gl_ES
Tempo Malpica de Bergantiños
Domingo 20°
15°
Luns 20°
15°
Martes 18°
16°
tiempo.com   +info
  1.  
  2. 2017
  3. Novembro

Novembro 2017

24Nov 2017

O Concello de Malpica asina un contrato por dous anos, ampliable ata tres, con Aspaber para a limpeza viaria

ASPABER 2

O Concello de Malpica e Aspaber asinaron hoxe o contrato correspondente ao servizo de limpeza viaria, que foi adxudicado ao centro especial de emprego Aspaber no concurso público convocado a tal efecto. No acto participaron o alcalde, Eduardo Parga; o concelleiro de Obras e Servizos, Miguel Fernández; o presidente de Aspaber, Francisco Costa, e a directora do centro especial de emprego, Dolores Fernández.

Aspaber, que viña desempeñando o servizo de limpeza viaria en Malpica desde mediados do ano 2013, renova deste xeito a súa vinculación co noso concello ao presentar a mellor oferta. O contrato ten dous anos de vixencia e un importe de 82.031,49 euros, e poderá ser prorrogado como máximo un ano máis.

O persoal de Aspaber encargarase da limpeza viaria, varrido e baldeo, limpeza de papeleiras, carteis e pintadas, entre outras funcións. O alcalde de Malpica expresou a súa satisfacción por poder seguir contando co centro especial de emprego non só polo bo facer que ten demostrado senón tamén porque este novo contrato permite ao Concello de Malpica seguir materializando o seu compromiso coa integración laboral das persoas discapacitadas.

24Nov 2017

O Concello de Malpica reforza o seu compromiso contra a violencia de xénero e ofrece ás vítimas “todo o apoio ano noso alcance”

IMG_3536

En Malpica anticipamos a conmemoración do Día Internacional para a Eliminación da Violencia contra a Muller para reunir a diferentes sectores sociais arredor dun obxectivo común, porque, como sinalou na súa intervención a concelleira de Servizos Sociais e Igualdade, Marisol Blanco Gorín, “a cidadanía debe involucrarse nesta loita”. Para conseguir ese obxectivo, o Concello de Malpica puxo en marcha nos últimos anos unha serie de iniciativas de visibilización que teñen como protagonista a veciños e veciñas do noso concello. O lipdub contra a violencia de xénero e a exposición fotográfica “Por elas, por nós” son dous claros exemplos, e hoxe quixemos volver a amosalos. Pero este ano damos un paso máis utilizando as fotografías da exposición para ilustrar o calendario de Malpica Igualdade para o ano 2018, do que se distribuirán 2.500 exemplares.

“O Concello -manifestou o alcalde, Eduardo Parga- non dedica tan só un día ao ano a reclamar, pedir e loitar pola erradicación da lacra social que é a violencia de xénero; o equipo de goberno está moi sensibilizado con este problema e traballa contra el no día a día. A mostra é que hai un convenio firmado co Centro de Información á Muller de Carballo, outro co Punto de Información á Muller Rural creado pola Asociación Íntegro, e tamén contamos coa colaboración inestimable da Garda Civil para por en funcionamento un protocolo de actuación con celeridade cando recibimos unha denuncia por malos tratos. Debo resaltar que o noso municipio ten un índice moi baixo de denuncias, e que en todas elas se actuou coa maior celeridade posible e se lle brindou á vítima todo o apoio ao noso alcance”.

Tanto o alcalde como a concelleira insistiron na necesidade de promover desde a casa, a escola e a sociedade unha educación en igualdade, pero tamén animaron a denunciar a violencia machista non só ás vítimas, senón tamén á cidadanía, “porque non podemos ser cómplices dos maltratadores co noso silencio”, apuntou Eduardo Parga.

O acto celebrado no Centro Cívico incluíu tamén unha pequena lembranza de Paco Souto, veciño e concelleiro falecido este ano, que foi un dos participantes na campaña “Por elas, por nós”. O Concello de Malpica quixo lembralo coa proxección do vídeo dunha canción que lle gustaba moito, e na que se fala, precisamente, do papel que cumpre a muller na sociedade. Unha visita á exposición, que poderá verse tamén nos vindeiros días na sala circular do Fondo Lugrís, completou o acto.

22Nov 2017

A Xunta inviste máis de 24.000 euros no CEIP Milladoiro de Malpica para converter a antiga casa do conserxe en comedor escolar

OVIDIO RODEIRO 1

O delegado territorial da Xunta na Coruña, Ovidio Rodeiro, visitou esta mañá o Colexio de Educación Infantil e Primaria (CEIP) Milladoiro de Malpica, no que a Consellería de Cultura, Educación e Ordenación Universitaria vén de investir algo máis de 24.000 euros na transformación da antiga vivenda do conserxe nun comedor escolar para dar servizo aos alumnos.

O delegado territorial estivo acompañado na súa visita polo alcalde de Malpica, Eduardo Parga; o primeiro tenente de alcalde, Miguel Fernández, e a directora do centro, Olga Rodríguez. As obras executadas consistiron na demolición de tabiques interiores, colocación de pavimento novo, pintura, colocación de falso teito, arranxo de iluminación e instalación eléctrica, adaptación de zona de cátering, mobiliario de cociña e zona de lava mans.

ovidio rodeiro 3

Na actualidade no CEIP Milladoiro, un dos tres centros cos que conta o municipio de Malpica, cursan os seus estudos un total de 176 alumnos entre infantil (44 en tres aulas) e primaria (132 en seis aulas), e traballan 15 mestres. Ovidio Rodeiro agradeceu á comunidade educativa do centro a súa implicación “por sumar ao esforzo por manter a calidade do ensino público e ao tempo reclamar as mellores condicións posibles para que os alumnos podan desenvolverse nas instalacións adecuadas”.

O delegado aproveitou a ocasión para felicitar á comunidade educativa po seren escollida, con 19 colexios máis de Galicia, para o proxecto Radio na Biblio, un proxecto piloto que pretende estimular o desenvolvemento do modelo de biblioteca cara a centros creativos de aprendizaxe e promover a creación de emisoras/laboratorios de radio nas bibliotecas escolares.

Rodeiro lembrou que este ano a Consellería de Cultura, Educación e Ordenación Universitaria acometeu vinte obras en outros tantos centros das comarcas de Carballo e Costa da Morte por un importe de algo máis de 1,2 millóns de euros.

22Nov 2017

Un convenio entre o Concello de Malpica e a Axencia de Turismo de Galicia permitiu sinalizar os nosos recursos turísticos

sinalizacion turistica

O convenio asinado entre o Concello de Malpica de Bergantiños e a Axencia de Turismo de Galicia para a mellora da sinalización turística do noso municipio permitiunos mellorar a identificación dalgúns dos nosos recursos turísticos máis significativos.

Grazas a un investimento de 10.098,78 euros levamos a cabo a sinalización do pobo oleiro de Buño e a súa olería tradicional, así como do Ecomuseo do Forno do Forte e o Forno dos Mouróns, dous puntos imprescindibles de visita para as persoas que queiran coñecer máis de preto a nosa artesanía.

Así mesmo, o convenio permitiu sinalizar as Torres de Mens e a igrexa románica de Santiago, na mesma parroquia; o dolmen da Pedra da Arca, en Cerqueda; o faro de Punta Nariga e o porto, en Barizo, e a ermida de Santo Hadrián e a praia de Seaia, na parroquia de Malpica.

21Nov 2017

A veciñanza de Malpica volve a protagonizar a campaña do Día Internacional da Eliminación da Violencia contra a Muller

Coincidindo co Día Internacional da Eliminación da Violencia contra a Muller, o Concello de Malpica, a través da Concellería de Servizos Sociais e Igualdade, volve a converter á cidadanía na auténtica protagonista da loita contra esa lacra social. A campaña deste ano terá como eixo o acto público que se celebrará este xoves 23, a partir das 12.30 horas, no Centro Cívico.

O alcalde, Eduardo Parga Veiga, e a concelleira de Servizos Sociais e Igualdade, Marisol Blanco Gorín, presentarán o programa de actos, que inclúe unha homenaxe ao finado Paco Souto, que foi un dos participantes na campaña do ano pasado e protagoniza unha das imaxes da exposición fotográfica “Por elas, por nós”, que poderá verse a partir do xoves no Fondo Lugrís (aula circular).

As fotografías que integran a mostra, precisamente, ilustran un calendario conmemorativo que a Concellería de Servizos Sociais e Igualdade repartirá entre a cidadanía. A distribución comezará no acto do día 23, no que tamén se proxectará o lipdub contra a violencia de xénero gravado con diferentes colectivos do municipio e que leva case 7.000 visualizacións en YouTube.

cartel 2

19Nov 2017

A UD Cerqueda renova o seu compromiso social cunha nova doazón para o banco de alimentos de Malpica

ENTREGA OS PETONS

Un ano máis, e xa van tres, a Unión Deportiva Cerqueda quixo destinar a recadación do Torneo Solidario Os Petóns ao banco de alimentos do Concello de Malpica de Bergantiños. Despois de interesarse polos produtos máis necesarios para as vinte familias usuarias do servizo municipal, representantes do club veñen de entregalos no banco de alimentos, nun acto simbólico no que participaron tamén o alcalde, Eduardo Parga; a concelleira de Servizos Sociais, Marisol Blanco, e o primeiro tenente de alcalde, Miguel Fernández.

A UD Cerqueda renova deste xeito o seu compromiso social, porque unha das máximas da entidade é conseguir que o fútbol traspase o ámbito puramente deportivo para entrar tamén no ámbito social. Deste xeito, no 2015 iniciouse unha colaboración estable entre a entidade deportiva e o banco de alimentos do Concello de Malpica da que poderemos ver unha nova mostra no Nadal.

17Nov 2017

150 nenos e nenas de catorce clubs galegos e as escolas de Malpica e Buño participarán mañá no II Trofeo Club Patín Velúa

Ao longo da xornada do sábado teremos en Malpica a 150 nenos e nenas para celebrar unha gran festa do patinaxe. O II Trofeo Club Patín Velúa, no que colabora o Concello de Malpica, reunirá a deportistas pertencentes a catorce clubs galegos, incluído o anfitrión, ademais dos alumnos das Escolas Municipais de Patín de Malpica e Buño.

patin

A xornada desenvolverase no pavillón municipal de 9.30 a 13.30 e de 16 a 20 horas. Despois das probas dos niveis 8, 7, 6, 2A, 1A e Debutantes está prevista unha exhibición a cargo de Carla Estraviz e Ángel Lorenzo, a parella subcampioa de Europa, que abrirá o desfile e o acto matinal de entrega de medallas e trofeos.

Pola tarde tocaralles a quenda aos niveis 3, 4 e 5 antes das exhibicións da EDM Malpica, Manuela Vila (campioa de España) e Pablo Vasallo (campión galego). A partir das 18.35 desenvolverase a competición autonómica nas categorías benxamín e alevín e ás 19.25 arrancará a competición nacional en alevín e infantil. O desfile e a entrega de medallas pecharán a intensa xornada deportiva.

O II Trofeo Club Patín Velúa contará coa participación dos clubs Patiart (Coristanco), Ribeira, A Pobra, Liceo (A Coruña), Dominicos (A Coruña), Anca (Lugo), Galia (Ordes), Alquimia (Cambre), Alquimia (Carral), Buxaina (Ferrol), Raiola (Ferrol), Fervello (Arteixo), Maxia (A Coruña) e Velúa (Malpica), así como das Escolas Municipais de Patín de Malpica e Buño.

16Nov 2017

Iago Espasandín presenta a súa dimisión por non poder compaxinar o cargo de concelleiro co seu novo traballo fóra de Galicia

SAMSUNG CAMERA PICTURES

A imposibilidade de compaxinar o traballo municipal coas súas novas responsabilidades laborais fóra de Galicia motivan a dimisión de Iago Espasandín Varela como concelleiro do Partido Popular en Malpica. Hoxe presentou o escrito de renuncia, que se fará oficial no pleno ordinario do vindeiro día 30. O seu posto no goberno municipal será ocupado por Julio José Vila Díaz, da parroquia de Cambre e gandeiro de profesión, posto que o seguinte na lista, Gabriel Costa García, de Mens, tampouco poderá incorporarse por motivos laborais.

No escrito presentado hoxe, Iago Espasandín explica: “O motivo da renuncia é estritamente profesional, xa que nos vindeiros días incorporareime ao meu posto de traballo fóra de Galicia, facendo totalmente incompatible a miña actividade laboral coa actividade política no Concello de Malpica”. O concelleiro de Deportes agradece o apoio dos veciños e veciñas do municipio “que fixeron posible a través do seu voto que chegara a ser concelleiro, algo que sen dúbida sempre levarei con moito orgullo”. Así mesmo, amosa a súa gratitude “ao Partido Popular pola oportunidade de formar parte da lista electoral municipal no ano 2015 e a todos os membros do grupo popular cos que compartín goberno nestes dous anos e medio”, e especialmente agradece “o apoio do alcalde e do primeiro tenente de alcalde en todas as actividades que se levaron a cabo nesta parte do mandato”. Iago Espasandín tampouco esquece ao persoal do Concello de Malpica nin a “todas as asociacións, clubs e persoas que colaboraron nesta experiencia e que dun xeito ou outro contribuíron a que tantas actividades e proxectos puidesen saír adiante, pois sen eles sería imposible”.

Na súa despedida, Iago Espasandín tamén quere “pedir desculpas polos posibles erros que puidera cometer nestes meses e desexarlle a mellor das sortes ao actual grupo de goberno no que queda de mandato”.

O agradecemento e os bos desexos son recíprocos. O alcalde de Malpica, Eduardo Parga, lamentou que Iago Espasandín abandone o seu posto da corporación, “pero o primeiro é o primeiro, e entendemos que agora ten que facer fronte ás súas novas responsabilidades laborais, nas que lle desexamos moitos éxitos e toda a sorte do mundo”. O alcalde agradeceu o importantísimo traballo desenvolvido polo concelleiro de Deportes e Urbanismo desde as áreas que xestionou ao longo de todos estes meses, e manifestou o seu desexo de seguir contando co seu apoio desde a militancia no Partido Popular e desde o compromiso que, como ten demostrado, ten adquirido co Concello de Malpica e cos seus veciños e veciñas.

10Nov 2017

Rematou o programa de envellecemento activo con moi boa nota por parte dos participantes e o compromiso do Concello de Malpica de intentar darlle continuidade

ENVELLECEMENTO

A xornada de clausura do programa de envellecemento activo promovido pola Concellería de Servizos Sociais foi unha auténtica festa. Despois da entrega de diplomas, na que participaron a concelleira Marisol Blanco, o concelleiro Miguel Fernández e o alcalde, Eduardo Parga, os e as participantes compartiron unha tarde de merenda e música en directo.

Un total de 50 persoas maiores de 60 anos participaron este ano no programa, que ten como finalidade enriquecer o proceso de envellecemento, previr situacións prematuras de dependencia e mellorar a calidade de vida dos nosos veciños e veciñas. Para conseguilo, a empresa de economía social Máis Porvir programou e levou a cabo durante o último mes numerosas actividades que foron moi ben valoradas polos asistentes, aínda que a que obtivo a mellor nota foi a xornada de termalismo.

A celebración rematou coa petición unánime dos participantes ao Concello de Malpica para manter este tipo de actividade e o compromiso do alcalde de intentar darlle continuidade a esta e outras iniciativas dirixidas ás persoas maiores.

5Nov 2017

Andrea Nunes Brións e María Rosendo asinan a obra gañadora do XII Certame de Poesía Erótica Illas Sisargas

cea das letras (1)

Por terceira vez na historia do Certame de Poesía Erótica Illas Sisargas gaña unha obra a dúas voces, pero por primeira vez trátase de dúas voces femininas: as de Andrea Nunes Brións (Marín, 1984) e María Rosendo (Vigo, 1984).  O xurado considerou que a súa Diáspora de amor balea era merecedora do premio, dotado con 1.000 euros e a publicación do libro, “pola riqueza e fondura da súa expresión metafórica, que permite construír un libro de poesía amorosa cunha marcada e explícita vontade erótica”. Tal como recolle o fallo, que se fixo público esta noite na xa tradicional Cea das Letras, “trátase dun espistolario a dúas voces nas que a forza do erotismo está na distancia física entre as voces. É un erotismo imaxinado, cálido, tenro, construído desde a memoria dos corpos e, á vez, na fertilidade da imaxinación. As dúas voces que falan no libro flutúan entre a mímese e a diferenza e dialogan a cada poema con fluidez e personalidade”.

Andrea Nunes é licenciada en filoloxía hispánica pola USC. É unha das autoras máis recoñecidas das novas xeracións da poesía galega. Publicou Corrente do esquecemento (2007) e Todas as mulleres que fun (2011), ademais de diversas obras colectivas das que destaca a recente “13 antoloxía da poesía galega próxima”, publicada por Chan da Pólvora e coordinada por Chus Nogueira. Andrea Nunes, que desde hai algúns anos vive en Nanjing (China), onde traballa como profesora de español, é tamén unha coñecida activista política e feminista.

María Rosendo, pola súa banda, realizou estudos de filoloxía inglesa e educación social. No ano 2010 obtivo o Premio Pérez Parallé co libro Nómade.

Co fallo feito público hoxe, a listaxe das obras gañadoras do Certame de Poesía Erótica Illas Sisargas é a seguinte:

  1. “Arredor do teu corpo”, Antonio García Teijeiro
  2. “Baile Átha Cliath”, Alberte Momán
  3. “Xoguetes póstumos”, Enma Pedreira
  4. “Rúa da cancela”, Eli Ríos e Eduardo Estévez
  5. “Amantes”, María Lado
  6. “Carnia Haikai”, Elvira Riveiro
  7. “Chamádeme Eva”, Mercedes Leobalde
  8. “Dominio público”, Ramón Neto
  9. “O episodio”, Verónica Martínez Delgado e Alberte Momán
  10. “A razón do perverso”, Mário J. Herrero Valeiro
  11. “O home invisíbel”, Xavier Queipo
  12. “Diáspora de amor balea”, Andrea Nunes Brións e María Rosendo

Na Cea das Letras, que este ano tivo como escenario a Casa da Cultura de Seaia, tamén se fixo entrega do premio correspondente á edición anterior a Xavier Queipo, nun acto presidido polo alcalde de Malpica, Eduardo Parga, e o presidente da Asociación Cultural Caldeirón, Paco de Tano, e no que estivo moi presente a memoria do que foi secretario da entidade, Paco Souto. Todos os asistentes foron agasallados con cadanseu exemplar de O home invisíbel, un novo título para a colección Caldeirón, e tiveron a ocasión de coñecer en primicia un dos poemas da Diáspora de amor balea recitado por unha das súas autoras, María Rosendo.