gl_ES
Tempo Malpica de Bergantiños
Xoves 14°
Venres 15°
11°
Sábado 14°
12°
tiempo.com   +info
  1.  
  2. Cultura

Cultura

6Xuñ 2019

Case 200 persoas participaron no Ecomuseo do Forno do Forte nas actividades da campaña “Hola cerámica”

hola ceramica 2

Un total de 194 persoas participaron a fin de semana pasada nas actividades incluídas na campaña ¡Hola cerámica!, unha iniciativa que se desenvolveu nos concellos adheridos á Asociación Española de Cidades da Cerámica (AECC) coa finalidade achegar a cerámica a un público cada vez máis amplo.

Visitas guiadas, demostracións do oleiro no torno e obradoiros infantís centraron a atención do público que se achegou ata o Ecomuseo do Forno do Forte, e que realizou unha valoración moi positiva da experiencia.

31Mai 2019

O Certame de Poesía Erótica Illas Sisargas cumpre 14 anos como único do seu xénero en España

IMG_0044

Eduardo Parga e Paco de Tano presentaron o certame

O Certame de Poesía Erótica Illas Sisargas é único e quere seguir séndoo. “Hai moitos concellos e entidades que convocan certames de poesía, pero o noso é único en España”, apuntou o presidente da Asociación Cultural Caldeirón, Francisco Quiroga “Paco de Tano”, na presentación da 14ª edición. No acto estivo acompañado polo alcalde, Eduardo Parga, ao que agradeceu o apoio do Concello de Malpica ano tras ano e a implicación persoal do alcalde.

Caldeirón volve a contar unha vez máis coa colaboración do Concello de Malpica na organización do certame, que nas últimas edicións xa se move arredor das 20 obras a concurso. O prazo para participar nesta edición xa está aberto. Os/as autores/as interesados/as poden enviar os seus orixinais ata o 30 de setembro, este ano coa novidade de que deberán facelo en formato pdf e vía correo electrónico, ao enderezo premio@caldeiron.org.

O Concello de Malpica financia a edición da obra gañadora e o premio, dotado con 1.000 euros.

Relación de gañadores das edicións anteriores:

  1. “Arredor do teu corpo”, Antonio García Teijeiro
  2. “Baile Átha Cliath”, Alberte Momán
  3. “Xoguetes póstumos”, Enma Pedreira
  4. “Rúa da cancela”, Eli Ríos e Eduardo Estévez
  5. “Amantes”, María Lado
  6. “Carnia Haikai”, Elvira Riveiro
  7. “Chamádeme Eva”, Mercedes Leobalde
  8. “Dominio público”, Ramón Neto
  9. “O episodio”, Verónica Martínez Delgado e Alberte Momán
  10. “A razón do perverso”, Mário J. Herrero Valeiro
  11. “O home invisíbel”, Xabier Queipo
  12. “Diáspora de amor balea”, Andrea Nunes Brións e María Rosendo
  13. “Marco Livornio”, Mario Regueira

Descarga as bases aquí bases premio illas sisargas 2019 (2 pax)

29Mai 2019

O Ecomuseo Forno do Forte participa esta fin de semana nunha campaña de promoción da olería de ámbito internacional

hola ceramica

O Ecomuseo Forno do Forte participa na campaña ¡Hola cerámica!, unha iniciativa que se desenvolve nos concellos adheridos á Asociación Española de Cidades da Cerámica (AECC) e que ten como finalidade achegar a cerámica a un público cada vez máis amplo. A iniciativa, de ámbito internacional, naceu en Italia no ano 2015, e dende entón vai a máis en cada edición.

Rutas, xornadas de portas abertas, talleres, demostracións no torno, exposicións, xogos tradicionais, charlas, masterclasses e visitas guiadas son algunhas das actividades que se desenvolverán os días 31 de maio e 1 e 2 de xuño nas dez localidades de toda España, na súa maior parte de Cataluña e a zona de Levante, que participan na experiencia. Buño será a única representante galega.

A proposta do Ecomuseo Forno do Forte inclúe tres actividades:

  • Vive a olería. Visitas guiadas ao Ecomuseo Forno do Forte, onde o público pode ver a tecnoloxía e o modo de vida tradicional dos oleiros. O conxunto etnográfico está formado polas antigas casas-talleres, forno, cabanote e cabazo, e ademais amosa unha ampla colección de pezas históricas e tradicionais, xunto co traballo dun oleiro en vivo.
  • Olería en vivo. Demostracións do oleiro no torno.
  • Elabora a túa cunca. Os visitantes maiores de 12 anos poderán sentar ao torno e aprender a elaborar unha peza sinxela coa axuda do oleiro do ecomuseo.

As tres actividades son gratuítas e desenvolveranse o venres e o sábado de 11.00 a 14.00 e de 16.00 a 19.00 horas, e o domingo, de 10.00 a 14.00 horas.

27Abr 2019

Leilía, De Vacas, Xosé Lois Romero & Aliboria e Os do fondo da barra serán os pratos fortes da XII Festa Galega de Malpica

Este verán a música galega volverá a inundar as rúas de Malpica con motivo da celebración da XII Festa Galega, que terá lugar os días 16 e 17 de agosto. E este ano volveremos a ter cartel de luxo, xa que nos acompañarán Leilía, De Vacas, Xosé Lois Romero & Aliboria ou Os do fondo da barra. Pero, a maiores destas primeiras confirmacións, a Concellería de Cultura, que dirixe Noelia Freijeiro, segue a traballar para converter a Malpica no epicentro da música folk durante toda unha fin de semana.

leilia

Leilía

Leilía nace no ano 1989 cando seis mulleres se xuntan para recuperaren do esquecemento a tradición oral galega. Ao son de pandeiretas e voces, pronto van agromando os froitos. A mediados dos 90 chega o louvado Leilía, composto exclusivamente por pezas tradicionais. O seguinte reto foi achegar a música do pasado ao presente, por medio da incorporación de instrumentos e polifonías non tradicionais, e así o fixeron nos seus seguintes traballos, dos que nos ofrecerán unha escolma o venres 16 de agosto.
O sábado 17 celebraranse os outros tres concertos, nos que reuniremos estilos moi diferentes da música galega de hoxe e de sempre. Dende Os do fondo da barra, o grupo de pandereteiros de Xacarandaina, ata Xosé Lois Romero & Aliboria ou De Vacas.

Premios La Opinion

Aliboria

Aliboria é un colectivo de novos músicos galegos, dirixidos por Xosé Lois Romero, que reinventan os cantos e os ritmos enxebres de Galicia conxuntando as potentes voces das súas cantantes cuns novos arranxos para percusión tradicional cheos de forza, raza e terra. Bombos, pandeiros, pandeiras, tixolas, tarrañolas, cunchas, pandeiretas, latas, tambores, sachos, perfectamente conxunguidos cos cantos, os aturuxos, os bailes e a diversión.

DE VACAS

De Vacas

De Vacas é un cuarteto composto por tres voces, as de Inés Salvado, Faia Díaz e Paula Romero, sempre acompañadas pola guitarra de Guillerme Fernández, que fai versións de temas de masas de todas as épocas, dende as Spice Girls ata o Gagnam Style. Algunhas, coma “Amodiño” ou o recentísimo “El anillo pa cuando”, arrasan.

24Abr 2019

Hostalaría local e Concello impulsan a Ruta de Tapas Malpica Sabe a Mar con dúas edicións en maio e setembro

A Ruta de Tapas Malpica Sabe a Mar cumpre catro anos e, por iniciativa do sector hostaleiro, neste 2019 vanse celebrar dúas edicións nos meses de maio e setembro. Unha vez máis, a Concellería de Promoción Económica e a hostalaría malpicá unen esforzos para desenvolver unha iniciativa conxunta que enlaza tres sectores fundamentais da economía local: o turismo, a pesca e a olería.

Malpica Sabe a Mar pretende diferenciarse doutras iniciativas semellantes incluíndo os produtos pesqueiros como ingrediente de todas as tapas, o que permite, por unha banda, poñer en valor o produto local e o sector pesqueiro, e, por outra, fomentar a innovación e a creatividade na elaboración de produtos de consumo tradicional. O terceiro elemento que incluiría a ruta sería a olería, xa que para a ocasión elaboraranse no Ecomuseo do Forno do Forte pratos artesanais que se repartirán entre os oito establecementos participantes: Taberna do Lesto, Restaurante O Burato, Café Bar Ybarra, Café Bar JB, Restaurante San Francisco, Larada Bar, Bar O Pescador e Bar Santiago Apóstol.

A primeira Ruta de Tapas Malpica Sabe a Mar deste ano arrincará o venres 3 de maio coa animación musical do grupo local Os Arjalleiros, que percorrerán os oito locais. As tapas serviranse nesa primeira xornada de 20.00 a 23.00 horas; o sábado, de 12.00 a 14.00 e de 20.00 a 23.00, e o domingo, de 12.00 a 14.00 horas. O prezo non varía con respecto ao ano pasado, de xeito de cada tapa custará 1,5 euros, e con cada unha entregaráselle ao cliente un boleto que lle permitirá obter premios directos. Nesta ocasión teremos mochilas isotérmicas, gorras e moitas sorpresas!

CARTEL

13Abr 2019

O Ecomuseo do Forno do Forte de Buño ampliará o seu horario de apertura e a súa oferta de actividades durante a Semana Santa

O Ecomuseo do Forno do Forte de Buño ampliará o seu horario de apertura durante a Semana Santa coa finalidade de converterse nun recurso de referencia para as persoas que visiten a nosa comarca durante eses días. Deste xeito, dende o luns 15 ata o sábado 20 o ecomuseo estará aberto de 10 a 14 e de 16 a 20 horas, e o domingo 21 poderá visitarse de 10 a 14 horas.

forno_do_forte

Paralelamente, ao longo da semana levaranse a cabo varias actividades. De martes a venres, de 11.30 a 13.30 e de 16.30 a 18.30, haberá obradoiros de barro para nenos e nenas, cun máximo de 25 participantes por quenda. Pero á parte de que os pequenos teñan o seu primeiro contacto co barro no cabanote do Forno do Forte, os maiores poderán probar a sentarse no torno.

Así mesmo, o venres e o sábado realizaranse rutas guiadas polo Buño oleiro. O ecomuseo será o punto de partida ás 12.00 horas e tamén o de chegada ás 14.00 horas. Ao longo da Ruta Oleira visitaranse os fornos da Costa e Os Mouróns, así coma o centro da vila, onde os visitantes non só terán a oportunidade de ver e saber máis sobre as tendas, os alfares ou a tradición oleira, senón tamén sobre a igrexa, o cruceiro e outros elementos patrimoniais de relevancia. Nos fornos restaurados faranse paradas específicas para explicar as súas características e o proceso de cocción.

9Abr 2019

O Ecomuseo Forno do Forte achega 14 pezas de olería á exposición “Pensar coas mans”, que será inaugurada o venres no Museo Centro Gaiás

Unha cazola, un xerro, un pucheiro, un barreño, unha tarteira, unha chocolateira, unha escudela, unha cunca, un cunquelo, unha cacheleira, unha fonte, un falsete, un botixo de rosca e unha buxina son as 14 pezas da segunda metade do século XIX e do século XX que representarán á Olería de Buño na exposición “Pensar coas mans. Cestería, cerámica e xoiería de Galicia”, que será inaugurada este venres 12, ás 12.00 horas, no Museo Centro Gaiás.

CARTEL

Ata Santiago de Compostela desprazarase o alcalde de Malpica, Eduardo Parga, que participará no acto de apertura da exposición xunto aos conselleiros de Cultura e Turismo, Román Rodríguez, e Economía, Emprego e Industria, Francisco Conde, entre outras autoridades.

A exposición, organizada pola Fundación Cidade da Cultura de Galicia coa colaboración da Fundación Artesanía de Galicia e a Secretaría Xeral de Igualdade, propón unha viaxe no tempo a través de 250 pezas da artesanía galega. Entre elas estarán as 14 cedidas polo Ecomuseo Forno do Forte da súa colección de olería tradicional. A mostra poderá visitarse ata o 8 de setembro de 10.00 a 20.00 horas.

A tradición oleira de Buño remóntase á etapa prehistórica coa creación dos primeiros cacharros feitos a man. Pero foi nos séculos XVIII e XIX cando acadou a súa idade de ouro. Grazas a un arduo traballo de recuperación e á inestimable colaboración dos artesáns e veciños/as da localidade, na actualidade podemos desfrutar dunha das coleccións de pezas tradicionais máis antigas e voluminosas da nosa olería, custodiadas no Ecomuseo Forno do Forte e divididas, segundo a clasificación realizada no seu momento por Luciano García Alén, en tres series: ancestral (anteriores ao ano 1700), antiga (do 1700 ao 1900) e moderna (posteriores ao ano 1900).

17Mar 2019

Emilio Rúa e Rosa Cedrón estarán o sábado 23 en Malpica para ofrecer o concerto suspendido no Nadal

Rosa-Cedron-Emilio-Rua-cartel-Malpica

O vindeiro sábado, 23 de marzo, celebrarase en Malpica o concerto de Emilio Rúa e Rosa Cedrón que estaba previsto para o 21 de decembro pasado e que foi suspendido debido aos dous días de loito decretados tras o falecemento de José Angel Sanjurjo no afundimento do pesqueiro “A Silvosa”.

Rosa Cedrón e Emilio Rúa ofrecerannos o espectáculo Diversións, incluído na Rede de Dinamización Lingüística da Xunta de Galicia, no que interpretarán pezas compostas por ambos os intérpretes e versións propias de pezas tradicionais.

O concerto comezará ás 20.00 horas no Auditorio do Centro Cívico, e a entrada será libre e de balde.

29Dec 2018

O convenio para o mantemento do Ecomuseo do Forno do Forte increméntase ata 69.200 euros para o ano 2019

28122018 convenio

Valentín González Formoso e Eduardo Parga Veiga

O presidente da Deputación da Coruña, Valentín González Formoso, e o alcalde de Malpica, Eduardo Parga Veiga, asinaron o convenio para o financiamento das actividades do ecomuseo do Forno do Forte durante o ano 2019.

A institución provincial achegará 69.200 euros, o que supón un incremento de 9.200 euros con respecto a este ano, para cubrir o 100% dos gastos de mantemento, xestión e promoción do ecomuseo do Forno do Forte de Buño, co obxecto de garantir a valorización e mantemento do conxunto etográfico.

González Formoso subliñou que, dende hai máis dunha década, a Deputación da Coruña colabora co Concello de Malpica de Bergantiños na posta en valor e difusión da olería tradicional de Buño, mostrando desde a vida cotiá dos artesáns ata todo o proceso de elaboración das pezas, nunhas instalacións que recuperan e conservan os elementos arquitectónicos propios dunha casa dedicada á olería.

O presidente provincial destacou que, ademais de financiar estas actividades, a Deputación da Coruña apoia tamén cada ano a celebración da Mostra de Olería de Buño, á que se destinaron 80.000 euros nos últimos anos.

Un importante recurso turístico e etnográfico

Os visitantes do Forno do Forte teñen a oportunidade de coñecer en profundidade todo o proceso de produción de pezas, desde o torneado ao cocido ou o secado nun centro que contribúe a conservar e poñer en valor a cultura popular e é tamén un importante recurso turístico e etnográfico da comarca.

O acordo asinado entre González Formoso e Parga Veiga renova o compromiso da Deputación co Forno do Forte. Entre as obrigas do Concello, atópase ofrecer un horario mínimo de atención ao público de 11.00 a 14.00 horas e de 16.00 horas a 19.00 horas, todos os días da semana agás o luns. Así mesmo, fomentarase o estudo e investigación en asociación con entidades oleiras e culturais da zona e facilitarase información turística e cultural sobre a Costa da Morte aos visitantes.

20Dec 2018

O Concello de Malpica únese ao Proxecto de Accesibilidade Cognitiva de Autismo Galicia coa colocación de pictogramas en espazos municipais

19122018 pictogramas (4)

Algúns dos edificios públicos do Concello de Malpica son, dende esta semana, máis comprensibles para as persoas con Trastorno do Espectro do Autismo (TEA) grazas ao Programa de Accesibilidade Cognitiva promovido pola Federación Autismo Galicia.

En colaboración coa Concellería de Educación e Cultura vimos de implantar 129 pictogramas nos seguintes espazos: Centro Cívico de Malpica, Casa de Cultura de Seaia, Centro sociocultural das Pozacas e pavillón polideportivo municipal.

O proxecto realizado no Concello de Malpica supón un esforzo pola sensibilización e concienciación sobre as persoas con Trastorno do Espectro do Autismo e as súas dificultades cognitivas e de comunicación.

As persoas con Trastornos do Espectro do Autismo (TEA) son pensadoras visuais, polo que comprenden mellor a información que se presenta de forma visual. Por iso, para facer a súa contorna máis accesible nos axudamos de apoios visuais, pictogramas, que son debuxos sinxelos que representan espazos e accións de maneira simplificada.

Os pictogramas supoñen para as persoas con autismo, persoas maiores ou mesmo estranxeiros, claves visuais claras e seguras que lles sitúan no espazo e no tempo e anticípanlles os feitos que van ocorrer, o que lles conduce cara a un estado de benestar e seguridade.

Página 3 de 1112345...10...Última »