Síguenos en
gl_ES
Tempo Malpica de Bergantiños
Luns 15°
10°
Martes 14°
Mércores 14°
10°
tiempo.com   +info
  1.  
  2. 2021
  3. Outubro

Outubro 2021

30Out 2021

O Centro Cívico acollerá a exposición fotográfica ‘Trece luces na nosa costa’ a partir do 6 de novembro

A Concellería de Educación, Cultura, Patrimonio e Deportes do Concello de Malpica, en colaboración coa Deputación da Coruña, acaba de anunciar a exposición fotográfica ‘Trece luces na nosa costa’, de Antonio Fernández.

O acto de inauguración da mostra realizarase o sábado 6 de novembro ás 19:00 horas no Centro Cívico. As pezas permanecerán expostas desde ese mesmo día ata o 10 de decembro. O horario de visitas será de luns a venres de 10.00 a 13:30 e de 15:30 a 20:00 horas.

A través desta serie de imaxes, Antonio Fernández, mestre xubilado, trata de contar a historia dos faros da Costa da Morte e a evolución da súa función ao longo do anos. O autor conta con seis premios en diferentes certames que poñen de manifesto a calidade do seu traballo.

A concelleira de Cultura, Noelia Freijeiro, anima a toda a veciñanza “a coñecer a historia do noso patrimonio a través dunha colección fotográfica que recolle esa aura especial que rodea os faros da nosa comarca”.

28Out 2021

O Concello de Malpica destina 20.000 euros para axudas a entidades sen ánimo de lucro do municipio

O Concello de Malpica destina unha partida de 20.000 euros en axudas para entidades sen ánimo de lucro do municipio co obxectivo de dinamizar o asociacionismo e a cultura entre a veciñanza.

As bases reguladoras xa están publicadas no Boletín Oficial da Provincia do martes 26 de outubro. A convocatoria abrirase nos vindeiros días e deberá tramitarse a través do Rexistro Electrónico na seguinte ligazón: https://sede.malpicadebergantinos.es/opencms/gl/.

Deste xeito, subvencionaranse todo tipo de actividades culturais que se realicen no ámbito xeográfico do municipio, así como gastos de funcionamento de entidades culturais con sede no Concello. “Trátase dunha convocatoria dunha enorme importancia para o tecido asociativo do municipio e, por extensión, para as opcións de ocio e cultura da nosa veciñanza”, explicou a concelleira de Cultura, Noelia Freijeiro. Neste sentido, asegurou que “un dos principais obxectivos do goberno local é potenciar o sector cultural do noso municipio xa existente e seguir ampliando a base para acoller ao maior número de persoas posible”, engadiu.

Os anexos necesarios para tramitar a solicitude pódense descargar a través destas ligazóns:

Anexo I: https://bit.ly/3CjPqLf

Anexo II: https://bit.ly/3bn60hv

Modelo Orzamentos: https://bit.ly/3pHKBrH

Modelo Memoria Actividades: https://bit.ly/3Gw8BE8

Bases dispoñibles en https://bit.ly/3pHKXyx.

26Out 2021

O Concello de Malpica e a Asociación Salitre recadan máis de 2.000 euros para a illa de La Palma co concerto benéfico ‘Isla Bonita’

O Concello de Malpica a e Asociación Cultural e Deportiva Salitre lograron recadar un total de 2.075 euros a través da celebración do concerto benéfico ‘Isla Bonita’ o pasado 23 de outubro. A axuda destínase a asociacións animalistas da illa de La Palma, que segue a estar afectada pola erupción do volcán de Cumbre Vieja.

O evento, que tivo lugar en Canido, contou coa participación dunha ducia de bandas de Malpica e doutras zonas da provincia da Coruña. Entre os grupos e artistas convidados estiveron o Mago Carlangas, Meigallo da ACD Carcaxía, Gaiteiros da AC Malante, Salitre no Pupitre, Xurxo Souto, O Pau Ke Vira, Juampiños, Improvisóns, Cantareiras da AC Raigañas, Las Antonias, Amenaza de Muerte e DJ SIL.

Tanto o Concello como a Asociación Salitre queren trasladar o seu agradecemento ás máis de vinte entidades e empresas colaboradoras na causa, entre as que se atopan Super MM, Aliprox, Tenda da Tía Carmen, Librería Miguens, Cartafol, Comestibles Varela, Carnicería Lola, Carnicería Moncho, Panadería La Trigalia, Panadería Forno Novo, Adozarte, Restaurante Casa Antonio, Submarino, Bar Santiago Apóstol, A Taberna do Lesto, Bar Humboldt, Cafetería Don Paco, Bar Larada, Bar Dársena, Club Patín Velúa, ACD San Xulián e UD Cerqueda. Tamén a F3 Vídeo e Damián Varela, encargados de cámara e fotografía, así como a Rakelua Coiro e Fátima Bermúdez, do apartado de decoración.

Neste sentido a concelleira de Cultura, Noelia Freijeiro, estendeu “a gratitude de todo o goberno local a todas as veciñas, veciños e visitantes que se achegaron a Canido nunha xornada coa que se pretendeu aportar un pequeno grao de area co que facilitar a recuperación económica nunha situación dramática para centenares de familias”.

“Malpica acaba de demostrar unha vez máis a súa profunda solidariedade e implicación cunha causa que non obedece a factores xeográficos, senón que se corresponde cun xesto de apoio humanitario”, destacou.

(Imaxes cedidas por Damián Varela)

26Out 2021

O Concello de Malpica, a través da Deputación, destinou máis de 17.000 euros para a contratación da brigada de limpeza de praias no 2021

O Concello de Malpica, a través da Deputación da Coruña, destinou 17.297 euros para a contratación da brigada de limpeza de praias durante a tempada estival do ano 2021

A brigada de limpeza de praias estivo composta por 8 peóns e estivo operativa do 23 de xuño ata o 6 de setembro de 2021.

Esta actuou en tódalas praias do Concello de Malpica: Area Maior, Canido, Seaia, Beo, Seiruga, Barizo, Riás, San Miro e As Torradas.

Malpica é un dos principais destinos turísticos da Costa da Morte sendo beneficiarios desta brigada de limpeza de praias todos os veciños e veciñas do Concello, os visitantes e turistas que nos honraron coa súa presenza durante a tempada estival e que puideron contemplar a excelencia das nosas praias e a súa protección medioambiental.

22Out 2021

O espectáculo “Varietés Animalario” trasladarase ao auditorio do Centro Cívico de Malpica

Debido ás condicións meteorolóxicas previstas para este domingo, 24 de outubro ás 18.00 horas, o espectáculo de monicreques “Varietés Animalario” de Paporrubio -en lembranza do 88 aniversario da visitas das Misións Pedagóxicas a Malpica- cambiará de localización. A función, que ía ter lugar na rúa Eduardo Vila Fano, trasladarase ao auditorio do Centro Cívico de Malpica.

20Out 2021

O Concello programa nove funcións para veciños de todas as idades a través da XVII Mostra de Teatro

Todas as representacións realizaranse no auditorio do Centro Cívico de Malpica ás 20.30 horas

Malpica converterase, nos meses de outubro, novembro e decembro, no escenario ao que se subirán varias compañías de renome da escena galega. A través da celebración da XVII Mostra de Teatro, o Concello ofrecerá a veciños e veciñas de todas as idades, nove representacións teatrais que se levarán a cabo no auditorio do Centro Cívico do municipio ás 20.30 horas. A programación arrincará o venres, 29 de outubro, e prolongarase ata o 10 de decembro.

A Mostra dará comezo o vindeiro venres, 29 de outubro, da man de “A carreta pantasma” de Berrobambán, dirixida a público adulto. A obra preséntase como unha historia singular na que se fala da morte, do medo e da memoria.

Novembro arrincará coa representación de “Coleccionistas – A arte feita comedia” de Ainé Producións (5 novembro). Trátase dunha comedia didáctica, dunha clase de arte chea de humor na que o público asistente terá un papel do máis participativo. Unha semana despois, o 12 de novembro, a compañía Pérez&Fernández tomará o relevo con “Os nenos da varíola”,  baseada na Real expedición Filantrópica da Vacina que partiu desde o porto da Coruña o 30 de novembro de 1803. Ese día, 22 orfos e orfas conformaron unha cadea humana “brazo a brazo” para facer chegar a vacina aos territorios de ultramar.

“Liberto”, de Rebordelos S.L. converterase na seguinte obra en subir á escena malpicá (19 de novembro). A función conta a historia de Ada, unha moza que relata, a través dun texto teatral, a experiencia máis determinante da súa vida: o nacemento de Liberto, o seu segundo fillo.

A agrupación Os Quinquilláns conquistarán ao público malpicá con “A pluma viva de Rosalía (26 de novembro), inspirada nun feito real de censura a un texto da escritora de Follas Novas. A obra arrinca coa visita sorpresa de Rosalía de Castro á imprenta de Soto e Freire, que acaba de ser atacada por un grupo de 200 seminaristas contrarios á publicación dun artigo.  Ao día seguinte,  o 27 de novembro, será a quenda de “Bravas” de Isabel Risco. Neste caso, a produción céntrase nas mulleres sen medo, naquelas que forman un valeroso clan que elas mesmas constrúen sobre os piares da rebeldía, a ilusión o inconformismo e a valentía.

Decembro chegará tamén cargado de teatro, e a primeira función terá lugar o venres, 3 de decembro, cando se interpretará “Pinocchio” de Teatro Ghazafelhos (para cativos e cativas a partir de 6 anos). Trátase dunha adaptación da obra clásica na que o protagonista é un monicreque que agocha un segredo no seu corazón. A posta en escena combina os monicreques, o teatro e a música en directo.  A temática da Mostra dará un xiro de 180º tan só un día despois, 4 de decembro, cando se interpretará a función “Crónicas dunha heterosexual insatisfeita”, de Verdeveras Expresións Artísticas en coprodución co Centro Dramático Galego. Nela convídase aos asistentes a reflexionar sobre as normas e parámetros preestablecidos que facemos propios sen sequera pensar se hai outra opción diferente.

A seguinte e última representación será o 10 de decembro coa función “Vida de cans”, a cargo de Talía Teatro. É unha comedia paródica e metafórica na que os actores se converten en tres cans. Durante a obra, os animais terán que afrontar un conflicto diferente en función da súa personalidade.

O aforo máximo en cada un dos espectáculos será de 150 persoas espectadoras. As persoas interesadas poderán reservar a súa entrada desde hoxe, mércores 20 de outubro, a través das seguintes vías: o correo auditoriodemalpica@gmail.com indicando o nome e apelidos de cada solicitante, o número de DNI se é o caso, un teléfono de contacto e os espectáculos nos que desexa realizar a reserva. 

15Out 2021

Unha ducia de bandas participará no concerto benéfico ‘Isla Bonita’ que organiza o Concello de Malpica e a Asociación Salitre

Unha ducia de bandas de Malpica e doutras zonas da provincia da Coruña xa confirmaron a súa participación no concerto benéfico ‘Isla Bonita’ que organiza o Concello de Malpica en colaboración coa Asociación Cultural e Deportiva Salitre. O evento terá lugar o vindeiro 23 de outubro a partir das 16:00 horas no aparcadoiro de Canido.

A celebración deste festival solidario ten como obxectivo recadar fondos para colaborar cos afectados pola erupción volcánica da illa de La Palma. Entre os grupos e artistas convidados atópanse o Mago Carlangas, Meigallo da ACD Carcaxía, Gaiteiros da AC Malante, Salitre no Pupitre, Xurxo Souto, O Pau Ke Vira, Juampiños, Improvisóns, Cantareiras da AC Raigañas, Las Antonias, Amenaza de Muerte e DJ SIL.

O aforo estará limitado e será necesario confirmar a asistencia de xeito previo enviando un correo electrónico a salitremalpica@gmail.com indicando nome e apelidos de cada solicitante ademais dun teléfono de contacto.

A concelleira de Cultura, Noelia Freijeiro, lembrou que, con esta actividade, “Malpica pretende aportar un pequeno grao de area co que facilitar a recuperación económica nunha situación dramática para centenares de familias”. “A entrada en actividade do volcán Cumbre Vieja provocou a destrución de vivendas, edificios e plantacións, forzando o desprazamento das persoas residentes e tamén de moitos animais salvaxes e domésticos”, lembrou.

Neste sentido, a concelleira lembrou que “o proxecto pretende contribuír á mellora da atención aos animais desprazados polos efectos derivados da actividade volcánica e a evacuación da poboación”.

13Out 2021

Curso de Alternativas de Xestión ao Minifundio Forestal

O Concello de Malpica, xunto co Grupo de Desenvolvemento Local (GDR) da Costa da Morte, organiza un Curso de formación de “Alternativas de xestión ao minifundio forestal” de 44 horas lectivas, que terán lugar en Buño, nas instalacións do antigo Centro Comarcal (actualmente Centro de Artesanía e Tradición – CAT).

O curso terá lugar dos días 27 de outubro ao 6 de novembro de 2021, en horario de 10:00 a 14:00 horas no antigo Centro Comarcal de Bergantiños (Lugar A Camposa, s/n – 15111 Buño – Malpica de Bergantiños).

Tamen se farán viaxes prácticas os días 30 de outubro e 6 de novembro de 2021, en horario de 09:00 a 21:00 horas (a fin de coñecer outras experiencias dos aproveitamentos forestal froiteiro – castaña e de mazá e arándanos).

Este curso está destinado ás persoas vinculadas profesionalmente aos sectores produtivos relacionados coa agricultura, gandería, industria agroalimentaria e a cadea forestal-madeira ou con expectativas de incorporación a estes sectores, en especial aos mozos e mozas do medio rural.

Para reservar praza poden facelo, adxuntando o formulario cuberto, no seguinte enderezo: gdrcostadamorte@gdrcostadamorte.com ou informacion@foresin.es. Tamén chamando ao teléfono: 981-717358 (GDR COSTA DA MORTE).

11Out 2021

Malpica rememora as Misións Pedagóxicas do 1933 cunha mostra fotográfica e un espectáculo de monicreques

O departamento de Cultura do Concello de Malpica, dentro da programación da Rede Cultural 2021 da Deputación da Coruña, rememorará as Misións Pedagóxicas do 1933 cunha mostra fotográfica e un espectáculo de monicreques. Conmemoraranse así as históricas representacións de José Val de Omar, Ramón Naya, Fernández Mazas, Miguel Prieto, Urbano Lugrís e Rafael Dieste.

O 20 de outubro de 2021 cúmprense 88 anos desde que o público malpicán puido gozar dunha serie de actividades con monicreques que acabarían percorrendo toda España co obxectivo de achegar a cultura a toda a poboación.

Deste xeito, o Fondo Lugrís do Centro Cívico será o escenario dunha mostra fotográfica das Misións Pedagóxicas do 1933 que estará aberta ao público desde o 18 ao 31 de outubro.

Ademais, o 24 de outubro ás 18:00 horas terá lugar o espectáculo ‘Varietés do Animalario’ da compañía teatral Paporrubio na praza Anselmo Villar Amigo. Trátase dunha actuación familiar, adecuada para nenas e nenos a partir de 3 anos,.

Será necesario inscribirse previamente para esta actividade, que contará cun aforo máximo de 100 persoas. Poderán reservarse asentos a partir do 15 de outubro enviando un correo a anton.noceda@malpicadebergantinos.es indicando nome e apelidos, DNI e teléfono de contacto. Cada persoa poderá solicitar ata catro asentos. A concelleira de Cultura, Noelia Freijeiro, destacou a importancia “dunha conmemoración histórica non só para Malpica, senón para todo o país”. “A través desta programación queremos facer un tributo a unha iniciativa pioneira que sentou as bases para o proceso de alfabetización de toda a sociedade”, engadiu.

6Out 2021

Malpica acollerá a cuarta edición do Memorial Ángel Rubio de xadrez, que repartirá 800 euros en premios

Malpica acollerá o vindeiro sábado 9 de outubro a IV edición do Memorial Ángel Rubio de xadrez. A proba repartirá 800 euros en premios e é valedora para o V Circuíto de Xadrez Deputación da Coruña 2021.

Esta competición anual está coordinada polo Club Xadrez Guillán, organizada polo Club Xadrez Arteixo e patrocinada polo Concello de Malpica coa colaboración da Deputación, a Asociación de Olería de Buño e Frutas Fondo.

A proba terá lugar no pavillón municipal de Malpica e comezará ás 16:00 horas coa primeira rolda. O acto de clausura e de entrega de premios está previsto para as 21:00 horas.

As inscricións poden realizarse ata o venres 8 de outubro chamando ao 617 23 43 93 ou enviando un correo a pokeryajedrez@gmail.com. Os prezos son de 8 euros na categoría xeral, 5 euros en sub-16 e gratuíto para GM-MI e competidores locais.

As bases da competición están dispoñibles na páxina web http://www.pokeryajedrez.com/iv-concello-de-malpica/.