• ACTUALIDADE,Novas

Delegados de zona da Asociación de Antigos Alumnos do colexio Calvo Sotelo da Coruña celebraron unha xuntanza en Malpica

Malpica acolleu este sábado unha xuntanza dos delegados de zona da Asociación de Antigos Alumnos do colexio Calvo Sotelo da Coruña. Foi unha xornada de traballo, de ocio e, sobre todo, de confraternidade entre os representantes da entidade nas distintas comarcas da provincia. A organización correspondeu a Federico Blanco Gorín, delegado de Bergantiños, que destacou a “atención extraordinaria” que recibiron en Malpica.

A xornada comezou coa recepción do alcalde aos visitantes, algúns dos cales non coñecían Malpica. Eduardo Parga agradeceu a visita do grupo, integrado por unha vintena de persoas, e entregoulles unha peza de Olería de Buño como recordo da súa estancia no concello. Os representantes da Asociación de Antigos Alumnos, pola súa banda, obsequiaron ao Concello de Malpica cun prato conmemorativo do colexio Calvo Sotelo e unha reprodución da Torre de Hércules. No acto, celebrado no Centro Cívico, tamén participaron o tenente de alcalde, Miguel Fernández, e a concelleira de Servizos Sociais, Marisol Blanco, que ademais é irmá do delegado da zona de Bergantiños da Asociación de Antigos Alumnos do colexio Calvo Sotelo. Tamén se sumou á visita o ex concelleiro Manuel Torrado, que foi alumno do centro coruñés.

Despois da recepción institucional, os delegados de zona celebraron unha xuntanza no mesmo Centro Cívico para preparar as próximas actividades, entre as cales destaca a Festa da Unión, que se celebra en maio, coincidindo co día de María Auxiliadora, patroa do colexio. Nese acto, que ten lugar nas instalacións do Calvo Sotelo, reúnense as diferentes promocións que saíron do centro nos seus case sesenta anos de historia.

Pero o gran proxecto da Asociación de Antigos Alumnos, que conta nestes momentos con 300 socios/as, é, precisamente, a Obra Social. Federico Blanco destacou que dentro do programa denominado “Mini Obxectivos” aténdense as necesidades de atención médica, manutención, transporte ou de calquera outro tipo, de antigos alumnos que carecen de recursos. Así mesmo, o Memorial Eloy Rey Vidal, de creación máis recente, permitiu abrir outras dúas liñas de axuda a os ex alumnos. Por unha banda, a aqueles que se atopan nunha “situación límite”, e por outra, a través da Fundación Juan Soñador, a proxectos concretos. Este traballo social susténtase grazas ás achegas dos socios e a donativos, pero os fondos resultan insuficientes na actualidade para atender todas as demandas, sinalou o delegado da zona de Bergantiños.

Ademais da Obra Social, a entidade organiza a Festa de Reis para fillos/as dos socios, un trofeo de fútbol entre equipos de antigos alumnos, e xuntanzas coma a de onte, que incluíu unha visita á ermida do Santo Hadrián e un xantar nun restaurante malpicán. “Procuramos mobilizar á xente en cada zona, e, aínda que á xente nova é máis difícil implicala, a federación da Coruña é a que mellor está funcionando de España”, destacou Federico Blanco.

• ACTUALIDADE,Novas

O Concello de Malpica iniciou as obras de urbanización da parcela do novo centro de saúde de Buño

O proxecto inclúe beirarrúas, aparcamentos e accesos, e o investimento supera os 60.000 euros

Xa están en marcha as obras de urbanización exterior do centro de saúde de Buño. O proxecto foi adxudicado á empresa Construcciones López Cao SL por 60.318,50 euros, e inclúe a construción de beirarrúas, zona de aparcamento, accesos e áreas axardinadas. O alcalde de Malpica, Eduardo Parga, e o concelleiro de Obras e Servizos, Miguel Fernández, supervisaron o inicio dos traballos acompañados pola técnica municipal Patricia García Varela.

O Concello de Malpica complementa deste xeito o investimento realizado pola Consellería de Sanidade na construción do novo e moderno centro de saúde, que permitirá atender a unha poboación de 1.800 persoas. O edificio -cofinanciado nun 50% por fondos do Estado, dentro do Plan de Desenvolvemento Rural Sustentable- supuxo un desembolso de 624.810 euros, e a superficie que se construíu é de 524 metros cadrados. Conta cunha área médica con tres consultas de medicina xeral e unha consulta de enfermería; e unha área de administración cun arquivo, almacéns e outros servizos comúns, necesarios para o correcto funcionamento do centro.

Unha vez completadas as obras de urbanización e o equipamento, que corresponde á Xunta de Galicia, o centro de saúde de Buño poderá entrar en servizo xa nos primeiros meses deste ano.

• ACTUALIDADE,Novas

Peixe e ovos no primeiro reparto do ano do banco de alimentos do Concello de Malpica e a Fundación Amigos de Galicia

O banco de alimentos xestionado conxuntamente pola Concellería de Servizos Sociais de Malpica e a Fundación Amigos de Galicia realizou o primeiro reparto do ano ás 21 familias usuarias do servizo. Ademais dos produtos non perecedoiros habituais, as familias recibiron xarda, ovos, laranxas, chourizo e iogures. Os produtos frescos sempre figuran nos lotes de alimentos que reparte o persoal do departamento que dirixe Marisol Blanco Gorín, que supervisa e participa activamente na distribución dos produtos que se leva a cabo no Centro Cívico.

O convenio entre o Concello de Malpica e a Fundación Amigos de Galicia está en vigor dende hai dous anos e medio. Ademais de garantir produtos básicos de alimentación ás 21 familias usuarias, o servizo ten contribuído á mellora das condicións de habitabilidade de varios fogares.

• ACTUALIDADE,Novas

Aberto o prazo de inscrición para a Campaña de Esquí 2016

O Concello de Malpica dispón de tres prazas na actividade organizada pola Deputación da Coruña

O Concello de Malpica dispón de tres prazas na Campaña de Esquí 2016 da Deputación da Coruña, dirixida a nenas e nenos nados entre os anos 2001 e 2005. Os interesados poden presentar a súa solicitude ata o 22 de xaneiro no Rexistro Municipal. No caso de que haxa máis solicitudes que prazas celebrarase un sorteo público entre todos os inscritos.

Os nenos de Malpica participarán na primeira quenda da campaña, do 7 ao 12 de febreiro. O seu destino será a estación invernal de Leitariegos, onde asistirán a cursos de esquí, ademais de desfrutar durante cinco días de todo tipo de actividades na neve. O custe da actividade é de 95 euros, que inclúe todos os gastos.

Tedes máis información no Departamento de Deportes e neste folleto (PDF para descargar).

• ACTUALIDADE,Novas

O Concello de Malpica e a ANPA Xaviña organizan Pequeoleiros para promover o contacto dos escolares de Buño coa olería

Once nenas e nenos de cinco a doce anos participarán en obradoiros de barro dous días á semana dende mañá ata finais de abril

Mañá arrancará unha nova edición de Pequeoleiros, o programa deseñado polo Concello de Malpica, a través do ecomuseo do Forno do Forte, e a ANPA Xaviña, do colexio Joaquín Rodríguez Otero, para difundir a olería entre os escolares de Buño e conseguir que os nenos e nenas manteñan o contacto cunha tradición centenaria que é, ademais, un dos sinais de identidade e un importante recurso económico e turístico de Buño e de todo o concello.

Pequeoleiros desenvolverase nas instalacións da Casa do Oleiro todos os mércores e xoves ata finais de abril, en horario de 16.50 a 17.50. O oleiro José Antonio Corral será o encargado de transmitir os segredos da olería aos once nenos e nenas de cinco a doce anos de idade que participarán na iniciativa, que rematará cunha exposición das pezas creadas polos escolares.

• ACTUALIDADE,Novas

Renovado o convenio anual entre a Deputación da Coruña e o Concello de Malpica para a xestión do Forno do Forte

O complexo etnográfico estará aberto de martes a domingo de 11 a 14 e de 16 a 19 horas

O alcalde de Malpica, Eduardo Parga, e o deputado provincial de Contratación, Patrimonio e Equipamento, Xesús Soto, asinaron o convenio de colaboración anual para a xestión do Forno do Forte de Buño. A Deputación da Coruña achegará o 100% dos gastos para o funcionamento do complexo etnográfico no 2016, ata un total de 60.000 euros, que xestionará integramente o Concello de Malpica.

Segundo figura no convenio, o Concello encargaranse do mantemento e dinamización do centro, a compilación de patrimonio etnográfico da zona, o fomento do estudo e a investigación ou a promoción de actividades culturais arredor do mundo da olería. Establécese un horario mínimo de atención ao público de 11 a 14 horas e de 16 a 19 horas de martes a domingo.

Nas instalacións do ecomuseo do Forno do Forte de Buño o propio espazo expositivo recupera e conserva os elementos arquitectónicos propios dunha casa dedicada á olería de Buño. As persoas visitantes achéganse no ecomuseo a todo o proceso de produción de pezas, desde o torneado ao cocido ou o secado, nun centro que contribúe a conservar e poñer en valor a cultura popular e é tamén un recurso turístico da comarca.

• ACTUALIDADE,Novas

O presidente de Portos de Galicia visitou hoxe as obras de urbanización do porto de Malpica e o novo pantalán

José Juan Durán anunciou que os traballos de acondicionamento do noiro da Atalaia e o novo aparcamento estarán rematados a finais de xaneiro

O presidente de Portos de Galicia, José Juan Durán, acompañado polo alcalde de Malpica, Eduardo Parga, o concelleiro Miguel Fernández e o patrón maior, Pedro Pérez, visitou hoxe as obras que o seu departamento está a acometer para mellorar os servizos aos usuarios do porto malpicán. Durán anunciou que as obras de reconstrución do noiro da Atalaia e a urbanización do espazo ocupado pola antiga lonxa estarán rematadas a finais do mes de xaneiro. O investimento realizado, que ascende a preto de 700.000 euros, garantirá a estabilidade e a seguridade do muro e permitirá mellorar de maneira substancial o acceso ás instalacións para camións e tráilers, dando así resposta a unha vella demanda do sector que foi trasladada a Portos polo alcalde. Ademais de gañar en operatividade, o terreo gañado permitirá crear unha nova área de aparcamento e lecer, harmonizando o espazo resultante coas actuacións realizadas no porto de Malpica nos últimos anos.

Portos de Galicia tamén inviste 22.000 euros na instalación de 15 vigas galvanizadas para as defensas de rosario (ringleiras de rodas que se colocan adosadas ao muro para protexer as embarcacións de posibles danos). A substitución completarase en breve.

José Juan Durán visitou hoxe, así mesmo, o novo pantalán para embarcacións menores, que supuxo un investimento de máis de 70.000 euros financiado con fondos FEDER. As obras consistiron na construción de dous pantaláns engarzados, aos que se accede por unha pasarela articulada de estrutura de aluminio e piso de madeira. Esta pasarela dá acceso a un pantalán adosado ao peirao de 12 metros de longo por 3 de ancho que, á súa vez, conecta con outro transversal de 29,5 x 2,5 metros. Estas dúas estruturas están realizadas con perfís principais de aluminio e piso de madeira, e contan cun sistema de flotadores que garante a súa estabilidade con mareas vivas.

• ACTUALIDADE,Novas

Aprobada definitivamente a ordenanza reguladora do IBI tras ser rexeitada pola corporación a única alegación presentada

A bonificación solicitada pola concelleira Isabel Loureiro non se axusta aos supostos previstos na lei, segundo o informe dos técnicos municipais

A corporación municipal de Malpica aprobou hoxe de xeito definitivo a ordenanza reguladora do Imposto sobre Bens Inmobles (IBI), despois de rexeitar a alegación presentada pola concelleira socialista Isabel Loureiro Varela para que se establecese unha bonificación do 95% “aos inmobles nos que se desenvolvan actividades agrarias, gandeiras ou pesqueiras e que sexan declaradas de especial interese ou utilidade municipal por concorrer circunstancias sociais, culturais, histórico-artísticas ou de fomento do emprego que xustifiquen tal declaración”.

A alegación foi desestimada en base a un informe dos servizos técnicos municipais segundo o cal a bonificación solicitada pola concelleira socialista non se axusta aos supostos previstos no Real Decreto Lexislativo 2/2004.

Por unha banda, o RD establece a posibilidade de regular unha bonificación do 95% “a favor de inmuebles nos que se desenvolvan actividades económicas que sexan declaradas de especial interese ou utilidade municipal por concurrir circunstancias sociais, culturais, histórico artísticas ou de fomento do emprego que xustifiquen tal declaración. Corresponderá dita declaración ao Pleno da Corporación e acordarase, previa solicitude do suxeito pasivo, por voto favorable da maioría simple dos seus membros”.

Por outra, no RD prevese unha bonificación “de ata o 90 % da cota íntegra do Imposto a favor dos bens inmobles urbanos ubicados en áreas ou zonas do municipio que, conforme á lexislación e planeamento urbanísticos, correspondan a asentamentos de poboación singularizados pola súa vinculación ou preeminencia de actividades primarias de carácter agrícola, gandeiro, forestal, pesqueiro ou análogas e que dispoñan dun nivel de servizos de competencia municipal, infraestruturas ou equipamentos colectivos inferior ao existente nas áreas ou zonas consolidadas do municipio, sempre que as súas características económicas aconsellen unha especial protección”.

Segundo o informe técnico, a alegante “confunde” os dous tipos de bonificación. Así, a do 95% está previsto “para actividades económicas que por determinadas circunstancias (sociais, culturais) sexan declaradas de especial interese ou utilidade municipal, non podendo entender a tal efecto que as actividades pertencentes ao sector primario pola súa natureza sexan per se xustificativas de tal declaración, senón que se require dun acordo expreso respecto dunha actividade económica a concretar, e non dun sector xenericamente considerado”.

Para os inmobles urbanos vinculados a actividades primarias existe a posibilidade de establecer unha bonificación de ata o 90%, “que en todo caso –aclara o informe- esixe que os citados asentamentos de poboación dispoñan dun nivel de servizos de competencia municipal, infraestruturas ou equipamentos colectivos inferior ao existente nas áreas ou zonas consolidadas do municipio, e que polas súas características económicas aconselle unha especial protección, algo que non se xustifica en ningún caso na proposta a tal fin formulada”.

Por todo isto, a alegación foi desestimada e a ordenanza reguladora do IBI quedou aprobada definitivamente cos seguintes tipos de gravame: