Síguenos en
gl_ES
Tempo Malpica de Bergantiños
Luns 15°
10°
Martes 14°
Mércores 14°
10°
tiempo.com   +info
  1.  
  2. 2015
  3. Decembro

Decembro 2015

29Dec 2015

O presidente de Portos de Galicia visitou hoxe as obras de urbanización do porto de Malpica e o novo pantalán

José Juan Durán anunciou que os traballos de acondicionamento do noiro da Atalaia e o novo aparcamento estarán rematados a finais de xaneiro

 MURO LONXA

O presidente de Portos de Galicia, José Juan Durán, acompañado polo alcalde de Malpica, Eduardo Parga, o concelleiro Miguel Fernández e o patrón maior, Pedro Pérez, visitou hoxe as obras que o seu departamento está a acometer para mellorar os servizos aos usuarios do porto malpicán. Durán anunciou que as obras de reconstrución do noiro da Atalaia e a urbanización do espazo ocupado pola antiga lonxa estarán rematadas a finais do mes de xaneiro. O investimento realizado, que ascende a preto de 700.000 euros, garantirá a estabilidade e a seguridade do muro e permitirá mellorar de maneira substancial o acceso ás instalacións para camións e tráilers, dando así resposta a unha vella demanda do sector que foi trasladada a Portos polo alcalde. Ademais de gañar en operatividade, o terreo gañado permitirá crear unha nova área de aparcamento e lecer, harmonizando o espazo resultante coas actuacións realizadas no porto de Malpica nos últimos anos.

Portos de Galicia tamén inviste 22.000 euros na instalación de 15 vigas galvanizadas para as defensas de rosario (ringleiras de rodas que se colocan adosadas ao muro para protexer as embarcacións de posibles danos). A substitución completarase en breve.

PANTALAN

José Juan Durán visitou hoxe, así mesmo, o novo pantalán para embarcacións menores, que supuxo un investimento de máis de 70.000 euros financiado con fondos FEDER. As obras consistiron na construción de dous pantaláns engarzados, aos que se accede por unha pasarela articulada de estrutura de aluminio e piso de madeira. Esta pasarela dá acceso a un pantalán adosado ao peirao de 12 metros de longo por 3 de ancho que, á súa vez, conecta con outro transversal de 29,5 x 2,5 metros. Estas dúas estruturas están realizadas con perfís principais de aluminio e piso de madeira, e contan cun sistema de flotadores que garante a súa estabilidade con mareas vivas.

28Dec 2015

Aprobada definitivamente a ordenanza reguladora do IBI tras ser rexeitada pola corporación a única alegación presentada

A bonificación solicitada pola concelleira Isabel Loureiro non se axusta aos supostos previstos na lei, segundo o informe dos técnicos municipais

pleno-investidura

A corporación municipal de Malpica aprobou hoxe de xeito definitivo a ordenanza reguladora do Imposto sobre Bens Inmobles (IBI), despois de rexeitar a alegación presentada pola concelleira socialista Isabel Loureiro Varela para que se establecese unha bonificación do 95% “aos inmobles nos que se desenvolvan actividades agrarias, gandeiras ou pesqueiras e que sexan declaradas de especial interese ou utilidade municipal por concorrer circunstancias sociais, culturais, histórico-artísticas ou de fomento do emprego que xustifiquen tal declaración”.

A alegación foi desestimada en base a un informe dos servizos técnicos municipais segundo o cal a bonificación solicitada pola concelleira socialista non se axusta aos supostos previstos no Real Decreto Lexislativo 2/2004.

Por unha banda, o RD establece a posibilidade de regular unha bonificación do 95% “a favor de inmuebles nos que se desenvolvan actividades económicas que sexan declaradas de especial interese ou utilidade municipal por concurrir circunstancias sociais, culturais, histórico artísticas ou de fomento do emprego que xustifiquen tal declaración. Corresponderá dita declaración ao Pleno da Corporación e acordarase, previa solicitude do suxeito pasivo, por voto favorable da maioría simple dos seus membros”.

Por outra, no RD prevese unha bonificación “de ata o 90 % da cota íntegra do Imposto a favor dos bens inmobles urbanos ubicados en áreas ou zonas do municipio que, conforme á lexislación e planeamento urbanísticos, correspondan a asentamentos de poboación singularizados pola súa vinculación ou preeminencia de actividades primarias de carácter agrícola, gandeiro, forestal, pesqueiro ou análogas e que dispoñan dun nivel de servizos de competencia municipal, infraestruturas ou equipamentos colectivos inferior ao existente nas áreas ou zonas consolidadas do municipio, sempre que as súas características económicas aconsellen unha especial protección”.

Segundo o informe técnico, a alegante “confunde” os dous tipos de bonificación. Así, a do 95% está previsto “para actividades económicas que por determinadas circunstancias (sociais, culturais) sexan declaradas de especial interese ou utilidade municipal, non podendo entender a tal efecto que as actividades pertencentes ao sector primario pola súa natureza sexan per se xustificativas de tal declaración, senón que se require dun acordo expreso respecto dunha actividade económica a concretar, e non dun sector xenericamente considerado”.

Para os inmobles urbanos vinculados a actividades primarias existe a posibilidade de establecer unha bonificación de ata o 90%, “que en todo caso –aclara o informe- esixe que os citados asentamentos de poboación dispoñan dun nivel de servizos de competencia municipal, infraestruturas ou equipamentos colectivos inferior ao existente nas áreas ou zonas consolidadas do municipio, e que polas súas características económicas aconselle unha especial protección, algo que non se xustifica en ningún caso na proposta a tal fin formulada”.

Por todo isto, a alegación foi desestimada e a ordenanza reguladora do IBI quedou aprobada definitivamente cos seguintes tipos de gravame:

Bens inmobles urbanos 0,4932 %
Bens inmobles rústicos 0,45 €
Bens inmobles de características especiais 1,3 %

 

 

 

 

17Dec 2015

Clausurado o curso de alfabetización informática para mulleres, incluído no programa Conectad@s da Área de Igualdade

Nove alumnas participaron na actividade, organizada polo Concello de Malpica en colaboración coa Deputación Provincial da Coruña

540-f-foto

As nove alumnas que participaron no curso de alfabetización informática para mulleres organizado dende a Área de Igualdade do Concello de Malpica, en colaboración coa Deputación Provincial da Coruña, recibiron hoxe os seus diplomas nun acto ao que asistiron o alcalde, Eduardo Parga; a concelleira de Servizos Sociais, Marisol Blanco Gorín, e a técnica de Igualdade, Patricia Vaquero, que foi, ademais, a encargada de impartir o obradoiro durante máis de dous meses.

O curso de alfabetización dixital formou parte do programa Conectad@s, que promove o coñecemento e a utilización das novas tecnoloxías para contribuír a diminuír a brecha dixital de xénero. As sesións formativas desenvolvéronse na Casa do Oleiro de Buño, onde tamén tivo lugar hoxe o acto de clausura, con panxoliñas e doces de Nadal incluídos.

O obxectivo do curso foi dotar ás participantes das ferramentas básicas en informática e novas tecnoloxías, pero tamén se traballaron de maneira transversal cuestións coma a igualdade de xénero e de oportunidades. Todas as asistentes amosáronse moi satisfeitas co resultado da iniciativa e pediron aos representantes do goberno local que sigan programando este tipo de actividades formativas.

17Dec 2015

Mireia Couto Baamonde e Martina Casal Varela, gañadoras do Concurso Escolar de Debuxo e Pintura de Nadal 2015-2016

O alcalde, Eduardo Parga, desprazouse hoxe ata os colexios Joaquín Rodríguez Otero e Milladoiro para entregarlles os seus premios

540-f-foto

Mireia Couto Baamonde, alumna de 1º curso de Primaria do CEIP Joaquín Rodríguez Otero, é a gañadora do primeiro premio do Concurso Escolar de Debuxo e Pintura de Nadal 2015-2016, convocado pola Concellería de Educación, Cultura e Turismo de Malpica. O alcalde, Eduardo Parga, fíxolle entrega hoxe do seu premio nun acto que reuniu aos 85 alumnos e alumnas do colexio de Buño na biblioteca de centro, e no que tamén participou a concelleira de Servizos Sociais, Marisol Blanco Gorín. Na mesma xuntanza tivo lugar a presentación do cartel do programa Malpica Nadal, que inclúe o alegre debuxo no que Mireia Couto plasma a súa particular versión da vila de Malpica e o seu porto no Nadal e a programación completa das actividades que se están a desenvolver xa e que continuarán ao longo das vacacións escolares.

O alcalde de Malpica tamén estivo hoxe no CEIP Milladoiro para entregar o segundo premio do Concurso Escolar de Debuxo e Pintura de Nadal a Martina Casal Varela, alumna de segundo curso de Primaria do centro malpicán. O seu debuxo ilustrará a tarxeta oficial de felicitación do Nadal do Concello de Malpica.

Eduardo Parga foi recibido nos coles con efusivos saúdos dos pequenos e pequenas.

-“Sabedes quen son?”, preguntoulles.

-“Siiiiiiii, o alcalde”, responderon.

Antes da entrega de premios, o rexedor animou aos escolares a participar nas actividades de Nadal organizadas polo Concello e as entidades de Malpica, e insistiulles en que deben portarse ben para que os Reis Magos lles traian moitos xoguetes.

15Dec 2015

Clausurado o curso de técnicas de pladur impartido por Íntegro para persoas con diversidade funcional ou en risco de exclusión

As persoas participantes fixeron as prácticas na Casa do Oleiro de Buño, onde acondicionaron un aula para os obradoiros de manualidades

540-f-foto

O alcalde de Malpica, Eduardo Parga Veiga, e a concelleira de Servizos Sociais, Marisol Blanco Gorín, clausuraron hoxe o curso de técnicas de colocación de pladur e pintura que viña impartindo dende principios de novembro a Asociación Íntegro e no que participaron persoas con diversidade funcional e/ou en risco de exclusión social. No acto de entrega de diplomas tamén estiveron o presidente de Íntegro, Adolfo López Baña, e o monitor encargado de impartir o obradoiro, Miguel Álvarez.

A concelleira de Servizos Sociais agradeceu a colaboración da Asociación Íntegro no desenvolvemento do programa de formación específica para estes colectivos que vén desenvolvendo o seu departamento nos últimos anos, e que ten como fin último lograr a integración das persoas participantes. ?Dende a área de Servizos Sociais e Igualdade consideramos a inclusión social como un obxectivo prioritario, e nese sentido planificamos actividades que fomentan a participación de todos os nosos usuarios e usuarias e que nos permiten ir dando pasos cara a súa inclusión?, manifestou Marisol Blanco. Pola súa banda, o presidente de Íntegro destacou o importante labor de visibilización destes colectivos que desenvolve o Concello de Malpica, que neste sentido cualificou coma un concello exemplar.

O obradoiro, subvencionado pola Deputación Provincial da Coruña, foi fundamentalmente práctico. As persoas participantes aprenderon as técnicas básicas de colocación de pladur e pintura e acondicionaron unha aula situada no primeiro andar da Casa do Oleiro que a partir de agora poderá ser utilizada polas alumnas e alumnos de manualidades.

14Dec 2015

O Concello de Malpica renova o alumeado dos lugares de Mens, Asalo e O Miñón para mellorar a eficiencia enerxética

O alcalde, Eduardo Parga, asinou o contrato coa empresa adxudicataria do proxecto de subministro e instalación, Insmontel Cutrín SL

540-f-foto

O alcalde de Malpica, Eduardo Parga Veiga, asinou hoxe coa empresa Insmontel Cutrín SL o contrato de subministro e instalación de iluminación pública exterior nos lugares de Mens, Asalo e O Miñón. O Concello de Malpica investirá 54.309,40 euros na mellora da eficiencia enerxética nos tres lugares con cargo ao Plan de Aforro e Investimento (PAI) 2015.

Dentro deste plan tamén se incluíu a instalación da rede separativa de augas pluviais e residuais no núcleo de Piñeiros, que foi adxudicada á empresa Construcciones López Cao SL por 98.339,37 e que permite completar o saneamento do lugar.

O PAI é un préstamo da Deputación da Coruña aos concellos sen xuros, con dous anos de carencia e un prazo de devolución de 10 anos a partir do 2017, unhas condicións moi vantaxosas. Nas bases reguladoras do PAI establécese que os concellos poden destinar a cantidade que lles corresponda á redución do seu endebedamento e/ou á realización de investimentos financeiramente sostibles, e no caso de Malpica pódese destinar a maior parte a investimentos grazas á boa situación económica do Concello. 

14Dec 2015

O Instituto Nacional de Estatística eliminou o colexio electoral da parroquia de Cambre por ter menos de douscentos electores

O alcalde informa nun bando aos veciños e veciñas da parroquia de que poderán exercer o seu dereito ao voto na mesa da Raxeira (Leiloio)

540-f-foto

O alcalde de Malpica, Eduardo Parga Veiga, vén de publicar un bando informativo sobre a decisión do Instituto Nacional de Estatística de suprimir a mesa electoral da parroquia de Cambre por ter menos de douscentos electores. Segundo a lei, ningún colexio electoral poderá ter menos de douscentos electores, cifra que non se acada nestes momentos na parroquia de Cambre.

No mesmo bando, o alcalde informa de que os veciños e veciñas de Cambre que desexen exercer o seu dereito ao voto o vindeiro domingo poderán facelo na mesa electoral da Raxeira (Leiloio). Eduardo Parga expresou a súa solidariedade co electorado de Cambre que lle manifestou o seu desexo de que se mantivese o colexio electoral na parroquia, e aclarou que a decisión de suprimilo non corresponde ao Concello de Malpica, senón ao cumprimento da lei por parte do INE, como tamén ten ocorrido en parroquias doutros concellos da contorna.

12Dec 2015

A UD Cerqueda entregou xoguetes para os nenos e nenas das familias usuarias do banco de alimentos

O club deportivo intensifica o seu labor social e a súa colaboración co departamento de Servizos Sociais do Concello

540-f-foto

A Unión Deportiva Cerqueda vén de dar un paso máis na súa colaboración co departamento de Servizos Sociais do Concello de Malpica de Bergantiños. Na xornada de onte, representantes do club fixeron entrega ao banco de alimentos dun lote de xoguetes para que este Nadal os Reis Magos cheguen a todos os fogares e que “nestes días tan máxicos os nenos das familias con menos recursos non perdan o sorriso nin a ilusión”, manifestaron. A UD Cerqueda destinou á adquisición dos xoguetes a recadación do partido da semana pasada contra o Camariñas, que ascendeu a 421 euros. Na entrega dos xoguetes estiveron presentes o alcalde, Eduardo Parga, e os concelleiros Miguel Fernández, Iago Espasandín e Marisol Blanco Gorín, delegada de Servizos Sociais, quen expresou o agradecemento do goberno municipal á entidade deportiva.

Xa é a segunda vez este ano que a UD Cerqueda colabora coa Concellería de Servizos Sociais. No mes de setembro fixo entrega de alimentos por valor de 379 euros, correspondentes á recadación do Torneo Solidario Os Petóns. A xunta directiva do club manifestou a súa intención de seguir colaborando e intensificando esta faceta social.

A entrega dos xoguetes coincidiu co reparto mensual do banco de alimentos, xestionado pola Fundación Amigos de Galicia e o Concello de Malpica. Dada a proximidade do Nadal, nesta ocasión, ademais dos produtos non perecedoiros habituais, as 21 familias usuarias recibiron turrón, polo, coliflor, costela, iogures e froita. Tamén se completou o amoblamento do dormitorio dunha familia coas mesiñas de noite e o tocador. Nos dous anos e medio que leva en funcionamento, o banco de alimentos do Concello de Malpica ten contribuído á mellora das condicións de habitabilidade de varios fogares. 

10Dec 2015

Intensa fin de semana de peche da XI Mostra de Teatro de Malpica

Talía ofrecerá mañá venres dúas representacións e o sábado actuará o grupo local Os Amigos de Malpica

540-f-foto

A XI Mostra de Teatro de Malpica, que está a ofrecer unha selección dos mellores espectáculos da escena galega, chegará ao seu remate esta fin de semana. Este ano a Concellería de Educación, Cultura e Turismo, que conta coa colaboración da Deputación Provincial da Coruña, a Asociación Teatral Os Amigos de Malpica, a Asociación Cultural Caldeirón e o colectivo Teatro Valle Innova-Fundación Valle Inclán, está a ofrecer dez actuacións para todo tipo de públicos que están a rexistrar unha excelente acollida.

Mañá venres estará en Malpica, unha vez máis, a compañía Talía Teatro. Ás 11.30 horas representará Rosa Caramelo para os escolares de 4 a 8 anos, que non pararán de ir coas aventuras de Margarita, a única elefanta do grupo que non consigue que a súa pel sexa de cor rosa caramelo.

E ás 20.30 horas continuarán as risas, aínda que tamén cun toque de drama, en Demolición, outra proposta de Talía Teatro entre o humor e a emoción, entre a dor e o pracer, entre o divertimento e a reflexión, especialmente dirixida a maiores de 13 anos.

O peche da XI Mostra de Teatro de Malpica correrá a cargo da compañía local Os Amigos de Malpica, que actuarán o sábado ás 20.00 horas. O grupo que dirixe Andrés Mourente interpretará O cantar dos cantares, unha peza cómica na que unha rexoubeira, e un crego autoritario, nunha aldea galega da década dos anos 50, queren impoñer o seu pensamento a toda a veciñanza e argallan todo tipo de estratexias para sometelos ás súas ideas.