Síguenos en
gl_ES
Tempo Malpica de Bergantiños
Venres 16°
13°
Sábado 16°
Domingo 18°
12°
tiempo.com   +info
  1.  
  2. ACTUALIDADE

ACTUALIDADE

22Xul 2017

O Concello de Malpica promociona a Mostra da Olería de Buño na praza de María Pita da Coruña

IMG-20170722-WA0058

O Concello de Malpica iniciou na Coruña unha campaña de promoción da Mostra da Olería de Buño (MOB), que se celebrará do 4 ao 13 de agosto. Este ano a tradicional feira de artesanía de Buño estrea imaxe e aposta por unha programación que trata de atraer a un maior número de visitantes e de abrir o abano a todas as idades. Os detalles déronse a coñecer na Praza de María Pita, na que o principal reclamo para o público foi a presenza do oleiro José Antonio Corral facendo unha demostración no torno.

Ao longo da xornada foron moitas as persoas que se achegaron ata o novidoso stand promocional da Mostra da Olería, no que tamén estivo presente o alcalde de Malpica, Eduardo Parga. Así mesmo, o Concello de Malpica aproveitou a ocasión para iniciar a distribución do novo mapa turístico de Buño, que estará a disposición de todo o público tanto na oficina de información turística de Malpica como no Ecomuseo do Forno do Forte.

A Mostra da Olería volverá a celebrarse no Parque de Luciano García Alén, no que estarán abertas as casetas de venda de 11.00 a 14.00 e de 17.00 a 21.00 horas, unha exposición do fotógrafo Peter Schneider, outra de artesanía, unha zona gastronómica e outra infantil. Pero a Mostra terá tamén como escenario o Ecomuseo do Forno do Forte, onde haberá a diario obradoiros de barro e exposición dos oleiros e oleiras de Buño.

PROGRAMA DE ACTIVIDADES
VENRES 4 DE AGOSTO
17.30 Concerto Raigañas no Parque Luciano García Alén
18.00 Acto oficial de inauguración
18.30 Visita ás instalacións da Mostra da Olería de Buño

CARTEL COCEDURA

SÁBADO 5 DE AGOSTO
11.00 a 20.00 Cocedura Tradicional no Forno do Forte
19.30 Actuación de Carcaxía no Parque Luciano García Alén
21.00 Carroa no Forno do Forte
22.30 Actuación de Pelepau no Forno do Forte

DOMINGO 6 DE AGOSTO
11.00 a 14.00 Descarga do Forno do Forte
13.30 Sesión vermú con De Vacas (Parque Luciano García Alén)

LUNS 7 DE AGOSTO – DÍA DO NENO
A partir das 17.30 Busca do tesouro e outras actividades

MARTES 8 DE AGOSTO
12.00 A 14.00 e 18.00 a 20 Ruta dos fornos guiada
22.30 Curtametraxes en familia

MÉRCORES 9 DE AGOSTO
19.00 e 21.00 Show The Momento Impro

XOVES 10 DE AGOSTO – FESTOLERÍA
A partir das 21.00 horas: Hellorice, The Cove, Cachas&Cousins, Dj Manuele Caamagno

VENRES 11 DE AGOSTO
17.30 Concurso infantil de modelado
21.00 Actuación Entrelas

SÁBADO 12 DE AGOSTO
17.30 Trofeo de fútbol MOB
21.30 Queimada tradicional e actuacións de Batuko Tabanka, Festicultores, Dj La SinCereza

DOMINGO 13 DE AGOSTO
12.00 a 14.00 e 18.00 a 20.00 Ruta dos fornos guiada
13.30 Sesión vermú coa Familia Caamagno

20Xul 2017

As nenas e os nenos de Malpica volven a “Pintar na rúa” para encher de cor o parque infantil

O vindeiro luns 24 arrancará a cuarta edición de “Pintar na rúa”, un proxecto de rexeneración urbana que ten a particularidade de que son os nenos e as nenas os que traballan, dirixidos por profesionais das artes plásticas. Este ano a monitora do obradoiro será a carballesa Laura Tova, que forma parte do colectivo artístico Crea Formas e que ten participado en proxectos como Derrubando Muros con Pintura.

Malpica, que foi un concello pioneiro na Costa da Morte no tratamento artístico de espazos degradados en décadas pasadas, recuperou no verán do 2014 o proxecto “Pintar na Rúa” a través de dous obradoiros que permitiron transformar o muro exterior do Centro Cívico nun enorme lenzo no que os nenos e nenas deron renda solta á súa creatividade. A experiencia tivo tanto éxito que a Concellería de Cultura decidiu incluíla na programación de Malpica Verán, e, deste xeito, nos anos 2015 e 2016 desenvolvéronse os dous coloridos murais que decoran o Paseo da Praia.

Este verán os participantes seguirán enchendo de cor os muros da vila, pero nesta ocasión traballarán no parque infantil da rúa Patria Galega desde o 24 de xullo ata o 7 de agosto, divididos en dous grupos en función das súas idades. O obradoiro vai destinado a nenos e nenas de 6 a 14 anos, e aínda quedan tres prazas dispoñibles. As familias que queiran máis información ou inscribir aos seus fillos e fillas teñen que dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104.

PINTAR NA RÚAVERÁN 2017

20Xul 2017

O Concello de Malpica pon a punto os campos de fútbol de cara á vindeira temporada de competicións oficiais

CAMPO XAVIÑA

O Concello de Malpica está poñendo a punto os campos de fútbol para que os equipos poidan comezar nas mellores condicións a vindeira temporada de competicións oficiais. O alcalde, Eduardo Parga; o concelleiro de Deportes, Iago Espasandín, e o de Obras e Servizos, Miguel Fernández, achegáronse onte ata Buño para supervisar os labores de mantemento do céspede que se están a levar a cabo no campo de Xaviña. En canto rematen neste, o persoal encargado dos traballos desprazarse ata Pedra Queimada.

Estes días hai moita actividade deportiva en Malpica, pero noutros escenarios. Esta fin de semana a praia de Canido acollerá a 2ª edición da Copa da Costa de fútbol praia. Así mesmo, durante o mes de agosto desenvolverase o Torneo de Fútbol Praia e Fútbol Sala Infantil, para nenas e nenos de entre os anos 2002 e 2010, e todos os martes e xoves de 12 a 13 horas tamén haberá zumba praia para toda as idades, sen límite e sen cotas.

19Xul 2017

Malpica acolle esta fin de semana o festival de curtametraxes “Vai no mar”

FESTIVAL CURTAS

Este ano a Concellería de Educación, Cultura e Turismo amplía a programación do Malpica Verán co Festival de Curtametraxes Vai no Mar, unha iniciativa que nace de maneira experimental pero coa intención de consolidarse dentro do Malpica Verán. O certame celebrarase esta fin de semana, de venres a domingo. A primeira sesión será infantil e desenvolverase no parque da rúa Patria Galega. Nas dúas seguintes, que serán no paseo marítimo e destinadas a adultos, ao remate de cada sesión haberá unha votación para elixir a mellor curta da noite.

Pero esta fin de semana non só haberá cine, senón tamén música. O venres 21, a partir das 23 horas, haberá música de baile en directo xunto á Casa do Pescador co Dúo Café. E o sábado, a partir das 20.30 horas, unha exhibición de baile e pasarrúas dos gaiteiros da Asociación Cultural Malante. Esta actividade está organizada polos locais de hostalaría A Taberna de Lesto, Brebaxe, Burato, Cachón, Café do Mar, Casa Antonio, Don Paco, Humboldt, Ibarra, JB, Larada, Pepucho, Pescador, San Francisco, Santiago Apóstol, Submarino e Xemevedes.

19Xul 2017

O alcalde de Malpica asina contratos de obras en varias parroquias por 73.000 euros

O alcalde de Malpica, Eduardo Parga, vén de asinar contratos de obras en varias parroquias por un importe próximo aos 73.000 euros. As actuacións están incluídas na terceira fase do Plan de Acción Social (PAS) 2015.

Un dos proxectos consiste na mellora de infraestruturas en Sorrío (Seaia), e será executado pola empresa D. Ogando S.L. cun orzamento de 42.917,28 euros. O outro inclúe obras de mellora de infraestruturas nas rúas Mouróns e Piñeiros e no Alto de Mens por un total de 33.000 euros, e a empresa adxudicataria é Dámaso Ferreiro e Hijos S.L.

Dentro do PAS 2015 o Concello de Malpica tamén incluíu traballos de acondicionamento de parques infantís e do alumeado público en varias parroquias.

18Xul 2017

Canido acollerá a vindeira fin de semana a 2ª Copa da Costa de fútbol praia

Os días 22 e 23 deste mes disputarase a segunda edición da Copa da Costa de fútbol praia no areal de Canido, e aquí tivo lugar a presentación coa participación de Eduardo Parga, Miguel Fernández e Iago Espasandín, alcalde, tenente alcalde e concelleiro de deportes do Concello de Malpica, respectivamente; Iván Barreiro e Carlos Calvete, xerente e director comercial de Alquileres Reneymar, empresa patrocinadora do evento; e Martín Varela, presidente da Asociación Deportiva Vidú.

presentación copa da costa de fútbol praia

As autoridades locais mostraron a súa satisfacción por acoller de novo esta competición que está medrando a pasos axigantados e que fomenta unha modalidade deportiva un tanto descoñecida na zona.

Pola súa parte, os representantes de Alquileres Reneymar mostraron o seu apoio total á organización, á cal lle deron todas as facilidades e todos os servicios que están nas súas mans para facer algo grande desta aposta do Concello de Malpica e da Asociación Deportiva Vidú, que lle dan continuidade a un evento único en Bergantiños coa intención de seguilo facendo durante moitos anos máis. Ademais, a empresa carballesa proporcionará un vale de 200€ en material de alquiler aos clubes que se proclamen campións en ambas categorías.

Mentres tanto, Martín Varela mostrouse encantado polo crecemento que está a ter esta competición e pola gran participación que haberá este ano con respecto á primeira edición, xa que nesta II Copa da Costa de Fútbol Praia serán seis equipos femininos e nove masculinos os que formarán parte dela.

Por último, dende a organización quixeron mandar unha mensaxe para animar a todos os afeccionados ao deporte a que se acheguen ata a praia de Canido durante toda a vindeira fin de semana na que o fútbol praia invadirá o areal malpicán.

14Xul 2017

Malpica lembra as Misións Pedagóxicas cunha nova edición do Retablo de Fantoches Rafael Dieste

As Misións Pedagóxicas volven a Malpica 84 anos despois. Aquel proxecto de solidariedade cultural que levou bibliotecas, música, cine e teatro a máis de 7.000 pobos e aldeas españois entre 1931 e 1936, chegou ao noso concello o 20 de outubro de 1933. A representación de “A doncela guerreira”, de Rafael Dieste, foi o primeiro espectáculo de monicreques que se levou a cabo en España, e a Concellería de Educación, Cultura e Turismo de Malpica quere lembrala, unha vez máis, cun ciclo de monicreques ao aire libre.

O departamento de dirixe Noelia Freijeiro programa unha nova edición do Retablo de Fantoches Rafael Dieste, que arrancará mañá sábado no parque infantil coa compañía Ghazafelhos e o espectáculo O vendedor de fume. As próximas actuacións terán lugar no paseo marítimo o 29 deste mes e o 12 de agosto. Na primeira, o grupo Paporrubio interpretará A danza dos paxaros, e na seguinte teremos a Lucecús Teatro con PingüSOS. En caso de choiva as funcións serán no auditorio do Centro Cívico.

Festival de Curtametraxes Vai no Mar
Pero este ano a Concellería de Educación, Cultura e Turismo amplía o programa co Festival de Curtametraxes Vai no Mar, unha iniciativa que nace de maneira experimental pero coa intención de consolidarse dentro do Malpica Verán. O certame celebrarase do 21 ao 23 de xullo no parque infantil (sesión infantil) e no paseo marítimo (pases para adultos), e en cada una das dúas sesións para adultos haberá unha votación ao remate de cada sesión para elixir a mellor curta.

Carteis Retablo de Fantoches xullo 17

13Xul 2017

Dez agrupacións musicais dos estilos máis variados encherán este verán as “Noites na Vila” de Malpica

Esta fin de semana arranca o programa Malpica Verán con moitas e moi variadas propostas. Pero a música, que vai xogar un papel moi importante ao longo de todo o período estival, tamén ocupa un lugar destacado nesta primeira fin de semana de actividades organizadas pola Concellería de Educación, Cultura e Turismo.

Hoxe comezan as Noites na Vila coa actuación da Traskiband na Praza Anselmo Villar Amigo (xunto á Casa do Pescador). Será a primeira dunha serie de bandas que pasarán por Malpica, en concreto polo paseo marítimo, nas vindeiras semanas. Aula 11, Sonseis, Killer Cats, The Cerne e Strobos interpretarán unha parte importante da banda sonora deste verán. Todos os concertos comezarán ás 22.30 e serán de balde.

Pero a música chega por partida dobre, porque este verán volvemos a ter Música na Rúa. Mañá sábado contaremos cos gaiteiros da Asociación Cultural Malante, que ofrecerán un pasarrúas polo centro da vila a partir das 21 horas. E nas vindeiras semanas tamén estarán en Malpica o Dúo Café, a Banda de Música de Abegondo e de novo Malante, que o 22 de xullo ofrecerá música e baile nunha actuación organizada polos locais de hostalería A Taberna de Lesto, Brebaxe, Burato, Cachón, Café do Mar, Casa Antonio, Don Paco, Humboldt, Ibarra, JB, Larada, Pepucho, Pescador, San Francisco, Santiago Apóstol, Submarino e Xemevedes.

CARTEIS NOITES NA VILA 2017

12Xul 2017

Aclaracións do concelleiro de Deportes sobre as relacións do Concello coa SCD Malpica

Despois da información vertida por Luis Porto no medio www.piratasdemuxia.es, onde semella falar en nome da SCD Malpica con respecto a un suposto conflito entre o mencionado club e o Concello de Malpica de Bergantiños, é preciso aclarar algún aspecto que non se axusta á realidade:

Primeiro. Nin o autor dese artigo nin ninguén do medio onde se publicou a noticia se puxo en contacto co concelleiro de Deportes nin con ningún dos outros clubs do Concello implicados nesa información. Polo que ou ben se inventou directamente ou ben a información procede da SCD Malpica.

Segundo. Hai dúas tempadas, dende o Concello e en colaboración cos clubs (cousa que sempre lle agradecemos profundamente) tratamos de coordinar as categorías inferiores, xa que a pesar de contar con 4 clubs federados non había ningunha categoría de fútbol base, aproveitando que dende prebenxamíns a infantís si había equipos municipais que xogaban nas ligas de Costa Bergantiñá. O Buño SCD competiu en categoría alevín, mentres que a SCD Malpica se encargou dos infantís pero esa tempada 15/16 non competiron a nivel federativo por falta de efectivos (de novo agradecerlle aos pais, nenos, adestrador dese ano e club a implicación, pois sen eles non sería posible).

Terceiro. A tempada pasada sumouse a esa dinámica a UD Cerqueda, facéndose cargo dos benxamíns, despois dunha reunión na que estiveron representantes dos tres clubs, os técnicos municipais de deportes e o concelleiro. Foi un acordo verbal entre todos, a pesar de que o Buño SCD tamén quería facerse cargo dos infantís, pero dado que o Malpica aguantara a tempada anterior sen competir parecíanos xusto que agora que si había efectivos suficientes, os infantís seguiran baixo a tutela do mesmo club. Dado que as normas da Federación Galega de Fútbol son así, os infantís son os únicos que xogan a fútbol 11, mentres que os alevíns e benxamíns xogan a fútbol 8; non é un desexo, senón que son as regras que impón a federación.

Cuarto. Nada máis empezar a tempada 16/17, a SCD Malpica incorpora a un futbolista en idade alevín (cando debería de xogar no Buño), rompendo o acordo verbal alcanzado poucas semanas antes, sen consultar nin co propio club oleiro nin co Concello. Para evitar polémicas, ninguén do Buño nin ninguén do Concello en ningún momento se meteu nesa cuestión.

Quinto. Despois de finalizar a tempada 16/17, os pais dos infantís a iniciativa propia reuníronse co Buño e co Cerqueda debido ao malestar xeneralizado coa xestión da SCD Malpica. De novo, a petición do concelleiro de Deportes, os tres clubs implicados tiveron unha reunión conxunta. Despois de varias horas de conversas e de diverxencias (de novo a dos infantís era a categoría da que todos querían facerse cargo), os clubs acordaron manter a mesma dinámica: os infantís competirían no Malpica, os alevíns no Buño e os benxamíns no Cerqueda, coa proposta adicional de que o Malpica trataría de facer cadetes para que os nenos que acabaron a idade infantil puidesen seguir xogando no Concello.

Sexto. Aos poucos días, o concelleiro de deportes mantivo unha reunión cos pais dos infantís para explicarlles o acordo ao que chegaran os clubs e para escoitar a súa versión do acontecido na tempada que acabara de rematar. Por aplastante maioría (un 90% aproximadamente) os pais negáronse a que os seus fillos xogaran outra tempada no Malpica, alegando numerosas razóns que non é preciso explicar aquí para evitar ferir sensibilidades.

Sétimo. Esta circunstancia explicóuselle ao presidente da SCD Malpica, Manolo Suárez, e ao directivo da mesma entidade Fernando Couto. Nesa reunión que mantiveron co concelleiro (hai unha semana xustamente) tras comprobar que era imposible xuntar nenos para ter infantís manifestaron que a súa intención era deixar a directiva.

Oitavo. 6 días despois da mencionada reunión, o presidente da SCD Malpica comunícame que van seguir na directiva e que teñen intención de facer cadetes e infantís, ademais do equipo sénior.

Noveno. Cabe recordar que o Concello non ten a potestade nin a idea de prohibir nin de obrigar a nin club a facer ou desfacer equipos de fútbol base, tan só se tratou de coordinar do mellor xeito posible a cuestión para que os nenos e nenas do municipio non tiveran que ir xogar para outros sitios habendo catro clubs federados aquí. Por iso, insisto en agradecerlle a tódolos implicados o súa labor unha vez máis e dicir claramente que non se rompeu ningún pacto; ao contrario, na reunión mantida cos clubs para esta tempada 17/18 que vai comezar, o acordo ao que chegaron os clubs foi a de manter o mesmo reparto que a tempada pasada. Quizás a reflexión que hai que facer é por que (case) tódolos pais non quixeron que os seus fillos continuaran baixo a tutela da SCD Malpica.

Décimo. Para rematar, no que atinxe ás subvencións, o primeiro que hai que indicar é que o ano económico nas Administracións Públicas vai dende o 1 de xaneiro ao 31 de decembro, que non coincide coa tempada de fútbol. No ano 2016, o Concello de Malpica dedicou 15.350€ ao mundo do fútbol en subvencións (o que supón máis do 90% do importe total da subvencións a entidades deportivas), sendo a SCD Malpica o club que más subvención levou (4.000€). Para este ano 2017, en canto o orzamento municipal se aprobe, publicaranse as bases para que de novo as asociacións deportivas volvan a concorrer a esas subvencións, sendo un dos criterios a ter en conta a involucración desas entidades no deporte infantil. Dado que o importe total para subvencións deportivas se ve aumentado no proxecto do orzamento 2017 en case un 25%, chegando aos 21.000€, é preciso esperar a súa aprobación para iniciar o procedemento de subvencións, porque si se fai antes o importe a repartir sería o mesmo que no ano 2016. Aumento que demostra o compromiso do Concello de Malpica co deporte e con tódalas entidades deportivas, entre eles os clubs de fútbol que ven aumentado o seu gasto debido, precisamente, a esa dinámica de crear equipos de fútbol base.

11Xul 2017

Malpica recibiu hoxe aos máis de 100 nenos e nenas que participan no Campamento Deportivo Costa Bergantiñá

CAMPAMENTO COSTA BERGANTIÑA 2017

Ao longo desta semana celébrase o Campamento Deportivo Costa Bergantiñá, que ten a particularidade de ser un itinerante, o que permite aos nenos e nenas practicar diferentes modalidades deportivas en cada un dos cinco concellos que integran a asociación. Hoxe tocoulle a Malpica. O alcalde, Eduardo Parga; o tenente de alcalde, Miguel Fernández, e o concelleiro de Deportes, Iago Espasandín, recibiron aos 106 rapaces e rapazas de Malpica, Ponteceso, Cabana, Laxe e Coristanco que participan na experiencia, e que puideron iniciarse no kaiak, o surf e as viaxes en banana.

O Campamento Deportivo Costa Bergantiñá continuará ata o venres, e o domingo celebrarase o Día da Bicicleta, organizado polo Grupo Voz. A vindeira semana comezarán o Campus de Fútbol, destinado a nenos e nenas nados entre os anos 2005 e 2010, e o Curso de Vela da Deputación da Coruña, que este ano terá a sede en Corme.

Página 40 de 113« Primera...102030...3839404142...506070...Última »