gl_ES
Tempo Malpica de Bergantiños
Mércores 14°
10°
Xoves 14°
Venres 14°
11°
tiempo.com   +info
  1.  
  2. Cultura

Cultura

18Nov 2019

O Concello de Malpica organizará diversos obradoiros con motivo da ‘Semana Contra as Violencias’

O Concello de Malpica, coas súa concellerías de Igualdade e Benestar á cabeza, organizará con motivo da Semana Contra as Violencias diversos obradoiros, no Centro Civico malpicán e na Casa da Cultura de Seaia.

O xoves 21 de novembro, de 18:00 ás 19:30 horas no Centro Cívico de Malpica, celebrarase o ‘Obradoiro para a prevención do síndrome de persoas coidadoras’. O martes 26 de novembro, tamén de 18:00 a 19:30 horas e na Casa da Cultura de Seaia, terá lugar o ‘Obradoiro de risoterapia e sororidade para mulleres’.

Todas as persoas que o desexen, poden apuntarse no 981 720 280. Ambas son actividades completamente de balde. A concelleira de Igualdade do Concello de Malpica, Leticia Varela Naya, destaca que “ambas propostas reflicten a nosa implicación non só co benestar social, senón tamén pola integración, e promulgación de valores como o respecto e a igualdade en todos os ámbitos. Agradecemos a PsicoNova a súa implicación en dúas actividades moi importantes para a veciñanza, e para seguir camiñando para acadar a igualdade en todas as facetas do ámbito social”, destacaba Varela.

22Out 2019

A Mostra de Teatro de Malpica celebra o seu 15º aniversario cun ciclo paralelo de espectáculos en locais comerciais e hostaleiros

A Mostra de Teatro de Malpica cumpre 15 anos, e para celebralo, ademais das funcións de sala no auditorio do Centro Cívico, a Concellaría de Cultura organiza un ciclo paralelo de espectáculos en comercios e establecementos hostaleiros da vila. Esta semana arranca o noso particular outono teatral, no que realizaremos un percorrido pola escena galega máis actual e divertida a través de 11 propostas escénicas moi variadas. Son todas estas:

Ciclo de sala

  • 25 de outubro (20.30 horas). Producións Teatrais Excéntricas S.L.
    Mofa & BefaCranios privilexiados … ou crítica da razón perralleira.

Elenco: Josito Porto e Víctor Mosqueira
Duración: 85 minutos
Xénero: Comedia
Público preferente: maiores de 13 anos

  • 1 de novembro (20.30 h). Ainé Producións Acusmaser Opus
    O montacargas (The Dumb Waiter)

Elenco: Santi Romai e Federico Pérez
Dirección: Evaristo Calvo
Duración: 50 minutos
Xénero: Teatro do absurdo
Público preferente: Adulto (en todo caso maiores de 13 anos)

  • 8 de novembro (20.30 horas). Redrum Teatro
    Idiota

Elenco: Machi Salgado e Susana Sampedro
Dirección: Álex Sampayo
Duración: 70 minutos
Xénero: Comedia negra
Público preferente: Adulto (en todo caso maiores de 13 anos)

  • 15 de novembro (20.30 h). Culturactiva Sociedade Cooperativa Galega
    Papar sen cancelas

Elenco: Isabel Risco, Pedro Brandariz e Fran Rei
Dirección: Diego Rey
Duración: 85 minutos
Xénero: Comedia, clown e improvisación
Público preferente: Adulto (en todo caso maiores de 13 anos)

  • 22 de novembro (20.30 h). Malasombra Producións
    Os fabulosos cleaners

Elenco: Josue García e Xoque Carbajal
Dirección: Marcos Orsi
Duración: 55 minutos
Xénero: Espectáculo de pompas de xabón
Público preferente: Todos os públicos, a partir de 4 anos

  • 29 de novembro (20.30 h). Baobab Teatro
    Puño puñete

Elenco: Andrea Bayer e Davide González
Duración: 45 minutos
Xénero: Espectáculo musical
Público preferente: Familiar / infantil, especialmente nenas/os de 1 a 7 anos

  • 6 de decembro (20.30 h). Magín Blanco e Teatro Ghazafelhos
    A nena e o grilo máis aló

Músicos: Magín Blanco (guitarra e voz), Cristian Legiero (teclado)
Actrices/actores: Teatro Ghazafelhos (Pepablo Patinho, Montse Piñón e Jorge Casas)
Duración: 60 minutos
Xénero: teatro musical infantil
Público preferente: Familiar e infantil, especialmente maiores de 3 anos.

Como é habitual, ao remate dos espectáculos de sala recolleranse as valoracións do público, que poderá puntuar cada actuación do 1 ao 5, axudando deste xeito a mellorar cada ano a programación segundo os gustos dos/as espectadores/as.

Paralelamente, este ano teremos a oportunidade de asistir a outros espectáculos fóra do auditorio do Centro Cívico grazas á colaboración de comercios e locais de hostalaría da vila. O programa do Ciclo Ruada é o seguinte:

  • 11 de novembro (22.30 horas). Pub Leño
    Monólogo de
    Pepo Suevos
    Público preferente: Adulto
  • 23 de novembro (23.00 horas). Submarino Bar
    Monólogo de
    Oswaldo Digón
    Público preferente: Adulto
  • 24 de novembro (12.30 horas). Librería Míguens
    Paula Carballeira presenta O río da bruxa
    Público preferente: Infantil / familiar
  • 1 de decembro (12.30 horas). Escola Surf A Mar
    O
    Mago Álex presenta De ilusións tamén se vive
    Público preferente: Infantil / familiar

Todos os espectáculos son de balde. O Concello de Malpica conta coa colaboración da Deputación Provincial da Coruña na organización da XV Mostra de Teatro.

Cartel_A2(1)

17Out 2019

Malpica celebra o 86º aniversario das Misións Pedagóxicas con monicreques, magosto e concurso de disfraces de época

As Misións Pedagóxicas volven a Malpica 86 anos despois. Aquel proxecto de solidariedade cultural que levou bibliotecas, música, cine e teatro a máis de 7.000 pobos e aldeas españois entre 1931 e 1936, chegou ao noso concello o 20 de outubro de 1933. A representación de A doncela guerreira, de Rafael Dieste, foi o primeiro espectáculo de monicreques que se levou a cabo en España, e a Concellería de Cultura quere lembrala este ano dun xeito especial. Así, este domingo, día 20, volverá a haber monicreques no mesmo lugar (se o tempo o permite) que 86 anos atrás. En caso de choiva os actos trasladaranse ao Mercado Municipal (rúa Patria Galega).

Pero o programa de actividades deseñado pola Concellaría de Cultura, que conta un ano máis coa colaboración coa A.C. Malante, a A VV San Antonio e A Tropa dos Pardo, será máis amplo. De feito, xa está aberta na aula circular do Fondo Lugrís, no Centro Cívico, a mostra fotográfica As Misións Pedagóxicas en Malpica, que pode visitarse ata o día 31, e que inclúe novas achegas. Para seguir ampliándoa, durante estes días todos os veciños e veciñas que dispoñan de fotografías daquela época poden achegalas ao Departamento de Cultura para proceder á súa dixitalización e incorporalas á exposición. As persoas que colaboren recibirán un CD con todas as imaxes recompiladas.

O día 20, como hai 86 anos, as Misións Pedagóxicas chegarán a Malpica. Ás 18 horas, na Praza de Anselmo Villar Amigo (fronte á Casa da Santa), a actriz e titiriteira Larraitz Urruzola representará Dona Barriga Verde, un espectáculo para todos os públicos recomendado para nenos e nenas a partir de 6 anos.

A Praza de Anselmo Villar Amigo será tamén o escenario, a partir das 19.00 horas, dun magosto popular no que contaremos coa música de A Tropa dos Pardo, as Cantareiras da A.C. Malante e a formación Os do fondo da barra cos seus cantos de taberna, e no que, como non podía ser doutro xeito, haberá castañas, pero tamén viño, licor café e chocolate. Todo de balde agás as cuncas, que se venderán a 2 euros e que permitirán recuncar tantas veces como se queira ata esgotar existencias.

A xornada completarase cun Concurso de disfraces de época, con premios para a mellor caracterización dos anos 1920-1930. Haberá unha categoría infantil (ata 12 anos) e outra absoluta, e o xurado será popular. O primeiro premio na categoría infantil consistirá en trofeo e un vale de 50 euros para a compra de libros, e na absoluta, en trofeo e vale de 100 euros canxeable no comercio e na hostalaría locais.

86MPed-Cartel-cambios

21Set 2019

As Tardes na Biblioteca enchen o outono con propostas culturais para nenas e nenos de 3 a 12 anos

tardes_na_biblioteca

A vindeira semana comezan as Tardes na Biblioteca, unha iniciativa da Concellería de Cultura para encher de actividades lúdicas, creativas e educativas as tardes de outono dos nenos e nenas de 3 a 12 anos. Durante catro semanas consecutivas, a biblioteca Eduardo Blanco Amor, situada no segundo andar do Centro Cívico, converterase no escenario de diferentes espectáculos. A cita será fixa: os venres ás 18.00 horas.

Estas son as propostas:

Venres 27 de setembro
Bibliodiscoteca de María Faltri. Unha festa para divertirnos en galego. Cantar, bailar e rir escoitando os mellores temas feitos en Galicia para os máis pequenos da casa. Unha bibliodiscoteca itinerante onde os protagonistas son as/os convidadas/os que veñen a pasalo moi ben.
Público preferente: nenas e nenos de 3 a 11 anos. Duración 60 minutos.

Venres 4 de outubro
“A tortoise, un can, two monsters e un picnic” de Pérez&Fernández. Unha sesión de contos en inglés-galego ambientada nun picnic perfecto onde os obxectos cobrarán vida para axudar ao entendemento das narracións; sinxelas pero cargadas de intención e valores como a empatía, a solidariedade, a fidelidade e o amor.
Público preferente: nenas/os de 3 a 8 anos. Duración: 55 minutos.

Venres 11 de outubro
Concerto sobre Antón Fraguas de Xoán Curiel. Concerto no que Xoán Curiel interpreta cantigas recollidas por Antón Fraguas e cancións de composición propia relativas á vida e obra de Antón Fraguas.
Público preferente: nenas/os de 8 a 12 anos. Duración 45 minutos.

Venres 18 de outubro
“Príncipas e princesos” de Os contos de Pablísimo. ¡Faise saber que se buscan príncipes rosas…e princesas azuis! ¡Faise saber que ides escoitar contos de valentes princesas enfrontándose a dragóns e de príncipes que lavan a roupa e pasan o ferro!… Son contos de Príncipas e Princesos. Unha sutil e divertida reflexión sobre a igualdade.
Público preferente: nenas/os de 4 a 10 anos. Duración 40 minutos.

Colabora: Secretaría Xeral de Cultura da Xunta de Galicia, programa Ler Conta Moito

19Set 2019

A Escola Municipal de Actividades Escénicas prepara o comezo do curso en Malpica e Buño

A Concellaría de Cultura porá en marcha en outubro un novo curso da Escola Municipal de Actividades Escénicas (EMAE), na que cada ano se forman pequenas actrices e pequenos actores do noso concello. Os talleres van dirixidos a nenos e nenas de 3 a 14 anos, que ademais poderán compaxinar esta actividade co obradoiro de manualidades.

O prazo de inscrición para a EMAE estará aberto do 23 de setembro ao 4 de outubro. O alumnado do curso 2018-19 que repita matrícula conservará o horario e o grupo do ano pasado. Para o resto, a distribución prevista (pode haber variacións en función da matrícula) é a seguinte:

Malpica (auditorio do Centro Cívico)

  • Grupo I (3 a 6 anos): xoves 15.00 a 16.00 h.
  • Grupo II (9-11 anos): xoves 16.00 a 17.00 h.
  • Grupo III (12-14 anos): xoves de 17.00 a 18.00 h.
  • Grupo IV (7 -8 anos): xoves de 18.00 a 19.00 h.

Inicio da actividade: Xoves 10 de outubro ás 16.00 h. no Centro Cívico

Buño (CEIP Joaquín Rodríguez Otero)

  • Grupo V (6-12 anos): venres, de 17.00 a 18.00 h.

Inicio da actividade: Venres 11 de outubro ás 17.00 h. no CEIP Joaquín Rodríguez Otero

Prezo

  • 16,29 €/mes (1 actividade)
  • 19,54 €/mes (2 actividades: 1 usuario teatro+manualidades)

Información e inscricións
Centro Cívico do Concello de Malpica de Bergantiños
Departamento de Educación e Cultura / Biblioteca
De 10.00 h. a 13.00 h.
Tfno: 981 707 104

emae

10Set 2019

Concello e Deputación exploran novas vías de colaboración que permitan afondar na promoción da Olería de Buño

visita deputacion

A concelleira de Olería, Leticia Naya Varela, acompañou ao deputado provincial de Patrimonio e Contratación, Xosé Lois Penas Corral, nunha visita ao Ecomuseo do Forno do Forte como primeiro paso de cara á apertura de novas vías de colaboración que permitan afondar na promoción da Olería de Buño como un dos eixos da promoción económica, cultural e turística do Concello de Malpica de Bergantiños, ademais de marca de identidade.

Ámbolos dous representantes das administracións local e provincial coinciden no enorme potencial da olería. Neste sentido, Penas Corral subliñou que “a artesanía é tradición, cultura e identidade, mais tamén futuro e, nese sentido, cómpre desenvolver recursos que supoñan un potencial económico para o concello”.

Nesa liña enmárcanse as accións desenvolvidas ata o momento, entre as que destacan o convenio anual entre a Deputación e o Concello de Malpica para a xestión municipal do Ecomuseo do Forno do Forte, que é de titularidade provincial, ou a subvención para a Mostra da Olería de Buño, que acada os 80.000 euros. “Desde o goberno da Deputación cremos que o patrimonio ten que estar xestionado polos propios concellos e, neste sentido, somos conscientes de que é preciso continuar na liña de colaboración desenvolvida nos últimos anos”, apuntou Xosé Lois Penas.

31Ago 2019

Entramos no último mes de prazo para participar no Certame de Poesía Erótica Illas Sisargas

O Certame de Poesía Erótica Illas Sisargas acada a súa 14ª edición convertido no único da súa temática en España. O concurso está organizado pola Asociación Cultural Caldeirón coa colaboración do Concello de Malpica, que financia a publicación da obra gañadora e o premio en metálico, dotado con 1.000 euros.

Co paso dos anos, o Certame de Poesía Erótica foi gañando en prestixio e participación, e nas últimas edicións móvese arredor das 20 obras a concurso. O prazo para participar está aberto ata o 30 de setembro, este ano coa novidade de que as obras deberán presentarse en formato pdf e vía correo electrónico no enderezo premio@caldeiron.org.

Nas edicións anteriores estes/as foron os títulos e os/as autores/as gañadores/as:
1. “Arredor do teu corpo”, Antonio García Teijeiro
2. “Baile Átha Cliath”, Alberte Momán
3. “Xoguetes póstumos”, Enma Pedreira
4. “Rúa da cancela”, Eli Ríos e Eduardo Estévez
5. “Amantes”, María Lado
6. “Carnia Haikai”, Elvira Riveiro
7. “Chamádeme Eva”, Mercedes Leobalde
8. “Dominio público”, Ramón Neto
9. “O episodio”, Verónica Martínez Delgado e Alberte Momán
10. “A razón do perverso”, Mário J. Herrero Valeiro
11. “O home invisíbel”, Xabier Queipo
12. “Diáspora de amor balea”, Andrea Nunes Brións e María Rosendo
13. “Marco Livornio”, Mario Regueira

Descarga aquí as bases premio illas sisargas 2019 (2 pax)

23Ago 2019

O Concello de Malpica habilita un aparcamento para 1.000 vehículos e un servizo de microbús durante as Festas do Mar

tirolina

Nestas Festas do Mar non haberá problemas para aparcar en Malpica, porque a Concellaría de Turismo, Festexos, Seguridade Cidadá e Tráfico vén de habilitar unha ampla zona de estacionamento nas inmediacións do campo de fútbol de Pedra Queimada con capacidade para 1.000 vehículos e con iluminación.

Este ano, ademais, e como novidade, un servizo de microbús conectará o aparcamento co centro da vila. O microbús funcionará durante a fin de semana (sábado e domingo) dende as 23.00 ata as 05.00 horas, aproximadamente, para facilitar os desprazamentos ás persoas que se acheguen a desfrutar das verbenas das Festas do Mar. O servizo será circular, polo que os desprazamentos realizaranse cada 10-15 minutos, e de balde.

O concelleiro de Turismo, Festexos, Seguridade Cidadá e Tráfico, Alfredo Cañizo, agarda que as medidas adoptadas contribúan a mellorar a mobilidade e a garantir a comodidade da multitude de persoas que se achegan durante estes días á nosa vila.

Ademais, animou a todos os visitantes a seguir desfrutando da tirolina xigante instalada no porto, que dende a Festa Galega está a ser un dos principais atractivos non só do noso concello, senón de toda a Costa da Morte. A tirolina, de 150 metros de lonxitude e 11 de altura, conseguiu no ano 2017 o récord da tirolina portátil máis longa de Europa e na actualidade é a segunda máis longa das súas características.

13Ago 2019

A Festa Galega cumpre 12 anos cun cartel de luxo e volve a vir moi ben “acompañada” pola Feira Medieval Mariñeira

Esta fin de semana a música tradicional galega volverá a inundar as rúas de Malpica, porque volve a Festa Galega para celebrar o seu 12º aniversario cun cartel de auténtico luxo. Pero non agardes ao venres para achegarte ata a nosa vila, porque o xoves 15 inauguramos a VII Feira Medieval Mariñeira, que este ano ofrécenos catro xornadas repletas de actividades. Bótalle unha ollada ao programa.

VII FEIRA MEDIEVAL MARIÑEIRAXoves 15 de agosto
11.00 h. Apertura do mercado ao público
14.30 h. A xantar!
18.00 h. O mariñeiro Grog e os músicos piratas percorren o mercado
20.00 h. Pasarrúas musical Deaki- pala
22.00 h. Brasas voadoras (pirotecnia e música en vivo)
Venres 16 de agosto
11.00 h. Apertura do mercado ao público
12.00 h. O pirata Patas Palos e os músicos Dreaki-pala percorren o mercado
13.30 h. Pasarrúas musical Dreaki-pala
14.00 h. Pasen e vexan! (malabarismos)
14.30 h. A xantar!
18.00 h. O mariñeiro Grog e os músicos piratas percorren o mercado
20.00 h. Pasarrúas musical Dreaki-pala
21.00 h. Brasas voadoras (lume e música en vivo)
Sábado 17 de agosto
11.00 h. Apertura do mercado ao público
12.00 h. O pirata Patas Palos e os músicos Dreaki-pala percorren o mercado
14.00 h. Pasen e vexan! Nacho Malabardo (malabarismos)
14.30 h. A xantar!
18.00 h. O mariñeiro Grog e os músicos piratas percorren o mercado
20.00 h. pasarrúas musical Dreaki-pala
21.00 h. Brasas voadoras (lume e música en vivo) – Nacho Malabardo e Dreaki- pala.
Domingo 18 de Agosto
11:00 h – Apertura do mercado ao público
11:30 h – Pasaxeiros ao tren! (paseos en tren polo porto, saídas dende a Casa do Pescador)
12.00 h. O pirata Patas Palos e os músicos Dreaki-pala percorren o mercado
13.30 h. Animación musical
14.00 h. Pasen e vexan Nacho Malabardo (malabarismos)
14.30 h. A xantar!
18.00 h. Pasaxeiros ao tren! (paseos en tren polo porto, saídas dende a Casa do Pescador)
O mariñeiro Grog e os músicos piratas percorren o mercado
20.00 h. Pasarrúas musical Dreaki-pala
22.00 h. Brasas voadoras (lume e música en vivo)

Este intenso programa completarase os días 16 e 17 coas actuacións da Festa Galega para ofrecerche uns días inesquecibles. Toma nota!

XII-Festa-Galega 2Venres 16 – Porto de Malpica
22.00 h. Banda de Gaitas da A. C. Malante
22.30 h. Cantareiras da A. C. Raigañas
23.00 h. Leilía
00. 15 h. Dequenvessendo
Sábado 17
12.00 h. VII Desfile de Bandas de Gaitas da A.C. Malante (sairán do Centro Cívico de Malpica)
14.00 h. Xurelada Tradicional. A C. D. A Estádiga
22.00 h. Cantareiras Meigallo da A. C. Carcaxía (no porto)
22.30 h. De Vacas (no porto)
24.00 h. Xosé Lois Romero e Aliboria (no porto)
01.30 h. Os do fondo da barra (no porto)

 

12Ago 2019

Xa podes inscribirte no Concurso de barcanas e castelos de area “Praia de Area Maior”

Xa podes inscribirte no Concurso de barcanas e castelos de area “Praia de Area Maior”, organizado pola Concellería de Cultura de Malpica e que celebrará a súa 19ª edición o 23 de agosto, coincidindo, como é tradición, co arranque das Festas do Mar. As anotacións poderán realizarse no Centro Cívico ata o día 22 e o propio día 23 ata as 11.00 horas na praia.

Haberá tres modalidades de participación: infantil (ata os 10 anos), amateur (de 10 anos en diante) e barcanas (sen límite de idade). E outorgaranse seis premios: 1º, 2º e 3º na modalidade amateur (Premios Sonpress 2019, dotados con 130, 70 e 50 euros, ademais de trofeo), premio á mellor barcana (Premio Asociación de Mulleres Redeiras Artesás Mar da Illa, consistente en trofeo), premio infantil (trofeo) e premio especial do público (Premio Asociación de Amas de Casa de Malpica, consistente en trofeo), que se elixirá mediante votación en urna de 13.00 a 13.30 horas.

As persoas participantes disporán de dúas horas para elaborar as súas creacións con area na Praia de Area Maior. O xurado, integrado por representantes do Concello de Malpica e das entidades colaboradoras, valorará a calidade artística e a orixinalidade de cada proposta segundo os criterios establecidos.

CARTEL CASTELOS AREA xullo 19

 

Página 1 de 1112345...10...Última »