|
|||||||||||||||||||||||||||||||||||||||||||||||||||
O Concello de Malpica organiza o domingo 17 de xullo o Día da Bicicleta, que comezará cunha concentración que terá lugar no Centro Social de Seaia ás 10.30 horas.
O percorrido rematará na praia Area Maior de Malpica.
Xa está aberto o prazo de inscrición para a 1ª Carreira Pedestre Concello de Malpica, que se celebrará o sábado 10 de setembro ás 18.30 horas. A organización corresponde á Concellería de Deportes, que dirixe Iago Espasandín, que deste xeito sigue ampliando a oferta deportiva do Concello de Malpica tanto en cantidade coma en calidade e variedade de disciplinas.
A Carreira Pedestre Concello de Malpica nace, de feito, coa intención de fomentar a actividade física como parte dun estilo de vida saudable. Poderán participar todas as persoas maiores de 16 anos que o desexen. A inscrición pode realizarse a través da plataforma www.championchipnorte.com. A cota é de 3 euros para os atletas que posúan chip e de 4 para os que precisen alugalo. No caso dos menores de idade requírese, ademais, autorización paterna. O prazo de inscrición rematará o 6 de setembro. As persoas interesadas poden solicitar máis información no Departamento de Deportes.
Haberá 4 categorías: xuvenil (nados/as nos anos 1999 e 2000), sénior 10K (1977-1998), veteranos M40 (1967-1976) e veteranos M50 (anteriores a 1966). Todos os participantes, tanto masculinos coma femininos, terán que percorrer unha distancia de 8.650 metros nun tempo máximo de 1 hora e 30 minutos. A carreira sairá da praza Villar Amigo e continuará por Eduardo Vila Fano, Rúa do Porto, Dársena, Camiño do Río, Eduardo Vila Fano, Guardia Pardines, Paseo da Praia, Rúa Canido, Cancela de Areas, Seaia, Estrada á Praia de Seaia, Instituto Urbano Lugrís, Estrada de Santo Hadrián ata a capela, Camiño do Santo, Canido e chegada no Paseo da Praia. “Este traxecto permítenos combinar dureza, con varios cambios de superficie, e paisaxe, xa que as vistas durante o percorrido son espectaculares”, explicou Iago Espasandín.
Os controis de cronometraxe realizaranse mediante chip, cuxo uso será obrigatorio para todas as categorías, ao igual ca o de dorsais. As persoas inscritas poderán recollelos o mesmo día da carreira, de 10.00 a 13.00 e de 15.00 a 17.45 horas, no Centro Cívico de Malpica, que funcionará tamén como gardarroupa. Así mesmo, o Concello de Malpica porá a disposición dos participantes o pavillón polideportivo para que poidan cambiarse e ducharse.
Haberá trofeos para os tres primeiros/as en cada categoría e tamén para o primeiro e a primeira clasificados de Malpica.
O pasado 13 de xullo rematou o curso de informática para mulleres organizado pola Concellería de Servizos Sociais de Malpica e impartido pola Asociación Íntegro dentro do Punto de Intervención para Mulleres con Diversidade Funcional (PIMD Rural). O alcalde, Eduardo Parga; a concelleira de Servizos Sociais, Marisol Blanco Gorín; o presidente de Íntegro, Adolfo López Baña, e a psicóloga da entidade, Begoña Rial, acompañaron ás alumnas nesta última xornada na aula de informática da Casa do Oleiro de Buño.
Accións formativas coma esta están encamiñadas a fomentar a empregabilidade das mulleres, sobre todo das que teñen algún tipo de discapacidade, dotándoas de coñecementos útiles e necesarios para acadar a plena inclusión. A semana que vén chegará á súa fin o curso de tapas e aperitivos que se imparte todos os xoves no Centro Cívico de Malpica.
Dende hoxe está aberto o prazo de inscrición para o obradoiro Pintar na Rúa, que se pon en marcha por terceiro verán consecutivo co dobre obxectivo de iniciar a nenos e mozos na expresión artística e de recuperar espazos degradados do Concello de Malpica.
O taller desenvolverase do 1 ao 12 de agosto. Haberá dúas quendas: de 11.00 a 12.15 horas para os nenos e nenas de 6 a 10 anos, e de 12.30 a 13.45 para os de 11 a 14 anos. En cada grupo haberá 10 prazas, e o prezo da actividade é de 11 euros.
As inscricións poderán facerse ata o día 29 nas oficinas de Educación e Cultura, no Centro Cívico de Malpica, en horario de 09.00 a 13.00. As familias interesadas deben achegar ficha de inscrición correctamente cuberta, fotocopia do libro de familia, da cartilla da Seguridade Social e do DNI dos titores legais, 1 foto tamaño carné e número de conta bancaria.
Aos seus 83 anos, Gloria Carril é a alumna de máis idade dos cursos de manualidades que organiza o Concello de Malpica. E tamén é unha das máis veteranas, porque leva unha década asistindo ás clases de Lucía Villanueva no Centro Cívico. Gloria, “a do Bar da Checa” -punto de parada obrigada de calquera ruta lugrisiana, xa que alí era onde xantaba o pintor-, ten unhas cualidades innatas para as manualidades. Non se lle resiste nada: bordado, pintura, ganchillo… Pero desde que descubriu a técnica das “arenillas” xa non quixo facer outra cousa. Dedicoulle todo este curso con tantas ganas que o seu traballo daría para facer varias exposicións. Agora mesmo pode verse unha. As súas obras de arenillas están dispoñibles para todas as persoas interesadas no espazo expositivo do Centro Cívico. E alí permanecerán durante xullo e agosto. Podedes visitalas de 09.00 a 14.00 horas, de luns a venres.
Os usuarios da praia de Canido dispoñen este verán de máis e mellores servizos. Grazas ao investimento realizado polo Concello de Malpica dentro do POS 2015, o acceso ao areal a través da rúa Canido puido ser pavimentado e pintado. Ao mesmo tempo, o goberno municipal incluíu na actuación o acondicionamento do espazo de aparcamento existente a pé de praia, que ademais de pavimentado e pintado, está perfectamente iluminado, como comprobaron o alcalde, Eduardo Parga, e o concelleiro de Obras, Servizos e Seguridade, Miguel Fernández, nun percorrido pola zona.
O investimento acadou os 64.614 euros. A obra non só mellora os accesos á praia de Canido, senón tamén ás numerosas vivendas e ao hotel situados nesa rúa.
O Centro de Transfusión de Galicia, en colaboración co Concello de Malpica, levará a cabo unha campaña especial de doazón de sangue en Malpica e Buño. Unha unidade móbil desprazarase o luns 4 á capital municipal. O vehículo estará a disposición das persoas que queiran sumarse a este acto solidario diante do Centro Cívico, en horario de 10.30 a 14.00 e de 16.30 a 21.00. O martes 5 a unidade móbil estará diante do Teleclub de Buño dende as 16.30 ata as 21.0 horas.
Coñece máis sobre a doazón de sangue:
As Noites na Vila comezan con maxia. Esta fin de semana terá lugar no paseo marítimo o primeiro dos sete espectáculos de ilusionismo e teatro que se levarán a cabo ao longo do verán en Malpica.
A programación da Concellería de Educación, Cultura e Turismo arranca este sábado, 2 de xullo, ás 20.30 horas, coa actuación do Mago Noel dentro do ciclo Malpica Máxica, que inclúe catro espectáculos internacionais. O día 9, de feito, estará en Malpica o Mago Camawey, de Cuba, e o 16 collerá o relevo o Mago Carlos Adriano, de Arxentina. A última actuación será o 12 de agosto e reunirá aos magos galegos Dani e Rafa co espectáuclo “O Baúl do Mago”, do que ofrecerán varios pases de 10 minutos dende as 17.00 ata as 21.00 horas.
O Concello de Malpica tamén volverá a poñer en escena o seu Retablo de Fantoches Rafael Dieste, que por terceiro ano lembrará a estrea de “La doncella guerrera” na vila o 20 de outubro de 1933, no marco das Misións Pedagóxicas.
A primeira representación será o 23 de xullo. Microminia Títeres ofrecerá no paseo marítimo “Vacacións no mar”, un espectáculo de títeres de luva e siluetas apto para todos os públicos. O 6 de agosto será a quenda de Títeres Cachirulo con luvas chinesas e variñas para dar vida a “Alicia no país das marabillas”. E, por último, o 13 de agosto chegará a Tropa de Trapo con “Zona de obras”, no que mesturan contos con música e obxectos de reciclaxe.
Todos os espectáculos serán ás 20.30 horas no paseo marítimo. No caso de choiva trasladaranse ao auditorio do Centro Cívico.
O Concello de Malpica promociona a Romaría de Santo Hadrián e a Mostra da Olería de Buño en Festur, a Feira de Festas de Interese Turístico de Galicia, que se celebrará dende mañá xoves e ata o domingo en Silleda, no marco da 39ª Feira Internacional Abanca Semana Verde de Galicia. A fin de semana, ademais do persoal de información, no stand de Malpica haberá demostracións a cargo do oleiro José Antonio Corral. O horario de apertura, tanto o sábado coma o domingo, será de 10.00 a 21.00.
Este ano, a través da Concellaría de Promoción Económica está en marcha tamén unha campaña específica de difusión da Romaría do Santo Hadrián na que colaboran Turismo de Galicia, a Xunta de Galicia e Abanca. A presentación da campaña tivo lugar hoxe na propia ermida, que se converterá o vindeiro domingo 19 no punto de encontro de milleiros de persoas. O alcalde, Eduardo Parga; a concelleira de Promoción Económica, Pilar Doldán, e o de Seguridade, Miguel Fernández, presentaron o cartel anunciador da romaría e os panos de romeiro que se distribuirán nos vindeiros días. A campaña inclúe tamén accións publicitarias en prensa escrita, radio e Internet, tanto en medios de comunicación dixitais coma nas redes sociais do Concello de Malpica.
Os obxectivos son a promoción da Romaría do Santo Hadrián máis alá do ámbito local, a identificación dos veciños e veciñas do noso concello cun dos símbolos da nosa herdanza cultural, contribuíndo deste xeito á preservación do noso patrimonio inmaterial e á súa posta en valor tanto dentro coma fóra do municipio de Malpica de Bergantiños, e a consolidación do noso concello como un dos principais destinos turísticos da comarca de Bergantiños e mesmo da Costa da Morte.
Precisamente esa fin de semana, á parte das verbenas e demais actividades organizadas pola comisión de festas, o Real Club Náutico da Coruña celebra unha nova edición da Regata Illas Sisargas. O sábado os cruceiros sairán da Coruña ás 14.30 e chegarán a Malpica arredor das 19.00 horas. A continuación procederase á entrega de premios no palco. O domingo ás 12 as embarcacións iniciarán a travesía de regreso.
O dispositivo da romaría está integrado por máis de 50 persoas entre Protección Civil, Policía Local e Garda Civil
Seis socorristas traballarán a partir do sábado 18 de xuño en Area Maior e Canido
Os corpos de seguridade e os servizos de emerxencias reforzarán a súa presenza en Malpica durante a Romaría de Santo Hadrián, Festa de Interese Turístico de Galicia, que se celebrarán dende o venres 17 ata o domingo 19, debido a que se espera unha afluencia masiva de visitantes, sobre todo o domingo pola mañá. O dispositivo da romaría estará integrado por máis de 50 persoas entre axentes da Garda Civil e da Policía Local -que se reforza con persoal dos concellos limítrofes- e Protección Civil, que será o corpo máis numeroso con 30 voluntarios das agrupacións de Coristanco, Cabana, Arteixo e Cerceda, ademais de Malpica. Todo este dispositivo dos corpos de seguridade completarase coa presenza dunha ambulancia.
O dispositivo de seguridade centrou a xuntanza que mantiveron hoxe o alcalde, Eduardo Parga; o concelleiro de Seguridade, Miguel Fernández; o xefe da Policía Local, Tito Mancebo, e o coordinador de Protección Civil, Iván Muíño. Ademais de reforzar os servizos de seguridade e emerxencias, o Concello de Malpica tamén porá a disposición dos visitantes zonas de aparcamento gratuítas.
Os servizos a veciños e visitantes completaranse coa entrada en servizo do equipo de salvamento e socorrismo, integrado por seis persoas, nas praias de Area Maior e Canido. Os socorristas traballarán a partir do sábado 18 de xuño, en horario ininterrompido de 12h a 20h. Nas praias do municipio que non dispoñen de servizo de salvamento colocaranse os aros salvavidas e a sinalización correspondente para que os usuarios tamén poidan gozar delas.
Ademais, o Concello de Malpica pon en marcha unha campaña de promoción da Romaría de Santo Hadrián coincidindo coa presenza municipal en Festur. A presentación da campaña terá lugar mañá mércores, ás 12.30 horas, na propia ermida de Santo Hadrián.
Galego
Castellano
