• ACTUALIDADE,Novas

A UD Cerqueda divulgará o proxecto da Croa do Castro nas súas camisetas durante a vindeira campaña

O proxecto de recuperación do xacemento segue avanzando

A UD Cerqueda quere sumarse á iniciativa de promoción turística desta parroquia malpicá nacida arredor do proxecto A Croa do Castro de Cerqueda no cal colectivos parroquiais e concello tratan de recuperar este recinto castrexo. Para iso, Alberto Pose, representante deste equipo de fútbol e comentarista deportivo, xunto con Eduardo Parga Veiga, alcalde de Malpica de Bergantiños, e Manuel Chouciño Garrido, presidente da A.VV. Monte d?Arxa, un dos colectivos promotores do proxecto de divulgación deste castro, reuníronse nas oficinas da Casa do Concello para oficializar este apoio divulgativo.

A UD Cerqueda, que realizou unha grandísima tempada este ano, na que acadou o título de liga e o ascenso de categoría, inserirá na súa camiseta as letras «A Croa do Castro de Cerqueda». Isto terá un gran impacto de divulgación non só nos campos de fútbol nos que xogue o equipo, senón que tamén terá eco en todos os sectores que rodean este deporte.

O proxecto de recuperación da Croa do Castro continúa a andar camiño. A primeira fase está pendente da poxa pública duns eucaliptos que hai no interior da súa parte alta. Tras a tala, poderá levarse a cabo a segunda fase: aplicación do gradiómetro (radar terrestre) a todo o recinto interior para descubrir a globalidade de posibles estruturas soterradas.

• ACTUALIDADE,Novas

O proxecto “Pintar na Rúa” encherá de cor este verán o paseo marítimo de Malpica

Catorce nenas de 7 a 14 anos iniciaron hoxe o taller que imparte por segundo ano consecutivo a artista Paula Fraile

Catorce nenas de 7 a 14 anos iniciaron hoxe a segunda edición do taller “Pintar na Rúa”, unha iniciativa da Concellería de Cultura de Malpica que pretende dar continuidade ao proxecto artístico de recuperación de espazos degradados. O ano pasado a actividade desenvolveuse no muro exterior do Centro Cívico, pero este verán trasládase á praia, en concreto ao deteriorado muro situado entre os bares Submarino e Leño, un lugar moi frecuentado polos malpicáns e as malpicás debido ás impresionantes vistas da praia que se divisan dende os bancos existentes nese emprazamento.

Despois dunha primeira toma de contacto no Centro Cívico, as 9 nenas de 7 a 10 anos que integran a primeira quenda desprazáronse ata o lugar no que van poder dar renda solta á súa creatividade da man da pintora Paula Fraile, de Guadalajara, que hoxe reencontrouse con algunhas alumnas do ano pasado. Ata o lugar acudiron tamén o alcalde, Eduardo Parga, e o concelleiro de Deportes, Iago Espasandín, que animaron as xovencísimas participantes no obradoiro a aproveitar a experiencia.

Aínda que o motivo elixido será froito das achegas de todas as participantes, o que xa está claro é que gardará relación co mar e con Malpica e que estará cheo de cor para que esa parede, ata agora caracterizada polo seu abandono, se transforme nun punto de referencia e nun atractivo máis do paseo marítimo. As pequenas comezaron coa imprimación da parede, e as cinco maiores que se incorporaron despois, e que teñen entre 11 e 14 anos, continuaron co labor ata última hora da mañá.

As familias que queiran inscribir aos seus fillos e fillas para o segundo obradoiro, que se desenvolverá en agosto, poden dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104.

• ACTUALIDADE,Novas

O Concello de Malpica dálle continuidade ao proxecto “Pintar na Rúa” cun obradoiro para nenas e nenos de 7 a 14 anos

Aberto o prazo de inscrición para o taller, que será impartido pola artista Paula Fraile

Malpica, que foi un concello pioneiro na Costa da Morte no tratamento artístico de espazos degradados, recuperou o verán pasado o proxecto “Pintar na Rúa” a través de dous obradoiros que permitiron transformar o muro exterior do Centro Cívico nun enorme lenzo no que os nenos e nenas deron renda solta á súa creatividade. A experiencia tivo tanto éxito que a Concellería de Cultura decidiu levar a cabo este ano unha segunda edición, na que de novo os escolares serán os protagonistas dun proxecto dirixido pola artista Paula Fraile (Guadalajara).

Este verán os participantes seguirán enchendo de cor os muros da vila, aínda que terán alternativas para os días de choiva que se desenvolverán no interior do Centro Cívico. En total serán 20 días, repartidos en dous bloques de dez sesións cada un. A primeira quenda desenvolverase do 20 ao 31 deste mes, e a segunda, do 3 ao 14 de agosto. Os participantes repartiranse en dous grupos en función das súas idades, de xeito que os nenos e nenas de sete a dez anos pintarán de 11.00 a 12.30 horas, e os de once a catorce anos, de 12.30 a 14.00 horas. En cada grupo hai 10 prazas, e o prezo da actividade é de 11 euros.

As familias que queiran máis información ou inscribir aos seus fillos e fillas teñen que dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104.

• ACTUALIDADE,Novas

A música de Xoán Curiel abre o intenso programa de Noites na Vila

A programación cultural do Concello de Malpica para as fines de semana de xullo e agosto tamén inclúe un ciclo de maxia e outro de monicreques

Música, teatro, maxia… As Noites na Vila encherán de animación o paseo marítimo de Malpica (en caso de choiva as actuacións trasladaranse ao auditorio do Centro Cívico) durante as fines de semana de xullo e agosto. A programación da Concellería de Cultura, Educación e Turismo comeza forte, nin máis nin menos que co concerto de Xoán Curiel ?Estamos no verán?, unha proposta dirixida ao público infantil e familiar, preferentemente, coa que desfrutará e bailará todo o mundo.

A programación para o verán é a seguinte:

Concerto (paseo marítimo, 20.30 horas)

·        Venres 10 de xullo Concerto “Estamos no verán”, de Xoán Curiel

Público preferente: infantil e familiar. Duración 60 minutos.

Malpica Máxica (paseo marítimo, 20.30 horas)

·         Sábado 11 de xullo, O Mago Rafa co espectáculo Historias dun ilusionista.
Público preferente: familiar. Duración: 55 minutos.

·         Venres 17 de xullo, O Mago Roberto Lolo co espectáculo Magia de cine.
Público preferente: familiar. Duración: 55 minutos.

·         Sábado 18 de xullo, O Mago Dani Polo co espectáculo Enmagiarte.
Público preferente: familiar. Duración: 55 minutos.

Retablo de Fantoches Rafael Dieste (paseo marítimo, 20.30 horas)

O 20 de outubro de 1933, no marco das Misións Pedagóxicas, estreábase en Malpica o Retablo de Fantoches coa obra “La Doncella Guerrera” de Rafael Dieste. Así José Val del Omar, Ramón Naya, Fernández Mazas, Miguel Prieto e Urbano Lugrís  xunto a Rafael Dieste iniciaban en Malpica de Bergantiños as representacións de  monicreques que as Misións Pedagóxicas representaron por  todo o estado. En lembranza daquel titánico esforzo por levar a cultura a todos os recunchos do estado español bautizamos a nosa pequena mostra co nome de Retablo de Fantoches de Rafael Dieste.

·         Sábado 1 de agosto. “Lume” de Teatro Babaluva

Público preferente: familiar/ infantil de 2 a 10 anos. Duración: 35 minutos.

·         Sábado 8 de agosto. “Rei, rei” de Fantoches baj. (Títeres de luva, variña e actores)

Público preferente: Familiar (+ de 2 anos). Duración: 60 minutos.

·         Sábado 29 de agosto. “As mil e unha noites” de Teatro Ghazafelhos

Público preferente: + 5 anos. Duración: 60 minutos.

• ACTUALIDADE,Novas

O alcalde de Malpica asina o contrato para a execución da obra de saneamento no Vilar, en Buño

O proxecto figura entre os tres que acometerá o Concello con cargo ao POS 2015

O alcalde de Malpica, Eduardo Parga, asinou o contrato para a execución das obras de saneamento do Vilar, en Buño, incluídas no POS 2015. Os traballos, que comezarán nos vindeiros días, serán realizados pola empresa Obras Ramón Cotelo, SL, cun orzamento de contratación de 28.540 euros.

No POS deste ano tamén figuran o proxecto de pavimentación e infraestruturas en Barizo, Porto do Fondo, Beo, Santiso, Aldeola e Cerqueda, cun orzamento de licitación de 69.056 euros, e a pavimentación da rúa Canido, por 64.887 euros.

• ACTUALIDADE,Novas

O Concello de Malpica reduce a dúas as dedicacións exclusivas, que terán o alcalde e o concelleiro Miguel Fernández

A proposta sobre a incompatibilidade de Alfredo Cañizo para exercer como edil e funcionario foi retirada da orde do día do pleno de organización da corporación municipal á espera de máis información legal

Aínda que a lei permitiría ao Concello de Malpica aprobar tres dedicacións exclusivas, o goberno municipal propuxo reducir unha con respecto ao mandato anterior. Deste xeito, só o alcalde, Eduardo Parga Veiga, e o primeiro tenente de alcalde, Miguel Ángel Fernández Mirás, cobrarán pola súa dedicación plena á xestión municipal. O rexedor manterá o mesmo salario que no pasado mandato, 42.139 euros brutos ao ano, mentres que o de Miguel Fernández increméntase en 4.000 euros brutos ao ano, e acada así os 34.000, debido, tal como xustificou o alcalde, a que tamén terá máis competencias e, en consecuencia, maior responsabilidade. O primeiro tenente de alcalde terá delegadas as áreas de Obras e Servizos, coma nos catro anos anteriores, pero ademais farase cargo das de Seguridade Cidadá e Protección Civil. Pola súa banda, Eduardo Parga encargarase directamente das áreas de Agricultura, Mar, Mostra da Olería e Ecomuseo do Forno do Forte.

O segundo tenente de alcalde, Iago Espasandín Varela, unha das novas incorporacións ao equipo de goberno, será o responsable das concellerías de Deportes e Urbanismo; a terceira tenente de alcalde, Marisol Blanco Gorín, seguirá á fronte de Servizos Sociais e Igualdade, e a cuarta tenente de alcalde, Noelia Freijeiro Novo, asumirá, ademais de Cultura e Educación, a área de Turismo. Pilar Doldán Pose tamén incrementa as súas competencias, ao facerse cargo de Promoción Económica, Traballo, Comercio e Industria. O sétimo membro do goberno municipal, Álvaro Carril Rodríguez, non terá delegada ningunha área debido a que, por motivos laborais, non se atopa en Galicia. De feito, onte non puido asistir ao pleno.

Este mandato haberá tres comisións (especial de contas, informativa de asuntos xerais e xunta de goberno), que se celebrarán ás 13.15 horas, e manteranse os plenos ordinarios cada dous meses. Por asistencia a plenos e comisións, os concelleiros que non teñen dedicación exclusiva percibirán 90 euros.

A corporación municipal de Malpica estará conformada por tres grupos: o PP, que conta con sete concelleiros; AIM, que ten catro, e o Grupo Mixto, integrado pola representante do PSOE e o do BNG, que, ao ter un único representante cada un, non poden ter grupo propio por lei. Cada grupo percibirá unha axuda anual fixa de 600 euros, á que se sumarán outros 600 por cada concelleiro. Miguel Fernández será o portavoz do grupo popular; Alfredo Cañizo, de AIM, e Isabel Loureiro e Paco Souto alternaranse como voceiros.

A iniciativa do alcalde, a proposta sobre a incompatibilidade de Alfredo Cañizo para exercer como concelleiro e funcionario municipal ao mesmo tempo foi retirada da orde do día. Eduardo Parga explicou que ten solicitado máis información para determinar se as competencias corresponden ao pleno ou á Alcaldía.

• ACTUALIDADE,Novas

Clausurados os cursos de manualidades para maiores e persoas con diversidade funcional impartidos en Malpica e Buño

Mañá remata tamén a temporada de baile social ata setembro

O Concello de Malpica de Bergantiños clausurou os obradoiros de manualidades que se impartiron dende principios de setembro no Centro Cívico de Malpica e na Casa do Oleiro de Buño, e nos que participaron máis de 50 persoas maiores e/ou con diversidade funcional. O alcalde, Eduardo Parga, entregou a cada participante, na súa maioría mulleres, os diplomas acreditativos da formación adquirida, aínda que a mellor forma de comprobar os resultados do traballo desenvolvido é visitar as exposicións que están abertas nos citados edificios municipais. No Centro Cívico a mostra pode visitarse a diario en horario de mañá e tarde, mentres que na Casa do Oleiro habilitouse un horario especial que abrangue dende onte ata o sábado da vindeira semana de catro a sete da tarde.

As exposicións inclúen todo tipo de obras, dende cadros elaborados coas técnicas artísticas máis variadas ata botellas decoradas, xoias, mantelerías, bolsos e carteiras, e obxectos decorativos de todo tipo, algúns deles elaborados con material de refugallo.

As 16 alumnas de Buño organizaron unha festa de clausura coa súa monitora, Chelo García, na que ademais de Eduardo Parga participou o tenente de alcalde, Miguel Fernández. Tamén houbo festa en Malpica para as 35 alumnas e alumnos (só dous homes que participaron no obradoiro) de Lucía Villanueva. Tanto nun caso coma noutro celebrouse unha merenda con todo tipo de doces, moitos deles elaborados polas propias participantes. A maior delas, por certo, ten 87 anos. Agora comezan as vacacións, pero en setembro volverán á carga.

Esta fin de semana non só rematan os obradoiros de manualidades, senón tamén o baile social que, ao igual ca os cursos, organizou a Concellería de Servizos Sociais. A sesión de baile deste domingo desenvolverase no horario habitual de 20 a 23 horas.

• ACTUALIDADE,Novas

O Concello de Malpica reforza o servizo de salvamento nas praias con máis medios materiais e humanos

Voluntarios de Protección Civil colaborarán cos seis socorristas na vixilancia de Area Maior e Canido durante as fines de semana

O Concello de Malpica reforza o servizo de salvamento nas praias de cara ao inicio dos meses vacacionais por excelencia. O alcalde, Eduardo Parga; o tenente de alcalde, Miguel Fernández, e o coordinador da Agrupación de Voluntarios de Protección Civil, Iván Muiño, presentaron hoxe os medios materiais dos que disporán este verán os seis socorristas contratados polo Concello, que empezaron a traballar o día 20 e rematarán a primeiros de setembro.

O equipo inclúe unha embarcación, tubos de rescate, boias torpedo, un taboleiro espiñal para a inmobilización de posibles lesións medulares, un desfibrilador e un taboleiro de rescate innovador, xa que ao ser inchable é máis lixeiro e polas súas dimensións permite realizar vixilancias dinámicas pola praia.

Pero non só se incrementan os medios materiais, senón tamén os humanos. Así, os socorristas contarán co apoio de voluntarios de Protección Civil, que reforzarán o servizo as fines de semana. O servizo de salvamento estará operativo nas praias de Area Maior e Canido ata principios de setembro, en horario ininterrompido de 12 a 20. Nas praias do municipio que non dispoñen de socorristas xa están colocados os aros salvavidas e a sinalización correspondente para que os usuarios tamén poidan gozar delas.

• ACTUALIDADE,Novas

O fotoxornalista Felipe Carnotto retrata Nicaragua tras gañar o certame “Imaxes con Fondo”

O premio da segunda edición do concurso organizado polo Fondo Galego de Cooperación consistía nunha viaxe para elaborar unha mostra fotográfica

O fotógrafo Felipe Carnotto áchase ata comezos de xullo en Nicaragua retratando a vida no país e os proxectos alí apoiados polo Fondo Galego de Cooperación e Solidariedade, do que forma parte o Concello de Malpica de Bergantiños, para preparar unha exposición que logo xirará por municipios de toda Galicia. A viaxe forma parte do premio da segunda edición de Imaxes con Fondo, certame que o fotoxornalista de orixe brasileira afincado en Vigo gañou o pasado ano.

Desde que a comezos de xuño iniciara o seu periplo, Felipe Carnotto está a visitar distintas iniciativas de loita contra a pobreza cofinanciadas desde o ano 2003 en materia de turismo sostible, autoconstrución de vivendas, formación agropecuaria, abastecemento de auga ou empoderamento das mulleres. Nos primeiros días, coincidiu en terreo coa técnica de proxectos do Fondo Galego, a tamén viguesa Andrea García Corzo, que durante dúas semanas supervisou os resultados das intervencións realizadas entre 2011 e 2015.

A asociación municipalista desenvolveu ata o momento un total de 17 proxectos co Instituto de Promoción Humana-Somoto como parceiro local, algúns deles con achegas extraordinarias de entidades socias coma o Concello de Vigo e mesmo da Consellería de Vivenda. No entanto, desde 1998 o Fondo Galego ten apoiado unha trintena de actuacións no país centroamericano que suman preto de un millón de euros de investimento, moitas delas en colaboración con ONGD galegas.

Na actualidade, estase a executar unha intervención con Amigos da Terra para facilitar o acceso á auga a 178 familias empobrecidas e outra con Taller de Solidaridad a prol do turismo rural comunitario. A andaina do fotoxornalista, que conta con distintos galardóns e ten publicado en xornais como Der Spiegel, Financial Times ou The Guardian, pode seguirse na bitácora www.felipecarnotto.com/blog.

• ACTUALIDADE,Novas

A organización da VI Travesía a Nado Sisargas-Malpica doa ao banco de alimentos 150 kg de comida, un por cada participante

A espectacular proba celebrarase o vindeiro 9 de agosto

A Travesía a Nado Sisargas-Malpica, que chega este ano á súa sexta edición, non é só unha proba deportiva, senón tamén solidaria. Os organizadores doaron ao banco de alimentos do Concello de Malpica un total de 150 quilos de comida, un por cada participante. Daniel Gambón, en representación do Club Travesía Sisargas, fixo entrega ao alcalde de Malpica, Eduardo Parga, e á concelleira de Servizos Sociais, Marisol Blanco Gorín, de champiñóns, chícharos, cenoria, albóndegas, fabada, lentellas, garavanzos, salsa de tomate, fariña, aceite, azucre, cacao en polvo, atún… todo ilo adquirido na cadea de supermercados Gadis, que colabora coa proba.

A Travesía a Nado Sisargas-Malpica celebrarase o vindeiro 9 de agosto. Os participantes terán que percorrer 4,2 km. en mar aberto, dende a Sisarga Grande, ata onde irán embarcados, pasando polo cabo de San Adrián e a Punta de Seaia ata chegar á praia de Malpica. Un dos aspectos máis importantes da proba é a seguridade. O dispositivo estará integrado por 10 postos de vixilancia por terra, boias de sinalización do percorrido, ambulancia, lanchas de apoio, barco escoba, lancha de coordinación e equipo médico, lancha de intervención e kayaks de apoio.

O interese que esperta a Travesía a Nado Sisargas-Malpica non deixa de aumentar dende a primeira edición. Este ano as 150 prazas dispoñibles completáronse xa nos primeiros días.