gl_ES
Tempo Malpica de Bergantiños
Xoves 14°
Venres 15°
11°
Sábado 14°
12°
tiempo.com   +info
  1.  
  2. Cultura

Cultura

23Ago 2018

O Concurso de Barcanas e Castelos de Area marca o comezo das nosas tradicionais Festas do Mar

CARTEL CASTELOS AREA AGOSTO 18

O Concurso de Barcanas e Castelos de Area “Praia de Area Maior” leva xa 17 anos marcando o comezo das tradicionais Festas do Mar. E este ano non será diferente, porque mañá venres a partir das 10.30 horas desenvolverase a 18ª edición coa finalidade de seguir promovendo a cultura popular e fomentando o uso lúdico da nosa praia. As inscricións poderán realizarse ata as 11 horas na mesma praia.

O Concello de Malpica establece tres modalidades de participación: infantil (ata 10 anos), amateur (a partir de 10 anos) e barcanas tradicionais de area (sen límites de idade). Cada participante ou grupo de participantes deberá realizar unha única obra. Na categoría amateur, coa colaboración de SonPress, haberá tres premios dotados con 130, 70 e 50 euros, respectivamente, e trofeo. Tamén recibirán trofeos os gañadores dos premios á mellor barcana, á mellor obra infantil (Premio Asociación de Amas de Casa de Malpica) e á máis votada polo público (Premio Asociación de Mulleres Redeiras Artesás Mar da Illa), que terá á súa disposición unha urna para votar entre as 13 e as 13.30 horas.

O xurado, que estará formado por representantes do Concello de Malpica, da Asociación de Amas de Casa e da Asociación de Mulleres Redeiras Artesás Mar da Illa, valorará a calidade técnica da obra, a súa complexidade, o deseño, as dimensións, a orixinalidade e a vinculación con Malpica.

Programa das Festas do Mar

cartel festas

Co Concurso de Barcanas e Castelos de Area arrancan as Festas do Mar, organizadas pola Asociación Cultural e Deportiva Estádiga coa colaboración do Concello, e que contarán tamén nesta primeira mañá de celebracións cos pasarrúas dos gaiteiros da Asociación Cultural Malante. Pero haberá música durante toda a xornada, xa que na sesión vermú das 14 horas actuará o Dúo Ciclón, ás 16 empezarán as actividades no mar na praia de Area Maior, ás 18 soará a música de Os Mecánicos no paseo e despois do pregón de Selina Otero, previsto para as 22 horas, chegará a verbena con Dúo Diamante, Smoke Trío, Monoulious Dop e Los Hijos de la Pandilla.

O sábado 26 actuarán de novo os gaiteiros de Malante ao longo da mañá, e na sesión vermú, que este ano terá dous escenarios, tocarán o Dúo De Festa (centro de saúde) e Calú (praza de Anselmo Villar Amigo). A partir das 17 horas haberá inchables na praia e ás 19 a Mekánica Rolling Band animará as rúas da vila. A verbena arrancará ás 23 horas cun cartel de luxo: Palladium e El Combo Dominicano.

As Festas do Mar rematarán o domingo con outra xornada chea de actividades: pasarrúas cos gaiteiros de Malante, misa cantada pola Coral de Malpica ás 12, sesión vermú ás 14 con O Tren da Unha, procesión marítima a partir das 17.30 e pasarrúas con Kilomberos de Monte Alto xa desde as 18 horas. Na última verbena, a partir das 22 horas, música variada con Disco Móbil Impacto, Grupo Bomba e Malpica Tomorrowland para pechar a festa tras a sesión de fogos de artificio na praia ás 24 horas.

19Ago 2018

O artesán rianxeiro Roberto Figueira Martínez entregou ao alcalde o escudo do Concello de Malpica tallado en madeira

ESCUDO CONCELLO

O artesán rianxeiro Roberto Figueira Martínez participou por segunda vez na Feira Medieval Mariñeira de Malpica, e por segunda vez despídese da nosa vila deixándonos un agasallo. Despois de pouco máis dunha xornada de traballo, onte fixo entrega ao alcalde, Eduardo Parga Veiga, do escudo do Concello tallado en madeira. No acto participaron tamén o primeiro tenente de alcalde, Miguel Fernández, e unha das responsables da empresa organizadora do mercado. O ano pasado, Roberto Figueira xa contribuíu a enriquecer o patrimonio artístico de Malpica coa doazón dunha imaxe da Virxe do Carme.

O artesán, iniciando o traballo

O artesán, iniciando o traballo

Roberto Figueira talla con gubias case todo tipo de madeiras, aínda que ten preferencia polas autóctonas, e deseña e fabrica todo tipo de obxectos, tanto colgantes e complementos decorativos como mobles ou elementos estruturais. A escultura da Virxe do Carme, está realizada en piñeiro roxo. Relevos, esculturas de pequeno e mediano formato, carpintería e ebanistería son as especialidades deste rianxeiro, que ademais realiza demostracións en eventos como a Feira Medieval Mariñeira.

Normalmente empeza unha peza en cada feira, e en Malpica puxo mans á obra xa dende o primeiro momento co escudo do Concello, de xeito que o público puido ver o proceso completo da creación.

16Ago 2018

A Feira Medieval Mariñeira inclúe este ano máis de 25 postos de artesanía e actividades de animación durante todo o día

ANUNCIO FESTA GALEGA DIARIO 255X152 MM pandereta

Na súa sexta edición, a Feira Medieval Mariñeira de Malpica non só encherá a nosa vila de artesanía senón tamén de animación, porque ademais dos 25 postos nos que atoparemos xoguetes de madeira, embutidos, chocolates artesáns, macramé, cadros infantís, sandalias de algodón ou garrapiñadas, durante os tres días inclúe un amplo e variado programa de actividades e actuacións para todos os públicos.

A Feira Medieval Mariñeira será inaugurada mañá venres ás 11.00 horas, e media hora despois desembarcarán na vila os Piratas de Turdión para ofrecernos un dos pasarrúas musicais que protagonizarán durante a fin de semana. Ás 12.00 horas o artesán Roberto Figueira comezará a tallar o escudo de Malpica en madeira para doarllo ao Concello ao remate da feira. Ademais dos Piratas de Turdión, pola tarde, a partir das 18.00 horas, contaremos coa Princesa Piruleta e a súa Unicornia, os Piratas e a Trasga do Mar coa súa bola xigante e a Bailarina de lume.

O sábado, ademais, contaremos cun taller de circo (12.30), contacontos (13.00), música en vivo (12.00, 14.00, 18.00 e 20.00 horas), os globos con figuras da Trasga Saltarina (18.30) e un espectáculo de lume ás 22.00 horas. O domingo continuará a música (actuacións ás 12.00, 13.30, 18.00, 19.30 e 21.30 horas), volverá a Trasga coa súa bola xigante (12.30) e haberá de novo taller de circo (18.30) e contacontos (20.00 horas). Para os nenos e nenas, ademais, durante todo o mercado teremos unha barca balancín, cama saltarina e zona de xogos e talleres. E, para todo o público, estará aberta unha exposición de cascos e armas e teremos exhibicións en vivo dos artesáns Roberto Figueira, de talla en madeira, e Salvador de Paz, de acibeche.

Os postos da Feira Medieval Mariñeira estarán abertos de 11.00 a 14.30 e de 18.00 a 23.00 horas.

Cartel de luxo na Festa Galega

O mercado convivirá coa Festa Galega, que chega á súa 11ª edición cun cartel de luxo. Catro grandes nomes da música tradicional galega pasarán polo escenario do porto entre os días 17 e 18 de agosto: Susana Seivane, Os da Porfía, Luar na Lubre e Coanhadeira. E non serán os únicos, porque, como é costume, na Festa Galega contamos coas agrupacións de música tradicional do noso concello e con bandas de gaitas locais e convidadas.

A música galega comezará a soar mañá venres ás 22.00 horas coas Pandereteiras da A.C. Raigañas sobre o escenario do porto, ao que subirán ás 22.30 as Feiticeiras da A.C. Malante. Para as 23.00 horas está previsto o concerto de Susana Seivane, unha das nosas gaiteiras máis internacionais, que está a piques de lanzar o seu quinto disco, e para pechar a velada contaremos a partir das 00.15 horas con Os da Porfía, sete homes que despois de formar parte durante anos de distintas agrupacións decidiron iniciar un proxecto común interpretando temas recollidos por eles e cunha indumentaria que xa é un dos seus sinais de identidade.

O día 18, ás 12.00 horas, sairá do Centro Cívico o tradicional Desfile de Bandas de Gaitas da Asociación Cultural Malante, un encontro de música tradicional que cumpre seis anos e que xunta, á parte da entidade organizadora, ás bandas de gaitas de Calo (Teo), Ximiela (Louro-Muros) e Ortigueira. Para pechar a mañá do sábado está prevista unha xurelada tradicional coa colaboración da A.C.D. A Estádiga.

A música volverá pola noite ao porto. A segunda sesión nocturna da Festa Galega arrancará ás 22.30 horas coas Cantareiras Meigallo da A.C Carcaxía. Para as 23.00 horas está programado o concerto de Luar na Lubre, a banda celta máis internacional de Galicia, que leva máis de 30 anos sobre os escenarios e que continúa reinterpretando a nosa música tradicional. Pero o luxo do concerto do día 18 será dobre, porque para pechar a velada contaremos, a partir da 01.00, con Coanhadeira, unha banda ourensá de folk que desde o ano 2006 está dedicada a amosar a música conservada ata os nosos días a través da tradición oral.

CARTEL

14Ago 2018

Unha festa sorpresa organizada polos nenos e nenas puxo fin á primeira quenda do obradoiro “Pintar na rúa”

14 agosto

Finalmente haberá segunda quenda do obradoiro Pintar na Rúa. Ante o elevado número de solicitudes recibidas no segundo prazo de inscrición habilitado, a Concellaría de Educación e Cultura optou por darlle continuidade ao proxecto ata o día 29. Deste xeito, a partir deste xoves 16, un total de 18 nenos e nenas, repartidos en dous grupos, empezarán a encher de cor a parede do parque infantil da rúa Patria Galega.

Hoxe rematou a primeira quenda do obradoiro, no que se completaron as 20 prazas dispoñibles. Os nenos e nenas prepararon unha festa sorpresa para a súa monitora, a artista carballesa Emi de las Heras, que despois de ter participado noutras iniciativas coma Derrubando Muros con Pintura, este ano sumouse ao proxecto de recuperación de espazos urbanos degradados que vimos desenvolvendo nos últimos anos.

Como podedes ver na imaxe, o deseño artístico vai cobrando forma. Nesta primeira quenda os traballos centráronse na preparación da parede e no debuxo do deseño, no que teñen cabida algúns dos elementos distintivos do noso concello, coma o mar, a pesca ou a olería. Os nenos e nenas que participarán na segunda quenda serán os encargados de rematar a proposta artística enchéndoa de cor. Pero para ver o resultado final haberá que agardar á finalización deste divertido e creativo taller o vindeiro 29 de agosto.

7Ago 2018

Susana Seivane, Os da Porfía, Luar na Lubre e Coanhadeira, catro grandes grupos para unha gran Festa Galega

CARTEL

Cada vez falta menos para un dos grandes acontecementos do verán, a nosa Festa Galega, que cumpre 11 anos e que volve acompañada dunha Feira Medieval Mariñeira para garantir a animación da mañá á noite. Catro grandes nomes da música tradicional galega pasarán polo escenario do porto entre os días 17 e 18 de agosto: Susana Seivane, Os da Porfía, Luar na Lubre e Coanhadeira. E non serán os únicos, porque, como é costume, na Festa Galega contamos coas agrupacións de música tradicional do noso concello e con bandas de gaitas locais e convidadas.

Se a Festa Galega acada xa a súa 11ª edición, a Feira Medieval Mariñeira cumpre 6 anos. Coa apertura dos postos de artesanía e gastronomía que se situarán ao longo da rúa Eduardo Vila Fano comezaremos a celebración a partir das 11.00 horas do día 17 de agosto. A música galega comezará a soar ás 22.00 horas coas Pandereteiras da A.C. Raigañas sobre o escenario do porto, ao que subirán ás 22.30 as Feiticeiras da A.C. Malante. Para as 23.00 horas está previsto o concerto de Susana Seivane, unha das nosas gaiteiras máis internacionais, que está a piques de lanzar o seu quinto disco, e para pechar a velada contaremos a partir das 00.15 horas con Os da Porfía, sete homes que despois de formar parte durante anos de distintas agrupacións decidiron iniciar un proxecto común interpretando temas recollidos por eles e cunha indumentaria que xa é un dos seus sinais de identidade.

O día 18 volverá a animación ás rúas de Malpica desde as 11.00 horas coas actividades da Feira Medieval Mariñeira. E tamén pola mañá, ás 12.00 horas, sairá do Centro Cívico o tradicional Desfile de Bandas de Gaitas da Asociación Cultural Malante, un encontro de música tradicional que cumpre seis anos e que xunta, á parte da entidade organizadora, ás bandas de gaitas de Calo (Teo), Ximiela (Louro-Muros) e Ortigueira. Para pechar a mañá do sábado está prevista unha xurelada tradicional coa colaboración da A.C.D. A Estádiga.

A música volverá pola noite ao porto. A segunda sesión nocturna da Festa Galega arrancará ás 22.30 horas coas Cantareiras Meigallo da A.C Carcaxía. Para as 23.00 horas está programado o concerto de Luar na Lubre, a banda celta máis internacional de Galicia, que leva máis de 30 anos sobre os escenarios e que continúa reinterpretando a nosa música tradicional. Pero o luxo do concerto do día 18 será dobre, porque para pechar a velada contaremos, a partir da 01.00, con Coanhadeira, unha banda ourensá de folk que desde o ano 2006 está dedicada a amosar a música conservada ata os nosos días a través da tradición oral. Os seus directos están cargados de forza, como poderemos comprobar en agosto.

E despois de dous días de música, o domingo 19 continuará a Feira Medieval Mariñeira con animación durante doce horas, de 11.00 a 23.00.

1Ago 2018

Nenos e nenas de 6 a 14 anos volven a “Pintar na rúa” para encher de cor o parque infantil da rúa Patria Galega

01082018 pintar_na_rua (4)

A quinta edición de Pintar na rúa xa está en marcha. Hoxe pola mañá preto de vinte nenos e nenas de idades comprendidas entre os 6 e os 14 anos puxéronse mans a obra para encher de vida e cor un dos muros do parque infantil situado na rúa Patria Galega (enriba do Mercado Municipal).  Desde hoxe e ata vindeiro día 14, os/as máis cativos/as volverán a ser os e as protagonistas e responsables do proxecto de rexeneración urbana, promovido pola Concellería de Educación, Cultura e Turismo para transformar diferentes espazos urbanos en enormes lenzos onde dar renda solta a súa creatividade.

Este ano, os/as alumnos/as deste obradoiro artístico estarán dirixidos/as pola artista carballesa Emi de las Heras, que xa ten participado en proxectos tan coñecidos coma Derrubando Muros con Pintura. Os e as  participantes están divididos en dous grupos en función das súas idades. Os nenos e nenas de 6 a 10 anos pintarán de luns a venres de 11.00 a 12.15 horas, e os de 11 a 14 anos, de 12.30 a 13.45 horas. Mentres que a primeira quenda xa está totalmente cuberta, para a segunda aínda queda unha praza dispoñible. Para anotarse abonda con dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104, en horario de 09.30 a 13.00. Finalmente, a actividade desenvolverase só do 1 ao 14 de agosto, quedando suspendido o obradoiro previsto do 16 ao 29.

01082018 pintar_na_rua (5)

A primeira xornada dedicárona a coñecer a temática do mural que comezarán a debuxar e pintar coas súas propias mans a vindeira semana. Polo de agora só vos podemos adiantar que se trata dunha creación moi colorista na que se recollen os elementos máis significativos do municipio, como son o mar, as redes e a Olería de Buño. Para ver o resultado final haberá que agardar ao remate deste divertido e creativo taller.

Malpica, que foi un concello pioneiro na Costa da Morte no tratamento artístico de espazos degradados en décadas pasadas, recuperou no verán do 2014 o proxecto “Pintar na Rúa” a través dun obradoiro que permitiu transformar o muro exterior do Centro Cívico nun enorme lenzo. A experiencia tivo tanto éxito que dende entón repetiuse cada verán en distintos espazos.

20Xul 2018

A Cocedura Tradicional no Forno do Forte cumpre 20 anos coa intención de obter a súa propia declaración de Festa de Interese Turístico

IMG-20170805-WA0046

No Forno do Forte de Buño xa está todo preparado para a Cocedura Tradicional, un proceso centenario de elaboración das pezas de barro recuperado fai agora vinte anos. Con motivo desta efeméride, desde a dirección do conxunto etnográfico e desde o Concello de Malpica estase a traballar para intentar conseguir a declaración de Festa de Interese Turístico, que se sumaría á que xa ten a Mostra da Olería.

A Cocedura Tradicional celebrarase hoxe sábado. Comezará ás 11.00 horas, coa carga do forno, que se prolongará durante toda a mañá. O prendido do forno será sobre as 17.00 horas, e xa a última hora da tarde, aproveitando a calor, celebrarase a Festa da Carroa, outra tradición que vai unida á cocedura tradicional e que introduce un elemento gastronómico na celebración. A descarga do forno será o domingo 22, a partir das 11.00 horas.

O alcalde de Malpica, Eduardo Parga, que participará, un ano máis, na carga do forno, destaca a importancia de reproducir unha parte tan importante do proceso de elaboración da olería como é a cocción tal e como se facía en Buño polo menos dende o século XVII. E como xa vén sendo habitual nestes vinte anos, o oleiro Antonio Manuel Pereira Rodríguez “O Rulo” será o encargado de dirixir ao equipo de traballo que durante estas dúas xornadas dará vida a unha das tradicións máis arraigadas da localidade.

Olas, canecos, pucheiros ou petos, porróns ou os ouriñais recuperados o ano pasado… Arredor de 2.000 pezas serán colocadas con sumo coidado no Forno do Forte o sábado pola mañá. Unha vez cargado o forno, a bóveda será tapada con “cachos”, que axudan a manter a calor. O prendido será ás 17.00 horas, e nese momento entrará en escena a muller dos fumes para alimentar o forno con toxo ata que acade a temperatura idónea, que se sitúa arredor dos 1.000 graos. E despois será a quenda dos atizadores, que terán a misión de manter a temperatura ata que remate a cocción, unhas catro horas despois. A a calor acumulada aproveitarase para asar o churrasco, que se servirá acompañado con pan e viño na Festa da Carroa, a partir das 21.30 horas. De feito, a cocedura nestes fornos comunitarios era, antigamente, unha festa.

As pezas que se descarguen o domingo do Forno do Forte serán identificadas cunha etiqueta na que se garante que foron elaboradas de xeito artesanal.

10Xul 2018

As nenas e os nenos de Malpica volven a “Pintar na rúa” para seguir enchendo de cor a nosa vila

pintar na rua 2018Ao longo do mes de agosto desenvolverase a quinta edición de Pintar na rúa, un proxecto de rexeneración urbana que ten a particularidade de que son os nenos e as nenas os que traballan, dirixidos por profesionais das artes plásticas. Este ano a monitora do obradoiro será a carballesa Emi de las Heras, que ten participado en proxectos coma Derrubando Muros con Pintura.

Malpica, que foi décadas atrás un concello pioneiro na Costa da Morte no tratamento artístico de espazos degradados en décadas pasadas, leva impulsando este tipo de obradoiros artísticos desde o verán do 2014, transformando diferentes espazos urbanos nun enorme lenzo no que os nenos e nenas deron renda solta á súa creatividade.

Este verán os participantes seguirán enchendo de cor os muros da vila divididos en dous grupos en función das súas idades. Os nenos e nenas de 6 10 anos pintarán de luns a venres de 11.00 a 12.15 horas, e os de 11 a 14 anos, de 12.30 a 13.45 horas. Ademais, e dado o éxito das anteriores convocatorias, para que poida participar o maior número de artistas posible, este ano haberá dúas quendas de Pintar na rúa, unha do 1 ao 14 de agosto e outra do 16 ao 29. O prazo de inscrición está aberto ata o día 30 deste mes. As familias que queiran máis información ou anotar aos seus fillos e fillas teñen que dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104, en horario de 09.30 a 13.00.

25Xuñ 2018

As Noites na Vila arrancarán o 13 de xullo para ofrecernos un verán repleto de música e teatro

O verán de Malpica chega cargado de propostas culturais. O 13 de xullo arrancarán as Noites na Vila para achegar a música e o teatro a todos os públicos e a diferentes recunchos. O paseo marítimo, a praza Anselmo Villar Amigo e o parque infantil serán os escenarios (en caso de choiva sumaráselles o Centro Cívico) dos espectáculos escénicos que nos propón a Concellería de Educación, Cultura e Turismo.

Dentro das Noites na Vila contaremos este ano cun novo ciclo musical Vai no mar, que se estenderá do 13 de xullo ao 10 de agosto cun total de 5 actuacións de grupos de Malpica e da zona. E o 28 de xullo comezará tamén unha nova edición do Retablo de Fantoches Rafael Dieste para conmemorar a estrea da obra La doncella guerrera, de Rafael Dieste, na nosa vila o 20 de outubro de 1933, no marco das Misións Pedagóxicas que levaron a cultura por todo o territorio español.
Aquí tes a programación ao detalle:

VAI NO MAR

  • Venres 13 de xullo – 22:30 -Praza Anselmo Villar Amigo: Traskiband.
  • Venres 20 de xullo – 22:30 h. – Paseo marítimo: Killer Cats.
  • Venres 27 de xullo – 22:30 h. – Paseo marítimo: The Cerne.
  • Venres 3 de agosto – 22:30 h. – Paseo marítimo: Versión Imposible
  • Venres 10 de agosto – 22:30 h. – Paseo marítimo: Strobos.

RETABLO DE FANTOCHES RAFAEL DIESTE

  • Sábado 28 de xullo – 19:30 h. – Parque infantil: O Paporubio. Urdime S.C.G. Público Preferente: Familiar. Duración: 150 minutos.
  • Sábado 4 de agosto – 20:30 h. – Paseo marítimo: Ghop de Teatro O Cubo. Público Preferente: Familiar. Duración: 50 minutos.
  • Sábado 11 de agosto – 20.30 h – Paseo marítimo: Bon appetit de Ghazafelhos Público Preferente: Familiar. Duración: 50 minutos.

CARTEIS NOITES NA VILA 2018

Página 5 de 11« Primera...34567...10...Última »