gl_ES
Tempo Malpica de Bergantiños
Luns 18°
15°
Martes 20°
15°
Mércores 19°
15°
tiempo.com   +info
  1.  
  2. 2019
  3. Febreiro

Febreiro 2019

27Feb 2019

Ethel Vázquez anunciou para este verán o inicio da reordenación e humanización da rúa principal de Malpica, cun investimento de 570.000 euros

IMG_1526

A conselleira de Infraestruturas e Mobilidade, Ethel Vázquez, mantivo hoxe unha xuntanza co alcalde de Malpica de Bergantiños, Eduardo Parga, veciños e comerciantes, na que avanzou o inicio este verán da reordenación e humanización da vía autonómica AC-418 ao seu paso polo centro urbano, cun investimento de 570.000 euros.

Vázquez Mourelle, xunto co delegado territorial da Xunta na Coruña, Ovidio Rodeiro, presentou o proxecto de mellora na contorna que coincide coas rúas Emilio González, Villar Amigo e Eduardo Vila Fano, e que forman parte da estrada autonómica. Unha intervención que, segundo dixo, busca facer cidade e humanizar unha parte da estrada autonómica que na actualidade conta con dous carrís de circulación e beiravías cun ancho reducido, e que debido ao seu carácter urbano e central debese adaptar á realidade actual dunha rúa principal do concello moi transitada e meramente urbana.

Explicou que a intervención, que mudará completamente a imaxe desta estrada e a súa contorna. se realizará ao longo de 300 metros, e persegue incrementar a seguridade viaria, a mellora dos servizos municipais, os que “non se ven” e, por último, unha maior integración urbana da estrada.

A conselleira salientou que no relativo á seguridade viaria, estas rúas veranse beneficiadas coa implantación de medidas que terán como resultado un calmado do tráfico que circula pola estrada así como unha maior seguridade para os peóns.

Tamén suporá unha mellora no relativo a servizos municipais, xa que se renovan as redes de saneamento e pluviais. E ademais, subliñou, suporá unha mellor integración urbana do vial, xa que se instalarán árbores e mobiliario urbano ao tempo que se dará á estrada unha estética máis humanizada.

O proxecto

Indicou que todo isto será posible grazas a unha nova calzada, repavimentada con formigón impreso, que se estreitará en medio metro reducindo o espazo destinado aos vehículos para incrementalo no espazo dos peóns.

IMG_1536

Ademais, engadiu, demoleranse e construiranse unhas novas beirarrúas máis anchas que se complementarán con balizas luminosas e con pasos de peóns diferenciados mediante granito. A intervención prevé ao mesmo tempo cambiar o peralte do viario, de xeito que as augas de chuvia sexan dirixidas cara os renovados sumidoiros evitando charcos ao longo da rúa.

Concretou que a actuación xa está licitada e hoxe mesmo reuniuse a mesa de contratación co obxectivo de poder adxudicar as obras no mes de abril para poder inicialas no verán, e telas rematados antes de que finalice este ano 2019. E indicou que a programación dos traballos estará completamente coordinada co concello para reducir, na medida do posible, as molestias que poidan ocasionar aos veciños e condutores nos meses de verán.

Vázquez Mourelle abundou na importancia desta nova intervención do departamento que dirixe na mellora da seguridade viaria e na comodidade dos veciños de Malpica que se vén sumar a outra obra realizada neste concello. Trátase da senda Xornes-Buño-Cantalarrana, que se puxo en servizo o pasado ano para mellorar a mobilidade peonil en 2 km destas localidades, grazas a un investimento superior ao medio millón de euros.

Polo tanto, concluíu, unha gran aposta da Xunta de Galicia pola mellora da seguridade viaria de Malpica que é posible, sen ningunha dúbida, grazas ao entendemento entre o Goberno municipal e a Administración autonómica.

22Feb 2019

O mellor Entroido da Costa da Morte chega cargado de citas ineludibles

CARCAXIA PIÑATAS

O obradoiro de piñatas que organiza a asociación Carcaxía abre, este sábado 23 de febreiro, a programación de Entroido elaborada polo Departamento de Cultura do Concello de Malpica en colaboración coas asociacións Malante, ANPA Ventorrillo, ANPA do CEIP Joaquín Rodríguez Otero de Buño, Asociación de Redeiras Mar da Illa, Asociación Cultural Carcaxía, A.V. S. O Brizo, Asociación Cultural Raigañas, Asociación de Amijos da Mikaela, A. VV. De Leiloio, AVC Viradeira de Buño, Asociación de Amas de Casa, tabernas, bares, cafetarías, restaurantes e pubs.

O groso da programación concentrarase entre o 1 e o 10 de marzo. Estas son as citas:

Venres de Entroido, 1 de marzo

  • Pasarrúas do CEIP MILLADOIRO, a partir das 10.30 h.
  • Pasarrúas do CEIP Joaquín Rodríguez Otero, a partir das 10.30 h.
  • Concurso de disfraces de Entroido, a partir das 24.00 horas polos pubs da vila. Cestas de lacóns e chourizos para os mellores disfraces. As persoas participantes deberán percorrer todos os locais organizadores onde se puntuará cada disfrace. Gañarán os/as que acaden maior puntuación. Organizan os pubs de Malpica: Jofra, Submarino, Leño, Brebaxe, Patio, Prisma, e Don Paco.

Sábado de Entroido, 2 de marzo

 

  • A partir das 13.00 actuación de Os Piñeiros, na Praza Anselmo Villar Amigo de Malpica.
  • Ás 20.00 h. ruta de viños.
  • A partir das 22.00 h. cocido de Entroido no Restaurante Dourado (cocido, filloas, café e bebida.), Prezo 25,00 €, con sorteos de experiencias doadas polas tabernas, bares, cafetarías e restaurantes de Malpica. Prazas: 120. Venta de entradas: Pub Jofra, Restaurante San Francisco e Taberna do Lesto.
  • A partir das 00.30 h. actuación da fanfarra Brassica Rapa, polas rúas e pubs da vila de Malpica.
  • Concurso de disfraces de Entroido, a partir das 01.00 horas polos pubs da vila. Premios en metálico para os mellores disfraces: 150, 100 e 50 euros para os tres primeiros premios individuais, e 250, 150 e 100 para comparsas e grupos. As persoas participantes deberán percorrer todos os locais organizadores onde se puntuará cada disfrace. O xurado estará composto polos propietarios dos establecementos. Gañarán os/as que acaden maior puntuación. 

Organiza: Asociación Cultural Malante. Colaboran: Pubs, tabernas, bares, cafetarías e restaurantes de Malpica, e Concello de Malpica.

En Seaia

  • Festa de disfraces infantil con inchable e merenda saudable con doces de entroido sen glute e concurso de disfraces, a partir das 16.30 h. na Casa da Cultura de Seaia. Colabora: A. C. Carcaxía.

 En Leiloio

  • Festa infantil con inchables a partir das 17.00 h. na Casa dos Veciños de Leiloio. Colabora: Asociación de Veciños de Leiloio.
  • Desfile de disfraces infantil e de adultos a partir das 20.30 h. seguido do concurso de doces para rematar coa actuación dun Dj.  Organiza: Asociación  de Veciños de Leiloio.

En Buño

  • Ás 17.00 h., no Teleclube, obradoiro de repostería de Entroido. Para rapaces/as a partir de 3 anos. 20 prazas. Inscricións nos teléfonos: 677 303 430 e 659 127 080, ata o 26 de febreiro. Colabora: AVC Viradeira de Buño.

Domingo de Entroido, 3 de marzo

En Malpica

  • Desfile de disfraces infantil, Percorrerá a vila saíndo do Centro Cívico ás 17.30 h. e rematando na Praza Villar Amigo. Organiza: Asociación Cultural Malante.
  • Actuación da Charanga RUADA polas rúas da vila, a partir das 17.30 horas.
  • Nos pubs, tabernas, bares, cafetarías e restaurantes da Vila, daranse doces de Entroido.
  • Concurso de comparsas do Entroido polas principais rúas da vila de Malpica a partir das 17.30 horas. Premios para as mellores comparsas. Entrega de premios a partir das 19.00 horas na Praza Anselmo Villar Amigo. Categorías: xeral (a partir de 13 anos), con premios en vales por valor de 300, 200 e 100 euros; infantil (6 a 12 anos) e benxamín (0 a 6 anos), con agasallos para todos.
  • Concurso de piñatas do Entroido, na Praza Anselmo Villar Amigo, a partir das 18.00 horas. Entrega de premios ás 19.30 horas. Colaboran: A. C. Malante e C. Carcaxía. Premios en vales para mercar nos establecementos do Concello de Malpica por valor de 150, 100 e 50 euros para os tres primeiros.
  • Baile social de disfraces de maiores e concurso de disfraces para maiores das 20.00 h. ás 23.00 h no Auditorio do Centro Cívico amenizado polo Dúo D´Café.

 

Luns de Entroido, 4 de marzo

En Buño

  • Festa de disfraces infantil con inchables, chocolatada e concurso de doces de Entroido das 16.30 h. ás 19.30 h. no Pavillón Polideportivo do CEIP Joaquín Rodríguez Otero. Colabora: ANPA do CEIP Joaquín Rodríguez Otero.
  • Concurso de disfraces infantil ás 19.30 h. no Pavillón Polideportivo do CEIP Joaquín Rodríguez Otero. Premios aos mellores disfraces. Organiza: ANPA do CEIP Joaquín Rodríguez Otero.

Martes de Entroido, 5 de marzo

cartel concurso doces

En Malpica

  • Festa de disfraces infantil con inchables (rapaces/as ata 14 anos), no Pavillón Polideportivo de Malpica das 17.00 ás 20.00 horas. Colabora: ANPA Ventorrillo.
  • Concurso gastronómico de doces do Entroido, a partir das 15.30 h., no Pavillón Polideportivo de Malpica. Fallo do xurado e degustación ás 19.00 horas. Colaboran: Asoc. de Redeiras Mar da Illa e Asoc. de Amas de Casa. Inscrición: No Departamento de Educación e Cultura ou en calquera das entidades colaboradoras.

Venres, 8 de marzo

  • De 18.00 h. a 20.00 h., obradoiro musical de Entroido (elaboración dun disfrace musical para desfilar o domingo de piñata), na Aula da Arte do Centro Cívico. Para rapaces/as de 6 a 12 anos, admitiranse menores de seis anos mentres permanezan acompañados dos proxenitores. Nº de prazas: 20. Inscricións no Departamento de Educación e Cultura de 10.00 h. a 14.00 h., ata o xoves 7 de marzo.

Sábado de piñata, 9 de marzo

En Malpica

  • De 11.00 h. a 13.00 h., obradoiro musical de Entroido (elaboración dun disfrace musical para desfilar o domingo de piñata), na Aula da Arte do Centro Cívico. Para rapaces/as de 6 a 12 anos, admitiranse menores de seis anos mentres permanezan acompañados dos proxenitores.. Nº de prazas: 20. Inscricións no Departamento de Educación e Cultura de 10.00 h. a 14.00 h., ata o xoves 7 de marzo.

En Buño

  • A partir das 13.00 h. sesión vermú da Mikaela a cargo da Orquestra ARAMIO. No aparcadoiro de Casa Elías.
  • A partir das 14.00 h. degustación de cocido en todos os Restaurantes de Buño. Tamén haberá postos de polbo, carne ao caldeiro e churrasco ao carón do aparcadoiro de Casa Elías.
  • A partir das 17.00 h. Mikaeliña infantil con inchables e chocolatada (a cargo da ANPA Xaviña) para os máis novos, no CEIP Joaquín Rodríguez Otero.
  • A partir das 17.00 h. actuación do grupo rock Strobos, no cruce de Xornes.
  • Das 17.00 h. en adiante, DJ Impacto na carpa. No aparcadoiro de Casa Elías.
  • A Mikaela sairá ás 16.30 horas do Restaurante Canta la Rana percorrendo todos os bares e tabernas de Buño.
  • Ás 19.30 h. misa da Mikaela no Parque Luciano García Alén.
  • A partir das 23.00 h. actuación da Orquestra ARAMIO. No aparcadoiro de Casa Elías.
  • Ás 24.00 h. queima da Mikaela. No aparcadoiro de Casa Elías.
  • Remate de festa coa disco móbil Impacto, no aparcadoiro do Restaurante Casa Elías.

Organiza: Asociación de Amijos da Mikaela.

Domingo de piñata, 10 de marzo

En Cerqueda

  • Percorrido dos Madamitos e Ghuardineros pola parroquia acompañados por unha comitiva de Entroido. Saída ás 16.30 h. itinerario: Os Resíos, O Ceán, Filgueira, As Cortes, Cerqueda, Leduzo e as Pozacas. Organiza: A.C. Raigañas.

En Vilanova

  • Festa de disfraces infantil e degustación de doces do Entroido a partir das 16.30 h. na Escola Unitaria de Beo. Colabora: A.V.C. S. O Brizo.

En Malpica

  • Actuación da Charanga FESTICULTORES Troupe polas rúas da vila, a partir das 17.00 horas.
  • Enterro do Faustino, que sairá do Centro Cívico ás 17.30 horas para percorrer as rúas da vila. Organiza: Asociación de Redeiras Mar da Illa.
21Feb 2019

A Deputación da Coruña impulsa o III Premio Provincial á Mellor Iniciativa Empresarial

pel 3

A Deputación da Coruña ten aberto ata o 28 de febreiro o prazo de presentación de candidaturas ao III Premio provincial á mellor iniciativa empresarial, enmarcado dentro da liña PEL-EMPRENDE do Plan de Emprego Local (PEL), que constitúe unha das citas anuais clave do sector empresarial da provincia.

O seu obxectivo é recoñecer as iniciativas e o traballo realizado polas empresas, asociacións empresariais e concellos, realzando o seu papel fundamental como xeradores de riqueza e emprego, contribuíndo á súa sustentabilidade e fomentando a cultura emprendedora na provincia.

Así mesmo, o presente premio tamén pretende aportar un valor engadido ás empresas mediante a súa concesión, facilitándolles soporte e respaldo para transformar ideas actuais en emprego de calidade e contribuíndo a dinamizar novos proxectos.

Este ano, por vez primeira, inclúese unha categoría destinada ás asociacións, agrupacións, federacións e confederacións de empresarios/as da provincia da CoruñaCon este galardón de 15.000 euros preténdese recoñecer e promocionar o traballo realizado polas asociacións empresariais que impulsan a iniciativa empresarial e o emprendemento, promoven a xeración de emprego de calidade e, en definitiva, contribúen á fixación da poboación.

A participación só poderá realizarse mediante a presentación telemática da memoria de candidatura (Anexo V) e a escrituras de constitución a través da plataforma Subtel.

A participación só poderá realizarse mediante a presentación telemática da documentación, a través da plataforma Subtel.

Pode consultar as bases e a convocatoria publicadas no BOP, así como descargar os anexos a presentar, na plataforma Subtel e na páxina web do Premio provincial á mellor iniciativa empresarial: https://emprego.dacoruna.gal/lineas/lina-2-pel-emprende/premio-provincial-mellor-iniciativa-empresarial/

17Feb 2019

O 25 de febreiro comezará un novo programa de envellecemento activo promovido polo Concello de Malpica

A Concellería de Servizos Sociais de Malpica un ano máis por mesturar formación, ocio, estimulación e educación nun programa de actividades que contribúa a potenciar a autonomía das persoas maiores na súa vida diaria, ademais de favorecer a súa inserción social e evitar o illamento a través do fortalecemento das relacións sociais e a participación.

Con esa finalidade, dende o 25 de febreiro ata o 4 de abril desenvolverase un novo programa de envellecemento activo que incluirá actividades de psicomotricidade, música e movemento, pilates, cociña, termalismo concursos, técnicas de decoración con estaño, xogos e baile. En definitiva, unha serie de propostas que favorecen a participación activa dos/as maiores dun xeito dinámico e lúdico.

O prazo de inscrición estará aberto do 20 ao 22 deste mes, ou ata que se cubran as prazas dispoñibles. As persoas interesadas poden dirixirse ao Departamento de Servizos Sociais ou chamar ao teléfono 981 720 280.
As actividades desenvolveranse todos os luns e xoves. Na Casa do Oleiro de Buño serán os luns de 18.15 a 20.15 horas e os xoves de 16.00 a 18.00 horas, e no Centro Cívico de Malpica, os luns de 16.00 a 18.00 horas e os xoves de 18.15 a 20.15 horas.

Desde a área que dirixe Marisol Blanco preténdese previr o deterioro cognitivo a través de exercicios prácticos, favorecendo así a autonomía persoal; ofrecer estratexias para un envellecemento feliz, para a mellora das relacións persoais e sociais de xeito que se optimicen as relacións das persoas participantes no obradoiro co seu entorno; aprender novas formas de comunicación e participación a través das TIC’s, previr o deterioro físico e ensinar unha serie de exercicios sinxelos para o mantemento físico que as persoas participantes poidan reproducir con facilidade no seu fogar, realizar pequenos traballos manuais cos que estimular e mellorar a coordinación motora fina, fomentar o consumo saudable ou dar a coñecer os beneficios da lectura para manter a mente activa, entre outros.

1

1Feb 2019

A Concellería de Servizos Sociais organiza un novo curso de arranxos florais en Buño e Malpica

Despois do éxito que tivo a primeira edición, a Concellería de Servizos Sociais e Igualdade pon en marcha un novo curso de arranxos florais, unha iniciativa que favorece a autonomía persoal e as habilidades básicas, mellora as capacidades cognitivas, contribúe a eliminar o estrés, facilita novos coñecementos en diversas áreas e crea un ambiente positivo entre flores, tal como explica a concelleira Marisol Blanco Gorín. A xestión recae de novo na empresa de economía social + Porvir, e da parte práctica encárgase Vina’s Arte Floral.

Haberá dous grupos, un na Casa do Oleiro de Buño todos os luns dende o 11 de febreiro ata o 8 de abril e outro no Centro Cívico de Malpica todos os mércores dende o 13 de febreiro ata o 10 de abril, cun máximo de 15 participantes en cada un. En ámbolos dous casos o horario será de 16.00 a 18.00.

O prazo de inscrición estará aberto do 6 ao 8 deste mes ou ata esgotar prazas. As persoas interesadas poden dirixirse ao departamento de Servizos Sociais no Centro Cívico ou a través do teléfono 981 720 280.

TALLER ARRANXOS FLORAIS