Síguenos en
gl_ES
Tempo Malpica de Bergantiños
Luns 15°
10°
Martes 14°
Mércores 14°
10°
tiempo.com   +info
  1.  
  2. 2016
  3. Xullo

Xullo 2016

30Xul 2016

A Banda de Gaitas da Asociación Cultural Malante actúa este ano no Festival Intercéltico de Lorient

malante

O Festival Intercéltico de Lorient converte cada ano esta cidade da Bretaña francesa no punto de encontro de centos de miles de persoas chegadas dende todas as latitudes para ver aos mellores intérpretes de música celta. Entre todas as actuacións que se levarán a cabo nesta edición, entre o 5 e o 14 de agosto, estarán as da Banda de Gaitas da Asociación Cultural Malante de Malpica.

A Asociación Cultural Malante naceu o 23 de agosto do ano 2003 por iniciativa dun grupo de mozas e mozos que entraran no mundo da música a través da Escola Municipal de Actividades Escénicas de Malpica. O seu principal obxectivo é a promoción da cultura tradicional galega, e froito dese interese naceu no ano 2005 a Banda de Gaitas. Na actualidade está integrada por trinta músicos de 14 a 40 anos, perfectamente compenetrados para que soen á perfección 16 gaitas, 6 tambores, 5 bombos e 4 pandeiretas. En Malpica temos a sorte de poder escoitalos de cando en vez, pero o público de Lorient terá a oportunidade de descubrilos nas actuacións que ofrecerán os días 6, 9, 10 e 11 en distintos escenarios do festival.

Despois de participar no Festival Internacional do Mundo Celta de Ortigueira e no Festival de Danzas e Músicas do Mundo de Montignac, a presenza no Festival Intercéltico de Lorient supón un soño cumprido para a asociación malpicá.

Nesta ligazón tedes a información do propio festival sobre a presenza da Banda de Gaitas da AC Malante en Lorient.

 

29Xul 2016

Concello de Malpica e Deputación da Coruña asinan o convenio de colaboración para a Mostra da Olería

convenio mostra 1

O alcalde de Malpica, Eduardo Parga Veiga, e o deputado de Promoción Económica e Empresa, José Luis García García, asinaron hoxe o convenio de colaboración entre o Concello de Malpica e a Deputación Provincial da Coruña para o financiamento da Mostra da Olería de Buño. As dúas institucións consideran “de gran interese para a provincia potenciar que o sector da olería se converta nunha actividade rendible de futuro que repercute favorablemente como medio de desenvolvemento económico, social e xerador de emprego e riqueza non só a nivel local, senón tamén provincial”, e proba dese interese é o acordo asinado.

A Deputación Provincial da Coruña achegará un total de 80.000 euros, que supoñen o 80 % do orzamento da 33ª Mostra da Olería de Buño, que se celebrará do 5 ao 15 de agosto. Este ano o programa inclúe varias novidades, entre elas actuacións musicais todos os días, unha ofrenda floral de homenaxe ao Doutor Luciano García Alén o día da inauguración, un tren turístico que funcionará as fines de semana ou a visita dos Bolechas, que coincidirá coa presentación do libro infantil “Os Bolechas visitan a Mostra da Olería”. Os postos de exposición e venda estarán situados no Parque Luciano García Alén, onde tamén se desenvolverán a maior parte das actividades. O Ecomuseo do Forno do Forte será outro dos escenarios da Mostra da Olería, coa Cocedura Tradicional como prato forte o sábado 6.

27Xul 2016

Pagamento 2º trimestre do exercicio 2016

En cumprimento do establecido na Disposición adicional primeira da Lei Orgánica 9/2013 de Control da Débeda Comercial, procédese a dar publicidade á información relativa ao periodo medio de pagamento desta entidade  correspondente ao  2º trimestre do exercicio 2016, calculado consonte ao establecido no RD 635/2014,de 25 de xullo, polo que se desenvolve a  metodoloxía do cálculo do periodo medio de pago a proveedores.

 

DATOS IDENTIFICATIVOS DO INFORME PERIODO MEDIO DE PAGAMENTO:

 

Código Corporación Local: 11-15-043-AA-000

Nome corporación local: Malpica de Bergantiños

Exercicio: 2016

Periodo: segundo trimestre

 

RATIO DE OPERACIÓNS PAGADAS

22,61 días

IMPORTE DAS  OPERACIÓNS PAGADAS

       360.239,26 €

RATIO DE OPERACIÓNS PENDENTES DE PAGAMENTO

52,52 días

IMPORTE DAS  OPERACIÓNS PENDENTES DE PAGAMENTO

524.236,73 €

PERIODO MEDIO DE PAGAMENTO DA ENTIDADE

40,34 días

 

Malpica de Bergantiños, 13 de xullo de 2016

O ALCALDE

Eduardo José Parga Veiga.

22Xul 2016

O presidente de Portos de Galicia visitou as obras do porto de Malpica

 

VISITA DURAN 21 XULLO - 3

O presidente de Portos de Galicia, José Juan Durán, acompañado polo alcalde de Malpica, Eduardo Parga, o concelleiro Miguel Fernández e o patrón maior, Pedro Pérez, visitou as obras realizadas polo seu departamento para mellorar os servizos aos usuarios do porto malpicán, entre elas a reconstrución do noiro da Atalaia e a urbanización do espazo ocupado pola antiga lonxa. O investimento realizado, que ascende a preto de 700.000 euros, garante a estabilidade e a seguridade do muro e permite mellorar de maneira substancial o acceso ás instalacións para camións e tráilers, dando así resposta a unha vella demanda do sector que fora trasladada a Portos polo alcalde. Ademais de gañar en operatividade, o terreo gañado permitiu crear unha nova área de aparcamento e lecer, harmonizando o espazo resultante coas actuacións realizadas no porto de Malpica nos últimos anos.

Portos de Galicia tamén investiu 22.000 euros na instalación de 15 vigas galvanizadas para as defensas de rosario (ringleiras de rodas que se colocan adosadas ao muro para protexer as embarcacións de posibles danos) e outros 70.000, financiados con fondos FEDER, na construción de dous pantaláns para embarcacións menores, aos que se accede por unha pasarela articulada de estrutura de aluminio e piso de madeira. Esta pasarela dá acceso a un pantalán adosado ao peirao de 12 metros de longo por 3 de ancho que, á súa vez, conecta con outro transversal de 29,5 x 2,5 metros. Estas dúas estruturas están realizadas con perfís principais de aluminio e piso de madeira, e contan cun sistema de flotadores que garante a súa estabilidade con mareas vivas.

22Xul 2016

O Concello de Malpica volve a contar cunha empresa de economía social para a prestación de servizos públicos

Asinado o contrato coa UTE Máis Porvir-Combina Social para a prestación do servizo de conserxería no CEIP Milladoiro e o pavillón de deportes

CONTRATO + PORVIR 2

Despois da sinatura do contrato, hoxe mesmo empezaron a traballar as dúas persoas con discapacidade física que se encargarán do servizo de conserxería no CEIP Milladoiro e no pavillón polideportivo de Malpica. Deste xeito, o goberno municipal volve a apostar -como xa fixo coa integración dun usuario de Aspaber no servizo de limpeza viaria- por unha empresa de economía social para a prestación de servizos públicos.

O alcalde, Eduardo Parga Veiga, asinou a primeira hora o contrato coa UTE Máis Porvir-Combina Social, as empresas creadas e xestionadas por Íntegro e Cogami, respectivamente, para a prestación de servizos e a xeración de recursos que permitan a ámbalas entidades seguir desenvolvendo o seu importante labor social. Máis Porvir e Combina Social estiveron representadas polos seus administradores, Adolfo López Baña e Álvaro García Bustelo. O alcalde destacou a importancia de que as Administracións públicas sexan as primeiras en dar exemplo para que a integración laboral das persoas con diversidade funcional poida producirse con normalidade tamén no ámbito privado.

O contrato terá unha vixencia dun ano, prorrogable por outro, e permitirá a inserción laboral de dúas persoas con discapacidade física. Haberá un terceiro traballador para substitucións.

 

22Xul 2016

Dúas das oito participantes no curso de Tapas e Aperitivos do PIMD Rural de Íntegro xa acadaron a inserción laboral

DIPLOMAS TAPAS E APERITIVOS 1

Seis das oito participantes no curso de Tapas e Aperitivos organizado polo Concello de Malpica e a Asociación Íntegro dentro do PIMD Rural recibiron hoxe os seus diplomas. As outras dúas non puideron completar o curso porque xa conseguiron traballo. A concelleira de Servizos Sociais, Marisol Blanco, que acudiu ao acto de clausura, expresou a satisfacción do goberno municipal pola inserción laboral das dúas usuarias da acción formativa, posto que, en definitiva, ese era o principal obxectivo.

No acto participou tamén o presidente de Íntegro, Adolfo López Baña, que una vez máis subliñou a importancia de que as Administración públicas se impliquen con este tipo de accións formativas, que no caso do Punto de Intervención para Mulleres con Diversidade Funcional van especialmente dirixidas ás mulleres con disCapacidade e que teñen como finalidade seguir avanzando cara a inclusión real. As alumnas demostraron o resultado da súa formación preparando e servindo tomates recheos e quiche de verduras. Os dous pratos estaban exquisitos.

A semana pasada rematou tamén o obradoiro de Informática, tamén dirixido a mulleres, que se levou a cabo na Casa do Oleiro de Buño. Con este tipo de iniciativas preténdese contribuír ao desenvolvemento das mulleres con disCapacidade na sociedade, dotándoas de coñecementos necesarios e útiles tanto para a súa vida diaria como para  a mellora do emprego e a plena inclusión.

19Xul 2016

O mago arxentino Carlos Adriano encheu de ilusión e  diversión o paseo marítimo de Malpica

carlos adriano 6

En Malpica o día do Carme foi máxico grazas Carlos Adriano, o mago arxentino que encheu de ilusión e diversión o paseo marítimo de Malpica na tarde, probablemente, máis calorosa do verán. O ciclo internacional Malpica Máxica continúa así a súa andaina polo verán. Despois do galego Mago Noel, o cubano Raúl Camawey e o arxentino Carlos Adriano, facemos unha pausa ata o 12 de agosto, no que regresará a maxia ao paseo cos galegos Dani e Rafa, que ofrecerán varios pases de 10 minutos de duración dende as 17.00 ata as 21.00 horas.

Pero as Noites na Vila non rematan, senón que a semana que vén deixarán paso ao Retablo de Fantoches Rafael Dieste, unha proposta da Concellería de Cultural que por terceiro ano lembrará a estrea de “La doncella guerrera” na vila o 20 de outubro de 1933, no marco das Misións Pedagóxicas.

A primeira representación será o 23 deste mes. Microminia Títeres ofrecerá no paseo marítimo “Vacacións no mar”, un espectáculo de títeres de luva e siluetas apto para todos os públicos. O 6 de agosto será a quenda de Títeres Cachirulo con luvas chinesas e variñas para dar vida a “Alicia no país das marabillas”. E, por último, o 13 de agosto chegará a Tropa de Trapo con “Zona de obras”, no que mesturan contos con música e obxectos de reciclaxe.

Todos os espectáculos serán ás 20.30 horas no paseo marítimo. No caso de choiva trasladaranse ao auditorio do Centro Cívico.

 

14Xul 2016

Aberto o prazo de inscrición para a 1ª Carreira Pedestre Concello de Malpica

Xa está aberto o prazo de inscrición para a 1ª Carreira Pedestre Concello de Malpica, que se celebrará o sábado 10 de setembro ás 18.30 horas. A organización corresponde á Concellería de Deportes, que dirixe Iago Espasandín, que deste xeito sigue ampliando a oferta deportiva do Concello de Malpica tanto en cantidade coma en calidade e variedade de disciplinas.

A Carreira Pedestre Concello de Malpica nace, de feito, coa intención de fomentar a actividade física como parte dun estilo de vida saudable. Poderán participar todas as persoas maiores de 16 anos que o desexen. A inscrición pode realizarse a través da plataforma  www.championchipnorte.com. A cota é de 3 euros para os atletas que posúan chip e de 4 para os que precisen alugalo. No caso dos menores de idade requírese, ademais, autorización paterna. O prazo de inscrición rematará o 6 de setembro. As persoas interesadas poden solicitar máis información no Departamento de Deportes.

cartel I carreira pedestre concello de Malpica

Haberá 4 categorías: xuvenil (nados/as nos anos 1999 e 2000), sénior 10K (1977-1998), veteranos M40 (1967-1976) e veteranos M50 (anteriores a 1966). Todos os participantes, tanto masculinos coma femininos, terán que percorrer unha distancia de 8.650 metros nun tempo máximo de 1 hora e 30 minutos. A carreira sairá da praza Villar Amigo e continuará por Eduardo Vila Fano, Rúa do Porto, Dársena, Camiño do Río, Eduardo Vila Fano, Guardia Pardines, Paseo da Praia, Rúa Canido, Cancela de Areas, Seaia, Estrada á Praia de Seaia, Instituto Urbano Lugrís, Estrada de Santo Hadrián ata a capela, Camiño do Santo, Canido e chegada no Paseo da Praia. “Este traxecto permítenos combinar dureza, con varios cambios de superficie, e paisaxe, xa que as vistas durante o percorrido son espectaculares”, explicou Iago Espasandín.

Os controis de cronometraxe realizaranse mediante chip, cuxo uso será obrigatorio para todas as categorías, ao igual ca o de dorsais. As persoas inscritas poderán recollelos o mesmo día da carreira, de 10.00 a 13.00 e de 15.00 a 17.45 horas, no Centro Cívico de Malpica, que funcionará tamén como gardarroupa. Así mesmo, o Concello de Malpica porá a disposición dos participantes o pavillón polideportivo para que poidan cambiarse e ducharse.

Haberá trofeos para os tres primeiros/as en cada categoría e tamén para o primeiro e a primeira clasificados de Malpica.

13Xul 2016

Clausurado o curso de informática para mulleres impartido pola Asociación Íntegro en Buño dentro do PIMD Rural

O pasado 13 de xullo rematou o curso de informática para mulleres organizado pola Concellería de Servizos Sociais de Malpica e impartido pola Asociación Íntegro dentro do Punto de Intervención para Mulleres con Diversidade Funcional (PIMD Rural). O alcalde, Eduardo Parga; a concelleira de Servizos Sociais, Marisol Blanco Gorín; o presidente de Íntegro, Adolfo López Baña, e a psicóloga da entidade, Begoña Rial, acompañaron ás alumnas nesta última xornada na aula de informática da Casa do Oleiro de Buño.

curso informática

Accións formativas coma esta están encamiñadas a fomentar a empregabilidade das mulleres, sobre todo das que teñen algún tipo de discapacidade, dotándoas de coñecementos útiles e necesarios para acadar a plena inclusión. A semana que vén chegará á súa fin o curso de tapas e aperitivos que se imparte todos os xoves no Centro Cívico de Malpica.

Página 1 de 212