gl_ES
Tempo Malpica de Bergantiños
Xoves 14°
Venres 15°
11°
Sábado 14°
12°
tiempo.com   +info
  1.  
  2. Cultura

Cultura

10Ago 2019

Os primeiros datos sobre afluencia de público e vendas na Mostra da Olería convidan ao optimismo

IMG_0043

As primeiras valoracións sobre a 36ª Mostra da Olería de Buño son positivas e convidan ao optimismo. Así o considera a concelleira delegada para a Olería, Leticia Naya, despois de recoller opinións entre o sector e de participar activamente durante os catro días da feira.

O cambio de formato foi a principal novidade desta edición, na que novamente destacou unha programación de actividades paralelas con actuacións musicais de gran calidade, obradoiros participativos, rutas e gastronomía. Así, actividades novas como o showcooking convértense nun interesante escaparate para a nosa olería, neste caso de cara ao sector da restauración, abrindo as portas a novas vías de comercialización, e outras xa veteranas, como a Cocedura Tradicional, consolídanse como un dos grandes referentes da Mostra. Este ano pasaron polo Ecomuseo do Formo do Forte arredor de 4.000 persoas, a maioría durante a fin de semana da Cocedura.

WhatsApp Image 2019-08-03 at 17.32.17

“Sabendo de todas as dificultades que houbo, esta Mostra da Olería pechou cuns resultados moi bos, destacando especialmente a xornada do sábado, na que se superaron con creces todas as expectativas”, sinala Leticia Naya. Por iso, e a falta dunha xuntanza conxunta para poñer sobre a mesa os datos definitivos, “cos primeiros datos que fomos recollendo estes días só podemos ser optimistas”, engade.

Dende a Concellería de Olería xa se pensa na próxima edición. “Esperamos _apunta Leticia Naya_ que con algunhas melloras, como a planificación e a organización anticipadas, ou o contacto e o diálogo constante coa xente da olería, poidamos seguir medrando. Cremos no futuro da olería de Buño e no seu potencial, e a partir de agora poñeremos todo da nosa parte para poñelo en valor”, asegura a concelleira delegada, que remata felicitando ao equipo organizador.

2Ago 2019

A Cocedura Tradicional no Forno do Forte complementarase este ano cunha Carroa que pon en valor a dieta atlántica e a cociña mariñeira

Esta fin de semana haberá festa no Ecomuseo do Forno do Forte. Arredor da Cocedura Tradicional, que se vén repetindo dende hai xa 20 anos coincidindo coa Mostra da Olería, nesta ocasión queremos poñer en valor a Carroa, unha comida tradicional que se facía unha vez rematada con éxito a cocedura e na que se preparaban, sobre todo, guisos, asados á brasa ou caldeiradas para celebrar o traballo ben feito, recuperar forzas e gratificar aos xornaleiros e xornaleiras.

Con esa finalidade, este ano variaremos o menú para ofrecer ás persoas que queiran achegarse un guiso de lapas e mexillóns con patacas, un prato tradicional da cociña mariñeira. Carmen, a cociñeira do restaurante O Esqueiro, levará a batuta nos fogóns para deleitarnos cun prato que representa todos os valores da dieta atlántica e no que, unha vez máis, fusionamos olería e mar para ofrecer unha mestura que só é posible no noso concello.

02082019 showcooking (2)

Nesa fusión intervén un terceiro elemento: a cociña. Hoxe mesmo tivemos a ocasión de asistir a un showcooking no que os cociñeiro Óscar Ures, do restaurante A Cunca, e David Vilariño e Alberto Alvedro, da Taberna do Campo, volveron a poñer en evidencia o ben que “maridan” gastronomía e olería de Buño. Ceviche de corvina, polbo sobre tosta de pan de cereais e carne asada a 100 graos durante tres horas con verduras foron, con moitísimos máis matices, os tres pratos que puideron degustar as persoas que conseguiron praza, xa que estaban limitadas.

Cocedura Tradicional

Mañá será outro gran día de Mostra da Olería, tanto no parque Luciano García Alén, no que haberá actuacións musicais e obradoiros, coma no Ecomuseo do Forno do Forte. Ás 11.00 arrancará a Cocedura Tradicional, dirixida, un ano máis, polo Rulo, coa carga do forno. Serán tres horas de traballo para montar, peza a peza, a torre de ladrillos e lama que manterá a calor para a cocción das vasillas. Serán todas pezas da olería tradicional elaboradas no ecomuseo co torno movido a pé, como se vén facendo dende hai séculos. Ás 17.00 horas teremos a axuda experta de Manuela de Mariñán para prender o forno, e farán falla outras tres horas de traballo dos atizadores para manter a temperatura e garantir o bo resultado do traballo.

Este ano a Cocedura Tradicional non só terá como prato forte unha Carroa distinta, a partir das 21.00 horas, senón tamén animación musical e teatral durante a tarde-noite. E o domingo, nova cita ás 11.00 horas para descargar o forno e comprobar se tamén este ano tivemos éxito coa Cocedura Tradicional. As pezas serán identificadas cunha etiqueta na que se garante que foron elaboradas de xeito artesanal.

Cartel cocedura maio 19

1Ago 2019

Buño reivindica a fortaleza da súa olería para afrontar os retos dos novos tempos

IMG_0026

O grupo de gaitas de Malante puxo a banda sonora do acto inaugural da 36ª Mostra da Olería de Buño, que durante catro días converterase no escaparate da nosa artesanía. Pero, aínda que ten un fin comercial, a feira pretende ir máis alá, e reivindicar a fortaleza da Olería de Buño para afrontar os retos que presentan os novos tempos. Retos aos que, dun xeito ou doutro, se referiron todas as autoridades que interviñeron no evento.

Alfredo Cañizo, concelleiro de Turismo; Leticia Naya, concelleira de Olería; Pilar López-Rioboo, subdelegada do Goberno; Sol Vázquez, directora xeral de Comercio e Consumo; Xosé Regueira, presidente en funcións da Deputación da Coruña, e Walter Pardo, alcalde de Malpica, coincidiron en lanzar unha mensaxe de apoio á olería ante eses novos retos e de compromiso das administracións ás que representan para garantir o futuro do principal pobo oleiro do noroeste peninsular, como recalcou o alcalde.

Nese sentido, a subdelegada do Goberno na Coruña agradeceu aos oleiros e ás oleiras de Buño “a súa defensa do patrimonio cultural galego”, un patrimonio que, en palabras de Xosé Regueira, debe estar presente nas casas, nos restaurantes ou nos petos dos nenos, “en todos os escenarios nos que nos movemos”. O vicepresidente da Deputación, que hoxe exercía como presidente en funcións, apelou á necesidade de apostar pola olería “como sector económico de futuro” e destacou o apoio da Deputación, que se materializa, por exemplo, no convenio para o mantemento do Ecomuseo do Forno do Forte ou nos 80.000 euros que achega para a Mostra da Olería.

IMG_0105

Walter Pardo destacou que, malia manter “o liderado dentro das vilas oleiras”, o futuro do Buño oleiro “está ameazado pola falta de relevo xeracional”, polo que urxe actuar en varias frontes: en primeiro lugar, “garantindo a preservación do legado de coñecementos centenarios da comunidade oleira”; en segundo lugar, “fomentando a formación de novos oleiros e oleiras”, e, por último, “potenciando canles axeitadas de comercialización”. Son tres obxectivos que requiren un traballo inxente, pero que, segundo manifestou o alcalde, comezando “xa”, dotándonos dunha “visión estratéxica” e conseguindo a unión entre o sector e as administracións, será posible.

Despois das intervencións, que tiveron lugar na carpa do parque dedicado a Luciano García Alén, representado un ano máis pola súa viúva e a súa filla, as autoridades fixeron un percorrido polos postos de venda, situados por segundo ano na rúa, e remataron a xornada no Ecomuseo do Forno do Forte, que ademais de acoller unha exposición de novas pezas dos oleiros e as oleiras, esta fin de semana será o escenario dunha nova Cocedura Tradicional.

19Xul 2019

“A vila do mañá”, un proxecto que involucrará este verán a nenos e adolescentes na transformación do espazo urbano

19072019 a_vila_do_manha (4)

O alcalde de Malpica, Walter Pardo, e a creadora e directora do proxecto “A vila do mañá”, a arquitecta Sandra González, presentaron hoxe os obradoiros infantís que se van desenvolver dende o luns 29 de xullo ata o venres 2 de agosto co obxectivo de implicar a nenos e adolescentes na transformación do espazo urbano de cara á consecución dun pobo cada vez máis habitable.

No acto estiveron acompañados por un dos membros do equipo de Sandra González que tamén participará nos obradoiros e polo técnico de Educación e Cultura do Concello de Malpica, Antón Noceda, que explicou como se materializou o proxecto. “Dende o aspecto técnico pareceunos das propostas máis interesantes que se nos presentaron nos últimos anos, no senso de que moi poucas veces vemos iniciativas para traballar conceptos como o urbanismo ou a transformación dos espazos públicos en rapaces tan pequenos, sendo un dos aspectos que despois vai condicionar a nosa vida como adultos”, manifestou.

Na mesma liña se expresou o alcalde, que destacou o carácter novidoso da experiencia. “Estou seguro de que os nenos van desfrutar moito, porque realmente transformar o espazo público pode ser, á parte de didáctico, moi lúdico para eles”.

19072019 a_vila_do_manha (6)

Sandra González, pola súa banda, explicou que “A vila do mañá” é un proxecto que leva percorrendo toda Galicia e parte do estranxeiro dende o ano 2016, e recoñeceu que está especialmente ilusionada coa posibilidade de desenvolvelo na nosa vila. “Malpica _dixo_ era unha espiniña que tiña pendente”. A arquitecta explicou que un dos obxectivos do seu traballo é, indirectamente, fixar poboación. “Se ti coñeces o lugar que habitas, se o vives, o día de mañá tes unha identidade formada con ese lugar e vai ser moito máis difícil que queiras marchar”, apuntou.

Os obradoiros van dirixidos a nenos e nenas de 3 a 15 anos de idade. A actividade desenvolverase do 29 de xullo ao 2 de agosto en dúas quendas:
• De 10.30 a 13.30 horas, para nenos e nenas de 3 a 12 anos (30 prazas)
• De 16.00 a 20.00 horas, para nenos e nenas de 8 a 15 anos (45 prazas)

“Malpica ten unha identidade moi potente e iso é o que temos que fomentar”, afirmou Sandra González. “O primeiro día é cando os nenos nos contan como ven eles a súa vila, e despois, dependendo da visión que eles teñan, cando empezamos a traballar, e son eles os que propoñen que espazos invadimos, como os invadimos… Vimos moi ilusionados”.

Inscricións: Ata o 26 de xullo no Departamento de Educación e Cultura, sito no Centro Cívico do Concello de Malpica. Avda. Ventorrillo s/n T. 981 707 104. En horario de 9.30 h. a 13.30 h.

16Xul 2019

Aberto o prazo de inscrición para o obradoiro infantil e xuvenil “A vila do mañá”

A infancia malpicá ten moito que dicir sobre o espazo no que vive. Por iso, este verán convidamos aos nenos e nenas a participar no proxecto “A vila do mañá”, unha iniciativa do Colexio Oficial de Arquitectos de Galicia, a Escola Técnica Superior de Arquitectura, a Asociación para a Defensa do Patrimonio Cultural Galego e Post Arquitectos para estimular unha actitude crítica entre as xeracións máis novas con respecto ao lugar que habitan.

O obxectivo do obradoiro, que vai dirixido a nenos e nenas de 3 a 15 anos de idade, é incluír á infancia nos procesos de construción do espazo común, partindo da cidade coma unha ferramenta educadora sobre a cal a cidadanía ten dereito ao seu desfrute e á súa transformación.

Para acadar esa participación activa, nunha iniciativa da Concellería de Educación e Cultura para a que contamos coa colaboración da Deputación da Coruña, transformaremos temporalmente o espazo público traballando desde o punto de vista da arquitectura, o patrimonio, o urbanismo e a paisaxe. A grandes trazos, nos talleres traballarase a percepción de Malpica e a valoración que fan os nenos e nenas do lugar no que viven, e traballarase partindo de distintos conceptos arquitectónicos (plano horizontal, o ceo, os elementos bidimensionais e tridimensionais, a proporción…) para que presenten a súa propia proposta de cidade. E todo iso a través de obradoiros infantís e xuvenís para repensar o modelo de vila a través do xogo e mediante intervencións lúdicas de transformación de diferentes espazos da vila.

A actividade desenvolverase do 29 de xullo ao 2 de agosto en dúas quendas:
• De 10.30 a 13.30 horas, para nenos e nenas de 3 a 12 anos (30 prazas)
• De 16.00 a 20.00 horas, para nenos e nenas de 8 a 15 anos (45 prazas)

Inscricións: Ata o 26 de xullo no Departamento de Educación e Cultura, no Centro Cívico do Concello de Malpica. Avda. Ventorrillo s/n T. 981 707 104. En horario de 9.30 h. a 13.30 h.

Carteis A Vila do mañá xullo 19

 

13Xul 2019

Volven as “Noites na vila” para que este verán goces da música e das artes escénicas a carón do mar de Malpica

paporrubio

As Noites na Vila encherán de animación o Paseo da Praia e a Praza Anselmo Villar Amigo (en caso de choiva as actuacións trasladaranse ao auditorio do Centro Cívico) durante as fines de semana de xullo e agosto.

A programación do Concello de Malpica, que conta coa colaboración da Deputación da Coruña, comeza forte, cunha nova edición do Retablo de Fantoches Rafael Dieste, en lembranza da estrea de “La doncella guerrera” na nosa vila no ano 1933, no marco das Misións Pedagóxicas que levaron a cultura a todos os recunchos do Estado. Este ano, o Retablo traeranos as seguintes propostas:

• Sábado 20 de xullo, ás 20:30 h. no Paseo da Praia “A Tropa do Doutor Milagre” de Iventi Teatro. Urdime S.C.G. Público Preferente: Todos os públicos. Duración: 45 minutos.
• Sábado 3 de agosto ás 20.30 h no Paseo marítimo “Os romeiros do caracol” de Fantoches Baj. Urdime S.C.G. Público Preferente: Infantil, a partir de 5 anos, e Familiar,. Duración: 50 minutos.
• Sábado 31 de agosto ás 20:30 h. no Paseo marítimo “Tolitates” de Teatro de Marionetas Trécola. Público Preferente: Todos os públicos. Duración: 50 minutos.

traskiband boa

Ademais das artes escénicas, as Noites na Vila tamén nos traen música. Malpica volverá a acoller o ciclo de concertos Vai no mar, que se está a converter nun escaparate para os grupos da contorna. Este ano contaremos cos seguintes.

• Venres 9 de agosto, ás 22:30 h. na Praza Anselmo Villar Amigo, actuación musical da “Traskiband”. Duración: 60 minutos.
• Venres 30 de agosto, ás 22:30 h. no Paseo marítimo actuación musical do grupo “Versión Imposible”. Duración: 120 minutos.

Este verán agardámoste en Malpica!

28Xuñ 2019

O Ecomuseo Forno do Forte ofrecerá obradoiros de barro para nenos e nenas durante todo o verán

hola ceramica 2

Despois da boa acollida das actividades incluídas na campaña ¡Hola cerámica!, o Ecomuseo Forno do Forte pon en marcha unha nova iniciativa para seguir achegando a olería a un público cada vez máis amplo. Nesta ocasión os destinatarios serán os nenos e as nenas, que durante todo o verán poderán participar en obradoiros de barro gratuítos.

Os talleres celebraranse dende o 1 de xullo ata o 31 de agosto, de martes a sábado, e en horario de 16.15 a 18.45. A actividade será grupal, cun máximo de 20 participantes por quenda, polo que as prazas asignaranse por orde de chegada.

Os obradoiros de barro, organizados polo Concello de Malpica coa colaboración da Deputación da Coruña, teñen como finalidade poñer en valor a nosa olería entre os máis pequenos e fomentar a súa creatividade.

21Xuñ 2019

O Ecomuseo Forno do Forte, incluído na nova exposición itinerante da Rede de Espazos Museísticos Atlánticos

WhatsApp Image 2019-06-20 at 12.51.50 (1)

O alcalde de Malpica, Walter Pardo, asistiu esta semana en Muros á inauguración da exposición itinerante “O océano que nos une”, que forma parte da Rede de Espazos Museísticos Atlánticos (REMA) e que está impulsada polos 8 Grupos de Acción Local do Sector Pesqueiro de Galicia (GALP). O alcalde estivo acompañado polo director do Ecomuseo Forno do Forte, Paco Doval, xa que é un dos espazos museísticos incluídos na exposición.

A través de dez paneis informativos, “O océano que nos une” amosa os elementos máis significativos dos museos que a acollerán, e que teñen en común a súa conexión co mar a través de temáticas tan diferentes coma a pesca, a historia, o medio ambiente ou, coma no caso do Forno do Forte, a etnografía. Por falta de espazo, a exposición non se instalará no ecomuseo, senón no Centro Cívico de Malpica, que será a última parada da ruta do 24 de outubro ao 3 de novembro.

9Xuñ 2019

A muller protagoniza este ano a campaña de promoción da Romaría de Santo Hadrián como Festa de Interese Turístico

07062019 santo_hadrian (4)

Este ano a Romaría de Santo Hadrián vai ser especial por varios motivos. A data é un deles, porque o día grande coincidirá o propio 16 de xuño, e outro é o novo aspecto exterior que loce a capela, que vén de ser completamente reformada. Pero, sobre todo, vai ser especial porque a gran protagonista da campaña anual de promoción como Festa de Interese Turístico será a muller.

Este ano, os panos de romeiro/a, que tan boa aceptación e tanta demanda teñen, son de cor rosa, que simboliza a loita contra o cancro de mama, e a estampación é de cor morada, emblema da loita contra a violencia de xénero. As persoas que queiran manifestar a súa solidariedade levándoos anudados ao pescozo no día grande da nosa romaría poden acudir a recollelos a partir do martes 11 ás oficinas municipais do Centro Cívico, de balde e ata fin de existencias.

Ademais, dende o Concello de Malpica sumámonos á campaña autonómica AgresiónOff, orientada a sensibilizar á poboación contra a violencia sexual. Deste xeito, durante a festa instalaremos un posto informativo no que se ofrecerá material impreso con información útil, ademais de chapas e outro material promocional co obxectivo de dar visibilidade a este importante problema social.

Catro anos de promoción

CARTEL SANTO HADRIAN 19

A campaña de promoción da Romaría de Santo Hadrián, na que colaboran a Xunta de Galicia, Turismo de Galicia e Abanca, tamén inclúe cartelería, promoción e animación musical durante a sardiñada. O alcalde, Eduardo Parga; a concelleira de Promoción Económica, Pilar Doldán, e o primeiro tenente de alcalde, Miguel Fernández, realizaron a presentación do material, que tamén se está a distribuír no stand do Concello de Malpica en Festur.

Nos últimos catro anos estamos a realizar diferentes accións de promoción da nosa romaría, entre elas un vídeo, un díptico con información sobre a romaría, actuacións, campañas publicitarias en prensa, radio, internet e televisión, e a distribución dos panos de romeiro/a, que cada ano son dunha cor diferente, que gozan de moitísima aceptación e que enchen de cor a procesión dende a igrexa de San Xulián ata a ermida de Santo Hadrián e os oficios relixiosos.

Programa de festas

57595659_482139825656877_6125092855561060352_n

O Concello de Malpica colabora ademais coa comisión de festas, que ten preparada unha fin de semana chea de actividades. Comezarán o 14 coa animación nas rúas da Mekánica Rolling Band ao longo da tarde, e ás 23.00 horas arrincará a verbena con Coldday, Salva & José Brea e Festicultores. O sábado 15 estará o Dúo Calú na sesión vermú, volverá a haber animación nas rúas pola tarde coa charanga Kilomberos de Monte Alto e na verbena tocarán os grupos Tekila e Bomba. O día grande, domingo 16, a verbena adiántase ás 21.00 horas e contará coa actuación de Os Piñeiros.

6Xuñ 2019

A Olería de Buño e a Romaría de Santo Hadrián volven a estar presentes este ano en Festur

IMG-20180608-WA0121

A promoción da olería é un obxectivo permanente do Concello de Malpica. Nesa liña, a partir do xoves 6 participaremos, un ano máis, en Festur, a feira das festas de interese turístico de Galicia, que se celebra en Silleda. No stand de Malpica promocionaremos as dúas festas de interese que temos no noso concello: a Mostra da Olería de Buño, na que estamos a traballar de cara á vindeira edición, e a Romaría de Santo Hadrián, que este ano coincide no seu propio día, polo que se agarda unha participación aínda maior á das últimas edicións.

O público que se achegue ata o stand do Concello de Malpica atopará, ademais de información sobre as festas, un torno para realizar demostracións en vivo os catro días da feira, tanto pola mañá coma pola tarde. Marilá estará o xoves e o venres e José Antonio Corral, a fin de semana.

Página 2 de 1112345...10...Última »