gl_ES
Tempo Malpica de Bergantiños
Mércores 13°
11°
Xoves 15°
12°
Venres 16°
14°
tiempo.com   +info
  1.  
  2. 2017
  3. Xullo

Xullo 2017

24Xul 2017

Corme e Buño revalidan os seus títulos de campións da Copa da Costa de fútbol praia

O Corme e o Buño en categoría masculina e feminina, respectivamente, proclamáronse campións da II Copa da Costa de fútbol praia e ambos revalidaron o título nun areal de Canido que estivo ateigado durante toda a fin de semana.

_CBL1633

O sábado 22 de xullo era a quenda dos equipos masculinos e foron un total de nove os que participaron nesta segunda edición da Copa da Costa de fútbol praia. Na fase de grupos, Cerqueda e Ponteceso impuxeron a súa lei nos grupos A e B gañando todos os partidos que disputaron mentres que no C habería un triplo empate a tres puntos pero sería o Corme quen pasaría como primeiro clasificado pola diferenza de goles. Deses nove equipos participantes nesta categoría masculina, tan só un quedaría eliminado nesta primeira fase e ese sería o Muxía, que acabaría a competición como noveno clasificado.

Unha vez rematada esta fase inicial, darían comezo os cuartos de final desta II Copa da Costa de fútbol praia e todos os encontros disputados resolveríanse con resultados moi axustados logo de que o Cerqueda vencese ao Xallas por 3-1, o Ponteceso fixese o propio ante o Cabana por 2-1 e o Corme e o Buño superasen ao Sporting Seaia e ao Coristanco, respectivamente, na quenda de penaltis. Os vencedores destes cuartos de final pasarían a loitar por un pase á gran final, mentres que Xallas, Cabana, Sporting Seaia e Coristanco disputarían un cadro de consolación.

Xallas e Cabana disputarían unha das semifinais na que os cabaneses vencerían por 2-7 e conseguirían o pase á final mentres que na outra semifinal, o Coristanco superaría ao Sporting Seaia por 1-3. No terceiro e cuarto posto deste cadro de consolación un Xallas guiado por un gran José Ángel lograría a vitoria ante o Sporting Seaia por 4-2. Mentres que na final o Cabana e o Coristanco empatarían a dous goles e o título de campión deste cadro de consolación decidiríase dende o punto de penalti e serían os cabaneses quen estarían máis acertados dende os nove metros e proclamaríanse campións.

En canto aos trofeos individuais, o mellor porteiro foi Eusebio Pena do Ponteceso SD, quen desquiciou aos equipos rivais coas súas constantes e espectaculares intervencións, e o mellor xogador foi Manuel Torres “Cholo” da UD Cerqueda, un xogador que foi clave para levar ao equipo cerquedán ata a final.

_CBL2317

No que respecta á loita polo título, esta II Copa da Costa de fútbol praia deixounos dúas semifinais moi intensas que acabarían resolvéndose co mesmo resultado, 4-1. Por un lado, o Cerqueda vencería a un Ponteceso que deixou un gran sabor de boca durante toda a competición, mentres que o Corme faría o propio ante un Buño que foi de menos a máis. No terceiro e cuarto posto, o Buño acadaría a vitoria grazas a dous goles de Christian nun partido cunha gran deportividade entre ambos conxuntos. Na gran final, a igualdade marcou o partido entre o Cerqueda e o Corme pero un gol de Toniño no treito final do encontro resolvería a final a prol dos cormeláns e o equipo da vila do Roncudo conseguiría revalidar o título nun ateigado Canido Area.

Mentres tanto, o domingo 23 foi a quenda das rapazas, quen a pesares de que o tempo non acompañou foron capaces de encher o Canido Area dun público entregado á causa e que puido gozar do gran nivel de fútbol praia que deron os seis equipos que conformaron esta II Copa da Costa de fútbol praia feminina.

_CBL2746

No grupo A, o Corme sería o primeiro clasificado con catro puntos e estaría acompañado nas semifinais polo Sporting Seaia. Mentres que no grupo B, o Buño non daría opción aos seus rivais e acadaría dúas vitorias noutros tantos partidos disputados e o Soneira acadaría o pase ás semifinais na última xornada logo de vencer ao Atletes.
Nas semifinais, o Corme acadaría o pase á gran final logo de vencer pola mínima a un Soneira moi novo que volveu a agradar moito ao público como xa fixera na pasada edición, mentres que o Buño fixo o propio que as cormelás logo de vencer ao Sporting Seaia por 4-1 nun partido no que se enfrontaron dous equipos que se coñecen á perfección.
No que respecta ao partido polo 5º e 6º posto, o Atletes desmelenouse e mostrou a súa mellor versión ante un Fisober ao que venceu por 1-4, mentres que no encontro polo 3º e 4º posto, o Soneira repetiría o resultado da pasada edición ao vencer por 3-2 ao Sporting Seaia.

_CBL2943 _CBL2934

Na gran final, Corme e Buño disputarían un partido igualado que se decidiu nos minutos finais a prol do conxunto oleiro, o cal revalidaría o título logo de vencer ás cormelás por 2-4.

Ademais estes dous equipos coparían os trofeos individuais, xa que Cintia Arijón do Buño SCD sería nomeada a mellor xogadora do torneo e Lucía Otero do Corme CF sería a mellor porteira desta II Copa da Costa de fútbol praia.

Dende a Asociación Deportiva Vidú queren agradecerlle ao Concello de Malpica e a Alquileres Reneymar toda a confianza depositada neles para que esta II Copa da Costa de fútbol praia fose unha realidade. Ademais dende a organización amósanse moi satisfeitos tanto pola afluencia de público como pola gran participación de equipos que houbo, a cal esperan que se amplíe na vindeira edición.

23Xul 2017

A praia de Area Maior foi escenario dunha interesante xornada sobre primeiros auxilios

PRIMEIROS AUXILIOS (5)

Aínda que non fixo día de praia, Area Maior tivo moita actividade durante toda a mañá do domingo. O noso areal foi o escenario da interesante xornada sobre primeiros auxilios organizada polo Grupo de Investigación en Actividades Acuáticas e Socorrismo (GIAAS) coa colaboración do Concello e de Protección Civil de Malpica, e impartida por Brais Ruibal, que foi socorrista en Malpica entre os anos 2010 e 2016, e Arantxa Lara López, enfermeira de Madrid que veranea na nosa vila.

Ao longo das máis de dúas horas que durou a xornada, á que se sumaron un bo número de persoas, os expertos falaron sobre a cadea de supervivencia, a valoración primaria, a posición lateral de seguridade, a RCP en adultos, nenos e persoas afogadas, a colocación e uso dun desfibrilador externo automático e o protocolo de actuación ante un caso de atragantamento.

IMG-20170723-WA0001 IMG-20170723-WA0002

22Xul 2017

O Concello de Malpica promociona a Mostra da Olería de Buño na praza de María Pita da Coruña

IMG-20170722-WA0058

O Concello de Malpica iniciou na Coruña unha campaña de promoción da Mostra da Olería de Buño (MOB), que se celebrará do 4 ao 13 de agosto. Este ano a tradicional feira de artesanía de Buño estrea imaxe e aposta por unha programación que trata de atraer a un maior número de visitantes e de abrir o abano a todas as idades. Os detalles déronse a coñecer na Praza de María Pita, na que o principal reclamo para o público foi a presenza do oleiro José Antonio Corral facendo unha demostración no torno.

Ao longo da xornada foron moitas as persoas que se achegaron ata o novidoso stand promocional da Mostra da Olería, no que tamén estivo presente o alcalde de Malpica, Eduardo Parga. Así mesmo, o Concello de Malpica aproveitou a ocasión para iniciar a distribución do novo mapa turístico de Buño, que estará a disposición de todo o público tanto na oficina de información turística de Malpica como no Ecomuseo do Forno do Forte.

A Mostra da Olería volverá a celebrarse no Parque de Luciano García Alén, no que estarán abertas as casetas de venda de 11.00 a 14.00 e de 17.00 a 21.00 horas, unha exposición do fotógrafo Peter Schneider, outra de artesanía, unha zona gastronómica e outra infantil. Pero a Mostra terá tamén como escenario o Ecomuseo do Forno do Forte, onde haberá a diario obradoiros de barro e exposición dos oleiros e oleiras de Buño.

PROGRAMA DE ACTIVIDADES
VENRES 4 DE AGOSTO
17.30 Concerto Raigañas no Parque Luciano García Alén
18.00 Acto oficial de inauguración
18.30 Visita ás instalacións da Mostra da Olería de Buño

CARTEL COCEDURA

SÁBADO 5 DE AGOSTO
11.00 a 20.00 Cocedura Tradicional no Forno do Forte
19.30 Actuación de Carcaxía no Parque Luciano García Alén
21.00 Carroa no Forno do Forte
22.30 Actuación de Pelepau no Forno do Forte

DOMINGO 6 DE AGOSTO
11.00 a 14.00 Descarga do Forno do Forte
13.30 Sesión vermú con De Vacas (Parque Luciano García Alén)

LUNS 7 DE AGOSTO – DÍA DO NENO
A partir das 17.30 Busca do tesouro e outras actividades

MARTES 8 DE AGOSTO
12.00 A 14.00 e 18.00 a 20 Ruta dos fornos guiada
22.30 Curtametraxes en familia

MÉRCORES 9 DE AGOSTO
19.00 e 21.00 Show The Momento Impro

XOVES 10 DE AGOSTO – FESTOLERÍA
A partir das 21.00 horas: Hellorice, The Cove, Cachas&Cousins, Dj Manuele Caamagno

VENRES 11 DE AGOSTO
17.30 Concurso infantil de modelado
21.00 Actuación Entrelas

SÁBADO 12 DE AGOSTO
17.30 Trofeo de fútbol MOB
21.30 Queimada tradicional e actuacións de Batuko Tabanka, Festicultores, Dj La SinCereza

DOMINGO 13 DE AGOSTO
12.00 a 14.00 e 18.00 a 20.00 Ruta dos fornos guiada
13.30 Sesión vermú coa Familia Caamagno

20Xul 2017

As nenas e os nenos de Malpica volven a “Pintar na rúa” para encher de cor o parque infantil

O vindeiro luns 24 arrancará a cuarta edición de “Pintar na rúa”, un proxecto de rexeneración urbana que ten a particularidade de que son os nenos e as nenas os que traballan, dirixidos por profesionais das artes plásticas. Este ano a monitora do obradoiro será a carballesa Laura Tova, que forma parte do colectivo artístico Crea Formas e que ten participado en proxectos como Derrubando Muros con Pintura.

Malpica, que foi un concello pioneiro na Costa da Morte no tratamento artístico de espazos degradados en décadas pasadas, recuperou no verán do 2014 o proxecto “Pintar na Rúa” a través de dous obradoiros que permitiron transformar o muro exterior do Centro Cívico nun enorme lenzo no que os nenos e nenas deron renda solta á súa creatividade. A experiencia tivo tanto éxito que a Concellería de Cultura decidiu incluíla na programación de Malpica Verán, e, deste xeito, nos anos 2015 e 2016 desenvolvéronse os dous coloridos murais que decoran o Paseo da Praia.

Este verán os participantes seguirán enchendo de cor os muros da vila, pero nesta ocasión traballarán no parque infantil da rúa Patria Galega desde o 24 de xullo ata o 7 de agosto, divididos en dous grupos en función das súas idades. O obradoiro vai destinado a nenos e nenas de 6 a 14 anos, e aínda quedan tres prazas dispoñibles. As familias que queiran máis información ou inscribir aos seus fillos e fillas teñen que dirixirse ao departamento de Educación, Cultura e Turismo, situado no primeiro andar do Centro Cívico, ou chamar ao 981 707 104.

PINTAR NA RÚAVERÁN 2017

20Xul 2017

O Concello de Malpica pon a punto os campos de fútbol de cara á vindeira temporada de competicións oficiais

CAMPO XAVIÑA

O Concello de Malpica está poñendo a punto os campos de fútbol para que os equipos poidan comezar nas mellores condicións a vindeira temporada de competicións oficiais. O alcalde, Eduardo Parga; o concelleiro de Deportes, Iago Espasandín, e o de Obras e Servizos, Miguel Fernández, achegáronse onte ata Buño para supervisar os labores de mantemento do céspede que se están a levar a cabo no campo de Xaviña. En canto rematen neste, o persoal encargado dos traballos desprazarse ata Pedra Queimada.

Estes días hai moita actividade deportiva en Malpica, pero noutros escenarios. Esta fin de semana a praia de Canido acollerá a 2ª edición da Copa da Costa de fútbol praia. Así mesmo, durante o mes de agosto desenvolverase o Torneo de Fútbol Praia e Fútbol Sala Infantil, para nenas e nenos de entre os anos 2002 e 2010, e todos os martes e xoves de 12 a 13 horas tamén haberá zumba praia para toda as idades, sen límite e sen cotas.

19Xul 2017

Malpica acolle esta fin de semana o festival de curtametraxes “Vai no mar”

FESTIVAL CURTAS

Este ano a Concellería de Educación, Cultura e Turismo amplía a programación do Malpica Verán co Festival de Curtametraxes Vai no Mar, unha iniciativa que nace de maneira experimental pero coa intención de consolidarse dentro do Malpica Verán. O certame celebrarase esta fin de semana, de venres a domingo. A primeira sesión será infantil e desenvolverase no parque da rúa Patria Galega. Nas dúas seguintes, que serán no paseo marítimo e destinadas a adultos, ao remate de cada sesión haberá unha votación para elixir a mellor curta da noite.

Pero esta fin de semana non só haberá cine, senón tamén música. O venres 21, a partir das 23 horas, haberá música de baile en directo xunto á Casa do Pescador co Dúo Café. E o sábado, a partir das 20.30 horas, unha exhibición de baile e pasarrúas dos gaiteiros da Asociación Cultural Malante. Esta actividade está organizada polos locais de hostalaría A Taberna de Lesto, Brebaxe, Burato, Cachón, Café do Mar, Casa Antonio, Don Paco, Humboldt, Ibarra, JB, Larada, Pepucho, Pescador, San Francisco, Santiago Apóstol, Submarino e Xemevedes.

19Xul 2017

O alcalde de Malpica asina contratos de obras en varias parroquias por 73.000 euros

O alcalde de Malpica, Eduardo Parga, vén de asinar contratos de obras en varias parroquias por un importe próximo aos 73.000 euros. As actuacións están incluídas na terceira fase do Plan de Acción Social (PAS) 2015.

Un dos proxectos consiste na mellora de infraestruturas en Sorrío (Seaia), e será executado pola empresa D. Ogando S.L. cun orzamento de 42.917,28 euros. O outro inclúe obras de mellora de infraestruturas nas rúas Mouróns e Piñeiros e no Alto de Mens por un total de 33.000 euros, e a empresa adxudicataria é Dámaso Ferreiro e Hijos S.L.

Dentro do PAS 2015 o Concello de Malpica tamén incluíu traballos de acondicionamento de parques infantís e do alumeado público en varias parroquias.

18Xul 2017

Canido acollerá a vindeira fin de semana a 2ª Copa da Costa de fútbol praia

Os días 22 e 23 deste mes disputarase a segunda edición da Copa da Costa de fútbol praia no areal de Canido, e aquí tivo lugar a presentación coa participación de Eduardo Parga, Miguel Fernández e Iago Espasandín, alcalde, tenente alcalde e concelleiro de deportes do Concello de Malpica, respectivamente; Iván Barreiro e Carlos Calvete, xerente e director comercial de Alquileres Reneymar, empresa patrocinadora do evento; e Martín Varela, presidente da Asociación Deportiva Vidú.

presentación copa da costa de fútbol praia

As autoridades locais mostraron a súa satisfacción por acoller de novo esta competición que está medrando a pasos axigantados e que fomenta unha modalidade deportiva un tanto descoñecida na zona.

Pola súa parte, os representantes de Alquileres Reneymar mostraron o seu apoio total á organización, á cal lle deron todas as facilidades e todos os servicios que están nas súas mans para facer algo grande desta aposta do Concello de Malpica e da Asociación Deportiva Vidú, que lle dan continuidade a un evento único en Bergantiños coa intención de seguilo facendo durante moitos anos máis. Ademais, a empresa carballesa proporcionará un vale de 200€ en material de alquiler aos clubes que se proclamen campións en ambas categorías.

Mentres tanto, Martín Varela mostrouse encantado polo crecemento que está a ter esta competición e pola gran participación que haberá este ano con respecto á primeira edición, xa que nesta II Copa da Costa de Fútbol Praia serán seis equipos femininos e nove masculinos os que formarán parte dela.

Por último, dende a organización quixeron mandar unha mensaxe para animar a todos os afeccionados ao deporte a que se acheguen ata a praia de Canido durante toda a vindeira fin de semana na que o fútbol praia invadirá o areal malpicán.

14Xul 2017

Malpica lembra as Misións Pedagóxicas cunha nova edición do Retablo de Fantoches Rafael Dieste

As Misións Pedagóxicas volven a Malpica 84 anos despois. Aquel proxecto de solidariedade cultural que levou bibliotecas, música, cine e teatro a máis de 7.000 pobos e aldeas españois entre 1931 e 1936, chegou ao noso concello o 20 de outubro de 1933. A representación de “A doncela guerreira”, de Rafael Dieste, foi o primeiro espectáculo de monicreques que se levou a cabo en España, e a Concellería de Educación, Cultura e Turismo de Malpica quere lembrala, unha vez máis, cun ciclo de monicreques ao aire libre.

O departamento de dirixe Noelia Freijeiro programa unha nova edición do Retablo de Fantoches Rafael Dieste, que arrancará mañá sábado no parque infantil coa compañía Ghazafelhos e o espectáculo O vendedor de fume. As próximas actuacións terán lugar no paseo marítimo o 29 deste mes e o 12 de agosto. Na primeira, o grupo Paporrubio interpretará A danza dos paxaros, e na seguinte teremos a Lucecús Teatro con PingüSOS. En caso de choiva as funcións serán no auditorio do Centro Cívico.

Festival de Curtametraxes Vai no Mar
Pero este ano a Concellería de Educación, Cultura e Turismo amplía o programa co Festival de Curtametraxes Vai no Mar, unha iniciativa que nace de maneira experimental pero coa intención de consolidarse dentro do Malpica Verán. O certame celebrarase do 21 ao 23 de xullo no parque infantil (sesión infantil) e no paseo marítimo (pases para adultos), e en cada una das dúas sesións para adultos haberá unha votación ao remate de cada sesión para elixir a mellor curta.

Carteis Retablo de Fantoches xullo 17

13Xul 2017

Dez agrupacións musicais dos estilos máis variados encherán este verán as “Noites na Vila” de Malpica

Esta fin de semana arranca o programa Malpica Verán con moitas e moi variadas propostas. Pero a música, que vai xogar un papel moi importante ao longo de todo o período estival, tamén ocupa un lugar destacado nesta primeira fin de semana de actividades organizadas pola Concellería de Educación, Cultura e Turismo.

Hoxe comezan as Noites na Vila coa actuación da Traskiband na Praza Anselmo Villar Amigo (xunto á Casa do Pescador). Será a primeira dunha serie de bandas que pasarán por Malpica, en concreto polo paseo marítimo, nas vindeiras semanas. Aula 11, Sonseis, Killer Cats, The Cerne e Strobos interpretarán unha parte importante da banda sonora deste verán. Todos os concertos comezarán ás 22.30 e serán de balde.

Pero a música chega por partida dobre, porque este verán volvemos a ter Música na Rúa. Mañá sábado contaremos cos gaiteiros da Asociación Cultural Malante, que ofrecerán un pasarrúas polo centro da vila a partir das 21 horas. E nas vindeiras semanas tamén estarán en Malpica o Dúo Café, a Banda de Música de Abegondo e de novo Malante, que o 22 de xullo ofrecerá música e baile nunha actuación organizada polos locais de hostalería A Taberna de Lesto, Brebaxe, Burato, Cachón, Café do Mar, Casa Antonio, Don Paco, Humboldt, Ibarra, JB, Larada, Pepucho, Pescador, San Francisco, Santiago Apóstol, Submarino e Xemevedes.

CARTEIS NOITES NA VILA 2017

Página 1 de 212