gl_ES
Tempo Malpica de Bergantiños
Domingo 20°
15°
Luns 20°
15°
Martes 18°
16°
tiempo.com   +info
  1.  
  2. 2016
  3. Outubro

Outubro 2016

31Out 2016

A veciñanza de Malpica reciclou 1.286 litros de aceite vexetal en 10 meses

colector centro civico

Os veciños de Malpica seguen contribuíndo á reciclaxe de aceite vexetal. Dende que se puxo en marcha o sistema de recollida selectiva, a mediados do 2013, grazas a un convenio entre o Concello e a empresa Reave (Recollidas de Aceite Vexetal), os malpicáns utilizan de cotío os colectores instalados no mercado municipal, o Centro Cívico, a Casa do Oleiro, o Centro Social de Seaia, o das Pozacas e o colexio Joaquín Rodríguez Otero. O mercado de abastos, no entanto, é o punto de depósito preferido polos veciños, cun total de 421 litros nos dez meses comprendidos entre xuño do 2015 e abril deste ano, aos que corresponde o último informe enviado por Reave ao Concello de Malpica.

Tanto dende a empresa como dende o Concello de Malpica agradeceron a colaboración da cidadanía e resaltaron a importancia de evitar que o aceite vexetal que se utiliza para cociñar acabe nos desaugues, xa que mesturado co xabón crea unha costra que acaba por atascar as canalizacións e ademais é prexudicial para as augas do sumidoiro. A mellor alternativa é almacenar o aceite en botellas de plástico con tapón de rosca e depositalo en calquera dos seis colectores distribuídos polo municipio.

30Out 2016

O Concello de Malpica aproba bonificacións do 50 ao 75% no IVTM para os vehículos respectuosos co medio ambiente

O Concello de Malpica aprobou unha serie de bonificacións no Imposto sobre Vehículos de Tracción Mecánica (IVTM) en función da clase de carburante e dos motores que utilicen, tendo en conta a súa incidencia no medio ambiente. Desde xeito, os vehículos híbridos, os de motor gasolina ou diésel que conten coa clasificación por consumo A, e os que utilicen biogás, gas natural comprimido, metano, metanol, hidróxeno ou GLP, así coma os mixtos GLP-gasolina, beneficiaranse dunha redución do 50% durante catro anos. Para os vehículos eléctricos ou de emisións nulas, a bonificación será un 75% durante seis anos. En todos os casos, os propietarios deben presentar a solicitude correspondente e a documentación acreditativa.

Os vehículos de máis de 25 anos de antigüidade non pagarán o imposto de circulación

Así mesmo, o prazo para obter bonificacións por antigüidade rebáixase de 35 a 25 anos. Estes vehículos, considerados históricos, terán un desconto do 100%, previa solicitude.

28Out 2016

Os espectáculos galegos máis laureados, na 12ª edición da Mostra de Teatro de Malpica

A XII Mostra de Teatro de Malpica, organizada pola Concellería de Educación, Cultura e Turismo coa colaboración da Deputación Provincial da Coruña, reunirá o mellor da escena galega ao longo de varias semanas. Os espectáculos máis laureados pasarán polo escenario do Centro Cívico a partir do día 4.

Este é o programa completo:

Venres 4 de novembro, ás 20.30 h
O día do pai. Malasombra

 

COMPAÑÍA GAÑADORA DA VALORACIÓN DO PÚBLICO NA XI MOSTRA DE TEATRO DE MALPICA 2015 E  X MOSTRA DE TEATRO DE MALPICA 2014.

  • Director: Marcos Orsi
  • Actores: Alberto Rolán, Jouse García, Xoque Carbajal e Pablo Alvarado.
  • Duración: 70 minutos
  • Xénero: Comedia
  • Público preferente:  Adulto (maiores de 16 anos)

Venres 11 de novembro, ás 20.30 h
Noiteboa. Redrum Teatro

 

PREMIO MARÍA CASARES NO ANO 2016: Mellor Actriz Protagonista. Nominacións  a Mellor Director e Mellor Texto Orixinal.

  •  Actores: Mela Casal, Ernesto Chao, Guilermo Carbajo
  • Dirección – Alex Sampayo
  • Duración: 75 minutos
  • Xénero: Traxicomedia
  • Público preferente:  A partir de 12 anos

Venres 18 de novembro, ás 20.30 h
Fábula Galénica. Fantoches Baj (Produce Urdime)

 

VIII PREMIO BARRIGA VERDE DE TEXTO PARA TEATRO DE MONICREQUES. Modalidade Infantil.

  • Duración: 50 minutos
  • Xénero: Títeres de luva
  • Público preferente:  Público familiar. Recomendado para maiores de 5 anos.

Venres 25 de novembro, ás 20.30 h
Luppo. Baobab Teatro

 

PREMIO AO MELLOR ESPECTÁCULO INFANTIL na Feira de Teatro de Ciudad Rodrigo 2015

CANDIDATO aos Premios Max 2016 na categoría de “Mellor Autoría Teatral”

  • Duración: 55 minutos
  • Xénero: Monicreques e actores
  • Público preferente:  Familiar a partir de 4 anos

Venres 2 de nadal, ás 20.30 h
Perplexo. Il Maquinario Teatro

 

5 PREMIOS MARÍA CASARES NO ANO 2015: Mellor Espectáculo, Dirección, Iluminación, Vestiario e Tradución/Versión. 

  • Actores: Melania Cruz, Fernando González, Fran Lareu, Laura Míguez
  • Director: Tito Asorey
  • Duración: 85 minutos
  • Xénero: Comedia
  • Público preferente:  Adultos e rapaces/as a partir de 15 anos

Cartel teatro 2016

28Out 2016

O Concello de Malpica establece bonificacións no IBI para os inmobles vinculados aos sectores primarios

O Concello de Malpica establece unha bonificación do 95% no Imposto sobre Bens Inmobles (IBI) para todos aqueles “nos que estean emprazadas unicamente construcións nas que se desenvolvan total e exclusivamente actividades agrarias, gandeiras, forestais ou pesqueiras pertencentes ao sector primario”. Con esta medida, aprobada xa pola corporación municipal, preténdese mitigar o efecto negativo que tivo a revisión posta en marcha pola Dirección Xeral de Catastro en xullo do ano 2014.

Para que as bonificacións sexan efectivas, o pleno terá que aprobar unha declaración de especial interese ou de utilidade municipal, previa solicitude por parte do interesado, que ademais debe presentar a seguinte documentación:

  • Certificado de Facenda no que conste a situación censal do titular da actividade
  • Acreditación da titularidade catastral do inmoble
  • Certificado de non ter débedas con Facenda nin coa Seguridade Social
  • Xustificante de recoñecemento da explotación ou licenza de actividade
  • Xustificante de adscrición ao réxime especial da Seguridade Social que corresponda
26Out 2016

Clausurado o programa de envellecemento activo promovido pola Concellería de Servizos Sociais

O alcalde de Malpica, Eduardo Parga; a concelleira de Servizos Sociais, Marisol Blanco, e o 1º tenente de alcalde, Miguel Fernández, clausuraron o Programa de Envellecemento Activo promovido pola Concellería de Servizos Sociais de Malpica e subvencionado pola Deputación Provincial da Coruña. Na entrega de diplomas, que tivo lugar no Centro Cívico, tamén participaron Adolfo López Baña e Sandra Caamaño, administrador e xerente de Máis Porvir, a empresa de economía social que se encargou do desenvolvemento do programa.

SAMSUNG CAMERA PICTURESUn total de 50 persoas, repartidas practicamente a partes iguais entre Buño e Malpica, dispoñen agora de máis ferramentas para poder manter a súa autonomía, ademais de evitar o seu illamento e de favorecer a súa participación social, aspectos que o alcalde destacou na súa intervención como especialmente importantes. Eduardo Parga agradeceu a participación e a boa acollida das actividades, e expresou o compromiso do Concello de Malpica coas actividades que contribúen a que as persoas maiores poidan manter unha vida activa.

Ao longo das últimas semanas, os participantes no Programa de Envellecemento Activo tiveron contacto coas novas tecnoloxías, os traballos manuais, pautas sanitarias e exercicio físico, participaron en excursións e obradoiros de elaboración de xabóns e recuperación de receitas de cociña tradicionais. Como remate da actividade, ademais de recibir os seus diplomas, compartiron unha merenda saudable e unha tarde de baile amenizada pola cantante carballesa Rocío Pérez.

22Out 2016

Remataron as obras dos camiños municipais de acceso a explotacións agrarias en Barizo e Beo

FOTO CARTEL OBRA

O Concello de Malpica de Bergantiños rematou as obras relativas ao Plan marco de mellora de camiños municipais de acceso a explotacións agrarias 2016, financiado co Fondo Europeo Agrícola de Desenvolvemento Rural (FEADER).

Expediente: PM16-0304302A-0110 (Mellora de camiños municipais en Barizo e Beo).

As actuacións foron executadas pola empresa Construcciones Dámaso Ferreiro e Hijos, S.L.

13Out 2016

En marcha varias obras de mellora das praias do municipio

Xa están en marcha as obras de mellora da accesibilidade á praia Área Pequena de Seiruga e de sinalización das praias do municipio. O alcalde, Eduardo Parga, e o concelleiro de Obras, Servizos e Seguridade, Miguel Fernández, desprazáronse ata a parroquia de Barizo para comprobar a execución das obras de accesibilidade ao areal, que avanzan a bo ritmo.

O proxecto ten un custe de 33.598,57 euros, e a execución corresponde á empresa Dámaso Ferreiro.

AREA PEQUENA SEIRUGA 3 AREA PEQUENA SEIRUGA 4

13Out 2016

Chega a Malpica a campaña “Polos teus ósos”, promovida pola Liga Reumatolóxica Galega co apoio da Consellería de Sanidade

O día 20 chegará a Malpica a campaña “Polos teus ósos”, unha iniciativa da Liga Reumatolóxica Galega que conta coa certificación de campaña de interese socio-sanitario por parte da Consellería de Sanidade. O reumatólogo Carlos Fernández, do Chuac; a psicóloga María López García e a terapeuta ocupacional Lucía Fernández Caamaño, ámbalas dúas da Liga Reumatolóxica Galega, falarán ás 19 horas, no Centro Cívico, sobre artrite, artrose, espondilite, lupus, fibromialxia, lupus e osteoporose. A Liga Reumatolóxica Galega lembra que o 40 % da poboación galega sofre algunha destas patoloxías, de aí a importancia destas campañas de información e prevención.

CARTEL CHARLA MALPICA

A campaña “Polos teus ósos” enmárcase en Malpica dentro do Programa de Envellecemento Activo promovido pola Concellería de Servizos Sociais e subvencionado pola Deputación Provincial da Coruña, aínda que a sesión formativa do día 20 está aberta a toda a poboación.

Este ano participan no Programa de Envellecemento Activo, xestionado pola empresa de economía social Máis Porvir, un total de 50 persoas, repartidas practicamente a partes iguais entre Buño e Malpica.

Os obxectivos do programa son os seguintes:

  • Previr o deterioro cognitivo a través de exercicios prácticos, favorecendo así a autonomía persoal.
  • Ofrecer estratexias para un envellecemento feliz, para a mellora das relacións persoais e sociais de xeito que se optimicen as relacións das persoas participantes no obradoiro co seu entorno.
  • Aprender novas formas de comunicación e participación a través das TIC’s.
  • Previr o deterioro físico e ensinar unha serie de exercicios sinxelos para o mantemento físico que as persoas participantes poidan reproducir con facilidade no seu fogar.
  • Realizar pequenos traballos manuais cos que estimular e mellorar a coordinación motora fina.
  • Fomentar o consumo saudable.
  • Previr o deterioro físico a través do exercicio ao tempo que se fomenta o coñecemento das diferentes músicas típicas dos países escollidos.
  • Dotar ás persoas participantes de ferramentas coas que mellorar o seu autoconcepto e as súas relacións persoais.
  • Dar a coñecer os beneficios da lectura para manter a mente activa.
  • Ofrecer os beneficios das augas termais para a mellora das diferentes patoloxías das persoas participantes.

Para acadar eses obxectivos desenvolveranse unha serie de actividades de estimulación cognitiva, xogos de mesa e campionatos, corpo e mente en movemento, taller afectivo sexual, obradoiro de mantemento físico con pilates, cachibol, elaboración de xabóns, recuperación de receitas tradicionais, elaboración menú e degustación conxunta, charla de reumatoloxía, balneario e festa de clausura.

12Out 2016

O Concello de Malpica repartirá 17.000 euros entre as entidades para o fomento do asociacionismo e a cultura

O Concello de Malpica de Bergantiños vén de publicar no Boletín Oficial da Provincia as bases reguladoras da convocatoria de axudas a entidades sen ánimo de lucro para o fomento do asociacionismo e a cultura. O importe global das subvencións será de 17.000 euros, repartidos do seguinte xeito.

 PROGRAMAS PARTIDA CRÉDITO ORZAMENTARIO

PROMOCIÓN DAS ACTIVIDADES DE ENTROIDO

334.480

2.000,00 €

PROMOCIÓN DOS ENCONTROS E FESTIVAIS CULTURAIS

334.480

2.000,00 €

PROMOCIÓN  CULTURAL

 

334.480

13.000,00

TOTAL

334.480

17.000,00

 Segundo as bases, no Programa de Promoción das Actividades do Entroido subvencionarase a realización das manifestacións tradicionais do Entroido en cada parroquia, así como a realización de actividades especialmente dedicadas ós nenos, cunha cantidade máxima de 400,00 € para aquelas actividades que acrediten un especial interese etnográfico e/ou se complementen con actividades dirixidas á infancia e á xuventude. No Programa de Promoción dos Encontros e Festivais Culturais: subvencionarase a realización de concertos musicais, encontros culturais e outras actividades de natureza análoga, especialmente aqueles que teñan capacidade de incidir na promoción turística do Concello e os que se dirixan á mocidade como público preferente. E no Programa de Promoción Cultural: subvencionaranse todo tipo de actividades culturais, que non sexan obxecto de axuda noutros programas desta convocatoria, así como os gastos de funcionamento das entidades culturais, sen máis limitacións das establecidas con carácter xeral.

Cada entidade non poderá recibir máis de 4.000 euros polo conxunto das actividades que desenvolva.

Poderán acceder ás subvencións as entidades constituídas xuridicamente ou sen ánimo de lucro, que desenvolvan a súa actividade no municipio e que, no primeiro caso, estean inscritas no Rexistro Municipal de Asociacións.

Descarga aquí toda a documentación:

8. Bases Reguladoras da Convocatoria de Axudas 2016

10. MODELO DE SOLICITUDE DE AXUDAS DO CONCELLO AS ENTIDADES 2016

100 MODELO MEMORIA DE ACTIVIDADES 101 MODELO DE ORZAMENTOS

101 MODELO DE ORZAMENTOS

Página 1 de 212