gl_ES
Tempo Malpica de Bergantiños
Domingo 16°
13°
Luns 15°
13°
Martes 16°
13°
tiempo.com   +info
  1.  
  2. Cultura

Cultura

28Mai 2018

O Certame de Poesía Erótica Illas Sisargas reivindica Malpica como lugar de referencia para a cultura galega

28052018 poesia_erotica (3)

O Certame de Poesía Erótica Illas Sisargas non só é único en Galicia, senón que co paso do tempo tense convertido nun premio de referencia. Tanto é así que, segundo anunciou o presidente da Asociación Cultural Caldeirón, Francisco Quiroga (Paco de Tano), na presentación desta 13ª edición, desde Allariz interesáronse este ano en reservarlle un espazo dentro do seu prestixioso Festival Internacional de Xardíns.

Caldeirón volve a contar unha vez máis coa colaboración do Concello e Malpica na organización do certame. “Despois de 13 anos vai a máis, o cal quere dicir que acertamos, e creo que está máis ca consolidado”, manifestou o alcalde, Eduardo Parga. Ademais de expresar o agradecemento do Concello a Caldeirón pola iniciativa, o alcalde convidou á participación e tivo palabras de lembranza para Paco Souto, que foi un dos principais impulsores do premio. “Hai unha persoa que nos falta, pero que segue estando con nós e hoxe estaría contento de ver que isto segue”, engadiu Eduardo Parga.

Pero o Certame de Poesía Erótica Illas Sisargas non é só un premio literario, senón que contribúe, en palabras de Paco de Tano, “a facer marca Malpica”. Con esa mesma intención, a Asociación Cultural Caldeirón volve a contar co apoio do Concello de Malpica, e neste caso tamén da Asociación Cultural Malante, para a organización doutro evento que tamén reivindica Malpica como lugar de referencia para a cultura galega: a I Feira do Libro de Poesía “Paco Souto”, que se celebrará do 1 de 3 de xuño no Mercado Municipal.

“É unha iniciativa que tiñamos pendente desde hai tempo, pero se hai vontade e o Concello colabora as cousas son máis sinxelas”, sinalou o presidente de Caldeirón. Neste caso, ademais, tamén se pretende dinamizar o Mercado Municipal e “darlle un pulo”, ademais de involucrar á hostalaría, porque “se a xente non vai á poesía, a poesía ten que ir á xente”, engadiu Paco de Tano.

Librerías e editoriais teñen expresado xa a súa intención de participar na iniciativa, que reunirá a nomes da cultura galega tan destacados coma Eduardo Estévez, Marta da Costa, Xurxo Souto, Rosalía Fernández Rial, Carlos Lourenzo ou Ricardo Seixo, a artistas plásticos e a entidades e persoeiros locais coma a Asociación Cultural Malante ou Andrés Mourente. “En Malpica poderiamos ser todos poetas, porque Malpica é unha poesía en si. Polo tanto, é normal facer unha feira da poesía e seguir facendo marca Malpica”, asegurou Paco e Tano.

Bases do Certame de Poesía Erótica e premiados
O prazo de participación no Certame de Poesía Erótica está aberto ata o 30 de setembro. Os interesados poden enviar as súas obras ao Concello de Malpica (Avda. Emilio González López, 1-15113 Malpica de Bergantiños), indicando no sobre “XIII Certame de Poesía Erótica Illas Sisargas”. O fallo farase público coincidindo coa Cea das Letras, en novembro, e na que tamén se fará a presentación pública da obra gañadora na pasada edición. O Concello de Malpica financia a edición da obra gañadora e o premio, dotado con 1.000 euros. Consulta as bases completas aquí: BASES XIII CERTAME DE POESIA EROTICA ILLAS SISARGAS 2018

Relación de gañadores das edicións anteriores:

  1. “Arredor do teu corpo”, Antonio García Teijeiro
  2. “Baile Átha Cliath”, Alberte Momán
  3. “Xoguetes póstumos”, Enma Pedreira
  4. “Rúa da cancela”, Eli Ríos e Eduardo Estévez
  5. “Amantes”, María Lado
  6. “Carnia Haikai”, Elvira Riveiro
  7. “Chamádeme Eva”, Mercedes Leobalde
  8. “Dominio público”, Ramón Neto
  9. “O episodio”, Verónica Martínez Delgado e Alberte Momán
  10. “A razón do perverso”, Mário J. Herrero Valeiro
  11. “O home invisíbel”, Xabier Queipo
  12. “Diáspora de amor balea”, Andrea Nunes Brións e María Rosendo
25Mai 2018

O Concello de Malpica conmemorará o 70º aniversario das dúas visitas ornitolóxicas de Francisco Bernis ás illas Sisargas

BERNIS NAS SISARGAS CARTEL

Nos meses de febreiro e xuño de 1948, o doutor en Zooloxía e fundador da Sociedade Española de Ornitoloxía SEO/BirdLife Francisco Bernis Madrazo realizou sendas visitas ornitolóxicas ao arquipélago das Sisargas. Tras ese traballo de campo, publicou dous artigos no Boletín de la Real Sociedad Español de Historia Natural que son considerados estudos ornitolóxicos pioneiros sobre estas illas. Agora, dentro da colección Costa da Morte de Edicións Embora, o divulgador ambiental Antonio Sandoval e o divulgador cultural Xosé Manuel Varela rescatan nun libro pensado para público xeral ambos textos acompañados dun manuscrito coas notas de campo nas Sisargas do propio Francisco Bernis.

Pero a reedición do libro non será a única actividade de homenaxe nesta data cando xusto se cumpren xusto 70 anos desas dúas visitas de Bernis ás Sisargas. Así, o Concello de Malpica de Bergantiños organizou para o domingo 3 de xuño uns actos conmemorativos para un persoeiro que colocou nun lugar importante a Malpica de Bergantiños dentro do mapa da ornitoloxía española.

A xornada abrirase de mañá cun percorrido turístico na que participarán as dúas fillas de Francisco Bernis, Carmen e Cristina Bernis Carro, acompañadas de Eduardo Parga, Antonio Sandoval e Xosé Manuel Varela. Nel visitarán a vila oleira de Buño, a contorna do faro Nariga e rematarán na cabo Santo Hadrián para contemplar de primeira man as Sisargas como espazo de traballo de seu pai.

Ás cinco da tarde, no salón de actos da Casa do Pescador desenvolverase o principal acto institucional de conmemoración deste «70 aniversario de Francisco Bernis nas Sisargas». Iniciarase coa presentación do libro «Francisco Bernis, Las islas Sisargas en 1948. Dos visitas ornitológicas». Na mesa de presentación, presidida polo alcalde de Malpica de Bergantiños, Eduardo Parga Veiga, participarán os editores do libro, Xosé Manuel Varela Varela e Antonio Sandoval Rey; Ramón Martí Montes, director de desarrollo institucional da Sociedad Española de Ornitología SEO/BirdLife; Álvaro Barros López, vogal da Sociedade Galega de Ornitoloxía; e Carmen e Cristina Bernis Carro.

Os actos pecharanse coa entrega de agasallos institucionais conmemorativos deste aniversario á familia de Bernis de man do máximo mandatario malpicán, Eduardo Parga Veiga.

18Abr 2018

Susana Seivane e Luar na Lubre serán os pratos fortes da XI Festa Galega, que se celebrará os días 17 e 18 de agosto

LNL XXX ANIV CARTEL

Luar na Lubre

Este verán a música tradicional galega volverá a inundar as rúas de Malpica con motivo da celebración da XI Festa Galega, que terá lugar os días 17 e 18 de agosto. E este ano farao cun cartel de luxo encabezado por dous dos máximos expoñentes do folclore galego de sona internacional, como vén de confirmar a Concellería de Cultura, que xa se atopa inmersa na organización do festival. A gaiteira Susana Seivane e a célebre banda Luar na Lubre, dúas iconas do panorama actual, serán os pratos fortes dunha edición na que tamén se darán cita algunhas das mellores voces da música folk da Costa da Morte.

Susana nueva

Susana Seivane

Os asistentes á Festa Galega deste ano terán a oportunidade de gozar e bailar ao son dos mellores. E non é unha frase feita, porque o vindeiro mes de agosto pasarán pola localidade dous referentes do folk en Galicia con maior proxección fóra das nosas fronteiras. O venres 17, Susana Seivane, herdeira dunha das máis prestixiosas familias de gaiteiros e artesáns galegos, será a primeira en subirse ao escenario para ofrecer un xenuíno concerto no que fusionará o estilo máis enxebre da gaita coa influencia de novas tendencias musicais nun espectáculo cheo de frescura e orixinalidade. Ao día seguinte, o sábado 18, será a quenda da mítica formación galega Luar na Lubre. Con máis de 30 anos de traxectoria, 17 discos editados e 300.000 copias vendidas, o célebre grupo de música celta protagonizará unha auténtica viaxe ás súas orixes para sorprendernos co seu último traballo recompilatorio, co que está a colleitar grandes éxitos.

O departamento de Cultura, que dirixe Noelia Freijeiro, segue a traballar na elaboración do programa da XI Festa Galega para converter a Malpica no epicentro da música folk durante toda unha fin de semana.

25Xan 2018

Mikaela, Madamitos, Faustino, Farruco, bailes, concursos, doces e unha chea de propostas máis para vivir o Entroido

O Entroido é unha das festas grandes do noso concello, e por iso tanto o Departamento de Cultura como o tecido asociativo e a hostalaría traballamos man a man para ofrecervos o mellor programa posible. Así, un ano máis presentamos un Entroido cheo de propostas para todos os públicos que nos converterán nunha das referencias das celebracións en toda Galicia.

IMG-20160208-WA0002

Comezaremos o venres 9 co pasarrúas do alumnado do CEIP Milladoiro a partir das 10.30 horas e o concurso de disfraces que se celebrará a partir das 24.00 horas polos pubs da vila, que un ano máis terán preparadas cestas de lacóns e chourizos para os mellores. E remataremos o día 18, despois de moitos días de troula coa Mikaela, os Madamitos e Ghuardineros, o Faustino, o Farruco, os concursos, os doces, as festas infantís, os bailes e tamén os cocidos.

Para que todo isto sexa posible contamos coa implicación dos pubs Jofra, Submarino, Brebaxe, O Patio, Prisma e Don Paco, así como de todas estas entidades: Asociación Cultural Malante, ANPA Ventorrillo, ANPA do CEIP Joaquín Rodríguez Otero de Buño, Asociación de Redeiras Mar da Illa, Asociación Cultural Carcaxía, A.C.D. San Xulián, A.V. C. S. O Brizo, Asociación Cultural Raigañas, Asociación de Amigos da Mikaela, A. VV. De Leiloio e Asociación de Amas de Casa.

A continuación detallamos o programa de actividades:

Venres de Entroido, 9 de febreiro

En Malpica

  • Pasarrúas do CEIP MILLADOIRO, a partir das 10.30 h.
  • Concurso de Disfraces de Entroido, a partir das 24.00 horas polos pubs da vila. Cestas de lacóns e chourizos para os mellores disfraces. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan os pubs: Jofra, Submarino, Brebaxe, O Patio, Prisma e Don Paco.

Sábado de Entroido, 10 de febreiro

En Seaia

  • Festa de Disfraces Infantil con inchable e merenda saudable con doces de entroido sen gluten, a partir das 16.30 h. na Casa da Cultura de Seaia. Colabora: A. C. Carcaxía.

En Leiloio

  • Festa infantil con inchables a partir das 17.00 h. na Casa dos Veciños de Leiloio. Colabora: Asociación de Veciños de Leiloio.
  • Desfile de disfraces infantil e de adultos a partir das 20.30 h. seguido do Concurso de Doces para rematar con actuación dun Dj.  Organiza: Asociación  de Veciños de Leiloio.

En Malpica

  • Concurso de Disfraces de Entroido, a partir das 24.00 horas polos pubs da vila. Premios en metálico para os mellores disfraces: 1º Premio 250,00 €, 2º Premio 150,00 € e 3º Premio 100,00 €. As persoas participantes deberán percorrer todos os locais organizadores onde se puntuará cada disfraz. Gañarán os/as que acaden maior puntuación. Organizan Pubs: Jofra, Submarino, Brebaxe, O Patio, Prisma e Don Paco.

IMG-20170226-WA0032

Domingo de Entroido, 11 de febreiro

En Malpica

  • Desfile de Disfraces Infantil, Percorrerá a vila saíndo do Centro Cívico ás 17.30 h. e rematando na Praza Villar Amigo. Organiza: Asociación Cultural Malante.
  • Actuación da Charanga NBA polas rúas da vila, a partir das 17.30 horas.
  • Nos pubs da Vila, daranse Doces de Entroido a partir das 17.00 h. Organizan pubs: Jofra, Submarino, Brebaxe, O Patio, Prisma e Don Paco.
  • Concurso de Comparsas do Entroido polas principais rúas da vila de Malpica a partir das 17.30 horas. Cestas de Entroido para as mellores comparsas. Entrega de premios a partir das 19.00 horas na Praza Villar Amigo.
  • Concurso de piñatas do Entroido na Praza Villar Amigo a partir das 18.00 horas. Entrega de premios ás 19.30 horas. Colaboran: A. C. Malante e C. Carcaxía.
  • Baile Social de Disfraces de Maiores e Concurso de disfraces para maiores das 20.00 h. ás 23.00 h no Auditorio do Centro Cívico amenizado polo Duo D´Café.

Luns de Entroido, 12 de febreiro

En Buño

  • Festa de Disfraces Infantil con inchables, chocolatada e degustación de doces de Entroido das 16.30 h. ás 19.30 h. no Pavillón Polideportivo do CEIP Joaquín Rodríguez Otero. Colabora: ANPA do CEIP Joaquín Rodríguez Otero.
  • Concurso de Disfraces Infantil ás 19.30 h. no Pavillón Polideportivo do CEIP Joaquín Rodríguez Otero. Premios ós mellores disfraces. Organiza: ANPA do CEIP Joaquín Rodríguez Otero.

Martes de Entroido, 13 de febreiro

En Malpica

  • Festa de Disfraces Infantil con inchables (rapaces/as ata 14 anos), no Pavillón Polideportivo de Malpica das 17.00 ás 20.00 horas. Colabora: ANPA Ventorrillo.
  • Concurso Gastronómico de Doces do Entroido, a partir das 15.30 h., no Pavillón Polideportivo de Malpica. Fallo do xurado e degustación ás 19.00 horas. Colaboran: Asoc. de Redeiras Mar da Illa, Asoc. de Amas de Casa e ANPA Ventorrillo.

Inscrición: No Departamento de Educación e Cultura ou en calquera das entidades colaboradoras.

MAR CASAL 1

Sábado de Piñata, 17 de febreiro

En Buño

  • A partir das 13.00 h. Sesión Vermú da Mikaela a cargo da Orquestra JERUSALÉN. Con pulpería e churrasquería no campo da festa.
  • A partir das 14.00 h. Degustación de cocido en todos os Restaurantes de Buño.
  • A partir das 17.00 h. Mikaeliña Infantil con inchables e chocolatada para os máis novos.
  • A Mikaela sairá ás 16.30 horas do Restaurante Canta la Rana percorrendo todos os bares e tabernas de Buño. Ás 22.30 h. queima da Mikaela e a partir das 23.00 h. actuación da Orquestra JERUSALËN e ó remate de festa con Disco Mobil, no aparcamento do Restaurante Casa Elias. Organiza: Asociación de Amigos da Mikaela.

Domingo de Piñata, 18 de ebrero

En Cerqueda

  • Percorrido dos Madamitos e Ghuardineros pola parroquia acompañados por unha comitiva de Entroido. Saída ás 15.00 h. itinerario: Os Resios, O Ceán, FIlgueira, As Cortes, Cerqueda, Leduzo e as Pozacas. Organizan: A.C. Raigañas.

En Vilanova

  • Festa de Disfraces Infantil e degustación de doces do Entroido a partir das 16.30 h. na Escola Unitaria de Beo. Colabora: A.V.C. S. O Brizo.

En Seaia

  • Cocido do Farruco e Faustino, para todos/as os/as participantes no Enterro do Farruco e o Faustino imprescindible asistir disfrazado. No Restaurante O Esqueiro a partir das 15.00 h. Inscricións no propio restaurante ou no Super MM até o xoves 15 de febreiro. Prezo: 15.00 € adultos e 10 euros os nenos. Organiza: A.C.D. San Xulian.
  • Actuación da Charanga MEKANIKA polas rúas de Seaia, a partir das 16.30 horas.
  • Enterro do Farruco, sairá en procesión ás 16.30 horas do Restaurante O Esqueiro percorrendo as rúas de Seaia. Xuntarase co seu curmán o Faustino no Centro Cívico e o acompañará ata o porto. Organiza: A.C.D. San Xulián.

En Malpica

  • Actuación da Charanga MEKANIKA polas rúas da vila, a partir das 17.30 horas.
  • Enterro do Faustino, que sairá do Centro Cívico ás 17.30 horas para percorrer as rúas da vila. Organiza: Asociación de Redeiras Mar da Ila.

Sábado 24 de febrero

En Cerqueda

Cocido de Entroido, no Restaurante Cantalarrana ás 22.00 h. Prezo: 20,00 € socios, 25,00 € non socios e 15,00 € nenos/as menores de 12 anos. Inscricións antes do mércores día 15 no Malpica Cen, no Centro Sociocultural das Pozacas (só os sábados) e nos teléfonos: 608 669201, 634 723 139, 638 673 057 e 698 173 659. Organiza: A. C. Raigañas.

29Dec 2017

Renovado o convenio anual entre a Deputación da Coruña e o Concello de Malpica para a xestión do Forno do Forte

convenio forno do forte

O alcalde de Malpica, Eduardo Parga, e o deputado provincial de Contratación, Patrimonio e Equipamento, Xesús Soto, asinaron o convenio de colaboración anual para a xestión do Forno do Forte de Buño. A Deputación da Coruña achegará no 2018 o 100% dos gastos para o funcionamento do complexo etnográfico, que xestionará integramente o Concello de Malpica.

Segundo figura no convenio, o Concello encargaranse do mantemento e dinamización do centro, a compilación de patrimonio etnográfico da zona, o fomento do estudo e a investigación ou a promoción de actividades culturais arredor do mundo da olería. Establécese un horario mínimo de atención ao público de 11 a 14 horas e de 16 a 19 horas de martes a domingo.

Nas instalacións do ecomuseo do Forno do Forte de Buño o propio espazo expositivo recupera e conserva os elementos arquitectónicos propios dunha casa dedicada á olería de Buño. As persoas visitantes achéganse no ecomuseo a todo o proceso de produción de pezas, desde o torneado ao cocido ou o secado, nun centro que contribúe a conservar e poñer en valor a cultura popular e é tamén un recurso turístico da comarca.

23Dec 2017

Dezasete entidades colaboran para encher de actividade para todos os públicos o Nadal de Malpica

O Concurso Escolar de Debuxo e Pintura foi a primeira actividade do Malpica Nadal, un programa cultural impulsado desde a Concellería de Educación, Cultura e Turismo coa colaboración de 17 entidades de todo tipo. As asociacións Malante, Raigañas, Carcaxía, San Xulián, Pobo Alfareiro, Viradeira de Buño, A Feira, O Brizo, Río de San Antonio, Leiloio, Amigos da Mikaela, as ANPA dos colexios Milladoiro e Joaquín Rodríguez Otero, os propios colexios, o CRA Nosa Señora do Faro e A Galiña Azul de Aldeola xuntan esforzos para encher de actividade todo o mes de decembro e os primeiros días do ano 2018.

arbore nadal (5)

As xornadas previas ás vacacións escolares estiveron centradas na elaboración dos adornos que decoran xa a árbore de Nadal xunto á Casa do Concello. Papá Noel visitou xa o 17 de decembro a Casa dos Veciños de Leiloio, mentres que o alumnado do CEIP Milladoiro recibiu o día 20 unha visita anticipada dos Reis Magos e O Apalpador estivo este sábado na Casa da Cultura de Seaia, onde ademais actuou o mago Álex e houbo unha festa infantil con inchables.

O día de Noiteboa terá dúas citas principais: ás 18 horas, cos pasarrúas de panxoliñas das cantareiras de Malante polas rúas de Malpica, e ás 18.30 coa entrega de agasallos aos nenos e nenas na Fonte da Praza de Anselmo Villar Amigo. O día de Nadal non haberá actividade, pero o 26 volverá a animación cunha festa infantil con chocolatada incluída no pavillón do colexio de Buño. O mércores 27 repetirase a festa no pavillón de Malpica; o 29, no centro sociocultural das Pozacas, e o 30, nas escolas de Pontella.

Para Fin de Ano repetimos a San Silvestre Malpicana, con saída ás 12 horas da praza e festa con brinde incluído ao rematar. E pola noite, teremos o tradicional baile organizado pola Concellería de Servizos Sociais a partir das 23.45 horas, con uvas, cava, cotillón e a música do Dúo Café no auditorio do Centro Cívico.

O prato forte do Malpica Nadal serán as cabalgatas de Reis, que se celebrarán os días 5 e 6. A véspera do día de Reis os Magos de Oriente farán tres rutas: unha por Cambre, Buño, Cerqueda e Malpica; outra por Mens, Barizo, Seaia e Vilanova, e a terceira por Leiloio. O sábado tocaralles visita a Seaia, onde tamén haberá inchables pola tarde no campo da festa.

Concurso de debuxo e pintura

IMG_4100

Elena Blanco Barca, alumna de 6º de infantil do CEIP Joaquín Rodríguez Otero, foi este ano a gañadora do premio de cartel, mentres que Candela Lema Chouciño (na foto, xunto ao alcalde), de 5º de infantil do CRA Nosa Señora do Faro, acadou o premio de pantalla dixital. O alcalde, Eduardo Parga Veiga, levoulles os seus agasallos aos coles. O terceiro galardoado foi Tristan Schurink Novo, alumno de 5º de primaria do CEIP Milladoiro e gañador do concurso de saúda de Nadal. Parabéns a todos/as os/as participantes, porque foi moi difícil escoller!

 

CARTEL NADAL DEC 17

8Dec 2017

“O tolleito de Inishman” foi a obra mellor valorada polo público da XIII Mostra de Teatro de Malpica

O tolleito de Inishman, cunha puntuación de 4,97 sobre 5, foi a obra mellor valorada polo público da XIII Mostra de Teatro de Malpica. A montaxe de Contraproducións, dirixida por Cándido Pazó e interpretada por Evaristo Calvo, Ana Santos, Ricardo de Barreiro, María Roja, Luis Iglesias, Santi Romay, Marcos Pereiro e Susana Dans, colleitou na nosa vila un novo recoñecemento, que se suma aos cinco premios María Casares acadados este ano.

O tolleito de Inishman

Cándido Pazó subiu ao escenario para dedicarlle a representación a Paco Souto

Contraproducións arrebátalle deste xeito o título a Malasobra, que fora a compañía gañadora da valoración do público nos anos 2014, 2015 e 2016, e que nesta ocasión quedou no cuarto posto. Con 185 espectadores, a proposta de Contraproducións foi tamén unha das que máis público atraeu ata o auditorio do Centro Cívico, e ademais estivo cargada de emoción porque Cándido Pazó subiu ao escenario antes de que comezase a función para dedicarlle a representación a Paco Souto.

En total, os nove espectáculos programados pola Concellería de Educación, Cultura e Turismo reuniron a 1.093 persoas. As obras infantís volveron a triunfar, e, de feito, A tropa trapalleira de Bocaberta, con 195 persoas, foi a que levantou máis expectación. Do mesmo xeito que a afluencia foi boa, cunha media de 121 espectadores/as por función, tamén foi moi alta a puntuación acadada polas compañías participantes, cunha media de 4,55 sobre 5, o cal demostra a boa acollida que ten o teatro galego.

Ademais de Contraproducións, que fixo dobrete con Memorias dun neno labrego, e Bocaberta, pola XIII Mostra de Teatro de Malpica pasaron Volta e Dálle con Dura Lex, Malasombra con Os Rockenstein, Ibuprofeno Teatro con O furancho (segunda coa mellor valoración do público), A Panadaría con Pan! Pan!, Rimavane con Vestido de voda (terceira na votación) e Talía Teatro con Foucellas.

5Nov 2017

Andrea Nunes Brións e María Rosendo asinan a obra gañadora do XII Certame de Poesía Erótica Illas Sisargas

cea das letras (1)

Por terceira vez na historia do Certame de Poesía Erótica Illas Sisargas gaña unha obra a dúas voces, pero por primeira vez trátase de dúas voces femininas: as de Andrea Nunes Brións (Marín, 1984) e María Rosendo (Vigo, 1984).  O xurado considerou que a súa Diáspora de amor balea era merecedora do premio, dotado con 1.000 euros e a publicación do libro, “pola riqueza e fondura da súa expresión metafórica, que permite construír un libro de poesía amorosa cunha marcada e explícita vontade erótica”. Tal como recolle o fallo, que se fixo público esta noite na xa tradicional Cea das Letras, “trátase dun espistolario a dúas voces nas que a forza do erotismo está na distancia física entre as voces. É un erotismo imaxinado, cálido, tenro, construído desde a memoria dos corpos e, á vez, na fertilidade da imaxinación. As dúas voces que falan no libro flutúan entre a mímese e a diferenza e dialogan a cada poema con fluidez e personalidade”.

Andrea Nunes é licenciada en filoloxía hispánica pola USC. É unha das autoras máis recoñecidas das novas xeracións da poesía galega. Publicou Corrente do esquecemento (2007) e Todas as mulleres que fun (2011), ademais de diversas obras colectivas das que destaca a recente “13 antoloxía da poesía galega próxima”, publicada por Chan da Pólvora e coordinada por Chus Nogueira. Andrea Nunes, que desde hai algúns anos vive en Nanjing (China), onde traballa como profesora de español, é tamén unha coñecida activista política e feminista.

María Rosendo, pola súa banda, realizou estudos de filoloxía inglesa e educación social. No ano 2010 obtivo o Premio Pérez Parallé co libro Nómade.

Co fallo feito público hoxe, a listaxe das obras gañadoras do Certame de Poesía Erótica Illas Sisargas é a seguinte:

  1. “Arredor do teu corpo”, Antonio García Teijeiro
  2. “Baile Átha Cliath”, Alberte Momán
  3. “Xoguetes póstumos”, Enma Pedreira
  4. “Rúa da cancela”, Eli Ríos e Eduardo Estévez
  5. “Amantes”, María Lado
  6. “Carnia Haikai”, Elvira Riveiro
  7. “Chamádeme Eva”, Mercedes Leobalde
  8. “Dominio público”, Ramón Neto
  9. “O episodio”, Verónica Martínez Delgado e Alberte Momán
  10. “A razón do perverso”, Mário J. Herrero Valeiro
  11. “O home invisíbel”, Xavier Queipo
  12. “Diáspora de amor balea”, Andrea Nunes Brións e María Rosendo

Na Cea das Letras, que este ano tivo como escenario a Casa da Cultura de Seaia, tamén se fixo entrega do premio correspondente á edición anterior a Xavier Queipo, nun acto presidido polo alcalde de Malpica, Eduardo Parga, e o presidente da Asociación Cultural Caldeirón, Paco de Tano, e no que estivo moi presente a memoria do que foi secretario da entidade, Paco Souto. Todos os asistentes foron agasallados con cadanseu exemplar de O home invisíbel, un novo título para a colección Caldeirón, e tiveron a ocasión de coñecer en primicia un dos poemas da Diáspora de amor balea recitado por unha das súas autoras, María Rosendo.

25Out 2017

O Certame de Poesía Erótica Illas Sisargas lembra a Paco Souto cunha semana de actividades arredor da súa figura

cartel erotico 2017 TRAZADOO mundo da cultura galega comeza a escribir as “Novas crónicas de Malpica” a través dun programa de actos que terán como eixo fundamental a figura do finado Paco Souto. Creadores das máis diversas disciplinas daranse cita na nosa vila entre o 31 deste mes e o 5 de novembro para lembrar, coincidindo coa entrega do premio do Certame de Poesía Erótica Illas Sisargas, a quen foi o seu principal impulsor.

Esta nova iniciativa da Asociación Cultural Caldeirón conta co apoio do Concello de Malpica, Tingalaranga, Confraría de Pescadores e Asociación Cultural Malante, e co patrocinio de Viños Tano, Carnicería Moncho e Forno Novo Panadería. Entre todas e todos, e coa colaboración de numerosas persoas do mundo da cultura, vaise desenvolver un programa de actividades para todos os públicos que trata de facer honor a unha das máximas de Paco Souto: “A vida sen paixón só é un trámite”.

Con toda a paixón, arrancaremos o martes 31 no CEIP Milladoiro con “Poemar o mar”, unha iniciativa de promoción da poesía dentro da escola baseada dun dos elementos aos que tantos versos dedicou o propio Paco Souto. E desde o 1 ata o 5 de novembro desenvolveranse todo tipo de propostas, que podedes consultar no folleto adxunto, en diversos escenarios. O Centro Cívico de Malpica, a Casa do Pescador, locais de hostalaría, a Casa da cultura de Seaia e tamén as rúas acollerán as actividades.

Ademais, o sábado 4 farase público o fallo do xurado do Certame de Poesía Erótica Illas Sisargas, coincidindo cunha Cea das Letras tamén moi especial. No acto do día 4 tamén se realizará a presentación de “O home invisíbel”, a obra gañadora do ano pasado, da autoría de Xabier Queipo.

programa reverso 2017

17Out 2017

Malpica lembra, 84 anos despois, a primeira representación de monicreques das Misións Pedagóxicas

O 20 de outubro de 1933, no marco das Misións Pedagóxicas, estreábase en Malpica o Retablo de Fantoches. José Val del Omar, Ramón Naya, Fernández Mazas, Miguel Prieto e Urbano Lugrís, xunto a Rafael Dieste, iniciaban na nosa vila as representacións de monicreques que as Misións Pedagóxicas levarían por todo o país. En lembranza daquel titánico esforzo por achegar a cultura a todos os recunchos do Estado español, no 22 de outubro de 2017, queremos levar ó mesmo espazo que se usara no ano 33 unha representación de monicreques.

Deste xeito, as Misións Pedagóxicas regresan a Malpica 84 anos cunha xornada festiva e cultural na que lembraremos aquela data histórica. Coa colaboración da Asociación Cultural Malante, a Asociación de Veciños San Antonio y A Tropa dos Pardo, ás 17 horas empezará a celebración cun pasarrúas da A.C. Malante pola praza de Anselmo Villar Amigo e a rúa Eduardo Vila Fano. A continuación volverán os monicreques. Titereficcións presentaranos “Cantos contos contas”, un espectáculo teatral e musical na que dous viaxeiros que coinciden nunha estación de tren compartirán, mentres agardan, algúns dos contos que marcaron as súas vidas.

O acto central comezará ás 19 horas na praza. Un magosto popular encherá de animación a vila. Haberá castañas, viño, licor café e chocolate, e cuncas a 2 euros coas que se poderá recuncar tantas veces como se queira. E como en toda boa festa debe haber música, as cantareiras e os gaiteiros de Malante e A Tropa dos Pardo encargaranse de que non falte.

Este ano, como novidade, tamén organizamos un concurso de disfraces de época no que haberá premios á mellor caracterización (anos 1920-1930). Teremos dúas categorías: infantil (ata 12 anos) e absoluta (sen límite de idade), e un xurado popular encargarase de decidir os premios, que consistirán en trofeos e cestas.

Exposición
Aínda que o prato forte será o 22, desde onte pode visitarse tamén na aula circular do Fondo Lugrís (Centro Cívico) unha exposición de fotografías da representación do ano 1933. Así mesmo, todos/as os/as veciños/as que dispoñan de fotografías das actividades das Misións Pedagóxicas no ano 1933 en Malpica poden achegalas ao Departamento de Educación e Cultura para proceder á súa dixitalización e incorporalas á Mostra Fotográfica “As Misións Pedagóxicas en Malpica”. Todas as persoas que acheguen fotografías recibirán un CD con fotografías do conxunto da exposición.

CARTEL

 

Página 4 de 9« Primera...23456...Última »