Síguenos en
gl_ES
Tempo Malpica de Bergantiños
Sábado 13°
Domingo 14°
10°
Luns 14°
10°
tiempo.com   +info
  1.  
  2. ACTUALIDADE

ACTUALIDADE

18Mar 2016

O alcalde de Malpica asinou o contrato de mantemento do alumeado público coa empresa adxudicataria

A UTE formada por Ifedic Pereira SL e Tecnored SA encargarase do servizo durante dous anos, cun custo total de 133.184 euros

O alcalde de Malpica, Eduardo Parga, asinou hoxe o contrato de mantemento do alumeado público coa Unión Temporal de Empresas (UTE) formada por Ifedic Pereira SL e Tecnored SA. O contrato ten unha duración de dous anos, prorrogables por un ano máis, e un prezo total de 133.184 euros.

Segundo consta no contrato, a UTE encargarase do servizo de conservación e mantemento do alumeado público no municipio de Malpica de Bergantiños, así como do subministro e instalación de arcos luminosos festivos e grupo electróxeno para festas.

 

17Mar 2016

A entrega dos títulos da concentración parcelaria de Cerqueda levarase a cabo antes do verán

As técnicas de Medio Rural desprazadas a Malpica para recoller a documentación dos titulares das parcelas atenderon a 400 persoas

PARCELARIA---DITO-1-web

Os titulares das parcelas resultantes do proceso de concentración parcelaria na parroquia de Cerqueda disporán dos seus títulos de propiedade antes do verán. Unha vez rematado o proceso de recompilación de documentación que se levou a cabo ao longo desta semana, o acto oficial de entrega dos títulos podería realizarse xa no mes de abril en Malpica.

Técnicas da Consellería de Medio Rural atenderon aos veciños e veciñas no Centro Cívico dende o luns ata hoxe, en horario de 10.00 a 13.30. Nestes catro días pasaron polo edificio case 400 persoas, a maioría en representación de varios titulares. O alcalde de Malpica, Eduardo Parga, que tamén acudiu hoxe para interesarse polo desenvolvemento do proceso, informou de que aquelas persoas que por calquera motivo non puideron desprazarse a Malpica esta semana poderán recoller igualmente o seu título de propiedade na Xefatura Territorial de Medio Rural, na Coruña, previa identificación co carné de identidade.

O proceso de concentración parcelaria na parroquia de Cerqueda iniciouse no ano 1992 e afectou a unha superficie de 793 hectáreas. Das 4.585 parcelas iniciais pasouse ás 1.849 actuais, que teñen unha superficie media de 3.700 metros cadrados. A Consellería de Medio Rural investiu preto de 1,8 millóns de euros para a asistencia técnica e as obras, que consistiron, por unha banda, na realización dos servizos técnicos para a investigación da propiedade, levantamentos topográficos e confección de planos parcelarios, clasificación de terras e acondicionamento de fincas e, por outra, no deseño e creación dunha rede axeitada de camiños principais e secundarios que permiten o acceso ás novas fincas e o tránsito de máquinas agrícolas.

A regulación e ordenamento do novo deseño das fincas permite acadar unha mellor capacidade de aproveitamento da terra e supón un mecanismo dinamizador para a economía local.

9Mar 2016

O Concello de Malpica implícase na posta en marcha dos PIMD Rural

IMG_20160308_121719-web

O Concello de Malpica expresou onte o seu compromiso coa posta en marcha do Punto de Intervención para Mulleres con Diversidade (PIMD) Rural, un novo servizo da Asociación Íntegro na que están implicados os catro concellos que compoñen a asociación supramunicipal Costa Bergantiñá (Malpica, Ponteceso, Cabana e Laxe).

O alcalde, Eduardo Parga, e a concelleira de Servizos Sociais, Marisol Blanco, asistiron no centro de recursos de Nantón á presentación do PIMD Rural. O presidente de Íntegro, Adolfo López Baña, explicou que a extensión dos puntos de intervención limítase de momento aos concellos de Costa Bergantiñá por cuestións de persoal, aínda que a intención de Íntegro é continuar coa ampliación en función da dispoñibilidade dos técnicos e da implicación dos concellos.

A terapeuta ocupacional e directora do centro de recursos de Íntegro, Noelia Barreira, e a psicóloga, Begoña Rial, foron as encargadas de explicar as liñas xerais do PIMD Rural, un programa específico de asesoramento e intervención integral para mulleres con diversidade funcional, tanto no ámbito social coma no educativo, o cultural ou o laboral. De feito, aínda que a iniciativa botará a andar en colaboración cos departamentos municipais de Servizos Sociais, o obxectivo é implicar tamén a orientadores/as laborais e axentes de desenvolvemento local.

4Mar 2016

O conselleiro de Sanidade acudiu á recepción da obra do novo centro de saúde de Buño

O conselleiro de Sanidade, Jesús Vázquez Almuiña, asinou hoxe en Buño a acta de recepción da obra do centro de saúde, unhas instalacións completamente novas que poderán atender a unha poboación ao redor de 1.600 persoas.

SAMSUNG CAMERA PICTURES

A obra de urbanización exterior, que executou o Concello de Malpica, tamén está lista, así que só falta o equipamento para que o centro poida abrir as súas portas. O edificio -cofinanciado nun 50% por fondos do Estado, dentro do Plan de Desenvolvemento Rural Sustentable- ten un importe de 624.000 euros, e a superficie que se construíu é de 524 metros cadrados. Contará cunha área médica, con dúas consultas de medicina de familia; unha consulta de enfermería e unha sala polivante; ademais dunha área de administración cun arquivo, almacéns e outros servizos comúns, necesarios para o correcto funcionamento do centro.

Xunto ao conselleiro acudiron a Buño representantes da Xunta e do Sergas. Por parte do Concello de Malpica asistiron o alcalde, Eduardo Parga, e os concelleiros Miguel Fernández, Iago Espasandín e Marisol Blanco.

1Mar 2016

O CEIP Milladoiro convértese nun dos primeiros colexios galegos que introduce a cociña no seu programa educativo

A comunidade educativa, a ANPA e o Concello de Malpica colaboraron na posta en marcha da pioneira Aula de Cociña.

 

CONVIDADOS_web

O CEIP Milladoiro de Malpica convértese nun colexio pioneiro na Costa da Morte coa posta en marcha da Aula de Cociña, unha das poucas que están en funcionamento en Galicia, e que dende onte é unha realidade grazas á implicación de toda a comunidade educativa. De feito, como destacaron todos os participantes no acto de inauguración, o proxecto, impulsado por un grupo de docentes co apoio do equipo directivo, tivo tan boa acollida que só fixeron falla uns meses para poñelo a andar. O Concello de Malpica encargouse do acondicionamento das instalacións e o mobiliario, mentres que a ANPA achegou electrodomésticos, enxoval e ata as cortinas. “Onde había un espazo sen uso agora temos unhas instalacións ao servizo da educación que reciben os nenos deste pobo”, sinalou a directora do colexio, Olga Rodríguez, que destacou as enormes posibilidades didácticas que ofrece a aula, porque a cociña, dixo, “ é física, é química, é matemáticas, é lingua…”.

DOCE-NENOS-2_webA esa transversalidade aludiu tamén o cociñeiro Fernando Agrasar, propietario do restaurante As Grazas, que posúe unha estrela Michelin, e que non quixo perderse o acto de inauguración da Aula de Cociña. “Para min é fundamental que os nenos experimenten na cociña, e ademais a cultura gastronómica edúcase, non se nace con ela”, declarou. Agrasar destacou a enorme demanda de profesionais da restauración. “É unha profesión de moda, cunha saída laboral do 98%, e nese sentido a gran materia pendente que temos na comarca é unha escola de hostalería forte”, engadiu.

Xunto ao coñecido restaurador estivo outra cociñeira moi coñecida en Malpica, Carmen Verdes, que, malia que se autodefine como afeccionada, ten ensinado a cociñar a moitas xeracións de malpicáns a través dos cursos que imparte na Asociación de Amas de Casa. Na inauguración da Aula de Cociña declarou a súa paixón polo chocolate e a améndoa, dous produtos que domina á perfección, como demostrou cos doces que elaborou para o acto, ao que asistiron membros da ANPA, docentes, o alcalde de Malpica, Eduardo Parga, e o tenente de alcalde e representante do Concello no consello escolar, Miguel Fernández.

DOCE-NENOS-1_web

Pero non foron os doces de Carmen nin os de Fernando os protagonistas da tarde, senón que o foron os que elaboraron os nenos e nenas, todos eles inspirados en contos e ademais co reto de ter que facer todas as elaboracións en frío, en forno ou en microondas, xa que na aula non se traballa con lume, polo menos de momento.

Pero o proxecto, que o alcalde de Malpica cualificou como “sorprendente” e “moi interesante”, non fixo máis que arrancar. A partir de agora será o profesorado o encargado de dinamizalo, xa que cada titor traballará na Aula de Cociña cos seus alumnos e alumnas. Iso si, tanto Carmen Verdes coma Fernando Agrasar brindáronse a acudir ao colexio para realizar algunha que outra “masterclass” ao longo do curso.

26Feb 2016

O Concello de Malpica abrirá o 1 de marzo a inscrición para as 10 prazas que ten reservadas na Travesía a Nado Illas Sisargas

  • O prazo estará aberto ata o día 23, e no caso de que haxa máis de 10 solicitudes realizarase un sorteo público o día 29
  • As persoas seleccionadas aboarán unha cota reducida de 30 euros

O Concello de Malpica abrirá o 1 de marzo o prazo de inscrición para as 10 prazas que ten reservadas na 7ª Travesía a Nado Illas Sisargas, que se celebrará o 14 de agosto. Segundo informou o concelleiro de Deportes, Iago Espasandín, o prazo de solicitude estará aberto ata o día 23 de marzo e no caso de o número de candidatos/as supere o de prazas procederase á celebración dun sorteo público que se celebraría o 29 de marzo, ás 12.00 horas, no Concello de Malpica.

Para a adxudicación das 10 prazas teranse en conta os seguintes criterios:

  • En primeiro lugar terán preferencia as persoas empadroadas no Concello de Malpica.
  • En segundo lugar, se quedan prazas libres, sortearanse entre @s nad@s no concello de Malpica.
  • En último lugar, as prazas que continúen vacantes sortearanse entre @s residentes no concello de Malpica.

A inscrición realizarase no Departamento de Deportes do Concello de Malpica en horario de 9:00 – 14:00 ou no teléfono 981 720 001. As persoas que resulten adxudicatarias das 10 prazas reservadas para o Concello de Malpica pagarán unha cota de inscrición reducida de 30 €. O concelleiro Iago Espasandín agradece ao Club Travesía Sisargas a súa boa predisposición e a súa colaboración para habilitar este prazo extraordinario de inscrición.

Toda a información da Travesía está na web www.travesiasisargas.com

22Feb 2016

O domingo 14 de agosto celebrarase a VII edición da “Travesía a nado Sisargas” Malpica

Durante o mes de abril estará aberto o prazo para inscribirse nesta proba en mar aberto cunha distancia en liña recta de 4,2 km

sisargas travesia

O período de preinscricións abrirase o día 1 de abril e pecharase o día 25 de abril. O importe da preinscrición será de 5?. O Club Travesía Sisargas doará o total da recadación das preinscricións á Ong “Save the Children”, que o destinará ao “Programa de atención da Infancia en España”.

O número límite de participantes nesta edicción será de 180 que se repartirán da seguinte forma: 15 prazas Club Travesía Sisargas, 10 prazas Concello de Malpica, 5 prazas para os 5 primeiros clasificados da pasada edicción e 150 prazas abertas a todos os participantes que se queiran inscribir na proba. Podedes ampliar toda a información da travesía e como inscribirse na nosa web www.travesiasisargas.com.

Os organizadores agradecen a colaboración do Concello de Malpica, Confraría de Pescadores, Protección Civil, Cruz Vermella do Mar, e de todos os nosos patrocinadores e colaboradores.

18Feb 2016

A Consellería do Mar investiu preto de 24.000 euros nas obras de mantemento das instalacións portuarias de Malpica

O presidente de Portos de Galicia visitou hoxe a vila acompañado polo alcalde, Eduardo Parga, o concelleiro Miguel Fernández e un representante da Confraría de Pescadores

VISITA-DURAN-6-baja
A Consellería do Mar, a través de Portos de Galicia, investiu preto de 24.000 euros en diversas obras de mantemento no porto de Malpica, consistentes na reparación de avarías eléctricas producidas polos últimos temporais e a reparación e colocación de novas defensas de protección para embarcacións, entre outras actuacións. Así o deu a coñecer esta mañá o presidente do ente público, José Juan Durán, nunha visita ás instalacións na que estivo acompañado polo alcalde, Eduardo Parga, o concelleiro Miguel Fernández e un representante da Confraría de Pescadores.

O obxectivo destas reunións de traballo é coñecer as inquedanzas e peticións levadas a cabo polo sector profesional e tamén por parte dos alcaldes dos concellos nos que se emprazan as propias instalacións portuarias. Desta maneira Portos de Galicia está a disposición do sector para tratar de resolver, na mellor medida posible, cada unha das peticións que se realizan.

Na visita tratáronse outros asuntos como o estado das infraestruturas, e o mantemento e conservación das instalacións portuarias de Malpica. Neste senso destacan a colocación das novas defensas para protección dos barcos que atracan na dársena do porto, así como a dispoñibilidade para o servizo e mantemento, tanto da comporta interior da dársena de Malpica como do seu guindastre.

Página 60 de 116« Primera...102030...5859606162...708090...Última »