Cultura – Páxina 12 – Concello de Malpica de Bergantiños

13Xul 2017

ACTUALIDADE,Cultura,Novas

Dez agrupacións musicais dos estilos máis variados encherán este verán as “Noites na Vila” de Malpica

Esta fin de semana arranca o programa Malpica Verán con moitas e moi variadas propostas. Pero a música, que vai xogar un papel moi importante ao longo de todo o período estival, tamén ocupa un lugar destacado nesta primeira fin de semana de actividades organizadas pola Concellería de Educación, Cultura e Turismo.

Hoxe comezan as Noites na Vila coa actuación da Traskiband na Praza Anselmo Villar Amigo (xunto á Casa do Pescador). Será a primeira dunha serie de bandas que pasarán por Malpica, en concreto polo paseo marítimo, nas vindeiras semanas. Aula 11, Sonseis, Killer Cats, The Cerne e Strobos interpretarán unha parte importante da banda sonora deste verán. Todos os concertos comezarán ás 22.30 e serán de balde.

Pero a música chega por partida dobre, porque este verán volvemos a ter Música na Rúa. Mañá sábado contaremos cos gaiteiros da Asociación Cultural Malante, que ofrecerán un pasarrúas polo centro da vila a partir das 21 horas. E nas vindeiras semanas tamén estarán en Malpica o Dúo Café, a Banda de Música de Abegondo e de novo Malante, que o 22 de xullo ofrecerá música e baile nunha actuación organizada polos locais de hostalería A Taberna de Lesto, Brebaxe, Burato, Cachón, Café do Mar, Casa Antonio, Don Paco, Humboldt, Ibarra, JB, Larada, Pepucho, Pescador, San Francisco, Santiago Apóstol, Submarino e Xemevedes.

Ler máis

10Xuñ 2017

ACTUALIDADE,Cultura,Novas

O Concello de Malpica pon en marcha por segundo ano unha campaña de promoción da Romaría de Santo Hadrián como Festa de Interese Turístico

Por segundo ano consecutivo, o Concello de Malpica de Bergantiños pon en marcha unha campaña de promoción da Romaría de Santo Hadrián grazas ás axudas establecidas por Turismo de Galicia, Xunta de Galicia e Abanca para as Festas de Interese Turístico de Galicia. Entre estas atópase a nosa popular romaría, que este ano celebrarase o vindeiro domingo 18 de xuño.

A campaña foi presentada hoxe polo alcalde, Eduardo Parga Veiga, e o tenente de alcalde, Miguel Fernández Mirás, ao pé da ermida do Santo Hadrián, na que ademais puideron comprobar que xa nesta época do ano é un lugar de visita obrigada para turistas chegados dende diferentes puntos da península e mesmo do estranxeiro.
Entre as accións programadas dende as concellarías de Turismo e Promoción Económica figura a presenza da Romaría de Santo Hadrián en Festur, a Feira de Festas de Interese Turístico de Galicia, que se celebra esta fin de semana en Silleda. Ademais comezou xa o reparto de cartelería tanto en Malpica como nos concellos limítrofes, e despois do éxito do ano pasado, o Concello volverá a repartir panos de romeiro. Serán 2.000 en total e poderán recollerse no Centro Cívico, de balde ata esgotar existencias, a partir do mércores 14 (máximo 2 por persoa). Este ano tamén se gravará un vídeo coa finalidade de seguir ampliando o fondo documental sobre a Romaría de Santo Hadrián.

Os obxectivos son a promoción da Romaría do Santo Hadrián máis alá do ámbito local, a identificación dos veciños e veciñas do noso concello cun dos símbolos da nosa herdanza cultural, contribuíndo deste xeito á preservación do noso patrimonio inmaterial e á súa posta en valor tanto dentro coma fóra do municipio de Malpica de Bergantiños, e a consolidación do noso concello como un dos principais destinos turísticos da comarca de Bergantiños e mesmo da Costa da Morte.

O Concello de Malpica colabora ademais coa comisión de festas, que ten preparada unha fin de semana de actividades. Comezarán o día 17 con pasarrúas a cargo da Banda de Música Eduardo Pondal, misa solemne ás 13 horas cantada pola Coral de Malpica, procesión coa banda, sesión vermú co Dúo Libertad e verbena cos dúos D’Festa e Libertad. O domingo ás 8 horas sairá a procesión coa imaxe do santo dende a igrexa parroquial de San Xulián ata a capela, onde haberá misas durante boa parte da xornada ata o regreso á vila a partir das 17.30 horas. A partir das 21 horas será a verbena con O Tren da Unha.

Ler máis

8Xuñ 2017

ACTUALIDADE,Cultura,Novas

O Concello de Malpica promociona a Romaría de Santo Hadrián e a Mostra da Olería de Buño en Festur

O Concello de Malpica promociona a Romaría de Santo Hadrián e a Mostra da Olería de Buño en Festur, a Feira de Festas de Interese Turístico de Galicia, que se celebra dende onte xoves e ata o domingo en Silleda, no marco da 40ª Feira Internacional Abanca Semana Verde de Galicia.

A partir de hoxe e durante a fin de semana, ademais do persoal de información, no stand de Malpica haberá demostracións a cargo do oleiro José Antonio Corral. Entre os visitantes que terá o stand nesta xornada de venres estarán o alcalde, Eduardo Parga, e o tenente de alcalde, Miguel Fernández, que se achegarán pola tarde ata Silleda.

As persoas que visiten o stand do Concello de Malpica de Bergantiños atoparanse con algunhas novidades, entre elas, e especialmente destacada, é a nova imaxe da Mostra da Olería de Buño, que nesta edición aposta por un cambio tanto estético como de contidos. Neste sentido, o programa que se dará a coñecer nas vindeiras semanas incluirá aspectos novidosos con respecto a anos anteriores.

Tamén hai novidades relacionadas coa promoción da Romaría de Santo Hadrián. O Concello de Malpica volve a apostar por segundo ano consecutivo pola difusión dos aspectos máis tradicionais da popular e concorrida celebración, que terá lugar o vindeiro domingo 18, cun programa que tamén se fará público en breve.

Ler máis

1Xuñ 2017

ACTUALIDADE,Cultura,Novas

Clausurado o obradoiro de manualidades infantís, no que participaron 23 nenas e nenos de catro a dez anos

Os 23 nenos e nenas que participaron este curso no obradoiro de manualidades organizado pola Concellería de Educación, Cultura e Turismo recibiron os seus diplomas e tamén medallas, porque demostraron ser uns campións tanto en comportamento como en creatividade.

Ao longo de todo o curso, e coa axuda da súa monitora, Lucía Villanueva, puxeron en práctica a reutilización e a reciclaxe, convertendo a parte metálica das pinzas da roupa en brazaletes ou os cartóns dos ovos en obxectos de decoración. Segundo as épocas do ano tamén fixeron os centros para as mesas de Nadal, os agasallos para o Día do Pai e o Día da Nai… Aprenderon a traballar con madeira, con goma eva e distintas técnicas de pintura. E boa parte do que fixeron pode verse xa na exposición inaugurada onte polo alcalde, Eduardo Parga, na planta baixa do Centro Civico.

O alcalde foi tamén o encargado de entregar os diplomas aos nenos e ás nenas, para o cal contou coa axuda do tenente de alcalde Miguel Fernández. O acto tivo lugar no auditorio, no que se deron cita tamén as familias dos alumnos, nenos e nenas de catro a dez anos de idade moi traballadores e “sempre dispostos a aprender”, como dixo a súa monitora. Despois do acto oficial, todas e todos participaron nunha merenda.

Pero as clausuras continúan. Mañá venres ás 19 horas celebrarase o remate do curso para as 12 alumnas do curso de manualidades para adultos que tamén organiza a Concellería de Educación, Cultura e Turismo.

Ler máis

26Mai 2017

ACTUALIDADE,Cultura,Novas

Fin de semana teatral coa estrea da nova montaxe de Os amigos de Malpica e o maratón do obradoiro infantil municipal

Esta fin de semana o teatro chega por partida dobre a Malpica.

Mañá sábado, ás 19.30 horas, a compañía Os Amigos de Malpica estreará a súa nova montaxe, “Aquí mando eu, entendido?”, unha comedia dirixida por Andrés Mourente Castro e protagonizada por Xurxo Alfeirán Chouciño, María del Carmen Varela Caravel, Adriana Reigía Martínez, Luis Mato Lema e Manuel Bugallo Chouciño, que ademais contarán coa axuda do apuntador Jesús Rodríguez Bello. O protagonista da obra é Xaquín, un viúvo autoritario e teimudo afeito a impoñer o seu parecer a base de ameazas a todo o mundo, incluída a súa única filla… Para coñecer o resto da historia haberá que asistir á función de mañá no auditorio do Centro Cívico. A obra está recomendada para maiores de 10 anos.

E o domingo, dentro do programa Nos Tempos das Letras, sairán a escena os alumnos e alumnas do Obradoiro de Animación Teatral do Concello de Malpica. A partir das 18 horas, tamén no auditorio do Centro Cívico, celebrarase un maratón de teatro infantil no que se representarán as obras “O punto e final”, “Unha de bruxas”, “Margarida, a filla de don Importante” e “Acampada no cemiterio”.

En ámbolos dous casos, a entrada é libre ata completar aforo.

Ler máis

22Mai 2017

ACTUALIDADE,Cultura,Novas

O Certame de Poesía Erótica Illas Sisargas incluirá este ano unha homenaxe a Paco Souto

Este ano o Certame de Poesía Erótica Illas Sisargas será especial porque, como lembrou hoxe Paco de Tano, presidente da Asociación Cultural Caldeirón, “é a primeira vez que o celebramos sen Paco Souto”. O que foi secretario de Caldeirón e un dos principais impulsores do premio, faleceu o pasado 30 de marzo, e tanto os seus compañeiros e compañeiras da asociación como o Concello de Malpica queren dedicarlle dalgún xeito esta 12ª edición. Con esa intención, segundo anunciou o presidente de Caldeirón na presentación do certame, que tivo lugar hoxe no Centro Cívico, coincidindo coa Cea das Letras, no mes de novembro, celebrarase unha homenaxe a Paco Souto.

Unha das propostas que se barallaron foi o cambio de nome do propio certame, pero Paco de Tano explicou que finalmente desestimouse “porque a fin de contas foi el o que lle puxo o nome de Illas Sisargas”. Do papel fundamental que xogou Paco Souto na historia do certame falou tamén o alcalde de Malpica, Eduardo Parga, e nese sentido considera que é preciso lembrar a súa figura.

Do mesmo xeito que Paco de Tano manifestou a intención da Asociación Cultural Caldeirón de manter o premio, o alcalde de Malpica expresou o compromiso do Concello de seguir colaborando como ata agora. “O certame de poesía erótica ten o noso apoio total porque cremos nesta iniciativa e esperamos que siga indo a máis, como ata agora”.

O prazo de inscrición está aberto ata o 30 de setembro. Os interesados poden enviar as súas obras ao Concello de Malpica (Avda. Emilio González López, 1-15113 Malpica de Bergantiños), indicando no sobre “XII Certame de Poesía Erótica Illas Sisargas”. O fallo farase público coincidindo coa Cea das Letras, na primeira fin de semana de novembro, e na que tamén se fará a presentación pública da obra gañadora na pasada edición. O Concello de Malpica financia a edición da obra gañadora e o premio, dotado con 1.000 euros. Consulta as bases completas pinchando aquí.

BASES XII CERTAME DE POESIA ERÓTICA ILLAS SISARGAS 2017

Relación de gañadores das edicións anteriores:

“Arredor do teu corpo”, Antonio García Teijeiro
“Baile Átha Cliath”, Alberte Momán
“Xoguetes póstumos”, Enma Pedreira
“Rúa da cancela”, Eli Ríos e Eduardo Estévez
“Amantes”, María Lado
“Carnia Haikai”, Elvira Riveiro
“Chamádeme Eva”, Mercedes Leobalde
“Dominio público”, Ramón Neto
“O episodio”, Verónica Martínez Delgado e Alberte Momán
“A razón do perverso”, Mário J. Herrero Valeiro
“O home invisíbel”, Xabier Queipo

Ler máis

1Mai 2017

ACTUALIDADE,Cultura,Novas

Malpica entra “Nos Tempos das Letras” con exposicións, contacontos, teatro, música e actividades literarias

Malpica entra “Nos Tempos das Letras” cun programa que inclúe propostas para todos os públicos e que abrangue diferentes manifestacións culturais. Durante cinco semanas, todos os venres ás 18 horas os máis pequenos da casa están chamados a participar nos “Venres na biblioteca”, que comezarán o 5 de maio co espectáculo de Gloria Mosquera “As aventuras de Mamá Cabra”, para nenos/as de 2 a 10 anos. O día 12 escoitarán os “Contos nacidos do mar” de Raquel Queizás, e o 19 chegará “A nosa música con Jorge e María”, ámbolos dous recomendados a partir de 3 anos. Para rapaces e rapazas de 5 a 12 anos, Ghazafelhos traerá o espectáculo “Camiñando entre estrelas” o día 26 de maio, e para rematar, para o 2 de xuño reservamos as historias de “Carmiña Miudiña, a pinga que quería ser científica”, con BocAberta.

Do 8 ao 31 de maio estará aberta, tamén na biblioteca, unha exposición sobre Carlos Casares, protagonista do cartel anunciador do programa. A literatura estará moi presente “Nos Tempos das Letras” grazas á colaboración da Asociación Cultural Caldeirón, que o luns 22 de maio presentará o XII Certame de Poesía Erótica Illas Sisargas (Centro Cívico, 12 horas), e o 3 de xuño convídanos á presentación da publicación “A relixión do mar”, de Xosé Iglesias (Casa do Pescador, 20 horas).

O 3 de xuño tamén será o día do teatro, co maratón de fin de curso a cargo do Obradoiro de Animación Teatral do Concello de Malpica. A partir das 18 horas, no auditorio do Centro Cívico, representará “O punto e final”, “Unha de bruxas”, “Margarida, a filla de Don Importante” e “Acampada no cemiterio”.

No programa “Nos Tempos das Letras”, organizado pola Concellería de Educación, Cultura e Turismo, tamén colaboran a Secretaría Xeral de Cultura e a Secretaría Xeral de Política Lingüística da Xunta de Galicia.

Ler máis

11Abr 2017

ACTUALIDADE,Cultura,Novas

Artesanía, música e relixiosidade na Semana Santa de Malpica

Na Semana Santa de Malpica non falta de nada. Mesmo o bo tempo semella estar garantido, segundo as previsións de Meteogalicia, o que axudará ao bo desenvolvemento das actividades organizadas directamente polo Concello ou por diversas entidades coa colaboración municipal.

A artesanía ten un peso específico no programa, comezando pola ampliación do horario de apertura do Ecomuseo do Forno do Forte de, que poderá visitarse ata o sábado de 10 a 14 e de 16 a 20 horas, e o domingo de 10 a 14 horas. En colaboración coa Asociación Oleira de Buño terán lugar o venres e o sábado as Rutas guiadas pola Olería de Buño, que inclúen un percorrido explicativo polos fornos visitables, guiado por Antonio Pereira “O Rulo”, e outro paralelo de fotografía. Tanto o día 14 como o 15 haberá unha ruta de 11.30 a 13.30 horas e outra de 17 a 19 horas.

Pola súa banda, a asociación de redeiras O Fieital ofrece visitas guiadas individuais e para grupos, previa reserva no teléfono 617 695 230. E para quen queira saber máis sobre a vila de Malpica recomendamos as rutas temáticas urbanas Tras os pasos de Lugrís (saída da praza Villar Amigo), Balcón das Sisargas (paseo do Caldeirón) e Balcón do porto (Casa do Pescador), con audioguías.

A música tamén estará moi presente na Semana Santa de Malpica, comezando o xoves 13 coa 5ª edición da Festa da Xuventude, que reunirá ás orquestras New York e Bomba e a discoteca móbil CDC nunha velada que se prevé multitudinaria. O venres teremos tamén sesión vermú no centro da vila con MCarballo Banda, o grupo do ourensán Manuel Carballo, guitarrista e compositor con máis de 30 anos de experiencia, que colaborou con grupos e músicos galegos como Miguel Costas, Cristina Pato ou Magín Blanco, e que presenta agora novo traballo discográfico cun estilo moi persoal. A súa estancia en Malpica prolongarase ata o sábado, cunha nova actuación pola tarde, tamén ao aire libre.

E polo que se refire á celebración relixiosa, o acto central será a procesión do Venres Santo, que sairá ás 20 horas dende a igrexa de San Xulián acompañada pola Banda de Gaitas Malante.

Ler máis

9Abr 2017

ACTUALIDADE,Cultura,Novas

As Torres de Mens abriron as súas portas para recibir a un grupo de excursionistas do municipio de Cambre

As Torres de Mens abriron hoxe as súas portas ao público, excepcionalmente, para recibir a un grupo de máis de corenta excursionistas procedentes do municipio coruñés de Cambre. A visita foi xestionada polo departamento de Educación, Cultura e Turismo do Concello de Malpica, que contactou co propietario do BIC (Ben de Interese Cultural), Agustín Ordóñez, quen, ademais de abrir a súa residencia, exerceu como guía. O alcalde de Malpica, Eduardo Parga, agradeceu a hospitalidade do dono das torres achegándose tamén ata a histórica fortaleza e facéndolle entrega dun conxunto de pezas tradicionais de Olería de Buño.

A viaxe a Malpica forma parte do programa de actividades da Oficina de Información Xuvenil de Cambre, que cada mes organiza unha excursión a un concello galego para coñecer novas rutas de sendeirismo, visitar algún recurso turístico (neste caso, as Torres de Mens) e ofrecer aos mozos e mozas a posibilidade de practicar actividades diferentes. En Malpica, ademais de percorrer un treito do Camiño dos Faros, asistiron a un curso de pesca e pola tarde levárono á práctica.

As Torres de Mens son un conxunto amurallado composto por vivenda e tres torres de planta cadrada. No último andar dunha delas sobresae un balcón corrido de madeira, apoiado sobre ménsulas de pedra. Pertenceron aos Condes de Altamira, e no ano 1467 quedaron parcialmente derruídas. No ano 1988, o seu propietario, Agustín Ordóñez, encargoulle a rehabilitación ao arquitecto Manuel Gallego Jorreto, un traballo que recibiu o premio Europa Nostra no 1993.

Ler máis

1Abr 2017

ACTUALIDADE,Cultura,Novas

O Ecomuseo do Forno do Forte de Buño ampliará o seu horario de apertura durante a Semana Santa

O Ecomuseo do Forno do Forte de Buño ampliará o seu horario de apertura durante a Semana Santa coa finalidade de converterse nun recurso de referencia para as persoas que visiten a nosa comarca durante eses días. Deste xeito, dende o luns 10 ata o sábado 15 o ecomuseo estará aberto de 10 a 14 e de 16 a 20 horas, e o domingo 15 poderá visitarse de 10 a 14 horas.

O Forno do Forte consta de 11 estruturas distribuídas arredor do forno -que é a peza central-, como o cabanote, o hórreo, a administración, a taberna, a tenda, a exposición agrícola e as vivendas dos oleiros. Durante todo o horario de apertura ao público, á parte de visitar as instalacións, o público poderá ver o traballo do oleiro Antonio Corral no torno.

O Concello de Malpica aproveita a celebración dos Días Europeos da Artesanía, esta fin de semana, para convidarvos a visitar o Forno do Forte e a vila de Buño. Precisamente hoxe recibimos dúas visitas moi interesantes, unha organizada pola Fundación Eduardo Pondal e outra dun grupo de veciños e veciñas do barrio coruñés dos Rosales (adxuntamos foto), que tamén percorreron a vila de Malpica e quedaron a xantar na Casa da Cultura de Seaia. O alcalde, Eduardo Parga, e o concelleiro Miguel Fernández exerceron como anfitrións.

Ler máis