gl_ES
Tempo Malpica de Bergantiños
Venres 13°
Sábado 15°
Domingo 12°
tiempo.com   +info
  1.  
  2. 2020
  3. Xaneiro

Xaneiro 2020

9Xan 2020

A Deputación da Coruña comprométese a crear un grupo de traballo para mellorar Malpica

A Deputación Provincial da Coruña, con seu presidente Valentín González Formoso á cabeza, comprometeuse a crear un grupo de traballo para acadar melloras infraestruturais no Concello de Malpica.

A vila malpicá recibiu hoxe, xoves 8 de xaneiro, a visita institucional do presidente da entidade provincial, ao que acompañou o alcalde de Malpica, Walter Pardo, e algúns dos membros tanto do equipo de goberno como da oposición.

Realizaron unha visita á instalación da empresa Forjados El Progreso, para coñecer a súa actividade. Ás 13:00 horas, o presidente da institución provincial foi recibido polo alcalde na Casa do Concello.  Tamén visitaron a Confraría de Pescadores, onde puideron contemplar algunhas das obras que Urbano Lugrís pintou en Malpica. Tamén a Lonxa e o Fogar do Pensionista, acompañados dos membros do goberno municipal.

Pola súa banda, o alcalde de Malpica, Walter Pardo, quixo sinalar que “é difícil dar un paseo pola nosa vila sen recoñecer pegadas do compromiso coa cohesión territorial impulsada pola Deputación da Coruña. O noso concello ten o anhelo de deixar de ser un territorio periférico e arraigar poboación. Para posibilitar este obxectivo, son moitos os retos que temos trazado, e gustaríanos contar co apoio da Deputación Provincial”, apuntaba o rexedor malpicán.

En palabras do presidente da Deputación, Valentín González, “esta visita serve para coñecer a realidade da vila de Malpica. Faremos un exame realista e o meu compromiso é facer un grupo de traballo para aportar ideas, todo para revitalizar esta vila da Costa da Morte. Hai que escoitar a todas as persoas, ter en conta as tendencias e cales son os camiños a tomar. Tanto pola vosa parte como pola nosa existe vontade, e non me cabe dúbida de que se reflictirá no futuro”, aportaba Formoso.

8Xan 2020

O alcalde de Malpica, Walter Pardo, consegue o compromiso da Xunta para prorrogar o convenio para o centro de día do municipio

O alcalde de Malpica, Walter Pardo, acaba de conseguir o compromiso da Consellería de Política Social para seguir financiando a creación do futuro centro de día do municipio. Así o confirmou o rexedor, que se reuniu hoxe coa conselleira de Política Social, Fabiola García. Á cita acudiu tamén a concelleira de Cultura, Olaría, Igualdade e Patrimonio de Malpica, Leticia Naya Varela e o concelleiro do PP, Eduardo Parga.

O alcalde destacou a “boa sintonía” do encontro, incidindo “nos excelentes resultados acadados”. O Concello sacou un compromiso para unha nova sinatura dun novo convenio de carácter plurianual polo mesmo importe do acordo anterior, de 150.000 euros.

O convenio precedente fora asinado en novembro de 2018, pero perdeu a súa vixencia.

Por medio deste acordo, a Xunta comprométese a aportar 150.000 euros, mentres que o Concello achegará a contía restante (outros 150.000 euros). Walter Pardo incide na necesidade de “habilitar esta nova dependencia canto antes co fin de sumar un servizo crucial para os veciños e veciñas do concello”.

8Xan 2020

Música en directo todos os domingos no centro cívico de Malpica

O Centro Cívico de Malpica ofrecerá, todos os domingos, música en directo, refrescos, doces e a posibilidade de participar no sorteo dunha cea para dúas persoas o domingo, 12 de abril.

O programa arranca este domingo, 12 de xaneiro, coa voz de Claudia. O Dúo Karma  (19 de xaneiro), Dúo Élite (26 de xaneiro) e Ángel Obama (2 de febreiro) subiranse tamén ao escenario do centro cívico.

 

 

2Xan 2020

Cabalgata de Reis Malpica de Bergantiños 2020

Concello de Malpica, a A.C. Malante, A.C. Raigañas, A.C. Carcaxía, a Asociación Veciñal e Cultural Viradeira de Buño, a Asociación Veciñal Río de San Antonio, a ANPA Milladoiro e a ANPA J.R.O. organizan a Cabalgata de Reis 2020. A cita coas Súas Maxestades de Oriente terá lugar este domingo, 5 de xaneiro. Durante a xornada, os Reis Magos pararán nos seguintes puntos:

  • Parada na parroquia de Mens. Fronte ao Bar Secundino (10.45 horas).
  • Parada na parroquia de Barizo. No Campo da Festa, diante do Centro Sociocultural (11.30 horas).
  • Parada na parroquia de Vilanova. Ao carón da igrexa, fronte ao parque infantil (12.15 horas).
  • Parada na Casa da Cultura de Seaia (12.45 horas).
  • Parada dos Reis e paxes no Centro Sociocultural de Cambre (17.00 horas).
  • Parada da Cabalgata no Centro Sociocultural de Buño, Teleclub (17.30 horas).
  • Cantos de Reis na Carpa Real do Paseo Marítimo, zona do chiringuito (18.00 horas).
  • Parada da Cabalgata en Cerqueda (Aldeola). Explanada do Bar O Rally, fronte á gasolineira (18.15 horas).
  • Saída da Cabalgata do Centro Cívico (19.00 horas).
  • Chegada dos Reis Magos de Oriente e dos seus paxes á Carpa Real do Paseo Marítimo. Recepción da rapazada e chocolatada (19.30 horas).

Botádelle un ollo aos horarios dos autobuses para asistir á Cabalgata de Reis.

Bus Nº 1:

  • 17.45 horas Mens – Parada na explanada do Bar Secundino.
  • 17.50 horas Barizo – Parada bus escolar (estrada xeral).
  • 17.55 horas Beo – Parada do bus escolar.
  • 17.58 horas Seaia – Parada na Casa da Cultura.
  • 18.00 horas Vilanova – Parada no adro da igrexa.

Bus Nº 2:

  • 17:50 horas  Cambre – Parada de bus escolar, Leixoada.
  • 17:55 horas Buño – Parada no Centro Sociocultural de Buño (Teleclub). Ao carón da Igrexa.
  • 18:00 Cerqueda – Parada fronte a gasolineira. Parada de bus.

Os autobuses descargarán os pasaxeiros no Centro Civico (Malpica). Os autobuses chegarán ao Centro Cívico (Malpica) entre as 18:15 horas e as 18:30 horas Os autobuses sairán do Porto (Zona da Lonxa) para as diferentes parroquias ás 21.00 horas.

Mens

Cabalgata de Reis Leiloio

O domingo, 5 de xaneiro, os Reis Magos de Oriente sairán da Feira Nova a partir das 18.00 horas e percorrerán a parroquia de Leiloio. A cita está organizada pola A.C. A Feira en colaboración co Concello de Malpica.

Mens