gl_ES
Tempo Malpica de Bergantiños
Venres 23°
17°
Sábado 19°
17°
Domingo 20°
16°
tiempo.com   +info
  1.  
  2. ACTUALIDADE
  3. Novas
  4. A veciñanza de Malpica reciclou 1.286 litros de aceite vexetal en 10 meses

31Out 2016

A veciñanza de Malpica reciclou 1.286 litros de aceite vexetal en 10 meses

colector centro civico

Os veciños de Malpica seguen contribuíndo á reciclaxe de aceite vexetal. Dende que se puxo en marcha o sistema de recollida selectiva, a mediados do 2013, grazas a un convenio entre o Concello e a empresa Reave (Recollidas de Aceite Vexetal), os malpicáns utilizan de cotío os colectores instalados no mercado municipal, o Centro Cívico, a Casa do Oleiro, o Centro Social de Seaia, o das Pozacas e o colexio Joaquín Rodríguez Otero. O mercado de abastos, no entanto, é o punto de depósito preferido polos veciños, cun total de 421 litros nos dez meses comprendidos entre xuño do 2015 e abril deste ano, aos que corresponde o último informe enviado por Reave ao Concello de Malpica.

Tanto dende a empresa como dende o Concello de Malpica agradeceron a colaboración da cidadanía e resaltaron a importancia de evitar que o aceite vexetal que se utiliza para cociñar acabe nos desaugues, xa que mesturado co xabón crea unha costra que acaba por atascar as canalizacións e ademais é prexudicial para as augas do sumidoiro. A mellor alternativa é almacenar o aceite en botellas de plástico con tapón de rosca e depositalo en calquera dos seis colectores distribuídos polo municipio.