gl_ES
Tempo Malpica de Bergantiños
Sábado 16°
10°
Domingo 16°
Luns 18°
tiempo.com   +info
  1.  
  2. 2014
  3. Decembro

Decembro 2014

26Dec 2014

Portos de Galicia derrubará a lonxa vella de Malpica para mellorar o acceso ao porto e ampliar as prazas de aparcamento

O presidente do Ente Público, José Juan Durán, presentou hoxe o proxecto, que tamén inclúe a creación dun espazo de lecer
540-f-foto

Unha vez rematadas as obras de reparación e reforzo do dique, Portos de Galicia acometerá unha nova actuación no porto de Malpica grazas ás xestións realizadas polo alcalde. O presidente do Ente Público, José Juan Durán, anunciou hoxe que o seu departamento procederá á demolición da lonxa vella para mellorar a accesibilidade, ampliar o aparcamento e crear un novo espazo de lecer. José Juan Durán presentou o proxecto acompañado polo deputado autonómico Aurelio Núñez; o alcalde de Malpica, Eduardo Parga; os concelleiros de Obras e Mar, Miguel Fernández e Alfredo Cañizo, e o patrón maior da Confraría de Pescadores, Pedro Pérez. 

 

As obras arrincarán despois do Nadal e estarán listas nun prazo de dous meses. O investimento ascende a 150.000 euros. José Juan Durán explicou que a demolición da lonxa vella, e sobre todo do seu gran beiril, “vai supoñer unha mellora importante na accesibilidade para camións e tráilers ao porto. Dende o punto de vista da operativa portuaria, dende o Ente Público e a Xunta de Galicia interésanos suprimir ese aleiro, que fai moi angosta a entrada”. O espazo que quedará baleiro despois do derrubo permitirá crear unha vintena de prazas de aparcamento para usuarios do porto, pero tamén se creará unha nova área de lecer, con bancos, que permitirá “harmonizar o espazo resultante con outras actuacións que se fixeron no porto de Malpica nos últimos meses”, apuntou o presidente de Portos.

 

A intervención completarase co saneamento e a estabilización do muro. “Creo que se cumpren moitísimos obxectivos: en primeiro lugar, o tema da mellora do acceso e tamén por suposto que haxa máis prazas de aparcamento para os usuarios do porto, e, por suposto, tamén hai que pensar no lecer. Eu creo que esteticamente a zona esta do porto vai saír gañando”, declarou José Juan Durán.

 

O alcalde de Malpica amosouse agradecido pola resposta de Portos de Galicia á súa petición e pola presenza de José Juan Durán na vila para presentar o proxecto. Eduardo Parga destacou a importancia da creación novas prazas de aparcamento e a humanización dos espazos portuarios para a súa utilización por parte de toda a cidadanía. “É unha mellora para o pobo de Malpica, xa que o pobo de Malpica necesita do porto e o porto necesita do pobo de Malpica”, manifestou o alcalde.

 

25Dec 2014

O Centro Cívico acolle unha exposición do Museo do Humor de Fene de homenaxe a Blanco Amor

Na mostra participan 18 ilustradores de primeiro nivel
540-f-foto

Dezaoito ilustradores de primeiro nivel participan na iniciativa “Imaxes EBA. Exposición-homenaxe a Blanco Amor”, promovida polo Museo do Humor de Fene dentro dos actos organizados polo Concello de Fene no ano 2012 ao redor da convocatoria da 30ª edición do Premio de Novela Longa Eduardo Blanco Amor. A mostra pode verse agora no Centro Cívico de Malpica, nos horarios habituais de apertura do edificio pola mañá e pola tarde.

 

A exposición, comisariada polo debuxante Siro López, está estruturada en dous grandes bloques: caricaturas de Blanco Amor e ilustracións relativas a personaxes ou anacos da súa obra. Os debuxantes que participaron no proxecto, de maneira totalmente altruísta, foron Aida Alonso, Almudena Aparicio, Carlos Silvar, Dani Pedrón, Idoia de Luxán, Nachortas, Pablo Otero, Pinto e Chinto, Xan Carpente, Xosé Cobas, Xosé Lois, Siro, Santy Gutiérrez, Michel Casado, Augusto Metztli, Gonzalo Vilas, Jaime Asensi e Miki.

 

23Dec 2014

O Forno do Forte permanecerá pechado os días 24, 25 e 31 de decembro e o 1 de xaneiro

Este ano a imaxe do tradicional calendario editado polo ecomuseo de Buño é o Forno da Costa, que pode visitarse por primeira vez
540-f-foto

O Ecomuseo do Forno do Forte permanecerá pechado os días 24, 25 e 31 de decembro e o 1 de xaneiro. O resto dos días estará aberto no seu horario habitual, de 11.00 a 14.00 e de 16.00 a 18.00 horas, polo que o complexo situado en Buño segue a ser un interesante destino durante este Nadal para as persoas amantes da artesanía e da etnografía.

 

Os turistas tamén poden visitar este ano, por primeira vez, o Forno da Costa, que vén de ser rehabilitado polo Concello de Malpica coa colaboración da Deputación Provincial da Coruña. O forno, que se atopaba en bastante bo estado, presentaba necesidades de saneamento do muro dianteiro, de reconstrución da boca, ademais da retirada do engadido no muro. Nun dos cabanotes foi substituída toda a estrutura de madeira, que se atopaba seriamente deteriorada. O pilar de ladrillo cerámico foi suplido por outro acorde ao conxunto, e os muros de mampostería de pedra foron saneados. No segundo cabanote levouse a cabo a reconstrución parcial e saneado dos muros, a reconstrución dun dos pilares e a instalación dun tellado novo. O custe da obra foi de 79.200,01 ?.

 

Precisamente o Forno da Costa é a imaxe do calendario do 2015, que vén de publicar o Ecomuseo do Forno do Forte, coma todos os anos, e que pode conseguirse na propia instalación. Coa rehabilitación deste forno, os tradicionais barrios oleiros de Forno Novo, Mouróns e Costa teñen as súas edificacións recuperadas.

 

22Dec 2014

“É fundamental seguir aprendendo”, destaca Diego Calvo na clausura dos cursos de Servizos Sociais

O presidente da Deputación e o alcalde apostan por manter a colaboración entre ámbalas institucións de cara ao vindeiro ano
540-f-foto

“É fundamental seguir aprendendo cousas todos os días”, díxolles Diego Calvo aos participantes nos cursos de xardinería e cociña organizados pola Concellería de Servizos Sociais de Malpica. O presidente da Deputación Provincial da Coruña asistiu hoxe ao acto de clausura, no que se mostrou moi satisfeito cos resultados das accións formativas e no que puido comprobar tamén a excelente acollida que tiveron entre os participantes.

 

Tanto Diego Calvo coma Eduardo Parga, alcalde de Malpica, apostaron por manter a colaboración entre ámbalas institucións de cara ao vindeiro ano. Nese sentido, o alcalde destacou que as achegas da Deputación permiten poñer en marcha actividades e programas de formación moi necesarios, “e que nós apoiamos porque cremos neles”, asegurou Eduardo Parga.

 

No acto de clausura tamén interviu a concelleira de Servizos Sociais, Marisol Blanco Gorín, que agradeceu a presenza do presidente da Deputación. Entre as autoridades asistentes tamén se encontraban os concelleiros Miguel Fernández e Alfredo Cañizo. En representación da Asociación Integro, que se encargou de impartir as actividades formativas, participou o seu presidente, Adolfo López Baña, que puxo ao Concello de Malpica como exemplo polas súas políticas sociais, “porque pensa nas persoas que o necesitan”, manifestou.

 

Nos cursos de xardinería e cociña, destinados a persoas con diversidade funcional e a maiores, participaron un total de 37 persoas.

 

O alcalde de Malpica agasallou a Diego Calvo cunha placa e un pin do Concello, que o presidente da Deputación colocou xa na solapa. Ao presidente de Integro fíxolle entrega dunha peza de barro de Buño en agradecemento polo éxito das accións formativas. Os dous levaron como recordo tamén unha selección de fotografías.

 

 

21Dec 2014

O presidente da Deputación asistirá mañá á clausura dos cursos organizados pola Concellería de Servizos Sociais

Un total de 37 persoas participaron nos obradoiros de xardinería e cociña
540-f-foto

O presidente da Deputación Provincial da Coruña, Diego Calvo, asistirá mañá á clausura dos cursos de cociña e xardinería organizados pola Concellería de Servizos Sociais de Malpica. A concelleira, Marisol Blanco Gorín, destacou que as actividades, destinadas a persoas con diversidade funcional e da terceira idade, tiveron moi boa acollida, en gran parte debido ao seu carácter práctico. En total formáronse 37 persoas, que mañá recibirán os seus diplomas nun acto está previsto para as 12.30 horas no Centro Cívico.

 

O curso de xardinería que se levou a cabo en Malpica non só permitiu mellorar a formación de algúns dos alumnos e alumnas que xa participaran anteriormente no de Buño, senón que tamén fixo posible o acondicionamento de dúas áreas axardinadas no centro de saúde e no Centro Cívico. Esta iniciativa, subvencionada pola Deputación, dirixiuse a persoas con diversidade funcional, que foron formadas pola Asociación Íntegro en tres sesións semanais durante un mes.

 

A Asociación Íntegro impartiu tamén os cursos de cociña saudable, un deles dirixido a maiores e o outro, a persoas con diversidade funcional. Neste caso foron dúas sesións semanais para cada grupo dende o 11 de novembro ata o 18 deste mes de decembro, subvencionadas tamén polo organismo que preside Diego Calvo.

 

19Dec 2014

Iniciadas as obras de reparación da senda de San Adrián

A Dirección Xeral de Conservación da Natureza financia os traballos, que permitirán subsanar os danos causados polos temporais do último inverno
540-f-foto

Xa están en marcha as obras de reparación da senda de San Adrián, na que o firme estaba deteriorado debido ao efecto das escorrentías ocasionadas polos temporais do último inverno a causa da elevada pendente. Eses problemas quedarán subsanados grazas a unha achega da Dirección Xeral de Conservación da Natureza con cargo ao programa de axudas  a actividades, actuacións ou medidas de concellos incluídos na Rede Natura 2000, cofinanciada con fondos FEADER. A mellora do camiño de San Adrián ten un orzamento de 8.032.80 euros e está a ser executada pola empresa Construcciones López Cao.

 

O alcalde, Eduardo Parga, e o concelleiro de Obras, Miguel Fernández, acompañados por técnicos municipais, realizaron unha visita ás obras, que consisten na reparación da senda existente mediante o acondicionamento do firme con zahorra nos tramos máis deteriorados, que son o acceso á capela dende a fonte e a subida da Praia de Seaia. O resto do camiño será bacheado e tamén se substituirá algún travesaño de madeira que está deteriorado.

 

A senda de San Adrián, de varios quilómetros de lonxitude, é moi utilizada coma circuíto de paseo polos malpicáns, pero sobre todo é un camiño imprescindible para os romeiros que soben á capela coincidindo coa festa do santo, no mes de xuño.

 

19Dec 2014

Doce entidades colaboran co Concello na organización do programa cultural Malpica Nadal

Concursos, obradoiros, teatro, música, xogos, literatura, festas e cabalgatas de Reis animarán as vacacións escolares
540-f-foto

O Concello de Malpica de Bergantiños, en colaboración con doce entidades, pon en marcha o programa Malpica Nadal, que inclúe unha amplísima oferta de actividades culturais e de ocio para toda a familia, pero sobre todo para que os nenos e nenas gocen das vacacións escolares con iniciativas deseñadas á súa medida. Outra das características do programa é que se estende a todo o territorio municipal grazas á implicación das asociacións Malante, Carcaxía, ANPA Ventorrillo, ANPA do CEIP Joaquín Rodríguez Otero, San Xulián, Río dos Píos, Pobo Alfareiro, A Feira, O Brizo, Río de San Antonio, Leiloio e Monte D?Arxa.

 

Venres, 19 de decembro

 

  • 10.15 e 11.40 horas. Visitas do Carteiro Real ao CEIP Joaquín Rodríguez Otero e á Ludoteca Municipal, respectivamente.
  • 12.15 h. Entrega dos premios do Concurso Escolar de Debuxo e Pintura de Nadal (CEIP Joaquín Rodríguez Otero).
  • 12.15 h. Visita de Papá Noel á escola de Barizo.
  • 16.45 a 18.45. Obradoiro de Adornos de Nadal (praza de Anselmo Villar Amigo)
  • 20.30. Mostra de Teatro: ?Fóra de lugar?, do Grupo de Teatro de Teruca Bouza (auditorio do Centro Cívico).

 

 

Sábado, 20 de decembro

  • 20.00 h. Mostra de Teatro: ?Cabaré Manicómico? de Creacións Manicómicas (auditorio do Centro Cívico).

Domingo, 21 de decembro

 

  • A partir das 16.30 h. Pasarrúas de Panxoliñas pola parroquia de Leiloio. Grupo de cantareiras de rapaces con Papá Noel e chocolatada para os máis pequenos). Organiza: AVV de Leiloio.

Luns 22 e martes 23 de decembro

 

  • 11.30 a 13.00 h. Nadal Xogo: Obradoiro de xogos de animación (auditorio do Centro Cívico).

Mércores, 24 de decembro

 

  • 16.30 h. Papá Noel entrega os regalos aos rapaces na Casa da Cultura de Seaia. Organiza: AC Carcaxía.
  • A partir das 18 h. Pasarrúas de Panxoliñas das cantareiras da AC Malante pola vila de Malpica.
  • 18.30 a 20.30 h. Papá Noel entrega os regalos aos rapaces na Fonte da Praza Villar Amigo. Organiza: AC Malante.

 

 

Domingo, 28 de decembro

  • 17 h. Nadal Xogo: Tómbola infantil de Nadal no pavillón polideportivo de Malpica (imprescindible entrar con zapatillas de deporte). Organiza: AC Malante.

Luns, 29 de decembro.

 

  • 11.30 a 13.00 h. Nadal Xogo: Obradoiro de xogos de animación no auditorio do Centro Cívico.
  • 16.30 a 20.30. Nadal Xogo: Festa infantil con inchables no pavillón polideportivo. Colabora: ANPA Ventorrillo.

 

 

Martes, 30 de decembro

  • 11.30 a 13.00 h. Nadal Xogo: Obradoiro de xogos de animación no auditorio do Centro Sociocultural de Buño. Colabora: ANPA do CEIP Joaquín Rodríguez Otero.
  • 16.30 a 19.30 h. Nadal Xogo: Festa infantil con inchables no pavillón polideportivo. Colabora: ANPA do CEIP Joaquín Rodríguez Otero.

 

 

Mércores, 31 de decembro

  • A partir das 23.45 h. Festa de Fin de Ano no auditorio do Centro Cívico, amenizada polo Dúo de Festa. Haberá uvas, cava e cotillón.

Sábado, 3 de xaneiro

 

  • 17.30 h. Nadal Xogo: Festa infantil e chocolatada na Casa dos Veciños de Leiloio (A Raxeira). Colabora: AVV Leiloio

Domingo, 4 de xaneiro

 

  • 16.30 h. Nadal Xogo: Actuación do mago Richard co espectáculo ?Divermaxia? na Escola Unitaria de Pontella. Organiza: AVCS O Brizo de Vilanova.
  • 17.30 h. Nadal Xogo: Festa infantil na escola unitaria de Pontella. Colabora: AVCS O Brizo de Vilanova.
  • 19.00 h. Presentación da publicación ?O grilo Míllelo?, con textos de Xosé Manuel Varela e Icía Varela Gómez, ilustracións de Xosé Tomás e música de Suso Moreira. No salón de actos da Casa do Pescador.

 

 

Luns, 5 de xaneiro

Os Reis Magos de Oriente chegarán a:

  • Buño, ás 17 h. (Bar O Forno)
  • Cambre, ás 18.30 h (local sociocultural)
  • Malpica, ás 20 h. Ao porto
  • A cabalgata percorrerá as parroquias seguindo o itinerario do bus escolar dos centros de primaria. Organizan: AVV Pobo Alfareiro, AC Malante, AC Carcaxía, ACD San Xulián, AVCS O Brizo de Vilanova. Colabora: AV Río de San Antonio
  • Leilolo, ás 18 h. (Feira Nova). Organiza: AC A Feira.
  • Seaia, ás 21 h. Entregarán os regalos polas casas. Organiza: ACD San Xulián.

 

 

Martes, 6 de xaneiro

Os Reis Magos chegarán a:

 

  • -Mens e Barizo, ás 10 h (igrexa de Mens). Organizan: AVS Río dos Píos de Mens.
  • -Seaia, ás 10 h (Casa da Cultura e percorrido pola parroquia).
  • -Santirso, á saída da misa
  • -Pontella, ás 12 h
  • -Beo, ás 12.30 h
  • A cabalgata percorrerá as parroquias seguindo o itinerario do bus escolar dos centros de primaria. Organizan: AVV Pobo Alfareiro, AC Malante, AC Carcaxía, ACD San Xulián, AVCS O Brizo. Colabora. AV Río de San Antonio
  • -Cerqueda, pola mañá os Reis Magos percorrerán toda a parroquia. Organiza: AVV Monte D?Arxa.
13Dec 2014

O día 27 celebrarase o IV Festival de Corais de Nadal

As agrupacións Virxe da Barca e San Valentín serán as convidadas
540-f-foto

Por cuarto ano consecutivo, a Coral de Malpica e o Concello organizan o Festival de Corais de Nadal, unha cita que ofrece unha mostra de música vocal de calidade ao tempo que lembra as cancións tradicionais desta época do ano.

O certame está programado para o 27 de decembro, ás 20 horas, no auditorio do Centro Cívico. Ademais da Coral de Malpica, que exercerá como anfitrioa, actuarán a asociación Virxe da Barca de Muxía e a polifónica San Valentín.

9Dec 2014

Matriculados 23 veciños e veciñas do municipio de Malpica nos cursos de graduado en ESO iniciados hoxe

Os primeiros en incorporarse ás clases foron os 11 alumnos de Buño e o xoves farano outros 12 na capital municipal
540-f-foto

Hoxe comezaron as clases para o primeiro dos dous grupos de veciños e veciñas matriculados no curso de graduado en ESO organizado polo Concello de Malpica de Bergantiños e subvencionado pola Deputación Provincial da Coruña. Ás 10 da mañá incorporáronse á aula da Casa do Oleiro os 11 integrantes do grupo de Buño, que foron recibidos polas súas maestras, pola concelleira de Servizos Sociais, Marisol Blanco Gorín, e polo alcalde, Eduardo Parga Veiga. Tamén asistiu o presidente de Íntegro, Adolfo López Baña, xa que esta entidade é a encargada da formación.

 

O alcalde animou aos participantes a aplicarse para conseguir unha titulación imprescindible para continuar a súa formación, para incorporarse ao mundo laboral ou para mellorar profesionalmente.

 

O xoves, ás 10 horas, empezarán as clases os 12 matriculados para o grupo de Malpica. Durante decembro e xaneiro haberá dúas horas de clase semanais, e a partir de febrero serán catro horas, tanto en Buño coma en Malpica. No caso de que a algún alumno lle quede algún módulo pendente para setembro, ao longo do mes de agosto haberá clases de reforzo.

 

8Dec 2014

O Concello de Malpica adapta o parque infantil á normativa

As obras, que avanzan máis lento do previsto debido á choiva, teñen un orzamento de case 100.000 euros
540-f-foto

Aínda que van un pouco máis lentas do previsto por culpa da choiva, as obras de reforma e adaptación do parque infantil de Malpica, situado na rúa Patria Galega, seguen avanzando e prevese que estean rematadas no prazo establecido, segundo indicou o concelleiro de Obras, Miguel Fernández. O proxecto está incluído no POS 2014 e ten un orzamento de 99.792,78 euros.

 

As obras consistirán na reforma do parque para adaptalo á normativa actual sobre parques infantís, a eliminación de elementos construtivos que poden supoñer certo risco para os usuarios (bordillos, gradas, bancos de fábrica?), a reposición de pavimentos, a substitución da fonte, a reforma dos aseos e a organización das zonas de xogos por idades. Neste sentido, os que poidan ser reutilizados serán restaurados e no resto dos casos colocaranse xogos novos. Ademais, o parque será dotado de mobiliario novo.

 

Página 1 de 212