, engadiu a edil, que incidiu nos “grandes beneficios que a compostaxe aporta a medio e longo prazo aos terreos de cultivo ao reducir a carga de produtos fertilizantes químicos”.

Página 1 de 512345